Mufundu Wonso Udi Ne Mushinga Bua Kulongesha
1 Ngenyi ya bantu pa mushinga wa Bible idi ya bungi ne mishilangane. Ku luetu luseke, tudi bajadike se: Bible udi wandamuna ku nshinga mijingakane ya bantu, udi kabidi ne mamanyisha a kueyemena bua kufila bulombodi buimpe mu nsombelu wetu. (Nsum. 3:5, 6) Kakuena bualu budi mua kufuanyikijibua ne mibelu ya meji ya mu Bible nansha. Kakuena tshidi tshipite mêyi-maludiki a mu nsombelu mafila mu Bible nansha. Mukenji wende ng’wa tshivuma, bualu udi “mua kujingulula meji ne malu adi mutshima musue kuenza.” (Eb. 4:12, NW) Mmunyi mutudi mua kuambuluisha bantu netu bua kumvuabu ne: badi ne bua kuangata mukanda eu mulekelela pa kabadi ne kuubala ne disuminyina? Nenku tuidikijayi, mu Lumungulu, imue ya ku mibelu idi ilonda mifila ne tshipatshila tshia kuleja Traduction du monde nouveau ne mukanda wa La Bible: Parole de Dieu ou des hommes?
2 Mumanye ne: diditatshisha dia bantu bavule ndia kukumbaja majinga abu a nshindamenu, udi mua kubuela mu bualu nunku:
◼ “Bantu bavule bandi mpetangana nabu matuku aa badi bamba ne: diditatshisha diabu dia kumpala ndia kukumbaja majitu abu a malu a mfranga. Ba bungi mbakuatshika ku buteyi bua dikeba dia bintu bia ku mubidi, ke tshidi tshibasumpakaja. Ntshinyi tshidi mpokolo mulenga wa mibelu pa mianda eyi? [Indila diandamuna.] Ndi mumone se: Bible udi ufila mibelu miakanyine idi mua kuambuluisha bua kuepuka ntatu ya patupu. Tangila tshilejilu.” Bulula mukanda wa La Bible: Parole de Dieu ou des hommes? mu dibeji dia 163 ne bala 1 Tim. 6:9, 10, mutela mu tshikoso 3. Fila makuabu mamanyisha pa tshikoso 4, pashishe ufile mukanda.
3 Udi mua kupangadija bua kulonda lungenyi lukuabu elu:
◼ “Patudi tubala tshikandakanda peshi tuteleja ngumu, tutu tufika anu ku dimanya bualu kampanda bupiabupia budi bubungamija, ne kanyinganyinga ketu kadi kavula. [Tela bualu kampanda bunyingalaji bua mu ngumu ya matuku aa.] Mmunyi mutudi mua kuakama ntatu ya mushindu’eu? [Indila diandamuna.] Mu 1983, mfumu wa mu États-Unis (tshikondo atshi uvua Ronald Reagan) wakamba ne: Bible udi ne mukenji wa mushinga mukole utu kauyi muanji kufundibua ne ‘mu mabeji ende mudi mupeteka diandamuna ku nshinga yonso idi mua kukuata muntu.’ Mêyi ende adi atuvuluija tshidi Bible wamba mene. [Bala 2 Tim. 3:16, 17.] Nensanke kukuleja bua tshinyi tudi ne bua kueyemena Bible.” Patula imue ngenyi mikoleshi ya mu trakte wa Pourquoi avoir confiance en la Bible. Umulombe bua wewe kualukila ne kumumvuija mushindu wa kukema udi mianda ya mu ngumu ya pa buloba bujima ikumbaja milayi ya mu Bible.
4 Bikala bantu bavule ba mu teritware wenu kabayi mu tshitendelelu kampanda, udi mua kuteta dileja edi:
◼ “Bantu ba bungi munu badi bela meji ne: imue mikanda minsantu kayena yumvuangana ne idi anu nsumuinu patupu. Badi bamona malu mabi mavule enzeka mu dîna dia ntendelelu ne ebi mbibasake bua kujimija mene dieyemena mu Bible. Tuambe eku tuambe eku, bantu bavule badi badiebeja bikala Bible Dîyi dia Nzambi peshi dia bantu. Udi wela meji kayi?” Indila diandamuna. Bilondeshile diandamuna edi, bulula mukanda wa La Bible: Parole de Dieu ou des hommes? pa muaba udibu bakula bua lungenyi peshi mulandu bijula kudi mukuyukidishi, ne nuyukile pa lungenyi lumue peshi ibidi. Tshilejilu, udi mua kutumika ne bikoso 27-29 bituadijile mu dibeji dia 66 pa ka-tshiena-bualu aka: “Jésus — Un personnage historique.” (Yezu—muntu muende lumu mu mianda ya bantu.)
5 Mulongeshi wetu munene udi utabalela bua dimanya dia disua diende kumanyishibuadi kudi muntu kayi yonso udi ujinga kudipeta. Bualu kampanda bulenga butambe butudi mua kuenzela bantu netu mbua kubambuluisha bua kuanyishabu mushinga wa Bible; ebi bidi mua kupandishisha muoyo wabo.—Nsum. 1:32, 33.