Tudi mua kuenza malu mapite bunene
1 Mu mudimu wa Yezu Kristo muvua malu a pa buawu. Wakadiisha mu tshishima binunu bia bantu, kuondapa ba bungi ku masama, ne kujula bamue ku lufu. (Mat. 8:1-17; 14:14-21; Yone 11:38-44) Mudimu wende wakakoka ntema ya tshisamba tshijima. Kadi, dilolo dia ndekelu kumpala kua lufu luende, wakambila balondi bende ba lulamatu ne: “muntu udi ungitaba, neenze pende malu andi meme ngenza aa. Neenze too ne mapite bunene.” (Yone 14:12) Mmunyi mutudi mua kuenza malu “mapite bunene”?
2 Pa kulenga teritware mupite bunene: Mudimu wa Yezu uvua muimanyine anu mu Palestine, pabi bayidi bende ba kumpala bavua batumibue bua kuyisha too ne ‘ku mfudilu kua buloba,’ kule kupita tshitupa tshivua Yezu muine muyishe. (Bien. 1:8) Mudimu wa diyisha wakatuadijaye udi mpindieu wenzeka miaba yonso, wenzeka mu matunga 232. (Mat. 24:14) Udiku wenza mudimu muebe muonso mu teritware mukosela tshisumbu tshienu anyi?
3 Pa kuyisha bantu ba bungi: Yezu wakashiya bayidi bakese bua kutungunukabu ne mudimu wa diyisha. Kadi, bu tshipeta tshia diyisha diabu dia lukunukunu mu dia Pentekoste wa 33 B.B., aba bakitaba bulelela ne kutambula dituku adi bavua batue ku bantu binunu bisatu. (Bien. 2:1-11, 37-41) Disangisha dia aba ‘badi badiakaje bimpe bua muoyo wa kashidi’ nditungunuke too ne mu tshikondo tshietu etshi, mudi bantu batue ku 1 000 batambula dituku dionso. (Bien. 13:48, NW) Udiku wenza muebe muonso bua kufika kudi bantu ba mitshima milulame miaba kayi yonso idibu mua kuikala ne kulondakaja ne lukasa luonso dijinga diabu dia kumanya bivule anyi?
4 Pa kuyisha tshikondo tshipite bule: Mudimu wa Yezu pa buloba wakenza anu bidimu bisatu ne tshitupa. Ba bungi ba kutudi tudi bayishe kukadi mutantshi mule kupita apu. Katuyi tutangila bule bua tshikondo tshiatulekelabu bua kutungunuka ne mudimu eu, tudi ne dianyisha dia kuambuluisha muyidi mupiamupia yonso bua kubuelaye mu njila udi ufikisha ku muoyo. (Mat. 7:14) Udiku ne bia bungi bia kuenza ngondo yonso mu mudimu wa Mukalenge anyi?—1 Kol. 15:58.
5 Tudi mua kulama dieyemena dia se: ne ditukuatshisha dia Yezu, netuenze malu mapite bunene bu bayidi bende balelela.—Mat. 28:19, 20.