Bantemu ba Yehowa: bamuangalaji balelela ba evanjeliyo
1 Yezu Kristo wakambika bayidi bende bonso bujitu bua kumuangalaja evanjeliyo, pa kubambila nangananga bua kumanyisha lumu luimpe lua Bukalenge. (Mat. 24:14; Bien. 10:42) Pa bualu ebu, bayidi bende ba kumpala bakafila tshilejilu mu diakula bua Bukalenge kabayi bapungila, kabiyi anu mu miaba ya ntendelelu, kadi kabidi miaba yonso ivuabu bapeta bantu, miaba ya patoke ne ku nzubu ne ku nzubu. (Bien. 5:42; 20:20) Lelu’eu, tuetu Bantemu ba Yehowa, tudi tudileja mutudi bamuangalaji balelela ba evanjeliyo ku diyisha mukenji wa Bukalenge mu matunga 232 ne ku bungi bua batismo budi bupite muliyo mujima wa bayidi bapiabapia mu bidimu bisatu patupu! Bua tshinyi mudimu wetu wa dimuangalaja evanjeliyo udi ulubuluka mushindu’eu?
2 Tudi basankisha kudi lumu luimpe: Bamuangalaji ba evanjeliyo mbayishi, anyi batuadi ba mukenji, ba lumu luimpe. Bikale nunku, tudi ne muabi kawuyi ditua mushinga wa kumanyisha Bukalenge bua Yehowa, lumu luimpe lumu’epele lulelela ludi bukua-bantu bufinakaja mua kupeta. Tudi tusanka bikole pa kudianjila kumanya ne: mu Mparadizu utshilualua diulu dipiadipia nedikokeshe ne buakane pa buloba bupiabupia buenza ne bantu ba lulamatu. (2 Pet. 3:13, 17) Tudi anu nkayetu badi ne ditekemena edi ne tudi ne dijinga dikole dia kudimanyisha bakuabu.
3 Dinanga dilelela didi ditusaka: Dimuangalaja evanjeliyo mmudimu wa lupandu. (Lomo 1:16) Ke bua tshinyi tudi tumvua disanka dikole dia kumuangalaja mukenji wa Bukalenge. Mutudi bamuangalaji balelela ba evanjeliyo, tudi banange bantu netu, ke tshidi tshitusaka bua kumanyisha lumu luimpe mu dîku dietu, kudi bena mutumba, kudi bamanyangana nabu ne kudi bakuabu bantu batudi mua kupeta. Kuenza mudimu eu ne anyima wetu mujima mmushindu mutambe buimpe wa kuleja dinanga dilelela ditudi nadi bua muntu netu.—1 Tes. 2:8.
4 Spiritu munsantu wa Nzambi udi utuambuluisha: Dîyi dia Nzambi didi ditujadikila ne: patudi tukuna ne tumiamina mâyi pa mamiinu a Bukalenge, Yehowa ke ‘udi udiundisha.’ Ke tshitudi tumona menemene tshienzeka mu bulongolodi lelu’eu. (1 Kol. 3:5-7) Spiritu wa Nzambi ke udi utukuatshisha mu midimu yetu ya dimuangalaja evanjeliyo ne utuambuluisha bua kupatula bipeta bitambe buimpe.—Yoe. 2:28, 29.
5 Mu dilama mu lungenyi dikankamija difila mu 2 Timote 4:5 (NW), dia ‘kuenza mudimu wa mumuangalaji wa evanjeliyo’ ne mu dikala ne dinanga bua muntu netu, tuikalayi ne dijinga dia kumanyisha mu bikondo bionso lumu luimpe lua Bukalenge lua disanka, batuishibue ne: Yehowa neatungunuke ne kubenesha mudimu wetu!