Bisangilu Bilenga
1 Anu bu basadidi ba Nzambi ba kale, Bantemu ba Yehowa batu badisangisha bua ‘kulongeshibua kudi Yehowa.’ (Yeshaya 54:13, NW) Batu batabalela bua kuikala mu bisangilu, bamanye ne: Yehowa udi ubapetesha biakudia bia mu nyuma mu tshikondo tshiakanyine ku butuangaji bua Yezu Kristo ne bua njila wa pa buloba udiye utumika nende, mbuena kuamba ne: “mupika wa lulamatu ne wa budimu.” Bisangilu ebi bidi biangata tshitupa tshinene tshia dîba dietu. Nenku tudi tujinga kuenza bua bantu kubabidilamu bia bungi, bua kutumbishabi Yehowa ne kuambuluishabi mu diibaka bantu bende. Ndambu wa mibelu peshi mavuluija bidi bilonda ebi nebituambuluishe bua kuenza bisangilu bilenga.
2 Dilongesha dîba dia Muyuki wa Patoke: Ngamba-malu neatabalele bua kutumika misangu yonso ne ngakuilu mupepele kumvua kudi bantu badi balua bua musangu wa kumpala ku Nzubu wa Bukalenge. Tudi tujinga kuambuluisha bantu, ki nkubaseka nansha; katuena basue kubapepeja, kadi kubasaka ku ditumika ne tshieledi tshiabu tshia lungenyi ne tshipedi tshiabu tshia bujinguluji. Tshilejilu, bikala muyuki wakula bua didimenena, ngamba-malu kêna ne bua kuamba ngenyi yende mu mushindu wa kuseka aba badi bitabuja dilongesha edi. Kusua kuamba malu bua kusekesha bantu, kakuakusonsola nansha kakese dijinga dia kumanya kudi bantu badi bitabuja didimenena.
3 Dilongesha dîba dia Dilonga dia Tshibumba tshia Nsentedi: Muanetu udi ulombola dilonga neepuke mbangilu milepakane. Neabale nkonko ya pa tshikoso ne neapeshe bateleji badi bele tshianza muulu dîyi bilondeshile dîba dilongolola. Neakankamije bateleji bua kufilabu mumvuija mîpi ne makanyine bua mandamuna mavule afidibue ku lukonko luonso. Neenze mushindu wa kupetesha bateleji bavule menemene mua kuakulabu mu dilonga. Kudi mushindu wa kukankamija bena bumamamama pa kudianjila kubatela bua kubala mvese ya mu Bible ya kumvuija bikala dîba mua kupeteka. Muanetu udi ulombola dilonga neikale mua kusakidila diumvuija kampanda padi lungenyi kansanga lutupika mu dikonkonona dia tshikoso. Kêna ne bua kuenza nunku dîba dionso, ne diumvuija diende dikale misangu yonso dîpi.
4 Malu manene a mu dilonga atu pa tshibidilu umvuangana ne nkonko ya diambulula ya mu kazubu. Neatabalele bua kuzangika malu manene aa mu dilonga.
5 Bikala dilonga dia Tshibumba tshia Nsentedi dikale dikonkonona dia mvese ku mvese wa nshapita kampanda wa mu Bible, nebikengele kubimanyisha ku ntuadijilu kua dilonga. Padibi nunku, bitu pa tshibidilu ne diambuluisha dinene bua kubadisha mvese yonso, kumpala mene kua kuela lukonko lua tshikoso.
6 Ku luseke lukuabu, nansha tshiena-bualu tshikonkonona tshikale tshia mushindu kayi, muanetu udi ulombola dilonga nealombe bateleji bua kuangatabu Bible ne kubala mvese ya mushinga. Bua dikonkonona dia nkatshinkatshi dia tshiena-bualu, neatabalele bua kubenga kunengakana bikole pa bikoso bia mbangilu, kadi nealamate ku bikoso bia munkatshi bia tshiena-bualu tshia dilonga, bidi ne ngenyi ya mushinga muvule.
7 Bua diandamuna dia bateleji, muanetu neapeshe bana dîyi mu mushindu mutshintshikila ne muakanyine. Ki mbiakanyine bua kubatela misangu yonso nangananga padibi bitangila bikoso bia mushinga bidi bikengela diumvuija ditoke ne divungulula.
8 Dilongesha dîba dia Bisangilu bia Mudimu: Biena-bualu bia dienza mu nkonko ne mandamuna kabiena ne bua kuikala ne mbangilu mule. Mbangilu muipidija mmukumbane. Nkonko neyikale mitoke, misunguluke, ya buludiludi ne yumvuangana ne malu a mu bikoso. Bilondeshile dîba didiku, mbiakanyine imue misangu bua kubadisha bikoso bidi ne mushinga mukole bia mu tshitupa tshikonkonona. Muanetu udi ulombola diyukidilangana neatabalele miaku minene ya mu mvese ya mu Bible mitela ne neatumike nayi mu diumvuangana ne tshiena-bualu tshia diyukidilangana. Mu dilongolola dia manaya a tshilejilu, bidi bikengela kutangila bidi tshisumbu tshikengela ne malu mapetangana nawu bushuwa mu buambi; mbiakanyine kabidi bua kudilongolola ku bipumbishi bitu mu teritware ne mushindu wa kupita nabi. Bia muomumue, tudi mua kuleja mushindu wa kuandamuna padibu babenga mikanda yetu. Manaya aa neikale aleja malu mutuwu enzeka. Mu nsombelu yonso, nebikengele kuepuka manaya a tshilejilu a mu lungenyi, adi kaayi aleja malu mutuwu enzeka bulelela.
9 Bikala bena mu tshisumbu kabayi bangata dipangadika dia kumanyisha lumu luimpe mu mpukapuka, bakulu nebalame dîba, mu Tshisangilu tshia mudimu, bua kulonda malu mamonamona peshi bua kuenza manaya a tshilejilu pa mushindu wa kufila bumanyishi bua mu mpukapuka.
10 Anu “Mamanyisha” adi atangila tshisumbu ke ikala ne bua kubadibua, ne “Mapiamapia a teokrasi” kudibu mua kusakidila imue misangu malu mamonamona mangatshila mu Annuaire; matunga akena mamanyike bimpe nebaaleje pa karte ka matunga.
11 Muanetu wapita wa kumpala bua kuakula mu Tshisangilu tshia Mudimu kêna ne bua kujingila bateleji difika dilenga nansha, bualu ndimana kuenza kumpala, ku ntuadijilu kua Kalasa ka Mudimu wa Teokrasi (bu mutuku kenzeka pa tshibidilu kumpala).
12 Mikanda itu Société ufundila bisumbu pa tshibidilu idi ne bua kubadibua ne musangelu ne bushindame. Pa kumona mushinga wayi, mbitambe buimpe bua mukulu kuyibalaye; neadianjile kuela kashonyi pa miaku ne ngenyi ya mushinga ya mu mukanda. Imue misangu nebikale bia mushinga bua kushindika ngenyi minene ya mu mukanda pa kuyambulula.
13 Dilongesha dîba dia Tshivulukilu: Muyuki wa Tshivulukilu kawena ne bua kupeshibua bangamba-malu muntu ku muntu, ne kipatshila kamue ka ne: bakulu bonso bawenze. Pa kumona mushinga wa tshisangilu etshi tshia pa buatshi, anu balongeshi batambe bulenga ba mu tshisumbu ke benza muyuki wa Tshivulukilu, nansha bikalabu bamane kuwenza misangu mishale. Nebatumike ne miaku mipepele, idibu mua kumvua kudi bateleji badi balue bua musangu wa kumpala mu Nzubu wa Bukalenge. Bisumbu bidi pabuipi ne Betele bidi mua kulomba, kumpala kua tshikondo, kudi Société bua kubituminaye ngamba-malu. Bia muomumue, bikala mutangidi wa tshijengu peshi wa distrike ukumbula tshisumbu, nebikale biakanyine bua kumupesha muyuki wa Tshivulukilu bua kuwenza, mu tshisumbu tshikumbula peshi mu etshi tshidi pabuipi natshi.
14 Amue mabambisha a pa malu onso: Bua musambu wa kuimba, tudi tuvuluija ne: mbimpe kumanyisha tshiena-bualu ne mvese wa mu Bible padiwu mushindamene. Mbianyishibue bushuwa bua bateleji kuimbabu ne mutshima wabu mujima. Muanetu udi ne bujitu bua biamu bia mêyi neajadike bikala mijiki mikuata mikala yumvuika bimpe, bualu bitu bienzeka imue misangu ne: mêyi a bateleji ajibikile mijiki. Ebi bitu binyangakaja musambu nangananga padiwu kawuyi mumanyike bimpe kudi bateleji.
15 Padi bantu babuela bua musangu wa kumpala mu Nzubu wa Bukalenge, mbiakanyine kubakidila ne luya. Bateleji kababatangidi bibi, nansha bikalabu bakula peshi bavuale mu mushindu ukena wa tshibidilu. Bantu ba mishindu yonso badi mua kusankidila bisangilu bietu. Miaba yetu ya bisangilu mmiunzuluila bantu bonso. Bidi mua kuenzeka ne: banene ba bampulushi peshi bena mbulamatadi balue kumona mututu tuenza bisangilu bietu, ne bonso badi ne bua kudiumvua bakidila bimpe.
16 Netuepuke kabidi bimue biambilu bikena bijalame patudi tuambila bana betu balume ne bakaji malu mu tshisumbu. Mona bimue bilejilu:
—Ki mbiakanyine kuamba ne: ‘muanetu frère Kampanda neenze disambila’ peshi ne: ‘muanetu sœur Kampanda neenze mudimu kansanga.’ Muaku ‘muanetu’ kawena ne bua kuikala ne muaku ‘frère’ peshi ‘sœur’ ulonda panyima pawu. Mbiakanyine kuamba ne: ‘Muanetu wa balume Kampanda neenze disambila’ anyi ‘Muanetu wa bakaji Kansanga neenze mudimu eu.’ Ki mbimpe kuamba ne: le frère kampanda peshi la sœur kansanga; kuteka kanungu kumpala kua muaku frère anyi sœur.
—Misangu mivule tutu tumvua bamba ne: “Muanetu wa balume Kampanda neatuambuluishe ne disambila.” Ki nngakuilu muakane mu Tshiluba to. Nunku, mbimpe kuamba ne: “Muanetu wa balume Kampanda neenze disambila.” Bia muomumue tuepuke kuamba ne: “Ku bukubi bua disambila.” Tuamba ne: “Tshisangilu tshidi ku bulombodi bua spiritu munsantu” peshi ne: “dipangadika ndiangata mu disambila.”
—Mu Mfualansa, pamutu pa kuakula bua “bonté imméritée de Jéhovah,” mbitambe kuakana ne biumvuangane ne Bible bua kuamba ne: “sa faveur imméritée.”
—Mu Mfualansa, netuepuke kabidi bilema bia mu disuikakaja dia miaku bu mudi ebi bidi bitambe kumanyika bia disakidila kakuyi kabingila dileta dia ‘t’ ku muntu muisatu wa ku bumue wa imue miaku ya pa muanda. Tshilejilu, “il va-t-être”; mbimpe kuamba ne: “il va être.”
17 Kabiena biumvuija, mu malu majula aa, ne: tuikale balondakaji ba tualu tuonso peshi tujula milandu bikala bilema ebi bipingana amu kupingana. Mmibelu mikese yatuambuluisha bua kuakula biakane, ne kulengeja ngikadilu wa bisangilu bietu.
18 Bushuwa nenubambishe ne: mibelu mifila kuulu eku idi itamba kutangila mmuenekelu wa malu pamutu pa ngenyi mifilamu; mu mêyi makuabu, idi yakula bua tshimuenekelu tshia bisangilu peshi tshia miyuki mienzamu. Bidi mua kunumuenekela anu bu tu-malu tukese, kadi bidi ne wabi mushinga bituasua ne bisangilu bietu bikale bishidimunyi ne bilenga. Bituikala bamanye dikengedibua dia kutabalela misangu yonso bua kubilengeja, nebipeteshe Yehowa lumu lua bungi. Bena mu tshisumbu bonso nebabindile ne disanka, bamanye se: nebiibakibuemu ne nebakankamijibue mu nyuma. Tudienzejayi bonso bua kuenza misangu yonso bisangilu bilenga!