Mêba A Bisangilu Neashintuluke Anyi?

 Padi bisumbu bia bungi bitu bibuela mu Nzubu wa Bukalenge umuepele biumvuangana bua kushintulukangana peshi bua kushintulula mêba a bisangilu, bidi ne bua kuenza nunku mu dia 1 dia Tshiongo. Kuanyisha dipangadika edi, nkulejangana dinanga ne kanemu bamue kudi bakuabu. Misangu yonso, dishintulula dia mêba a bisangilu ndienza bua kutuambuluisha bua kubuelamu kakuyi lutatu.

Bidi mua kuenzeka ne: dishintulula dia mêba a bisangilu dienzeka mu Tshiongo kadiena diumvuangana bimpe ne etu mêba. Netuikale imue misangu ne bua kuenza mashintuluka akondakaja etu mêba. Pa kueleshangana maboko, netuleje ne: tudi bajingulule kabingila ka dipangadika edi didi disankisha aba bonso badi bualu ebu butangile.

Bushuwa, dishintulula dialonda dia mêba a bisangilu didi mua kutuakanyina bimpe. Pa kuikala mu diindila, tudi bakankamijibue bua kuenza mashintuluka makengedibue atuambuluisha bua kubuela mu bisangilu bionso bia mu lumingu, bilondeshile programe muteka mu tshisumbu. Tuenzayi madikolela bua kulama mmuenenu wa mumue ne mufundi wa misambu wakamba ne: ‘Disanka kayi, pavuabu bangambile ne: “tuye mu nzubu mua [Nzambi, NW]!” ’​—⁠Mus. wa 122:​1, MMM.

Mu bimenga mutu bisumbu bia bungi bibuela mu Nzubu wa Bukalenge umuepele, dipangangana ku mêyi ditu diajuka munkatshi mua tusumbu tua bakulu pa bidi bitangila mêba a bisangilu. Mu Tshibumba tshia Nsentedi (mu Mfualanse) tshia mu dia 15 Tshimungu 1988, dibeji dia 19, tshikoso tshia 15 muvua mufunda ne: “Tshilejilu bikala bisumbu bibidi bibuela mu Nzubu wa Bukalenge umuepele, tshisumbu tshimue tshia ku ebi katshiena ne bua kuela meji ne: nzubu eu ‘ng’watshi’ ne tshidi mua kubambakaja tshikuabu tshisumbu bua kuitabatshi mêba a bisangilu matshitekela ne malu makuabu nansha. Kanemu ka bamue kudi bakuabu ne dieleshangana maboko bidi ne bua kutshimuna.”​—⁠1 Petelo 3:​10-12.