Butekete bua bantu budi butumbisha bukole bua Yehowa

“Muntu yonso uvua wela meji ne: mvua ministre eu wa ku dîba ne ku dîba muena disanka ne wa luya. Mvua misangu yonso muntu uvua wambuluisha bakuabu mu ntatu yabu. Nansha nanku, mvua ndiumvua mu tshikondo tshimuetshimue atshi bu se: mvua ngenda mfua mundamunda. Ngenyi milubakaji ne buôwa bua mu tshieledi tshia lungenyi bivua bilela tshipeta tshibi kundi. Ngakatuadija kudiumvua mudilamune kudi bantu. Mvua musue anu kushala mu bulalu kumbelu. Munkatshi mua ngondo mivule, ngakalomba Yehowa bua andekele mfue.”​—Vanessa.

BU MUDI tshilumbu tshitela kuulu eku, bidi anu bualu bua pa tshibidilu bua se: mu bikondo kampanda basadidi ba Yehowa nebumvue bipeta bia dikala ne muoyo mu “bikondo bikole mua kupita nabi” ebi. (2 Timote 3:1, NW) Bamue mene badi mua kulua batekeshibue ku muoyo. (Filipoi 2:25-27) Padidi dilunguluke, ditekeshibua mu mikolo didi mua kutuiba bukole buetu, bualu Bible udi wamba ne: “Biwateketa [p]alua dituku dia dikenga, bukole buebe budi buke[p]a.” (Nsumuinu 24:10) Eyowa, patudi tuteketa mu maboko, tudi tukengela bukole​—pamu’apa mene tshivua mupostolo Paulo mubikile ne: “bukole budi bupite bua pa tshibidilu.”​—2 Kolinto 4:7, NW.

Yehowa Nzambi udi mpokolo wa bukole bukena ndekelu. Ebi mbilelela patudi tutangila bifukibua biende. (Lomo 1:20) Tshilejilu, tangila dîba. Buloba budi bulama bungi bushindame bua chevaux-vapeur butue ku miliyare 240 000 idi yumbukila ku dîba. Pabi, bungi ebu budi buleja anu bu tshitupa tshimuepele mu miliyare ibidi ya bungi bua bukole bupatula kudi dîba. Ne dîba ndikese padidi difuanyikija ne mitoto idi mimanyike bu ya mpolondo. Munkatshi muayi mudi mutoto wa Rigel, umue wa mu kasumbu ka mitoto ka Orion, udi misangu 50 mutamba dîba dietu edi ku bunene ne upatula bukole bua bungi kupita bua dîba misangu 150 000!

Mufuki wa mpokolo ya bukole ya mu diulu bu nunku udi mene ne bua kuikala ne “dikanda dia bungi ne bukole bupite.” (Yeshaya 40:26, MMM; Musambu 8:3, 4) Bushuwa, muprofete Yeshaya wakamba ne: Yehowa “kena uteketa nansha, kena u[p]ungila nansha.” Ne Nzambi mmusue kuabanyangana bukole buende ne bonso badi, bua butekete bua bantu, badiumvua batekete. (Yeshaya 40:28, 29) Mushindu udiye wenza bualu ebu mmuleja mu tshilumbu tshia mupostolo muena nkristo Paulo.

Mua kupita ne mateta

Paulo wakambila bena Kolinto bua tshipumbishi tshivuaye ne bua kutantamena. Wakatshibikila ne: “dieba mu mubidi.” (2 Kolinto 12:7) “Dieba” edi divua mua kuikala lutatu lua makanda a mubidi, pamu’apa bukepele bua lumonu. (Galatia 4:15; 6:11) Peshi Paulo uvua mua kuikala utela bapostolo ba dishima ne banyangakaji bakuabu bakatutubija bupostolo buende ne mudimu wende. (2 Kolinto 11:5, 6, 12-15; Galatia 1:6-9; 5:12) Nansha bu diodi mua kuikala tshinyi, “dieba mu mubidi” edi diakabungamija Paulo bikole, ne wakasambila misangu milondangane bua kumbukadi.​—2 Kolinto 12:8.

Kadi, Yehowa kakafila diandamuna ku dilomba dia Paulo. Bishilangane, wakambila Paulo ne: “Bulenga buanyi bukena bunuakanyine mbukukumbane.” (2 Kolinto 12:9, NW) Yehowa uvua umvuija tshinyi ku bualu ebu? Ee, patudi tutangila nsombelu wa kale wa Paulo wa dikengesha bena nkristo, mu mishindu yonso bivua anu bua bulenga bukena butuakanyine pavuaye mua kuikala ne malanda ne Nzambi​—nansha disadila dine bu mupostolo!a (Fuanyikija ne Zekâya 2:8; Buakabuluibua 16:5, 6.) Yehowa uvua mua kuikala muambile Paulo ne: disanka dia kuikala muyidi divua ‘dikumbane.’ Kadivua mua kuikala dishindikija kudi diumbusha mu tshishima dia ntatu yende ya mu nsombelu. Bushuwa, imue ntatu idi mene mua kulua bu tshipeta tshia masanka a mudimu masakidila. (2 Kolinto 11:24-27; 2 Timote 3:12) Mu mishindu yonso, Paulo uvua anu ne bua kutantamena “dieba [diende divua] mu mubidi.”

Nansha nanku, Yehowa kavua mulekele Paulo kakuyi luse. Kadi, wakamuambila ne: “Bukole buanyi budi bukumba[j]ibua tshishiki mu butekete.” (2 Kolinto 12:9) Eyowa, Yehowa ne dinanga dionso uvua mua kupetesha Paulo bukole bua mua kupita ne nsombelu wende. Nenku, “dieba [dia Paulo divua] mu mubidi” diakalua tshitembelu. Diakamulongesha bua kueyemena bukole bua Yehowa pamutu pa buende yeye. Bushuwa Paulo wakalonga tshishiki dilongesha edi, bualu panyima pa bidimu wakafundila bena Filipoi ne: “Mu nsombelu kayi yonso mundi, ndi mulonge bua kuikala mudikumbanyine. Ndi ne bukole mu malu onso ku diambuluisha dia eu udi umpesha bukole.”​—Filipoi 4:11, 13, NW.

Bidi munyi buebe wewe? Utu utantamena umue mushindu wa “dieba mu mubidi,” pamu’apa disama peshi nsombelu kampanda udi ukulelela kanyinganyinga anyi? Bikalabi nanku, kolesha muoyo. Padi eku Yehowa kayi mua kumbusha mu tshishima tshipumbishi etshi, udi mua kukupetesha meji ne bukole bua mua kupita natshi mu ditungunuka diebe ne kuteka bipatshila bia Bukalenge pa muaba wa kumpala mu nsombelu webe.​—Matayo 6:33.

Bikala masama peshi bukulakaje bikupangisha bua kukumbaja bivule mu mudimu wa Buena-nkristo bu muudi musue, kupangidi ditekemena. Pamutu pa kumona diteta diebe bu didi diteka mikalu mu mudimu webe mukuatshila Yehowa, uditangile bu tshikondo tshia kudiundisha dieyemena diebe kudiye. Uvuluke kabidi ne: mushinga wa muena nkristo utu upimibua, ki nku bungi bua bidiye wenza mu mudimu, kadi ku ditabuja diende ne buondoke bua dinanga. (Fuanyikija ne Mâko 12:41-44.) Kunanga Yehowa ne anyima webe mujima kudi kumvuija ne: udi umusadila bilondeshile bukole buebe buonso buudi nabu​—ki mbua bukole bua muntu mukuabu.​—Matayo 22:37; Galatia 6:4, 5.

Bikala “dieba [diebe dia] mu mubidi” dikonga nsombelu kampanda wa dibungama, bu mudi lufu lua munanga kampanda, ulonde mubelu eu wa mu Bible: “Upuila Yehowa nkayende bujitu buebe, ne yeye nkayende neakukuatshishe. Kakulekela nansha kakese bua muntu muakane kutenkakanaye.” (Musambu 55:22, NW) Mukaji kampanda muena nkristo udi ne dîna se: Sylvia wakenza nanku. Mu lupolo lua bidimu bikese tshianana, wakajimija bayende mu lufu panyima pa bidimu 50 bia dibaka ne kabidi bena dîku bakuabu tshitema​—kukonga ne bankana bende batekete babidi. “Bu bikala kabuyi bua Yehowa,” ke mudi Sylvia wamba, “mvua mua kubungama mu mushindu ukena kukokesha. Kadi ndi mupete busambi bunene mu disambila. Ndi ntungunuka ne diyukidilangana dia munanunanu ne Yehowa. Ndi mumanye se: udi umpesha bukole bua kutantamena.”

Ndishindika kayipu dia kumanya se: “Nzambi wa busambi buonso” udi mua kupesha aba badi babungame bukole bua kutantamena! (2 Kolinto 1:3; 1 Tesalonike 4:13) Mu dijingulula muanda eu, tudi mua kumvua nkomenu wa Paulo pa bualu ebu. Wakafunda ne: “Ke pandi nsanka mu butekete buanyi, mu bipendu, mu makenga, mu malu makole ne mu ntatu indi ngumvua bualu bua Kristo; bualu pandi ne butekete ke pandi ne bukole.”​—2 Bena Korente 12:10, MMM.

Mua kupita ne mapanga bupuangane

Buonso buetu tudi bapiane dipanga bupuangane kudi baledi betu ba kumpala. (Lomo 5:12) Bu tshipeta, tudi mu mvita ne majinga a mubidi wa mpekatu. Mmunyipu mudibi bitekesha ku muoyo bua kumanya se: ngikadilu ya “muntu au wa kale” mmitambe kuikala ne buenzeji kutudi kupita mutuvua bele meji! (Efeso 4:22-24) Mu bikondo bu ebi tudi mua kumvua bu muakumvua mupostolo Paulo, wakafunda ne: ‘Ndi nsanka munda muanyi bua mikenji ya Nzambi, kadi ndi mona mukenji mukuabu mu mubidi wanyi udi uluangana ne mukenji wa mu meji anyi, ne udi umbueja mu bupika bua mukenji wa bubi udi mu mubidi wanyi.’​—Lomo 7:22, 23.

Apa kabidi, tudi mene mua kubabidila bukole bua kudi Yehowa. Paudi wenza madikolela bua kuluisha butekete buebe, kulekedi nansha kakese kutangila kudiye mu disambila, ukeba ne muoyo mujima dilekelela bilema diende kakuyi kutangila bungi bua misangu iudi ne bua kumulomba bua bualu bumuebumue abu. Bua bulenga buende bukena butuakanyine, Yehowa, “udi uteta mitshima” ne udi mua kumona buondoke bua muoyo mululame webe, neakupeteshe kuondo ka muoyo kakezuke. (Nsumuinu 21:2) Ku diambuluisha dia spiritu wende munsantu, Yehowa udi mua kukupesha bukole bua kubangulula mvita ne matekete a mubidi.​—Luka 11:13.

Tudi tukengela kabidi bukole bua kudi Yehowa patudi tuakama mapanga bupuangane a bakuabu. Tshilejilu, muena nkristo netu udi mua kutuamba ‘mêyi a tshiakulakula adi atapa bu muele wa mvita.’ (Nsumuinu 12:18) Ebi bidi mua kututapa bikole ku muoyo, nangananga bikalawu afumina kudi muntu kampanda utudi bamanye se: udi ne bua kuikala mujadike bubi bua tshienzedi tshiende. Tudi mua kulua bapampakajibue bikole. Bamue mbatumike mene ne bilema bu nunku bu kabingila bua kumbuka kudi Yehowa​—tshilema tshitamba bionso!

Kadi, mmuenenu wa nkatshinkatshi neatuambuluishe bua kuangata matekete a bakuabu mu mushindu muimpe. Katuena mua kutekemena bupuangane kudi bantu bapange bupuangane. “Kakuena muntu udi kayi wenza malu mabi,” ke mudi muena meji Solomo utuvuluija. (1 Bakelenge 8:46) Arthur, muena nkristo muela manyi wakasadila Yehowa ne bulamatshi munkatshi mua bidimu bitue ku makumi muanda-mutekete, wakabambisha ne: “Matekete mu basadidi netu adi atupesha mushindu wa kuteta muoyo-mutoke wetu kudi Nzambi, ateta bukitu buetu bua Buena-nkristo. Bitualekela bidi bantu bamba anyi benza bibuelakana ne disadila dietu dia Yehowa, tudi tusadila bantu. Kabidi, bana betu badi pabu ne bua kunanga Yehowa. Bituakeba anu tshidi tshimpe mu buobu, tudi tumona mu katupa kîpi bua se: ndekelu wa bionso ki mbantu babi nansha.”

Bukole bua kuyisha

Kumpala kua kubanda mu diulu, Yezu wakambila bayidi bende ne: “Nenupete bukole panutulukila spiritu munsantu, ne nenuikale bantemu banyi mu Yeruzaleme ne mu Yudeya mujima ne mu Samariya ne mu bitupa bia kulekule bia buloba.”​—Bienzedi 1:8, NW.

Mu dikumbana dia mêyi a Yezu, mudimu eu udi mpindieu wenjibua kudi Bantemu ba Yehowa mu matunga 233 pa buloba bujima. Badi bapitshisha mu tshi-bungi tshiabu, mêba mapite pa muliyare tshidimu tshionso bambuluisha bakuabu bua kupeta dimanya dia Yehowa. Dikumbaja mudimu eu kaditu dipepele misangu yonso nansha. Mu amue matunga mudimu wa diyisha Bukalenge mmukandikibue anyi mmukepesha. Tangila kabidi, badi benza mudimu eu​—bantu batekete, bapange bupuangane, yonso wa kudibu udi ne yende ntatu ne tuende tunyinganyinga. Kadi mudimu udi anu utungunuka, ne bu tshipeta, mu bidimu bisatu bishale ebi, bantu bapite pa muliyo mujima bakatshipa mioyo yabu kudi Yehowa e kuleja diditshipa diabu ku batismo wa mu mâyi. (Matayo 28:18-20) Bushuwa, mudimu eu udi wenda wenjibua anu ku bukole bua Nzambi. Yehowa wakamba ku butuangaji bua muprofete Zekâya ne: “Kabiena bua bungi bua masalayi, anyi bua bukole, kadi mbua [“spiritu,” NW] wanyi.”​—Zekâya 4:6.

Biwikala mumanyishi wa lumu luimpe, udi ne tshiebe tshitupa​—kakuyi ditangila muditshi tshimueneka bu tshikese—​mu dikumbana edi dinene. Kakuyi ditangila bua ‘meba’ audi ne bua kutantamena, udi mua kushindika ne: Yehowa kakupua muoyo ‘mudimu webe ne dinanga diwakaleja bua dîna diende.’ (Ebelu 6:10) Nenku utungunuke ne kueyemena Mpokolo wa bukole buonso bua tshikandi bua kupeta dikuatshisha. Uvuluke ne: tudi mua kutantamena anu bua bukole bua Yehowa; bukole buende mbuvuija bupuangane mu matekete etu.

[Mêyi adi kuinshi]

[Tshimfuanyi mu dibeji 26]

Muulu adi ajadika bukole bua Yehowa

Mudimu wa diyisha udi wenzeka anu ku bukole bua Yehowa