‘Yehowa udi mukuatshishi wanyi’
1 Pavua Yezu muambike bayidi bende ba kumpala bukenji bua kuyisha, wakabambila ne: “Ndi nnutuma bu mikoko munkatshi mua mibuabua.” (Mat. 10:16, Mukanda wa Mvidi Mukulu) Bua nunku, bakumvua buôwa ne kudikandabu bua kuyisha anyi? Tòo. Bakaleja mmuenenu wakalua Paulo kumvuija bena nkristo nende pashishe ne: ‘Tudi tuamba ne dikima ne: [“Yehowa,” NW] udi mukuatshishi wanyi; tshiena ntshina. Muntu neangenzele tshinyi?’ (Eb. 13:6) Bavua ne disanka dia kumona babapetula bua dîna dia Yezu, ne bakatungunuka kabayi bapungila ne dilongesha ne dimanyisha lumu luimpe.—Bien. 5:41, 42.
2 Lelu’eu, bumanyishi buenza pa buloba bujima budi mu tshitupa tshiabu tshia ndekelu. Anu bu muakadianjila Yezu kuamba, bisamba bionso bidi netu lukuna. (Mat. 24:9) Bumanyishi budi butuilangana ne buluishi, badi babupetula ne babukandika mene mu imue miaba ya pa buloba. Bu katuyi ne ditabuja, tuvua mua kuikala ne buôwa. Kadi, dimanya dia se: Yehowa udi mukuatshishi wetu ne se: udi utupesha bukole didi dikolesha dipangadika dietu dia kunanukila.
3 Kuikala ne dikima mmumue ne: kuikala ne bukole, ne didibamba ne bukitu. Nkubengangane ne ditshina, buôwa ne bukata. Bayidi ba Yezu batu misangu yonso dijinga ne dikima bua kutantamana. Bidi bitukengela kuikala ne dikima bua bikadilu ne bienzedi bia bulongolodi budi buluisha Nzambi kabitukokeshi. Bidi bitukankamija bua kuela meji pa tshilejilu tshilenga tshia Yezu, wakatshimuna bulongolodi ebu! (Yone 16:33) Tuvuluke kabidi bapostolo bakamba ne dikima pakatuilanganabu ne mateta ne: ‘Butudi nabu mbua kutumikila mêyi a Nzambi kumpala kua mêyi a bantu.’—Bien. 5:29.
4 Katuena ba ku badi balukila tshianyima: Tudi ne bua kudienzeja bua kulama mmuenenu muimpe wa mudimu wetu. (Eb. 10:39) Katupu muoyo nansha kakese ne: Yehowa ke udi ututuma bua dinanga diende ne luse luende bua bukua-bantu bujima. Katu ulomba basadidi bende bua benze bualu budi kabuyi ne tshipatshila tshia mushinga nansha. Bionso bitudi ne bua kuenza nebikale ndekelu wa bionso bua diakalenga dia badi banange Nzambi.—Lomo 8:28.
5 Mmuenenu muimpe wa malu neatuambuluishe bua kutungunuka ne kukeba mu teritware wetu bantu badi bafuane mikoko. Netuikale mua kumona kalèngù kaleja kudi bantu bu tshijadiki tshia disuyibua diabu ne dipanga ditekemena. Tuenze bua dinanga dituvuije bumvuidianganyi ne bena lutulu! Musangu wonso utudi tushiya mukanda anyi tujingulula dijinga nansha dikese dia kumanya bivule, tudi ne bua kuikala ne tshipatshila tshia kuenza pa lukasa dikumbulula bua kusonsola dijinga adi. Katuena ne bua kuela mpata bua makokeshi etu a kutuadija dilonga dia Bible anyi a kudilombola. Kadi, dîba dionso tudi ne bua kulomba mu disambila dikuatshisha ne bulombodi bua Yehowa, batuishibue se: neatukuatshishe.
6 Tudi bajadike se: Yehowa neafikishe mudimu ku ndekelu kuawu. (Tangila Filipoi 1:6.) Yehowa udi mukuatshishi wetu, ne dieyemena dietu dijima kudiye didi ditukolesha bua “katu[p]angi mu kuenza kua malu mimpe.”—Gal. 6:9.