‘Wewe usankishibue bua lungenyi luebe!’
MÊYI adi kuulu aa ngavua Davidi mutumbishe nawu mamu kampanda uvuaye musambakene nende. Dîna diende divua Abigayila. Ntshinyi tshivua tshisake Davidi bua kumutumbisha? Mmunyi mudi tshilejilu tshia mamu eu mua kutuambuluisha?
Davidi wakasambakena ne mukaji wa nzubu eu pavuaye unyema mukalenga Shaula. Abigayila uvua mukaji wa Nabala, muntu mubanji uvua ne mikoko ya bungi mu tshitupa tshia buloba tshia mikuna tshia ku sud kua Yuda. Davidi ne bantu bende bavua “bu lumbu” kudi balami ba mikoko ba Nabala ne kudi mikoko yende. Davidi wakalua kutuma pashishe bantu kudi Nabala bua kumulomba ‘tshionso tshivua mu tshianza tshiende’ bu biakudia. (1 Sam. 25:8, 15, 16) Dilomba adi kadivua dibi to, patudi tufuanyikija ne muvua Davidi ne bantu bende bakube bintu bia Nabala.
Kadi Nabala, muena dîna divua diumvuija ne: ‘Dipanga lungenyi’ anyi ‘Bupote,’ wakenza malu anu bu muvua diumvuija dia dîna diende. Wakandamuna ne mêyi mashile a bipendu ubenga dilomba dia Davidi. Ke Davidi kulongolola bua kunyoka Nabala bua diandamuna diende divua dinyingalaja ne kadiyi dia meji. Nabala ne bena mu dîku diende bavua ne bua kuambula bujitu bua bupote buende.—1 Sam. 25:2-13, 21, 22.
Pakajingulula Abigayila bipeta bibi bia bualu buvuabu balongolola bua kuenza ne lukasa, wakenza bualu kampanda ne dikima. Wakasengelela Davidi ne kanemu muimanyine pa malanda ende ne Yehowa. Wakapesha Davidi uvua ne bua kulua mukalenge biakudia bia bungi buende yeye ne bantu bende. Davidi pende wakitaba ne: Yehowa uvua muenze mudimu ne mamu eu bua kumukanda bua kuenza bualu buvua mua kumuvuija muena tshibawu kumpala kua Nzambi. Davidi wakambila Abigayila ne: ‘Wewe usankishibue kabidi bua lungenyi luebe, bualu bua wewe wakunkanda lelu ne: kumatshishi mashi a bakuabu panshi.’—1 Sam. 25:18, 19, 23-35.
Bidi bimueneka patoke ne: katuena basue kuikala bu Nabala, tubenga kuikala ne dianyisha bua malu mimpe adibu batuenzele nansha. Bualu bukuabu, patudi tumona bualu kampanda bubi bukeba kuenzeka, mbimpe tuenze tshionso tshitudi mua kuenza bua kubuepuka. Bushuwa, tudi mua kuamba anu bu mufundi wa Misambu mukuabu wakambila Nzambi ne: “Unyishe dijingulula dimpe dia malu ne meji.”—Mis. 119:66.
Bantu bakuabu badi mua kumona mutudi ne meji anyi ne lungenyi lujalame ku malu atudi tuenza. Nansha bobu bakule anyi kabayi bakule, badi mua kudiumvua anu bu Davidi wakamba ne: “Wewe usankishibue kabidi bua lungenyi luebe.”