Programe Wa Mpuilu Wa Tshijengu Mupiamupia

¹ Biangatshile mu Kabitende, tshiena-bualu tshia mpuilu wa tshijengu netshikale: “Telejayi ne longayi mua kutumikila Dîyi dia Nzambi.” Tshiena-bualu etshi tshiashila pa Dutelonome 31:12, 13 ntshikumbanyine bimpe programe eu, udi uzangika mushinga wa malongesha atudi ne bua kulonga ne kutumikila.

² Nansha mudi bantu bavule lelu’eu bateya ntema ku mamanyisha a dishima mafila ku buenzeji bua spiritu mibi, bidi bia mushinga bua yonso wa kutudi kutelejaye Dîyi dia Nzambi ne kulonga mua kuditumikila. (Luka 11:28; 1 Tim. 4:1) Miyuki ya mpuilu eu wa tshijengu ivua milongolola ne tshipatshila etshi mu mushindu wa kukankamija ne kuambuluisha bamanyishi, mêku, bakulu ne bampanda-njila. Mu Disambombo nekuikale muyuki wa bitupa binayi bikuatakane pa tshiena-bualu etshi: “Diakama ntatu yetu​—⁠Pa kuteya ntema ku Dîyi dia Nzambi.” Ne mu Dia lumingu mu dinda, nekuikale muyuki mukuabu wa bitupa bikuatakane udi ne mutu wa bualu eu: “Mushindu udi Mifundu ilongamija mu buakane.” Programe eu mu kabujima kende neikale ne makankamija a mu nyuma audi wewe ne dîku diebe kanuyi bua kupangila to.

³ Mu Disambombo ne mu Dia lumingu, ngenyi mikuatshishi bua mudimu wa buambi neyifidibue ku diambuluisha dia maleja. Nenuteleje kabidi diela nkonko ne malu menzeka adi akankamija ne ashidimuna. Nunku, pa kuikalaku ne pa kuteleja ne tshipatshila tshia kutumikila binudi nulonga, nenukumbane mua kunemeka mêyi-matuma a mu Dîyi dia Nzambi.

⁴ Batismo wa aba batshiena badilambuilaku kudi Nzambi neikale tshikondo tshinene tshia mpuilu eu wa tshijengu. Balumbidi ba batismo badi ne bua kukuatshila mutangidi muludiki dijinga diabu dia kutambula kumpala kua dîba, bua alongolole diyukidilangana diabu ne bakulu.

⁵ Muyuki wa patoke wa mpuilu eyi ya tshijengu yalondangana newikale ne tshiena-bualu etshi: “Bua tshinyi kuikala balombodibue kudi Bible?” Nubikile bantu badi baleja dijinga dia kumanya bia bungi. Bamane kutangila bungi bua makankamija ne bua diambuluisha binuapeta wewe ne dîku diebe mu mpuilu eu, nudilongololayiku bua kubuela mu bitupa biende bionso.