Nshapita 10

Bukalenge bua Nzambi budi bukokesha

PAMU’APA, ukadiku musumbe tshiamu tshia mudimu, bua kusangana anu ne: katshiena tshitumika. Tuamba ne: wakabikila mulongolodi. Kakese kunyima “wakalongolola” tshiamu etshi, kadi, tshiakanyanguka kabidi. Nditekeshibua ku muoyo kayipu!

² Mbia muomumue ne mbulamatadi ya bantu. Bukua-bantu butu bujinga misangu yonso mbulamatadi udi mua kufila ditalala ne diakalenga. Kadi, madikolela a tshikandi bua kulongolola malu mu nsangilu wa bantu kaena bulelela malubuluke. Bipungidi bivule bia ditalala bikadi bienjibue—ne bishipibue kunyima. Kabidi, mmbulamatadi kayi udi mua kukokesha kujikija bupele, kansungansunga, dibunda bibawu, masama, dinyanguka dia buloba, dia mâyi ne kapepa? Bukokeshi bua bantu kabuena mua kulongolodibua. Nansha Mukalenge wa Izalele muena meji Solomo wakebeja ne: ‘Nunku muntu neamanye mua kujingulula njila wende munyi?’—Nsumuinu 20:24.

³ Kuteketshi mu maboko! Mbulamatadi mujalame wa buloba bujima ki ntshilota patupu. Ke tshivua tshiena-bualu tshia bumanyishi bua Yezu. Wakabubikila ne: “bukalenge bua Nzambi,” ne wakalongesha bamulondi bende bua basambile bua buine ebu. (Luka 11:2, NW; 21:31) Bushuwa, Bukalenge bua Nzambi butu imue misangu butedibua mu bisumbu bia malu a Nzambi. Mu bulelela, miliyo ya bantu itu isambila bua buine ebu dituku dionso padiyi yambulula Disambila dia Mukalenge (dibikila kabidi ne: Tatu Wetu anyi ne: disambila dia tshitembelu). Kadi bantu batu bandamuna mu mishindu mishilangane patubu babebeja ne: “Bukalenge bua Nzambi ntshinyi?” Bamue batu bamba ne: “Budi mu mutshima webe.” Bakuabu badi babubikila ne: diulu. Bible udi ufila diandamuna ditokesha, anu bu mutuabimona.

BUKALENGE BUDI NE TSHIPATSHILA

⁴ Yehowa Nzambi utu katshia kuonso eku Mukalenge, peshi Mukokeshi Mudikadile, wa bukua-bifukibua. Wakapeta muanzu eu mutumbuke bualu wakafuka bintu bionso. (1 Kulondolola 29:11; Musambu wa 103:19; Bienzedi 4:24) Kadi Bukalenge buakalongesha Yezu budi buambuluishi, anyi budi pa muaba muibidi, kunyima kua bumfumu bua Nzambi pa bifukibua bionso. Bukalenge ebu bua Masiya budi ne tshipatshila tshisunguluke, kadi ntshipatshila kayi?

⁵ Bu mudibi biumvuija mu nshapita 6, bena dibaka ba kumpala bakatombokela bukokeshi bua Nzambi. Bua bilumbu biakajuka, Yehowa wakasungula bua kuenza tshimuenekelu tshipiatshipia tshia bumfumu buende. Nzambi wakamanyisha dilongolola diende dia kupatula “dimiinu” dikala ne tshia kuboza Nyoka, Satana, ne kumbusha bipeta bia mpekatu mupiana kudi bukua-bantu. Yezu Kristo udi “Dimiinu” dia diambedi, ne “bukalenge bua Nzambi” ntshiamu tshia mudimu tshiatshimuna Satana kashidi. Ku butuangaji bua Bukalenge ebu, Yezu Kristo neapingajilula bukokeshi pa buloba mu dîna dia Yehowa ne neabingishe bumfumu bujalame budikadile bua Nzambi bua bikondo bionso.—Genese 3:15, NW; Musambu wa 2:2-9.

⁶ Bilondeshile nkudimuinu kampanda wa mêyi a Yezu kudi bafarizeyi bena malu mabi, wakamba ne: “Bukalenge bua Nzambi budi munda muenu.” (Luka 17:21, King James Version) Yezu uvua usua kuamba ne: Bukalenge buvua mu mitshima mibi ya bantu aba banyanguke anyi? Tòo. Nkudimuinu mutambe kujalama wa mfundilu wa ntuadijilu wa tshiena-Greke udi ne: “Bukalenge bua Nzambi budi munkatshi muenu.” (Traduction du monde nouveau) Nunku, Yezu uvua munkatshi muabu, wakaditela bu Mukalenge wa matuku atshilualua. Kabuyi pabuipi ne kuikala tshintu kampanda tshidi muntu natshi mu mutshima wende, Bukalenge bua Nzambi mmbulamatadi mulelela, udi ukuata mudimu muikale ne mukokeshi ne bakokedi. Mmbulamatadi wa mu diulu, bualu mmubikidibue ne: “bukalenge bua mu diulu” ne “bukalenge bua Nzambi.” (Matayo 13:11, Luka 8:10, NW) Mu tshikena-kumona, muprofete Danyele wakamona Mukokeshi wabu bu “muntu kampanda mufuane muana wa muntu” mutuadibue kumpala kua Nzambi Wa-Bukole-Buonso ne mupeshibue “bukokeshi ne butumbi ne bukalenge,” budi bunenga, “bua bisamba, bisumbu bia ditunga ne miakulu bikale bionso ne bua kumusadila mene.” (Danyele 7:13, 14, NW) Mukalenge eu nnganyi? Bushuwa, Bible udi ubikila Yezu Kristo ne: “Muana wa muntu.” (Matewuse 12:40, MMM; Luka 17:26) Eyowa, Yehowa wakasungula Muanende, Yezu Kristo, bua ikale Mukalenge.

⁷ Yezu kêna ukokesha nkayende. Neikale ne bantu 144 000 “bakasumbibue pa buloba” bua kuikala bakalenge pamue nende ne bakuidi. (Buakabuluibua 5:9, 10; 14:1, 3, NW; Luka 22:28-30) Bakokedi ba Bukalenge bua Nzambi nebikale dîku dijima dia bukua-bantu badi bakokela bulombodi bua Kristo. (Musambu wa 72:7, 8) Nansha nanku, mmunyi mutudi mua kujadika ne: Bukalenge ebu nebubingishe bushuwa bumfumu budikadile bua Nzambi ne kuasulula mparadizu pa buloba buetu ebu?

BULELELA BUA DIKALAKU DIA BUKALENGE BUA NZAMBI

⁸ Fuanyikija ne: kapia nkoshe nzubu webe. Ne mulunda kampanda udi ne mushindu wa kuasa nzubu udi ulaya bua kukuambuluisha bua kuibakulula nzubu webe ne kufila biakudia bua dîku diebe. Pikala mulunda au utu ukuambila misangu yonso bulelela, kuakumuitabuja anyi? Tshinka ne: mu dipingana diebe ku mbelu ufumina ku mudimu dituku diakalonda, wakasangana bena mudimu bamane kutuadija kuumbusha bintu bivua bipie ne biakudia bimana kutuala bua dîku diebe. Kabiyi mpata, newikale ne dieyemena dijima se: kunyima kua matuku, malu kaakuakana patupu kadi nsombelu neapite mene wa kumpala bulenga.

⁹ Bia muomumue, Yehowa udi utupa dishindika dia bulelela bua dikalaku dia Bukalenge. Bu mudibi bileja mu mukanda wa mu Bible wa Ebelu, bitupa bivule bia Mikenji bivua mundidimbi wa ndongoluelu wa Bukalenge. (Ebelu 10:1) Bindidimbi bia mu tshiprofete bia Bukalenge bua Nzambi bivua kabidi bimueneke patoke mu bukalenge bua pa buloba bua Izalele. Katshivua mbulamatadi bu yonso, bualu bakokeshi bavua basomba pa “nkuasa [wa bumfumu, NW] wa Yehowa.” (1 Kulondolola 29:23) Kusakidila apu, biakambibua ne: “Dikombo kadiena diumbuka kudi Yuda, tshibangu tshia bukokeshi katshiena tshiumbuka munkatshi mua makasa ende, too ne palua Shilo; ne ditumikila dia bantu nedikale kudiye.” (Genese 49:10, NW)a Eyowa, Yezu, Mukalenge wa tshikondo tshionso wa mbulamatadi wa Nzambi, uvua ne tshia kuledibua mu mulongo wa bakalenge wa ndelanganyi ya Yuda.—Luka 1:32, 33.

¹⁰ Tshishimikidi tshia Bukalenge bua Nzambi bua Masiya tshiakajadikibua ne disungula dia bapostolo ba Yezu. (Efeso 2:19, 20; Buakabuluibua 21:14) Buobu ke bavua ba kumpala ba ku bantu 144 000 bavua ne tshia kukokesha mu diulu bu bakalenge pamue ne Yezu Kristo. Pavuabu pa buloba, bakokeshi pamue Yezu mu matuku atshilualua aba bavua ne tshia kuikala bantunga-mulongo mu kampanye ka bumanyishi, mu diumvuangana ne dîyi-dituma dia Yezu edi: “Ndayi . . . ne nuenze bantu ba mu bisamba bionso bayidi, nubatambuishe mu dîna dia Tatu, dia Muana ne dia spiritu munsantu.”—Matayo 28:19, NW.

¹¹ Dîyi-dituma dia kuenza bayidi didi mpindieu ditumikila mu bualabale bupite bikondo bishale. Bantemu ba Yehowa badi bamanyisha lumu luimpe lua Bukalenge pa buloba bujima, mu diumvuangana ne mulayi wa Yezu eu: “Lumu luimpe elu lua bukalenge nelumanyishibue pa buloba bujima budi buâsa, bu bujadiki bua bisamba bionso; ne pashishe nshikidilu nealue.” (Matayo 24:14, NW) Programe wa dishidimuna dinene udi ukumbajibua bu tshitupa tshia mudimu wa bumanyishi bua Bukalenge. Aba badi bakokela mikenji ne mêyi-maludiki a Bukalenge bua Nzambi mbamane kupeta ditalala ne buobumue bidi mbulamatadi ya bantu kayiyi mua kupetesha. Bionso ebi bidi bifila tshijadiki tshia patoke se: Bukalenge bua Nzambi mbualu bulelela!

¹² Yehowa wakambila bena Izalele ne: “Nudi bantemu banyi, . . . musadidi mene wanyi undi musungule.” (Yeshaya 43:10-12, NW) Yezu, “Ntemu Wa-Lulamatu,” wakamanyisha ne mitalu lumu luimpe lua Bukalenge. (Buakabuluibua 1:5, NW; Matayo 4:17) Nunku bidi biakanyine se: bamanyishi ba Bukalenge ba lelu bikale ne dîna dibapa kudi Nzambi dia Bantemu ba Yehowa. Kadi bua tshinyi Bantemu batu bapitshisha dîba divule nunku ne madikolela mu diakula ne bantu bakuabu pa bidi bitangila Bukalenge bua Nzambi? Badi benza nunku bualu Bukalenge ke ditekemena dimuepele bua bukua-bantu. Mbulamatadi ya bantu ikadi pa kufika ku nshikidilu wayi mu tshitupa tshîpi, kadi Bukalenge bua Nzambi kabuena ne nshikidilu. Yeshaya 9:6, 7 udi ubikila Mukokeshi wabu, Yezu, ne: “Mukelenge wa ditalala” ne udi usakidila ne: ‘Kuvudija kua bukokeshi buende ne kua ditalala kakuena kuikala ne nshikidilu.’ Bukalenge bua Nzambi kabuena bu mbulamatadi ya bantu—idiku lelu ne malaba bayitonkola. Bushuwa, Danyele 2:44 udi wamba ne: ‘Nzambi wa mu diulu neajadike bukalenge bukuabo budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabo, . . . ne buobu nebujalame tshiendelele.’

¹³ Mmukalenge kayi wa pa buloba udi mua kujikija mvita, dibunda dia bibawu, masama, biyole bia nzala, ne dipanga miaba ya kulala? Kupita apu, mmukokeshi kayi wa pa buloba udi mua kujula badi bafue? Bukalenge bua Nzambi ne Mukalenge wabu nebukumbaje malu aa. Bukalenge ebu kabuakudileja ne tshilema, bu mudi tshiamu tshia mudimu tshidi tshikengela kulongolola dîba dionso. Bishilangane, Bukalenge bua Nzambi nebulubuluke, bualu Yehowa udi ulaya ne: “Muaku udi upatuka mukana muanyi; kawena upingana kundi tshianana kauyi muanji kukumbaja tshindi musue, kauyi muenze bualu bundi muutumine.” (Yeshaya 55:11) Dilongolola dia Nzambi kadiakupangila to, kadi ntshikondo kayi tshivua bukokeshi bua Bukalenge ne bua kutuadija?

DIKOKESHA DIA BUKALENGE—MBUA TSHIKONDO KAYI?

¹⁴ “Mukalenge, udi ujadikulula bukalenge bua Izalele mu tshikondo ethi anyi?” Lukonko elu luela kudi bayidi ba Yezu luakasokolola ne: kabavua banji kumanya tshipatshila tshia Bukalenge bua Nzambi ne tshikondo tshijadika bua dikokesha diabu kutuadija. Ubadimuija bua kabikadi ne muoyo kulu kulu pa bualu ebu, Yezu wakamba ne: “Ki mbanupe bua kumanya bikondo ne bitshia bidi ku bukokeshi bua Tatu.” Yezu uvua mumanye se: bukokeshi buende pa buloba buvua buindija bua matuku atshilualua, kunyima kule kua dibiishibua diende ne dibanda mu diulu. (Bienzedi 1:6-11, NW; Luka 19:11, 12, 15) Mifundu yakadianjila kuleja bualu ebu. Mmushindu kayi?

¹⁵ Utela Yezu mu tshiprofete bu “Mukalenge,” Mukalenge Davidi wakamba ne: “Dîyi dia Yehowa kudi Mukalenge wanyi didi ne: ‘Somba ku diboko dianyi dia balume too ne pangateka baluishi bebe bu tshidiatshilu tshia makasa ebe.’ ” (Musambu wa 110:1, NW; fuanyikija ne Bienzedi 2:34-36.) Mulayi eu udi uleja ne: bukokeshi bua Yezu kabuvua ne tshia kutuadija diakamue kunyima kua dibanda diende mu diulu. Bishilangane, uvua ne tshia kuindila ku diboko dia balume dia Nzambi. (Ebelu 10:12, 13) Ntshikondo bule munyi tshivuaye ne tshia kutungunuka ne kuindila? Ntshikondo kayi tshivua bukokeshi buende ne tshia kutuadija? Bible udi utuambuluisha bua kupeta mandamuna.

¹⁶ Tshimenga tshimuepele pa buloba bujima muvua Yehowa muteke dîna diende tshivua Yeruzaleme. (1 Bakelenge 11:36) Tshivua kabidi tshimamuende wa bukalenge buanyisha kudi Nzambi pa buloba buvua tshimfuanyi tshia Bukalenge bua Nzambi bua mu diulu. Nunku, dibutudibua dia Yeruzaleme kudi bena Babilone mu 607 K.B.B. divua ne diumvuija dinene. Muanda eu uvua ntuadijilu wa diimanyika bua mutantshi mule dia bukokeshi bua buludiludi bua Nzambi pa tshisamba tshiende pa buloba. Siekele bu isambombo kunyima, Yezu wakaleja ne: tshikondo etshi tshia diimanyika dia bukokeshi katshivua tshianji kujika, bualu wakamba ne: “Yeruzaleme neadiatakajibue ku makasa kudi bisamba, too ne pakumbana bikondo bijadika bia bisamba.”—Luka 21:24, NW.

¹⁷ Mu “bikondo bijadika bia bisamba,” mbulamatadi ya mu bulongolodi ebu ivua milekelela bua yimanyike bukokeshi buanyisha kudi Nzambi. Tshikondo etshi tshiakatuadija ne dibutuka dia Yeruzaleme mu 607 K.B.B., ne Danyele wakaleja ne: netshitungunuke bua “bikondo muanda-mutekete.” (Danyele 4:23-25, NW) Bidi bule munyi? Bible udi uleja ne: “bikondo” bisatu ne tshitupa mmuomumue ne: matuku 1 260. (Buakabuluibua 12:6, 14) Bule bua lupolo elu buvudija misangu ibidi, peshi bikondo muanda-mutekete, nebikale matuku 2 520. Kadi muanda nansha umue wa mushinga kawakenzeka ku ndekelu kua lupolo elu luîpi alu lua tshikondo. Pa kutumika ne mbadilu wa: “dituku dimue mmuomumue ne tshidimu tshimue” mu mulayi wa Danyele ne kubadika bidimu 2 520 bituadijile ku 607 K.B.B., nunku tudi tufika mu tshidimu tshia 1914 B.B.—Dibadika 14:34, MMM; Yehezekele 4:6.

¹⁸ Yezu wakatuadija kukokesha mu diulu mu tshikondo atshi anyi? Tubingila tua mu Mifundu bua kujadika bualu ebu netufidibue mu nshapita udi ulonda. Bushuwa, dituadija kukokesha dia Yezu kadivua ne bua kutuala ditalala diakamue pa buloba to. Buakabuluibua 12:7-12 (NW) udi uleja ne: diakamue kunyima kua dipeta Bukalenge, Yezu uvua ne bua kuipata Satana ne ba-demon mu diulu. Ebi bivua ne tshia kumvuija diakabi bua buloba, kadi bidi bikankamija pa kubala ne: Diabolo udi anu ne “lupolo luîpi lua tshikondo.” Mu tshitupa tshîpi emu, netumone mua kusanka ki ng’amu bualu Bukalenge bua Nzambi budi bukokesha, apo kabidi bualu nebutuale mabenesha pa buloba ne kudi bantu bena ditumikila. (Musambu wa 72:7, 8) Mmunyi mutudi bamanye se: nebienzeke mu tshitupa tshîpi emu?

[Mêyi adi kuinshi]

TETA DIMANYA DIEBE

Bukalenge bua Nzambi ntshinyi, ne budi bukokesha kumbukila kuepi?

Nnganyi udi ukokesha mu Bukalenge ebu, ne mbanganyi badi bakokedi babu?

Mmunyi mudi Yehowa mutujadikile se: Bukalenge buende mbualu bulelela?

Ntshikondo kayi tshiakatuadija ne kujika “bikondo bijadika bia bisamba”?

[Nkonko ya dilonga]

1, 2. Mmunyi mudi mbulamatadi ya bantu midileje kayiyi mikumbanyine?

3. (a) Ntshinyi tshivua tshiena-bualu tshia bumanyishi bua Yezu? (b) Mmunyi mudi bamue bumvuija Bukalenge bua Nzambi?

4, 5. Bua tshinyi Yehowa wakasungula bua kuenza tshimuenekelu tshipiatshipia tshia bumfumu buende ku mutu kua bionso, ne netshikumbaje tshinyi?

6, 7. (a) Bukalenge budi penyi, ne nnganyi udi Mukalenge ne mbanganyi badi bakokeshi pamue nende? (b) Mbanganyi badi bakokedi ba Bukalenge ebu?

8, 9. (a) Mmunyi mutudi mua kufuanyikija dieyemenyibua dia malaya a Bukalenge bua Nzambi? (b) Bua tshinyi tudi mua kuikala bashindike ne: Bukalenge mbualu bulelela?

10. (a) Ntshikondo kayi tshiakajadikibua tshishimikidi tshia Bukalenge bua Nzambi bua Masiya? (b) Mmudimu kayi wa mushinga uvua bakokeshi pamue ne Yezu mu matuku atshilualua ne bua kuikadila bantunga-mulongo pa buloba?

11. Mmunyi mudi mudimu wa bumanyishi bua Bukalenge wenzeka lelu, ne ntshinyi tshidiwu ukumbaja?

12. (a) Bua tshinyi mbikumbanyine bua kubikila bamanyishi ba Bukalenge ne: Bantemu ba Yehowa? (b) Mmunyi mudi Bukalenge bua Nzambi bushilangane ne mbulamatadi ya bantu?

13. (a) Ng’imue ntatu kayi yajikija Bukalenge bua Nzambi bimpe? (b) Bua tshinyi tudi mua kuikala bajadike ne: malaya a Nzambi neakumbane?

14. Mmuenenu kayi wa ditupakana uvua nende bayidi ba Yezu pa bidi bitangila Bukalenge, kadi ntshinyi tshivua Yezu mumanye pa bukokeshi buende?

15. Mmunyi mudi Musambu wa 110:1 ufila butoke pa tshikondo tshivua Yezu ne tshia kukokesha?

16. Ntshinyi tshiakenzeka mu 607 K.B.B., ne mmunyi muvua muanda eu musuikakaja ku Bukalenge bua Nzambi?

17. (a) “Bikondo bijadika bia bisamba” ntshinyi, ne bivua bia lupolo bule munyi? (b) Ntshikondo kayi tshiakatuadija ne tshiakajika “bikondo bijadika bia bisamba”?

18. Ntshinyi tshiakenza Yezu diakamue kunyima kua dipeta bukokeshi bua Bukalenge, ne mbuenzeji kayi budi nabu muanda eu pa buloba?

[Kazubu mu dibeji 94]

IMUE MIANDA YA MUSHINGA IDI ITANGILA BUKALENGE BUA NZAMBI

• Yehowa udi umanyisha dilongolola diende dia kupatula “dimiinu” dikale ne bua kuboza mutu wa Nyoka, Satana Diabolo.—Genese 3:15, NW.

• Mu 1943 K.B.B., Yehowa udi uleja ne: “dimiinu” edi nedikale kankanunuina ka Abrahame.—Genese 12:1-3, 7, NW; 22:18.

• Tshiovo tshia Mikenji tshipesha bena Izalele mu 1513 K.B.B. tshivua tshipetesha “mundidimbi wa malu malenga atshivuavua.”—Ekesode 24:6-8; Ebelu 10:1, NW.

• Bukalenge bua Izalele bua pa buloba mbutuadije mu 1117 K.B.B., ne mbutungunuke kunyima mu mulongo wa ndelanganyi ya Davidi.—1 Samuele 11:15; 2 Samuele 7:8, 16.

• Yeruzaleme udi ubutudibua mu 607 K.B.B., ne “bikondo bijadika bia bisamba” bidi bituadija.—2 Bakelenge 25:8-10, 25, 26; Luka 21:24, NW.

• Mu 29 B.B., Yezu udi wedibua manyi bu Mukalenge-Musungula ne udi utuadija mudimu wende pa buloba.—Matayo 3:16, 17; 4:17; 21:9-11.

• Mu 33 B.B., Yezu udi ubanda mu diulu, mudiye windila ku diboko dia balume dia Nzambi too ne padi bukokeshi buende butuadija.—Bienzedi 5:30, 31; Ebelu 10:12, 13.

• Yezu udi ubanjijibua mu nkuasa mu Bukalenge bua mu diulu mu 1914 B.B. pakajika “bikondo bijadika bia bisamba.”—Buakabuluibua 11:15.

• Satana ne ba-demon bende badi bedibua panshi ku mpenge ya buloba ne badi batuala diakabi divule kudi bukua-bantu.—Buakabuluibua 12:9-12.

• Yezu udi ulombola bumanyishi bua pa buloba bujima bua lumu luimpe lua Bukalenge bua Nzambi.—Matayo 24:14; 28:19, 20.