Ikalayi Ne Bikadilu Biakanangane Ne Lumu Luimpe

¹ Mutudi Bantemu ba Yehowa, tudi tujinga kutumbisha dîna dia Yehowa. Tudi bamanye se: bikadilu bietu, ngakuilu wetu, mvuadilu wetu ne nsuki yetu bidi mua kuikala ne buenzeji pa mushindu udi bakuabu bamona ntendelelu mulelela. Ebi bitu bimueneka nangananga dîba dia bisangilu bietu. Tudi ne bua kujadika se: bionso bidi biambibuamu ne bienzekamu mbiakanangane ne lumu luimpe ne bidi bitumbisha Yehowa.​—⁠Fil. 2:⁠4.

² Malu mavule adi bena mu bulongolodi ebu bamona bu a bukalanga pa bidi bitangila mvuadilu ne nsuki kaena makanyine bena nkristo nansha. Ba-ministre ba lumu luimpe badi ne bua kutabalela bualu ebu ne ntema. Mu Tshibumba tshia Nsentedi tshia Kabalashipu 1989, dibeji dia 16 muvua mufunda ne: “Kabiena bikengedibua kuvuala bilamba bia mushinga mukole, kadi bidi bikengela bilamba bia mankenda, bidi bisankisha ku mêsu ne bitukumbane. Bisabata bietu bidi ne bua kuikala bijima ne bilenga kuîsu. Bia muomumue, tudi ne bua kuikala ne mankenda, kuvuala bilamba bia mankenda ne bilongolola bimpe mu tshisangilu tshionso, nansha mu dilonga dia mukanda.”

³ Difika pa dîba ntshimanyinu tshia kanemu ne tshia ntema tshisonsola kudi dinanga. Bipumbishi bidi mua kutupangisha mushindu wa kufika pa dîba mu tshisangilu kampanda. Kadi difika panyima misangu milondangane mu bisangilu didi mua kumuenesha ne: katuena ne kanemu bua ngikadilu wa tshijila wa bisangilu ne tudi tulengulula bujitu buetu bua kubenga kusuya bakuabu. Misangu mivule, aba batu bafika panyima pa dîba batu bakuatshisha bateleji bakuabu ditanaji ne babapangisha mua kubabidilabu bivule mu bisangilu. Difika dietu pa dîba didi dileja kanemu ketu bua didiumvua ne bua dijinga dia kubabidila dia aba bonso badiku.

⁴ Dinanga dia muntu netu didi ne bua kutusaka bua kubenga kuikala mpokolo wa ditanaji dîba dia bisangilu. Kunungana, kudia, kutshiankunya bazoka, kuvungakaja mabeji ne diya ku nkumba ne dialukila dia patupu bidi mua kupangisha bakuabu bua kulondabu ne ntema ne bidi mua kuonesha bunême bua muaba wa ntendelelu wa Yehowa. Kabiena bikumbane bua muntu kukuataye mudimu wa tshisumbu peshi kuyukidilanganaye ne bakuabu dîba adi nansha, anu bikalaku bualu kampanda bua lukasa lukasa buajudija bana betu pa miaba yabu. Padibi kabiyi nunku, bonso badi ne bua kuikala basombe ne bateleja bua dikuatshisha diabu ne dia mêku abu. Kupanga bukalanga kakuena ne bua kulejibua mu Nzubu wa Bukalenge nansha, bualu “dinanga . . . kadiena dipanga bukalanga.”​—⁠1 Kor. 13:​4, 5, MMM; Gal. 6:⁠10.

⁵ Dîna dia Yehowa didi kabidi disamunyibua ne ditumbishibua pa kumona bikadilu bimpe bia bana dîba dia bisangilu. Bidi bia mushinga bua baledi kubatabalelabu. Mbimpe kukankamija bana bua kutelejabu ne kufila mandamuna. Baledi bavule batu basombela muaba udibu mua kupatuka ne lukasa luonso bua kukumbaja malu adi atangila bana babu batekete kabiyi kusuya bakuabu.

⁶ Paulo wakafila mubelu eu: “Bikadilu bienu bikale biakanangane ne lumu luimpe.” (Fil. 1:27) Nenku, tuenze madikolela bua kuikala ne bukalanga ne kanemu kudi bantu netu patudi tubuela mu bisangilu. Dieleshangana maboko dietu bonso nedipatule ‘dikoleshangana ku muoyo mu ditaba dia muomumue ditudi nadi bonso.’​—⁠Rm 1:⁠12, MMM.