Dikumbula dìdì mua kuikala dibenesha
1 Zakayo wakakidila Yezu ne disanka dionso bu muenyi mu nzubu muende. Ne dikumbula edi diakamueneka dibenesha bushuwa!—Luka 19:2-9.
2 Lelu’eu, bu mudi Yezu Kristo muikale Mfumu wa tshisumbu, udi ulombola bakulu bua ‘kulama tshisumbu tshia mikoko ya Nzambi.’ (1 Pet. 5:2, 3; Yone 21:15-17) Kusakidila ku dilongesha mu bisangilu ne difila tshilejilu mu mudimu wa budimi, bakulu ba mu bisumbu badi bafila ne dinanga dionso diambuluisha dia nsungasunga kudi muntu ne muntu mu tshisumbu. Pa nanku, ku musangu ne ku mukuabu, udi mua kutekemena bua kupeta ditabalela dia kudi bakulu, nansha bikala ku nzubu kuebe, ku Nzubu wa Bukalenge, panudi nupatuka pamue mu buambi anyi mu bikondo bikuabu. Udi ne bua kutshina bua makumbula a bakulu anyi? Nansha kakese. Padi bakulu bakukumbula kabiena biumvuija ne: kudi bualu bubi kampanda buudi muenze nansha. Nenku, dikumbula dia bulami didi ne tshipatshila kayi?
3 Paulo wakamba ne: uvua ne dijinga dia kukumbula bana betu bua ‘kumona né bavua munyi.’ (Bien. 15:36) Eyowa, bu mudibu balami ba dinanga, bakulu badi baditatshisha bikole bua kumanya muudi. Mbasue kukupetesha dikuatshisha dia mu nyuma didi mua kuikala ne diambuluisha ne diibaka. Ditabalela dia nsungasunga dia mushindu eu ke didi Mulami wetu wa dinanga Yehowa musue bua yonso wa kutudi apete.—Yeh. 34:11.
4 Itaba makumbula a bakulu ne disanka: Tshipatshila tshia Paulo mu dikumbula bana babu tshivua tshia ‘kubamanyisha dimue dipa dia muoyo, ne kubakankamika; bua buobu kukoleshangana ku muoyo.’ (Rm 1:11, 12, MMM) Buonso buetu tudi tukengela dikankamija dia mu nyuma mu matuku makole aa a ku nshikidilu, ne tudi ne dijinga dia diambuluisha bua kutungunuka ne dienda bashindame mu ditabuja. Diandamuna diebe dimpe ku dikumbula dia bulami nedikufikishe kakuyi mpata ku dikoleshangana ku muoyo.
5 Anyisha bipeta bimpe bivule bidi bifumina ku mudimu wa bulami wa bakulu. Bikalaku bualu kampanda anyi lukonko ludi lukutatshisha, vuluka ne: bakulu badiku mu tshisumbu bua kuambuluisha. Kuelakanyi bua kuyukila nabu pa bualu kayi buonso budi mua kuikala bulenga dikala-bimpe diebe mu nyuma to. Anyisha ndongoluelu eu wa dinanga wa Yehowa, ne peta disanka mu mabenesha adi dikumbula dia nunku mua kutuala.