Bikala dileja kampanda dipatula bipeta, tumika nadi!

¹ Mudimu wetu wa Bukalenge utu pa tshibidilu utuleja mbuelelu kabukabu bua buambi, bitu bitupesha ngenyi mipiamipia bua kujula dijinga dia kumanya bia bungi pa mukenji wa Bukalenge. Pamu’apa ngondo yonso tutu tuenza madikolela bua kulonga umue anyi mivule ya ku mbuelelu eyi. Kadi, bamanyishi badi mua kumona se: dîba didibu anu batumika misangu mikese ne mbuelelu umue, nimero mupiamupia wa Mudimu wetu wa Bukalenge udi upatula mikuabu. Bushuwa, kakuena mushindu wa muntu yonso kulonga mbuelelu mupiamupia padiyi kayi muanji kukuata mu lungenyi eu wa kumpala.

² Ku lukuabu luseke, binunu bia bampanda-njila ne bamanyishi bakuabu batu bafila mêba mavule mu buambi. Kabidi, bisumbu bivule bitu bijikija teritware yabi mu mbingu mikese. Mu nsombelu ya mushindu’eu, bamanyishi badi ne disanka dia kuikala ne mishindu mipiamipia ya kutuadija diyuki ne bantu ne ngenyi mipiamipia bua kufila mukenji. Ebi bidi bibambuluisha bua kudiakaja. Mudimu wabu udi kabidi ujula ntema, upatula bipeta, ne nunku badi ne mushindu wa kutshimuna ntatu idibu bapeta.

³ Nansha biobi munyi, bituikala balongolole mbuelelu kampanda udi wambuluisha bimpe bua kujula dijinga dia kumanya bia bungi mu mushindu udi upatula bipeta, nenku tutungunuke ne ditumika nende! Kabiena bikengela bua kulekela kutumika ne dileja kampanda dilenga padidi dipatula bipeta. Tshidibi, tumuakaje ne mukanda utudi tufila ngondo eu. Mu diambulula ngenyi mifila ya mu Mudimu wetu wa Bukalenge, tukebe malu a mushinga atudi tujinga kubueja mu mbuelelu wetu.

⁴ Nunku, patudi tupeta nimero mupiamupia wa Mudimu wetu wa Bukalenge, tuvuluke ne: maleja adimu adi anu ngenyi mifila patupu. Bituikala mua kutumika nawu, mbimpe bitambe. Kadi bituikala ne mbuelelu udi upatula bipeta mu teritware wetu, nunku tutumike nende! Tshidi ne mushinga ‘ndikumbaja tshishiki mudimu wetu’ mu mushindu mutambe buimpe, mu dikeba badi bawakanyine ne mu dibambuluisha bua kuluabu bayidi.​—2 Tim. 4:5, NW.