Mmuenenu kayi utudi tuleja?

¹ Paulo wakakoma mukanda wende mufundila tshisumbu tshia ku Filipe ne dikankamija edi: “Bulenga bukena butuakanyine bua Mukalenge Yezu Kristo buikale ne mmuenenu unudi nuleja! ” (Fil. 4:23) Wakela bena Filipe ka-lumbandi bualu bavua badifila mu buambi ne muoyo umue, bavua ne musangelu ne baditatshisha ne dinanga bamue bua bakuabo.—Fil. 1:3-5; 4:15, 16.

² Tuvua kuikala ne dijinga dia kuleja mmuenenu wa muomumue mu tshisumbu tshietu. Padi buonso ne mitalu, baleja buimpe ne bikale bakididi ba benyi, kudi kuledibua mmuenenu udi bantu badi batutangila bamona. Mmuenenu muimpe ne muule tente ne dinanga udi ukolesha buobumue ne malubuluka a mu nyuma. (1 Kol. 1:10) Mmuenenu mubi udi ulela ditekesha mu mikolo ne tshiuyuya.—Buak. 3:15, 16.

³ Bakulu badi bafila tshilejilu: Bakulu badi ne bujitu bua kulama munkatshi muabo, ne mu tshisumbu, mmuenenu muimpe mutambe. Bua tshinyi? Bualu mmuenenu wabo ne nsombelu wabo bidi ne buenzeji pa tshisumbu. Tudi tuanyishe bua kuikala ne bakulu badi badifila ne mitalu mu buambi, badi batuakidila ne mimuemue ne dîyi dimpe, ne badi bafila mibelu mimpe ne miibaki, nansha bikala bua muntu pa buende anyi ku tshiakuidi.—Eb. 13:7.

⁴ Bushuwa, tudi buonso ne bua kuenza muntu tshiende tshitupa bua tshisumbu kuluatshi tshia bulunda, tshiakididi tshia benyi, tshiena mitalu ne tshishindame mu nyuma. Muntu yonso udi mua kudileja muena musangelu ne muule tente ne dinanga mu malanda ende ne bakuabo. (1 Kol. 16:14) Munkatshi muetu kamuena mua kuikala kansungasunga bua bidimu, dikoba, dimanya dia mukanda anyi lupetu lutudi nalu. (Tangila Efeso 2:21.) Ditekemena dietu didi ditupetesha mua kuleja mmuenenu wa disanka, diakidila dia benyi ne mitalu mu buambi.—Lomo 12:13; Kolos. 3:22, 23.

⁵ Buonso badi badisangishe kutudi, pamue ne bantu badi batuadije kusankidila bulelela, badi ne bua kudiumvua bakidibue bimpe mu dîku dia bana betu ne kudijinguluila mudi dinanga ne ditshina dia Nzambi bikuata mudimu. Pa kufila bumanyishi ne pa kuleja ngikadilu mitambe buimpe ya buena-nkristo, tudi tujadika bushuwa ne: tshisumbu tshidi ‘dikunji ne nshindamenu wa bulelela.’ (1 Tim. 3:15) Tudi kabidi bakubibue mu nyuma ku diambuluisha dia “ditalala dia Nzambi” didi dilama mitshima yetu ne makokeshi etu a diela meji. (Fil. 4:6, 7) Tuenzayi tuetu buonso madikolela bua kuleja mmuenenu wikala mua kutupetesha masanka ku bulenga bukena butuakanyine bua Yehowa, ku butuangaji bua Mfumu Yezu Kristo!—2 Tim. 4:22.