Tubabidilayi Kalasa Ka Mudimu Wa Teokrasi Bua 1996​—⁠Tshitupa 1

¹ Ukadiku mubale mamanyisha mafunda mu “Programe wa Kalasa ka Mudimu wa Teokrasi bua 1996 anyi”? Uvuaku mubambishe mashintuluka kampanda anyi? Biangatshile mu Tshiongo too ne mu Tshisanga, mudimu No. 3 neushindamene pa mukanda wa Comment raisonner, ne biangatshile mu Lumungulu too mu Tshisua-munene, pa mukanda mupiamupia wa Dimanya. Mudimu No. 4 neushindamene pa muntu kampanda wa mu Bible lumingu luonso.

² Midimu ya balongi: Mudimu No. 3 mmupeshibue muanetu wa bakaji. Padiwu mushindamene pa mukanda wa Comment raisonner, nsombelu udi ne bua kuikala wa bumanyishi bua ku nzubu ne ku nzubu peshi bua mu mpukapuka. Bikala tshiena-bualu tshishindamene pa mukanda wa Dimanya, mudimu udi ne bua kuenjibua bu dikumbulula peshi dilonga dia Bible. Ebi nebikale ne mushinga, bualu mukanda wa Dimanya neukuate mudimu mu dilombola dia malonga a Bible a ku nzubu.

³ Bikalabu basungule nsombelu wa dilonga dia Bible, bana betu ba bakaji babidi badi mua kusomba. Utuadije diakamue tshiena-bualu panyima pa mêyi makese a mbuelelu, pashishe wele nkonko mifunde mu mukanda. Muyukidishi udi ne bua kukumbaja mudimu wende mu mushindu muakanyine. Mvese mifila idi mua kuangatshibua mu Bible ne kubadibua bikala dîba mua kupeteka. Muanetu wa bakaji muenji wa tshiena-bualu etshi udi ne bua kuleja dimanya-kulongesha pa kuenza bua mumuyukidishi akule ku diambuluisha dia nkonko mimuela ne pa kumuelesha meji pa mvese mitumika nayi.

⁴ Tshidi ne bua kuenjibua ntshinyi bikala mvese mifidibue ya bungi ne kakuyi mushindu wa kuyibala yonso mu minute itanu? Usungule mvese idi izangika malu a mushinga. Bikala mvese mifidibue mikese, malu a mushinga a tshiena-bualu neikale mua kuambibua mu buondoke. Imue misangu, udi mua kubala tshikoso tshimue peshi tshiambilu tshimue tshia mu mukanda ne kuyukidilanganapu ne mukuyukidishi.

⁵ Bikala tshiena-bualu tshikupesha tshikonga malu a mu tshikoso tshia ndekelu tshia nshapita kampanda wa mukanda wa Dimanya, udi mua kukonkonona mu tshikoso kazubu ka ku ndekelu kadi ne mutu wa bualu ne: “Teta dimanya diebe.” Tuzubu tudi munkatshi mua bikoso bifidibue tudi kabidi mua kukonkononyibua bikala dîba mua kupeteka. Bikala kazubu kampanda kasanganyibue pankatshi pa bitupa bikonkonona kudi bana betu ba bakaji bashilangane, eu wikala mua kuenza tshitupa tshia kumpala udi mua kukakonkonona. Bimfuanyi bia mu mukanda bidi mua kumvuijibua misangu yonso idibi bitangila malongesha makonkonona.

⁶ Mudimu No. 4 udi ne bua kuenjibua mu mushindu udi ukoka ntema ne ufila dilongesha. Lumingu luonso netuakule bua muntu kampanda wa mu Bible. Ukonkonone ne ntema tshidi mukanda wa Auxiliaire utulongesha pa bualu bua muntu muine au. Ulongolole mudimu bilondeshile mutu wa bualu, usungule mifundu ya mu Bible idi mua kuambuluisha bateleji bua kutangijabu meji abu pa muntu wa mu Bible au ne pa bumuntu buende, kabidi ne pa ngikadilu anyi bienzedi bitudi mua kuidikija peshi kulekela. Udi mua kutela mvese idi kayiyi misuikakaja diakamue ku bualu bua muntu eu bikalayo izangika mushindu udi Yehowa umona imue ya ku ngikadilu mimpe anyi mibi, peshi bikalayo mu diumvuangana ne mutu wa bualu wa mudimu.

⁷ Bituababidila mu ka-bujima dishidimunyibua ditudi tupeta mu Kalasa ka Mudimu wa Teokrasi, netuikale mua ‘kumanyisha dîyi’ pa kudifila muetu muonso mu “tshipedi tshia kulongesha.”​—⁠2 Tim. 4:⁠2, NW.