Tudi Ne Mudimu Mutuomekela
1 Yezu wakalomba bamulondi bende bua kuenza “ba mu bisamba bionso bayidi.” (Mat. 28:19, NW) Batendeledi ba Yehowa Nzambi bapite pa miliyo itanu badi bujadiki budi ne muoyo bua dikumbana dia dîyi-dituma edi mu matunga 232 ne bidiila. Kadi bidi munyi buetu tuetu bine? Tutuku tuangata ne mushinga mudimu wetu mutuomekela bua kuyisha anyi?
2 Dienzejibua dia mu lungenyi: Mudimu muomekelangana “mbujitu bupesha muntu bua kuya kukumbaja bualu kampanda.” Kristo mmututumine dîyi bua kuyisha. (Bienz. 10:42) Mupostolo Paulo uvua mumanye se: dikengedibua, peshi dienzejibua dia mu lungenyi dia kumanyisha lumu luimpe divua dimuomekela ku dîyi-dituma edi. (1 Kol. 9:16) Tshilejilu: Elabi meji ne: udi muenji wa mudimu mu mazuwa adi enda adiina mu mâyi. Muendeshi wa mazuwa udi ukutumina dîyi bua umanyishe bena luendu ne ubalombole mu tu-matu tua didipandishila. Neulengulule dîyi-dituma edi ne neuditatshishe amu bua kupandisha muoyo webe nkayebe anyi? Bushuwa kuakuenza nanku. Muoyo wa bantu bakuabu udi mu bianza biebe. Muoyo wabu udi mu njiwu. Udi ku dienzejibua bua kukumbaja mudimu mukuomekela bua kubambuluisha.
3 Tudi bapete mudimu mutuomekela kudi Nzambi wa kufila didimuija. Yehowa ukadi pa kubutula ndongoluelu mubi eu wa malu mu bujima buende. Tshiavuila miliyo ya bantu ki ntshimanyike. Nebikale biakane bituikale katuyi tuditatshisha bua njiwu idi mindile binetu eku tutabalela anu dipandishibua dietu nkayetu anyi? Tòo. Tudi ku buenzeji bua kuambuluisha muinetu bua kupandishaye muoyo wende.—1 Tim. 4:16.
4 Bilejilu bia lulamatu bia kuidikija: Muprofete Yehezekele wakamona se: uvua ne bujitu bua kumanyisha mukenji wa didimuija bena Izalele bakena bena lulamatu. Yehowa wakamumanyisha patoke tshivua ne bua kuenzeka biabengaye kuambula bujitu buende: ‘Pangambila muntu mubi ne: Wewe neufue bulelela, ne wewe udi upanga kumudimuisha, . . . muntu eu mubi neafue mu bubi buende, kadi nendombe mashi ende ku tshianza tshiebe.’ (Yehez. 3:18) Yehezekele wakakumbaja mudimu mumuomekela ne lulamatu luonso, nansha muvuaku buluishi bukole. Nenku, wakasanka pakakumbaja Yehowa malumbuluisha ende.
5 Siekele mivule kunyima, mupostolo Paulo wakakula bua bujitu buende bua kuyisha. Wakamba ne: ‘Ndi mbingishibua ku mashi a bantu bonso. Tshiakatshina bua kunuambila malu onso adi Nzambi musue.’ Paulo wakayisha patoke ne ku nzubu ne ku nzubu bualu uvua mumanye se: bialengululaye bualu ebu neadiambike dibanza dia mashi ku mêsu kua Nzambi.—Bienz. 20:20, 26, 27.
6 Tudiku ne lukunukunu bu Yehezekele anyi? Tutuku tudiumvua basakibue bua kuyisha pa kulonda tshilejilu tshia Paulo anyi? Mudimu mutuomekela ng’wa muomumue. Tudi ne bua kutungunuka ne kukumbaja bujitu buetu bua kudimuija binetu nansha bikala ne kalèngù, ne dilengulula malu peshi buluishi. Bidi mua kuenzeka ne: binunu bia bantu kabidi bitabe mukenji wa Bukalenge ne bambe ne: ‘Tudi basue kuya n’ebe, bualu bua tudi bumvue ne: Nzambi udi n’ebe.’ (Zek. 8:23) Dinanga dietu bua Nzambi ne bua muntu netu ditusakeku bua kubenga kulekela! Tudi ne mudimu mutuomekela: kuyisha!