Masanka adi afuma ku dikuatshishangana
1 Nudi nuela meji ne: tudi mua kupetela masanka ku dikuatshishangana ne binetu mu buambi anyi? Yezu uvua wela meji nunku. Nansha muvua dinowa dinene ne bena mudimu amu bakese, wakatuma balongi 70 bua kupatuka mu buambi “babidi babidi.” Ndisanka kayipu divua yonso wa kudibo mupete pa kufila bumanyishi “mu bimenga bionso ne mu miaba yonso ivua yeye muine ne mua kulua!”—Luka 10:1, 17; Mat. 9:37.
2 Bitu bikankamija pa kukuatshishangana ne binetu. Bamue munkatshi muetu mbakatale ne badi ne ntatu bua kuakula ne bantu badibo kabayi bamanye. Kuikala ne mumanyishi mukuabo kudi mua kutupesha dieyemena didi dikengedibua bua kumanyisha Dîyi dia Nzambi ne dikima. Patudi katuyi nkayetu, bidi mua kuikala bipepele bua tuetu kukumbaja mudimu wetu mu mushindu utuvua balongeshibue. (Nsum. 27:17) Muena meji wakamba ne: “Babidi mbapite umue.”—Muambi 4:9
3 Bidi ne dikuatshisha bua kupatuka mu buambi ne bamanyishi ne bampanda-njila bashilashilangane. Mupostolo Paulo uvua ne bena mudimu nende bu mudi Barnabase, Silase, Timote, Yone Mako, pamue ne bakuabo, ne bakapeta masanka a bungi ku dikuatshishangana edi. Bidi mua kuikala bia muomumue matuku etu aa. Tukadiku bapatuke mu buambi pamue ne kampanda ukadi ne bidimu bia bungi mu bulelela anyi? Bamane kumona mudiye muzanzamuke mu difila bumanyishi, kakuyi mpata, tuvua basunyineku ngenyi mimpe ivua mituambuluishe bua kudiakaja. Tukadiku bapatuke ne bamanyishi batshidi bapiabapia anyi? Apu tuvua mua kuikala babaleje bitukadi balonge, ne ke bivua bibambuluishe bua kutamba kupatula bipeta bilenga ne kumvua disanka dia bungi mu buambi.
4 Tudi mpindieu tulombola dilonga dia Bible anyi? Pikalabi nanku, bua tshinyi kubenga kubikila mukulu umue anyi mutangidi wa tshijengu bua kutufilaye? Bidi bimpe bua balongi ba Bible bamanyangane ne batangidi. Bituelakana bua kulombola dilonga padi mukulu muikalaku, bumue yeye muine neitabe bua kudilombola ne kutupetesha pa kumuenena ndongeshilu wende. Pashishe ku budisuile, tumulombe bikalaye ne mibelu idi mua kutupetesha mua kuambuluisha mulongi bua alubuluke lukasa.
5 Tuikale bakankamiji patudi mu buambi ne binetu. Tuikale ne mmuenenu muimpe patudi tuakula pa bidi bitangila teritware. Katujanyi binetu ne katununganyi bua mapangadika mangata mu tshisumbu nansha. Tuikale balame mu lungenyi mudimu wetu ne masanka adi Yehowa utupetesha. Pa kuenza nunku, netupingane ku mètù bakoleshibue mu nyuma, tuetu pamue ne binetu.
6 Pamu’apa bitu bitukolela bua kupatuka mu buambi pamue ne bana betu ba balume ne ba bakaji. Kadi, bituikala mua kuenza nunku, bua tshinyi kubenga kudilongolola bua kupatuka mu buambi dimue dîba ne mumanyishi mukuabo? Bubidi buetu netupeteleku masanka.—Lomo 1:11, 12.