Tuidikijayi Yehowa Pa Kuditatshisha Bushuwa Bua Bakuabu

 ¹ Yehowa udi tshilejilu tshilenga tshia muntu udi uditatshisha bushuwa bua bakuabu. Bu mudiye Mukokeshi mutambe bunene wa mu bukua mabulunge, udi utabalela majinga a bantu badiye mufuke. (1 Pet. 5:7) Yezu wakakankamija bayidi bende bua kuleja ngikadilu ya Tatuende, udi ubandisha dîba ne ulokesha mvula bua bakane ne bakena bakane. (Mat. 5:45) Tudi mua kuidikija Yehowa pa kuleja ditabalela dilelela bua bakuabu, pa kuikala badilongolole bua kumanyisha mukenji wa Bukalenge kudi muntu yonso utudi tupetangana nende. Bituibidilangane bimpe menemene ne broshire ituatumika nayi mu mudimu wa buambi mu ngondo wa Tshimungu, netufike ku difila dikuatshisha dia mu nyuma kudi bakuabu. Ngenyi mifila idi ilonda eyi idi ileja amue malu pa mushindu wa kulongolola diyukidilangana dia kumpala pashishe kusonsola dijinga dia kumanya bivule ku makumbulula makanyine.

 ² Bitualeja broshire wa “Dieu se soucie-t-il vraiment de nous ?” tudi mua kuamba ne:

◼ “Ukadiku mudiebeje bua tshinyi Nzambi mmulekele dikenga, bikalaye muikale uditatshisha bushuwa bua bantu, anyi? [Lekela muntu andamune.] Broshire eu kêna anu utuala diandamuna didi disankisha ku lukonko elu, kadi kabidi udi uleja ne: Nzambi mmulaye bua kujikija tshinyangu tshionso tshidi muntu muenzele bantu nende ne dinyanga dia buloba.” Bala tshikoso tshia 23 mu dibeji dia 27. Leja tshimfuanyi tshidi kuinshi ne bala Musambu wa 145:16 mutela mu tshikoso tshia 22. Fila broshire. Bikala muntu mumuitabe, ujule lukonko luwandamune mu dikumbula didi dilonda, tshilejilu: “Udiku musue kumanya mushindu wakumbaja Nzambi dilongolola diende dia kuitshikijila bantu mabenesha ne kukudimuna buloba mparadizu anyi?”

 ³ Paudi upingana bua kutangila aba bauvua mushile broshire wa “Dieu se soucie-t-il vraiment de nous ?” udi mua kubuela mu diyukidilangana diibidi mu mushindu’eu:

◼ “Mu dipita dianyi dia musangu mushale, tuvua bamone se: Nzambi udi uditatshisha bushuwa buetu ne se: udi ne tshipatshila tshia kukupula tshinyangu tshionso tshidi muntu muenzele bantu nende ne dinyanga dia buloba.” Ubulule broshire mu dibeji 2 ne 3, mutudi tusangana tshimfuanyi, ne utungunuke ne: “Tuvua bashiyangane pa lukonko elu: mmushindu kayi wakumbaja Nzambi dilongolola diende dia kuitshikijila bantu mabenesha ne kukudimuna buloba mparadizu? Udi wela meji kayi pa bualu ebu?” Kunyima kua wewe mumane kumvua diandamuna, bala tshikoso 2 mu dibeji dia 17 ne Danyele 2:44. Pashishe bala tshikoso tshia 12 mu dibeji dia 18. Ebeja mukuyukidishi webe bikalaye musue kukonkonona nebe tshitupa tshia 9 tshia mu broshire. Bianyishaye, tutshilonge nende.

 ⁴ Mona mbuelelu uudi mua kukuata nende mudimu paudi uleja broshire wa “Padi muntu uudi munange ufua. . . ” Leja tshizubu tshia broshire ne amba ne:

◼ “Tudi tufila lelu’eu broshire eu udi upetesha miliyo ya bantu badi bajimije munangibue wabu busambi ne ditekemena. Ukadiku mudiebeje ditekemena kayi didiku bua bafue anyi? [Teleja diandamuna.] Bible udi wamba patoke ne: Nzambi mmulaye dibiishibua.” Bala Yone 5: 28, 29. Bulula broshire ne ela nseka pa mumvuija adi mu tshikoso tshia ndekelu tshia mu dibeji dia 28 ne a mu tshikoso tshidi tshilonda mu dibeji dia 31. Leja bimfuanyi bidi biumvuangana ne bikoso ebi. Fila broshire. Udi mua kujula ntema bua dikumbulula pa kuebeja ne: “Mmunyi mutudi mua kuikala bajadike ne: ndekelu wa bionso lufu nelujike nkoong?”

 ⁵ Paudi upingana kutangila bantu bavua bitabe broshire wa “Padi muntu uudi munange ufua. . . ” udi mua kuamba ne:

◼ “Musangu mushale, tuvua bayukile pa ditekemena dia mpatshi dia dibiishibua. Broshire umvua mukushile udi umvuija bua tshinyi tudi mua kuikala bajadike se: ndekelu wa bionso lufu nelujike nkoong. Kuenaku umona se: malaya a Nzambi aa adi atusamba ne atukolesha ku muoyo anyi?” Lekela muntu andamune. Pashishe bulula broshire mu dibeji dia 31 ne bala tshikoso tshibiidi ne tshisaatu, ne kabidi Buakabuluibua 21:​1-4. Ela kashonyi pa ditekemena ditudi nadi dia kuikala ne muoyo katuyi tufua. Bilondeshile dijinga dia kumanya didi muntu muleje ne mianda mikuabu, tulombe muntu eu bua kuenza nende dilonga dia Bible mu mukanda wa Dimanya peshi tujule lukonko lua kuandamuna mu dikumbula dialonda.

 ⁶ Mona tshiudi mua kuamba biwikala uleja broshire wa “Quel est le but de la vie ? Comment le découvrir ?”:

◼“Bantu bavule badi badiebeja tshipatshila tshia muoyo. Badi badikonka ne: ‘Bua tshinyi ndi pa buloba? Muoyo wanyi mmutangile kuepi? Mmunyi muikale nsombelu wanyi wa matuku atshilualua?’ Bua diebe dimona, nkuepi kutudi mua kupetela mandamuna? [Teleja diandamuna dia muntu.] Bambisha tshidi Bible wamba. [Bala Musambu wa 36:⁠9.] Kabienaku bia meji bua kuitaba ne: Mufuki wa muntu ngudi mutambe kukumbanyina bua kutumvuija tshitudi tuenza pa buloba anyi? [Ulekele muntu andamune.] Broshire eu udi uleja dilongolola dinene didi nadi Nzambi bua bualu buetu.” Bulula broshire mu dibeji dia 20 ne dia 21, bala miaku idi yumvuija tshimfuanyi ne ela nseka pa tshimfuanyi, pashishe fila broshire. Bikala muntu mumuitabe, umuebeje ne: “Mmunyi mutudiku mua kuikala bajadike ne: Nzambi utshidi anu ne tshipatshila tshia se: bantu bikale ne muoyo wa kashidi mu Mparadizu pa buloba?” Umvuanganayi dîba dia kupetangana.

 ⁷ Biwikala uvua mushiye broshire wa “Quel est le but de la vie ? Comment le découvrir ?” tshilejilu, udi mua kuamba musangu muibidi uwapingana se:

◼ “Musangu mushale umvua mulue, mvua bushuwa muanyishe diyukidilangana dietu pa tshidi Bible wamba: muoyo udi bushuwa ne tshipatshila.” Leja tshimfuanyi tshia mu dibeji dia 31 ne ela lukonko elu: “Mmunyi mutudi mua kujadika ne: disua dia Nzambi ditshidi anu dia se: bantu bikale ne muoyo wa kashidi mu Mparadizu pa buloba?” Bala tshikoso 3 mu dibeji dia 20. Konkonona ngenyi miumvuija mu ka-tshiena-bualu ka “Le dessein de Dieu demeure inchangé,” mu dibeji dia 21. Bala pa tshizubu tshia panyima tshia broshire dilomba dia kuenza dilonga dia Bible dia ku nzubu kabiyi difuta mfranga. Leja mukanda wa Dimanya ne mulomba bua kumuleja mua kutumika ne mukanda eu bua kulonga Bible.

 ⁸ Mudimu wetu wa buambi udi ne bua kuleja diditatshisha dietu dilelela bua kuambuluisha badi ne mutshima mulenga bua ‘bafike ku dimanya dijalame dia bulelela.’ (1 Tim. 2:⁠4, NW) Nunku, udilamine tshikondo mu programe webe wa mudimu bua kualukila kutangila bonso bauvua mushile broshire. Pa kuleja bantu dibatabalela dilelela, tudi pamu’apa mua kuambuluisha aba badi banyingalala ne batua mikemu bua malu mabi adi enzeka mu tshitendelelu tshia dishima bua kupeta tshimanyinu tshia lupandu. (Yehez. 9:​4, 6) Netupete kabidi disanka ne disankishibua dia kumanya se: tudi tuidikija Yehowa pa kuditatshisha bushuwa bua bakuabu.​—⁠Tangila Filipoi 2:⁠20.