Tupetelayi masanka ku miyuki ya patoke miakajilula
1 Miyuki ya tshikondo etshi ya Bantemu ba Yehowa mmiumvuija mu tshikoso mu bululame buonso mu Nsumuinu 4:18 (NW): “Njila wa bantu bakane udi bu butoke budi bukenka, budi buenda butoka ku kakese ku kakese too ne patamba munya kujalama.”
2 Bilondeshile dîyi edi, tshisumbu tshia bena nkristo ntshitungunuke ne kupeta matokesha adi afidibua pa dîba diakanyine ne mamanyisha makajilula a malongesha a mu Bible. (Mat. 24:45-47) Udi mua kutela bilejilu bijadika biwudi mumanye katshia wadisangisha ne Bantemu ba Yehowa. Bukenke bua bulelela budi buenda budiunda ne bisangilu bia tshisumbu, bu mudi miyuki ya patoke, bidi bituambuluisha bua kulondesha didiunda diabu.
3 Plan miakajilula ne mamanyisha mapiamapia: Mu matuku mashale aa Société mmuakajilule miyuki ya patoke ya bungi. Idi ne mamanyisha makajilula ne ngenyi ya mushinga mmitokesha. Bua bisumbu kupetabi masanka ku mamanyisha makajilula aa, bana betu bangamba-malu badi ne bua kutumika ne plan mipiamipia eyi.
4 Nuenu basue kusuna masanka mu miyuki ya patoke eyi, imanyinayi pa biena-bualu bia miyuki idi ne bua kuenjibua. Kumpala kua kuya mu bisangilu, anjayi kuvuluka ngenyi ya ndekelu mipatula mu mikanda ya Société pa tshiena-bualu tshia muyuki. Ne panuabanga kuteleja muyuki, nudianjile ngamba-malu mu lungenyi pa bialuaye kuamba. Nufunda pa dibeji panuikale bamone ne: malelela aa mmalonda mu mushindu mupiamupia, bua nuenu kutumika nawu matuku adi alonda. Nenku nenuikale bajadike bua kubabidila plan ya miyuki miakajilula.
5 Miyuki ya patoke idi ne bua kulongesha, ne kabidi Kusonsola: Pavua Yezu wakula, uvua wipatshila kulenga mitshima ya bamuteleji. Tudi tubala mu Matayo 7:28 pa Muyuki wende wa pa mukuna muende lumu kutamba miyuki yonso katshia ne katshia ne: ‘diyisha diende diakakemesha bantu.’
6 Kasumbu ka bakulu nkalombibue bua kulama mu lungenyi tshilejilu tshia Yezu bua kuenza malu ne bujinguludi padibu basungula bangamba-malu bapiabapia, mu disungula amu bana betu badi bikale balongeshi bimpe, banemeka bikole plan ya Société, ne badi bamanye mua kukoka ntema ya bateleji. Bana betu badi ne disanka dia kuenza miyuki ya patoke badi ne bua kuenza madikolela bua kulengeja ndongeshilu wabu, pa kuitaba mibelu yonso mibapa kudi bakulu.
7 Bu muakamanyishabu mu Yeshaya 65:13, 14, dilubuluka mu nyuma dia basadidi ba Yehowa ndimueneke patoke. Miyuki ya patoke ngumue wa ku mishindu idi ituvuija “bantu balongesha kudi Yehowa.”—Yeshaya 54:13.