Ditalala​—Mmunyi muudi mua kudipeta?

BU MUTUDI mu buloba bua bimvundu, tudi ne bua kudienzeja bikole bua kupeta ditalala. Kadi nansha tuetu ne ndambu wa ditalala, tudi tuluangana misangu yonso bua kudilama. Bilondeshile Dîyi dia Nzambi, ntshinyi tshidi mua kutuambuluisha bua kupeta ditalala dilelela? Mmunyi mutudi mua kuambuluisha bakuabu bua badipete pabu?

NTSHINYI TSHITUDI NE BUA KUENZA BUA KUPETA DITALALA?

Bua tuetu kuamba ne: tudi ne ditalala dilelela, tudi ne bua kudiumvua batukije mu lungenyi ne bikale mu bukubi. Tudi kabidi ne bua kuikala mu malanda mashême ne bakuabu. Bualu bua mushinga mukole budi ne: bua tuetu kupeta ditalala dilelela, tudi ne bua kudia bulunda bukole ne Nzambi. Mmunyi mutudi mua kufika ku didia bulunda ebu?

Patudi tutumikila mikenji miakane ya Yehowa ne mêyi ende manene, tudi tuleja ne: tudi tumueyemena ne basue kuikala nende mu ditalala. (Yel. 17:7, 8; Yak. 2:22, 23) Nunku, yeye pende udi usemena pabuipi netu, utupesha ditalala dia bushuwa. Yeshaya 32:17 udi wamba ne: “Tshipeta tshia buakane bulelela netshikale ditalala, ne mamuma a buakane bulelela neikale bupole ne bukubi bia tshiendelele.” Tudi mua kupeta ditalala dilelela patudi tutumikila Yehowa ne muoyo wetu mujima.​—Yesh. 48:18, 19.

Tatu wetu wa mu diulu udi kabidi mua kutupesha ditalala dilelela ku diambuluisha dia dipa dia mushinga mukole, mmumue ne: nyuma wende muimpe.​—Bien. 9:31.

NYUMA WA NZAMBI UDI UTUPETESHA DITALALA

Mupostolo Paulo udi utela ditalala bu ngikadilu muisatu wa “dimuma dia nyuma.” (Gal. 5:22, 23) Bu mudi nyuma wa Nzambi ufila ditalala dilelela, tudi ne bua kulekela nyuma muimpe eu atuambuluishe bua tupete ditalala dilelela. Tukonkononayi mishindu ibidi idi nyuma wa Nzambi mua kutuambuluisha bua kupeta ditalala.

Tshia kumpala, tudi tupeta ditalala patudi ne tshibidilu tshia kubala Dîyi dia Nzambi difundisha ku nyuma muimpe. (Mis. 1:2, 3) Patudi tuelangana meji bua malu adi mu Bible, nyuma wa Nzambi udi utuambuluisha bua kumvua ngelelu wa meji udi nende Yehowa mu malu a bungi. Tshilejilu, tudi tumona mudiye ushala ne ditalala ne tshidi tshienza bua ditalala dikale ne mushinga wa bungi kudiye. Patudi tutumikila malu aa, tudi tupeta ditalala dia bungi mu nsombelu wetu.​—Nsu. 3:1, 2.

Tshibidi, tudi ne bua kulomba Nzambi nyuma wende muimpe. (Luka 11:13) Yehowa udi ulaya ne: tuetu bamulombe diambuluisha, “ditalala dia Nzambi didi dipite dijingulula dionso dia malu nedilame mioyo [yetu] ne bieledi [bietu] bia meji ku butuangaji bua Kristo Yezu.” (Filip. 4:6, 7) Tuetu ne tshibidilu tshia kusambila tulomba nyuma wa Yehowa, Nzambi neatuwuje ne ditalala dilelela didi anu kudi bantu badi badie nende bulunda bua mushinga mukole.​—Lomo 15:13.

Bamue bana betu mbatumikile mubelu wa mu Bible eu ne mbenze mashintuluka adi mabapeteshe ditalala dilelela, mabambuluishe bua kuikala mu ditalala ne Yehowa, ne bantu nabu kabidi. Mmunyi mudibu bafike ku dienza nanku?

MUAKAPETABU DITALALA DIA BUSHUWA

Mu tshisumbu tshia bena Kristo mudi bamue bana betu bavua kumpala ne “tshiji tshia lukasa,” kadi lelu bakadi bena bupole, bena malu malenga, bena lutulu, ne bikale mu ditalala ne bakuabu.a (Nsu. 29:22) Ke tshivua tshifikile bamanyishi ba lumu luimpe babidi bavuabu bambuluishe bua balekele tshiji ne bafike ku dikeba ditalala ne bakuabu.

Tshikadilu tshibi tshia David tshivua tshinyange ngakuilu wende. Kumpala kua kudilambulaye kudi Nzambi, uvua utamba kuakula bibi bua bakuabu ne uvua wamba bena mu dîku diabu mêyi mashile. Panyima pa matuku, wakashintuluka, kuluaye muena ditalala. Mmunyi muvuaye mudipete? Udi wamba ne: “Ngakatuadija kutumikila mêyi manene a mu Bible; bu tshipeta, meme kutuadija kunemeka bena mu dîku dietu bikole.”

Mushindu uvua Rachel mukole uvua munyange bikadilu biende. Udi wamba ne: “Nansha lelu, ntshidi nduangana ne tshiji bualu ndi mukolele mu dîku dia bantu bavua ne tshiji.” Tshidi tshimuambuluishe bua kulua muena ditalala dia bungi ntshinyi? Udi wamba ne: “Mvua ne tshibidilu tshia kusambila Yehowa mmulomba diambuluisha.”

David ne Rachel badi bilejilu bibidi patupu bidi bileja ne: patudi tutumikila mêyi manene a mu Bible ne tulomba Yehowa bua nyuma wende atuambuluishe, netupete ditalala. Bulelela, nansha mutudi mu buloba budi buwule ne tshikisu, tudi mua kupeta ditalala dilelela didi dienza bua tuikale mu buobumue ne bena mu mêku etu ne bena Kristo netu bakuabu. Nansha nanku, Yehowa udi utulomba bua “kuikala mu ditalala ne bantu bonso.” (Lomo 12:18) Bidiku bushuwa mua kuenzeka anyi? Mmasanka kayi atudi tupeta patudi tudienzeja bua kukeba ditalala?

KEBA DITALALA

Ku diambuluisha dia mudimu wetu wa buambi, tudi tuenda tuambila bantu mukenji wa Bukalenge bua Nzambi wabapetesha masanka. (Yesh. 9:6, 7; Mat. 24:14) Diakalenga, bantu ba bungi mbawitabe. Bu tshipeta, kabatshiena badiumvua kabayi ne ditekemena anyi bumvua tshiji bua malu adibu bamona to. Kadi badi mpindieu ne ditekemena dilelela bua matuku atshilualua ne bidi bibasaka bua ‘kukeba ditalala ne kudilonda.’​—Mis. 34:14.

Kadi ki mbantu bonso batu bitaba mukenji wetu to, bamue batu banji kuwubenga patudi tubambilawu musangu wa kumpala. (Yone 3:19) Nansha nanku, nyuma wa Nzambi udi utuambuluisha bua kubambila lumu luimpe bikale ne ditalala ne kanemu. Patudi tuenza nunku, tudi tutumikila mibelu ivua Yezu mufile bua mudimu wa buambi idi mu Matayi 10:11-13, ya ne: “Panudi nubuela mu nzubu, nuele bena nzubu muoyo. Bikala nzubu mukumbane, ditalala dinudi numujingila diluamu; kadi bikalayi kayi mukumbane, ditalala dienu dipingane kunudi.” Tuetu tutumikila mibelu ya Yezu eyi, tudi mua kumbuka kua muntu bikale ne ditalala dietu anu muvuadi amu ne bikale ne ditekemena dia ne: neatuteleje musangu mukuabu.

Tudi tukeba kabidi ditalala patudi tuyukila ne banene ba mbulamatadi ne kanemu konso, nansha badi baluisha mudimu wetu. Tshilejilu, mbulamatadi wa mu ditunga kampanda dia mu Afrike wakalekela malu avua bantu bamba amufikisha ku ditubengela bua kuibaka Nzubu yetu ya Bukalenge. Bua kujikija tshilumbu atshi mu ditalala, bakatuma muanetu mukuabu uvua muenze mudimu kumpala mu ditunga dia mu Afrike adi bu missionere bua kuya kumonangana ne muleji mpala wa ditunga adi uvua mu Londres, mu Angleterre. Uvua uya bua kumuambila mudi Bantemu ba Yehowa benza mudimu wabu ne ditalala dionso mu ditunga diabu adi. Mmunyi muakaya malu?

Udi wamba ne: “Pangakafika muaba uvua muntu uvua wakidilangana, bua mushindu uvuaye muvuale, ngakamba anu ne: uvua wa mu tshisa tshia muakulu umvua mulonge. Ke meme kumuela muoyo mu muakulu wende wa ku dibele. Wakakema bikole, kungebejaye ne: ‘Udi ukeba tshinyi?’ Meme kumuandamuna ne bukalanga ne: ndi musue kumonangana ne muleji mpala wa ditunga dienu. Wakamubikila ku telefone, yeye kulua, kungelaye muoyo mu muakulu wa kuabu. Pashishe wakanteleja ne ntema yonso pamvua mmumvuija mudi Bantemu benza midimu yabu ne ditalala.”

Bu muvua muanetu eu mumvuije malu ne kanemu konso, muleji mpala eu wakashintulula ngumvuilu mubi wa malu uvuaye nende bua midimu yetu. Matuku makese pashishe, mbulamatadi wa ditunga dia mu Afrike adi wakatuanyishila bua kuibaka Nzubu yetu ya Bukalenge. Bualu abu buakasankisha bana betu bikole be! Bulelela, kuenzela bantu malu ne kanemu kudi kupetesha malu mimpe, mu malu mimpe au mudi ditalala.

IKALA NE DITALALA BUA KASHIDI

Lelu, bantu ba Yehowa badi mu mparadizu wa mu nyuma mudi ditalala diuwule tente. Wewe udienzeja bua kuikala ne ngikadilu eu wa dimuma dia nyuma mu nsombelu webe, newenze bua ditalala edi dikale anuku. Bualu bua mushinga budi ne: Yehowa neakuanyishe, neupete ditalala dia bungi didi dishala kashidi mu bulongolodi bupiabupia bua Nzambi.​—2 Pet. 3:13, 14.