Tujandulayi nshinga wa dimanya kubala ne kufunda

¹ Mu tshidimu tshia mudimu tshishale, bana betu ba balume ne ba bakaji batue ku 972 bakalonga kubala ne kufunda mu teritware mujima udi filiale wetu utangila. Nansha mudibi bisankisha, bipeta ebi kabiena ne bua kutusaka ku didianyisha nkayetu. Bualu, dipanga kubala ne kufunda ditshidi anu nshinga bua musadidi yonso wa Yehowa.

² Tudi mua kuenza tshinyi bua kujandula nshinga eu ne kuambuluisha bamanyishi bavule mua kubala ne kufunda? Tshia kumpala, bidi bitukengela kumanya ne: Yehowa ke udi musue bua basadidi bende kuangatabo dibala ne mushinga. Bivua nunku bua bamulamatshi bende buonso, bu mudi Abrahama, Isaka, Yakoba, Yozefe, Mozese, ditunga dionso dia Izalele ne bena nkristo ba kumpala. (Tangila Auxiliaire, dibeji 899, muinshi mua “Lecture.”) Kupita apu, kubangila ku mpindieu too ne mu bulongolodi bupiabupia, tudi ne bua kupuita ne kumuangalaja dimanya.

³ Bua kuluisha bikole dipanga kubala ne kufunda, tshisumbu tshijima, ne nangananga kasumbu ka bakulu, badi ne bua kuteka tulasa tua dibala ne difunda munkatshi mua bintu bia kumpala. Batangidi bena ngendu mbapete ngenyi-miludiki pa bualu ebu. Tudi basue kukuatshishangana nabo bua kujandula nshinga wa dimanya kubala ne kufunda. Tuangate ndongoluelu yonso mikumbane bua kulonga mua kubala ne kufunda. Tudi ne mikanda milongolola kudi “mupika wa lulamatu ne wa budimu.” Mu bimue bisumbu batu bababidila dîba dia Kalasa ka mudimu wa teokrasi bua kulombola kalasa ka dimanya kubala ne kufunda. Kunyima kua tshiena-bualu No. 1 ne malu manene a mu dibala dia Bible ne padi balongi bakuabo baya mu tulasa tuabu tushilangane, bena mu tulasa tua dimanya kubala ne kufunda badi baya kudi mulongeshi wabo bua kulonga mua kubala ne kufunda. Bilondeshile mamanyisha pa tshiena-bualu No. 3, amu badi bamanye kubala ke badi mua kupeshibua tshiena-bualu mu Kalasa ka mudimu wa teokrasi. Ndongoluelu eu udi ukankamija badi bapange kubala ne kufunda bua kuenza madikolela bua kudifundisha mu kalasa pikalabo bapatule bipeta bimpe mu kalasa ka dimanya kubala ne kufunda.

⁴ Kumanya dibala ne difunda kudi ne dikuatshisha ki ng’anu bua kukumbaja bimpe mudimu wetu, apo kabidi ne bua nsombelu wetu wa ku dituku ne dituku. Tudi bapikudibue ku nkanu ya bupangi ne nunku tudi mua kudidiisha nkayetu kabiyi kuindila misangu yonso diambuluisha dia bakuabo. Tudi mua kutekemena dikuatshisha dia muntu ne muntu ne diambuluisha dia spiritu wa Yehowa bua kujandula nshinga wa dimanya kubala ne kufunda. Pa kuenza nenku, didiunda dietu nedimueneke, bua lupandu luetu ne lua aba batudi tutuadila mukenji wa Nzambi.—1 Timote 4:13-16.