Annuaire: Tshikongoloji tshia makankamija a mushinga mukole

¹ Bitu amu bikolesha ku muoyo bua basadidi ba Nzambi kupeta luapolo ne malu menzeke a kuanyisha pa bidi bitangila midimu ya kukema ya Yehowa. (Yobo 38:4, 7; Nsum. 25:25; Luka 7:22; Bienz. 15:31) Nunku, Annuaire des Témoins de Jéhovah udi tshikongoloji tshia makankamija a mushinga mukole.

² Annuaire yonso utu uleja luapolo idi ibaka ya buloba bujima pa midimu ya Bantemu ba Yehowa. Malu menzeke mu buambi adi akolesha ditabuja ne aleja mudi Yehowa ulombola, ukuba ne ubenesha tshisamba tshiende. Annuaire udi wakula bua balume ne bakaji bashindame badi bashiye mêku abu, balunda babu ne matunga abu bua malelela a mu Bible kumanyishibuawo kudi basombi ba pa bitupa binene bionso bia buloba ne bungi bupite bua bidiila.

³ Annuaire mmusake babadi ba bungi bua kukuatshila Nzambi mudimu bia bungi menemene. Mukaji kampanda wakafunda ne: “Ndi musue kumubala lukasa. Bindi mubale too ne mpindieu mbinkoleshe bikole ku muoyo. Pandi mmona bidi bakuabo benza mu nsombelu mikole, ndi ndiambila mundi mua kuenza bivule mu buambi bua lumu luimpe.”

⁴ Kutuadija mu 1927, tshidimu tshionso Annuaire des Témoins de Jéhovah mmudileje tshikongoloji tshia luapolo ya mushinga ne tshia malu menzeke mu buambi adi kaayi kupua muoyo. Tusombele tupetela masanka ku mpokolo eu wa pa buende wa makankamija anyi? Bua kuenza nunku, tubalayi Annuaire diakamue patudi tumupeta. Pashishe, mu kupita kua tshidimu, tubalulule bimue bitupa bidi bitukankamija, tuetu ne dîku dietu.