Bible: Muludiki mupesha bantu bonso kudi Nzambi
1 Batu batshinka ne: miliyare inayi ya Bible ikadi mipatula mu miakulu mipite pa 2 100, bienza ne: Dîyi dia Nzambi difike kudi bantu bapite pa bia pa lukama 90 bia bonso badi pa buloba. Pabi, mu buloba mudi nzala ya ‘kumvua mêyi a Yehowa.’ (Amo. 8:11) Kudi bantu ba bungi badi ne Bible ne kabayi bamubala peshi kabayi bamumvua. Mmunyi mutudi mua kubasaka bua kulekelabu Bible ulombola nsombelu wabu mu mushindu udi umueneka ne mêsu?
2 Mu Tshiongo, netufile mukanda wa La Bible: Parole de Dieu ou des hommes? Kudi aba baleja disankidila, netuikale kabidi mua kuleja nkudimuinu wa Bible utudi nende kukadi mpindieu bidimu 34, eu wa Traduction du monde nouveau. Bua nanku, tuele kashonyi pa ngakuilu wende mupepele ne wa buena-lelu. Bituambuluisha bakuabu ne musangelu bua kumona Bible bu muludiki mupesha bantu bonso kudi Nzambi, netuleje dianyisha dietu diondoke bua dipa edi dia Yehowa.
3 Tudi mua kutuadija diyuki ku diambuluisha dia trakte wa “Bua tshinyi kuanyisha Bible,” tshilejilu pa kuamba ne:
▪ “Bantu bapite pa bia pa lukama 90 bia bonso badi pa buloba badi ne Bible, kadi anu bakese mbatu bamubala pa tshibidilu. Udiku mua kubiumvuija anyi?” Bala bikoso bibidi bia kumpala bia mu trakte ne 2 Timote 3:16. Leja mukanda wa Parole de Dieu. Biangataye mukanda, umumanyishe mushinga wawu. Biaubengaye, umushile trakte bua ajikije dimubala, pa kukoka ntema yende pa ka-tshiena-bualu ka ndekelu ka: “Bible mmudianjile kumanyisha malu atshilualua.”
4 Paudi umonangana tshiakabidi ne bantu bavua bangate trakte wa “Bua tshinyi kuanyisha Bible,” udi mua kuteta mêyi aa:
▪ Panyima pa mumane kuvuluija diyuki dia musangu mushale, ubale bikoso bibidi bia ndekelu bia mu trakte. Ebeja mukuyukidishi webe né ukadiku muele meji pa mushindu wa kuikala ne muoyo wa kashidi pa buloba. Teleja diandamuna diende, pashishe usakidile ne: “Bantemu ba Yehowa mbatuishibue ne: milayi yonso ya mu Bible neyikumbane, pamue ne eyi idi imanyisha matuku malenga atshilualua bua bantu badi bakumbaja malu malomba kudi Nzambi.” Leja tshimfuanyi tshidi mu dibeji 13 dia broshire wa Utulomba. Bua kutuadija dilonga, uye ku dilongesha 5 ne umulombe bua kukonkonona mandamuna ku nkonko miela.
5 Mu teritware mudi bantu badifile mu malu a Nzambi, udi mua kuteta mbuelelu eu:
▪ “Tudi tukankamija dinemeka dikole dia Bible. Mêku mavule adi ne Bible, kadi anu makese ke atu amubala padiwu apeta ntatu mikole. Nudiku penu bamone nunku anyi? [Teleja diandamuna.] Bantu batu pamu’apa bela meji ne: Bible ukadi mujike mushinga. Mukanda eu wa La Bible: Parole de Dieu ou des hommes? udi ufila bijadiki bidi bituisha bia se: Bible mmujalame mu malu a sianse ne udi uleja mu mushindu udi ukuatshisha mua kupita ne ntatu minene itudi tumona lelu’eu.” Ela kashonyi pa imue ngenyi ya mu nshapita 8 anyi 12 wa mukanda, pashishe uleje mukuyukidishi mukanda eu.
6 Paudi walukila bua kutangila muntu uuvua mushile mukanda wa “Parole de Dieu,” udi mua kuamba ne:
▪ “Musangu mushale, tuvua bamone mushindu udi Bible utuambuluisha bua kujikija ntatu mijingakane idiku lelu’eu. Udi kabidi wambuluisha badi bamuitaba bu Dîyi dia Nzambi bua bikale ne nsombelu wa disanka divule ne dianyisha dipite. Ndi musue kukuleja dimue dia ku mêyi-maludiki a mu Bible adi ne dikuatshisha maleja mu mukanda umvua mukushile.” Yukidilanganayi pa dîyi-diludiki dimue dileja mu bikoso 3-6 bia nshapita 12, ne ukomeshe pa kubala tshikoso 7. Bialeja muntu disankidila, umuebeje bua dilonga dia mukanda wa Dimanya anyi broshire wa Utulomba.
7 Tshiena-bualu tshia diyuki tshidi tshilonda etshi tshidi mua kukoka ntema ya bakulakaje:
▪ “Mu tshikondo kampanda, bavua babala Bible mu mêku pamue ne onso ne mêyi-maludiki ende avua alombola nsombelu mu dîku. Ke muvuabi kuenu anyi? [Teleja diandamuna.] Lelu’eu, mbimueneke se: bantu bavule kabena ne dîba dia kubala Bible, anyi badi bela meji ne: mêyi-maludiki a nsombelu wa tshitembu adimu akadi majike mushinga. Nshapita 13 wa mukanda eu wa La Bible: Parole de Dieu ou des hommes? udi ulonda bualu bua bantu basatu bavua bashintulule nsombelu wabu pakalongabu Bible. Biwasua kubala mushindu udi bukokeshi bua Dîyi dia Nzambi bubambuluishe, nensanke bua kukushila mukanda eu.”
8 Mu dipita diebe dia musangu muibidi, udi mua kuamba ne:
▪ “Musangu mushale, tuvua bapetangane pa bualu bua se: mêyi-maludiki a mu Bible a nsombelu wa tshitembu mmalengulula mu nsangilu wa bantu ba lelu. Bua diebe dimona, malu aa mmatutangile petu anyi? [Teleja diandamuna.] Yezu Kristo wakumvuija ne: kulonga mua kumanya Nzambi kudi ne mushinga munene.” Bala Yone 17:3. Pashishe ubulule mukanda wa Dimanya mu nshapita 1 ne nuyukidilangane pa tshikoso 5. Akula bua programe wetu wa dilonga dia Bible kabiyi difuta mfranga ne lomba muntu bua umuleje mututu tuenza.
9 Tulombe Yehowa bua abeneshe madikolela etu onso bua diludika ntema ya bantu pa Bible, muludiki udiye mupeshe bantu bonso!