Lupandu tshidilu lumvuija bushuwa

‘UDI mupande anyi?’ Misangu ya bungi, aba batu bela lukonko elu badi bela meji ne: mbapande bualu ‘mbitabe Yezu bu Musungidi wabu nkayabu.’ Pabi bakuabu badi bela meji ne: kudi njila mishilangane bua kupeta lupandu ne se: bu mudi ‘Yezu mu mutshima webe,’ mitabuja ne ekleziya webe kabiena ne bualu.

Bible udi wamba ne: disua dia Nzambi didi se: “bantu bonso basungidibue.” (1 Timote 2:3, 4) Nenku lupandu ludiku bua aba bonso baluanyisha. Kadi kupanduka kudi mene kumvuija tshinyi? Kudi bushuwa tshintu kampanda patupu tshidi tshikufikila mu dienza madikolela makese peshi kakuyi tshintu tshienza anyi?

Muaku “lupandu” udi umvuija “bupikudi ku njiwu anyi kabutu.” Lupandu lulelela ludi lumvuija bivule kupita ditukija dia mu tshieledi tshia lungenyi. Ludi lumvuija kupanda ku kabutu ka ndongoluelu eu mubi wa malu ne ndekelu wa bionso ku lufu luine! Kadi, nnganyi mene wikala Nzambi mua kupandisha? Bua kuandamuna, tukonkononayi tshiakalongesha Yezu pa bualu ebu. Bipeta bia dikonkonona dietu bidi mua kukukemesha.

Lupandu​—Ludi mu bitendelelu bionso anyi?

Umue musangu, Yezu uvua uyukila ne mukaji mukuabu muena Samariya. Nansha muvuaye kayi muena Yuda, wakitaba bimpe ne: Masiya uvua ne bua kulua, eu ‘udibu babikila ne: Kristo.’ (Yone 4:25) Ditabuja bu edi divuaku dikumbane bua kupandaye anyi? Tòo, bualu, ne dikima dionso Yezu wakambila mukaji eu ne: “Nudi nutendelela tshinudi kanuyi bamanye.” Yezu uvua mumanye se: bua mukaji eu kupetaye lupandu, uvua ne bua kuakaja mushindu wende wa ntendelelu. Pa nanku Yezu e kumvuija ne: “Kadi dîba nedilue, didiku katataka mene, diatendelela batendeledi balelela Nzambi [“ne spiritu ne,” NW] bulelela; Tatu udi ukeba bantu ba nunku bamutendelele.”​—Yone 4:22, 23.

Musangu mukuabu wakasokolola Yezu mmuenenu wende pa lupandu uvua utangila Bafarizeyi, kasumbu kende lumu ka malu a Nzambi a Buena-Yuda. Bafarizeyi bavua bajadike mushindu kampanda wa ntendelelu ne bavua bela meji ne: Nzambi uvua wanyisha mushindu au. Kadi teleja mêyi a Yezu mambila Bafarizeyi: ‘Nuenu bena lubombo, bulelela, Yeshaya wakamba bualu buenu ne: Bantu aba badi bannemeka ne mishiku yabu, kadi mitshima yabu kayena kundi, idi kule. Badi bantendelela tshianana, badi bayisha bantu diyisha dia mikenji ya bantu.’​—Matayo 15:7-9.

Tuambe tshinyi bua bisumbu bivule bia ntendelelu bidi biamba lelu’eu mudibi bitabuja Kristo? Yezu uvuaku mua kubianyisha bionso bu njila mianyishibue bua kufika ku lupandu anyi? Mu muanda eu katuena ne tshia kufuikakaja, bualu Yezu wakamba patoke ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye utu wenza bu mudi Tatu wanyi udi mu diulu musue. Dituku adi bantu ba bungi nebangambile ne: Mukalenge, Mukalenge, katuena bambile bantu bualu buebe mu dîna diebe, anyi? Katuena bumushe ba-demon mu dîna diebe, anyi? Katuena benze malu a kukema a bungi mu dîna diebe, anyi? Dituku adi nembambile ne: Tshiakunumanya; umukayi kundi, nudi benji ba malu mabi.’​—Matayo 7:21-23.

Dimanya dijalame dia Yezu ndia mushinga mukole bua kupeta lupandu

Mêyi aa a Yezu adi ne mumvuija adi elesha meji. Adi aleja ne: balondi ba ntendelelu bavule badi bapangila bua ‘kuenza mudi Tatu musue.’ Nenku, mmunyi mudi muntu mua kupeta lupandu lulelela? Timote wa kumudilu 2:3, 4 (NW), udi wandamuna ne: “Disua [dia Nzambi] ndia se: bantu ba mishindu yonso bapande ne bafike ku dimanya dijalame dia bulelela.”​—Fuanyikija ne Kolosai 1:9, 10.

Dimanya bu edi didi ne mushinga wa bungi bua kupeta lupandu. Pavua mulami wa buloko muena Lomo mukonke Paulo ne muinende Silase ne: ‘Bundi nabu mbua kuenza tshinyi bua kusungidibua?’ bakamuandamuna se: ‘Itabuja Mukalenge Yezu, neusungidibue ne ba mu nzubu muebe.’ (Bienzedi 16:30, 31) Abi bivua biumvuija ne: tshionso tshivua mulami wa buloko au ne bua kuenza pamue ne dîku tshivua anu tshia kuikala ne nyanji kampanda mu mitshima yabu anyi? Tòo, bua kabingila kamue, bushuwa kabavua mua ‘kuitabuja Mukalenge Yezu’ anu bu buobu bikale ne ngumvuilu kampanda pa Yezu, tshivuaye, biakenzaye ne biakalongeshaye.

Tshilejilu, Yezu wakalongesha dijadika dia ‘bukalenge bua Nzambi’​—mbulamatadi wa mu diulu. (Luka 4:43) Yeye kabidi wakumvuija patoke mêyi-maludiki a nsombelu ne ngikadilu muimpe wa Buena-nkristo. (Matayo, nshapita 5-7) Wakaleja mmuenenu uvua bayidi bende ne bua kuangata bua malu a tshididi. (Yone 15:19) Wakateka programe wa dilongesha dia buloba bujima ne kupesha balondi bende mudimu wa kudituamu. (Matayo 24:14; Bienzedi 1:8) Eyowa, ‘kuitabuja Yezu’ kuvua kumvuija dijingulula dia bintu bia bungi! Nanku, kabiena bikemesha muvua Paulo ne Silase ‘bambile [mulami wa buloko] dîyi dia Mukalenge ne bonso bakadi mu nzubu muende,’ kumpala kua bena kuitabuja aba bapiabapia kutambulabu.​—Bienzedi 16:32, 33.

Dimanya dijalame dia Nzambi didi kabidi dia mushinga mukole

Tshitupa tshia mushinga tshia ditabuja Yezu dilelela tshidi tshitangila ditendelela Nzambi udi Yezu nkayende utendelela. Yezu wakasambila ne: “Etshi tshidi tshiumvuija muoyo wa kashidi, dipeta diabu dia dimanya diebe wewe, Nzambi umuepele mulelela, ne dia eu uwakatuma, Yezu Kristo.”​—Yone 17:3, NW.

Mu mudimu wende wa pa buloba, Muana wa Nzambi uvua misangu yonso utuma ntema kudi Tatuende, ne ki nkudi yeye nkayende nansha. Kavuaku muanji kudiamba muvuaye Nzambi Wa-Bukole-Buonso. (Yone 12:49, 50) Misangu ya bungi Yezu wakaleja patoke muaba wende mu dilongolola dia Nzambi pa kuamba ne: uvua mushadile kudi Tatuende. (Luka 22:41, 42; Yone 5:19) Ee, Yezu wakamba ne: “Tatu udi muntambe meme.” (Yone 14:28) Ekleziya webe mmukulongeshe malanda malelela pankatshi pa Nzambi ne Kristo anyi? Peshi mmukufikishe ku ditaba ne: Yezu muine ke Nzambi Wa-Bukole-Buonso? Lupandu luebe ndusuikakaja ku dipeta dia ngumvuilu mujalame.

Mu disambila dia Tatu wetu, Yezu wakabela bayidi bende bua kusambila ne: “Dina diebe ditumbe.” (Matewuse 6:9, MMM) Nkudimuinu mivule ya Bible mmibuitshidije dîna dia Nzambi, pa kudikudimuna ne: “Mukalenge.” Kadi mu kopi ya kale ya “Dipungila Dikulukulu,” dîna dia Nzambi divua dimueneka misangu mipite pa binunu bisambombo! Tudi tubala nenku mu Musambu 83:18: ‘Mbua bamanye biabu ne: wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’ (Disendamija miaku ndietu.) Mbakulongeshe bua kutumika ne dîna dia Nzambi, Yehowa anyi? Biobi kabiyi nanku, lupandu luebe ludi mu njiwu, bualu ‘yonso watela dîna dia [“Yehowa,” NW] neasungidibue’!​—Bienzedi 2:21; fuanyikija ne Yoele 2:32.

Ne spiritu ne bulelela

Yezu Kristo kabidi wakatuma ntema ku Bible, Dîyi dia Nzambi. Pavuaye umvuija mmuenenu wa Nzambi pa amue malu, uvua misangu ya bungi wamba ne: “Bakafunda [dîyi] ne.” (Matayo 4:4, 7, 10; 11:10; 21:13) Butuku bua kumpala kua kufuaye, Yezu wakasambila bua bayidi bende ne: ‘Ubajidile mu bulelela, dîyi diebe mbulelela.’​—Yone 17:17.

Dikala ne ngumvuilu muimpe wa malongesha a mu Bible, Dîyi dia Nzambi, mbualu bukuabu bua mushinga bua kupeta lupandu. (2 Timote 3:16) Anu Bible ke udi wandamuna ku nkonko bu mudi: Muoyo udi ne diumvuija kayi? Bua tshinyi Nzambi mmulekele bubi butungunuka mutantshi mule? Ntshinyi tshidi tshienzekela muntu padiye ufua? Nzambi udi bushuwa ukengesha bantu mu inferno wa kadilu anyi? Ntshinyi tshidi dilongolola dia Nzambi bua buloba?a Muntu kêna mua kutendelela Nzambi mu mushindu muakane kakuyi ngumvuilu mujalame wa malu aa, bualu Yezu wakamba ne: “Batendeledi balelela nebatendelele Tatu [“ne spiritu ne,” NW] bulelela.”​—Yone 4:23.

Ditabuja didi disaka ku dienza

Lupandu ludi lumvuija bivule kupita dipeta patupu dia mamanyisha kampanda. Dimanya dijalame dia Nzambi didi dipatula ditabuja mu mutshima wa ditaba. (Lomo 10:10, 17; Ebelu 11:6) Ditabuja dia nunku didi disaka muntu ku dienza. Tshilejilu, Bible udi udimuija ne: ‘Kudimunayi mitshima yenu, andamukayi kabidi, bua mibi yenu ijimijibue; bua bikondo bia kunukankamija bifume ku mêsu kua Mukalenge.’​—Bienzedi 3:19.

Eyowa, lupandu ludi kabidi lumvuija dikala ne nsombelu mumvuangane ne mêyi-makulu a Nzambi a ngikadilu ne nsombelu wa tshitembu. Ku buenzeji bukudimunyi bua Dîyi dia Nzambi, bibidilu bia kale bia mu nsombelu bia kushima ne kusuikangana ku masela bidi bishila bululame ne bulelela muaba. (Tito 2:10) Udi ulekela bilele bia buendenda, bu mudi diangatangana dia bena bitupa bia lulelu bimue, masandi a basele ne a bajike, ne upingaja pa muaba wabi ngikadilu mupeluke ne wa tshitembu. (1 Kolinto 6:9-11) Bualu ebu ki ndidikanda dia tshitupa tshîpi dishindamene pa mpampakenu, kadi ndishintuluka didi dishala kashidi ne difumina ku dilonga dia lubatshi ne ditumikila dia Dîyi dia Nzambi.​—Efeso 4:22-24.

Pashishe, dinanga ne dianyisha bua Nzambi bidi bisaka muntu muena mutshima mululame bua kuenza diditshipa dia tshishiki kudi Nzambi ne kuleja diditshipa edi mu batismo wa mu mâyi. (Matayo 28:19, 20; Lomo 12:1) Bena nkristo batambule mbapande ku mêsu kua Nzambi. (1 Petelo 3:21) Mu kabutu katshilualua ka bulongolodi ebu bubi, Nzambi neabapandishe bonso pa kubakuba munkatshi mua dikenga adi.​—Buakabuluibua 7:9, 14.

Tshidi lupandu mua kumvuija buebe wewe

Ku diambuluisha dia diyukidilangana dikese edi mbitoke bua se: dipeta lupandu didi diumvuija bivule kupita ‘kuikala ne Mukalenge mu mutshima webe.’ Didi diumvuija dipeta dia dimanya dijalame dia Yehowa Nzambi ne Yezu Kristo ne dienza mashintuluka adi akengedibua mu nsombelu wetu. Dienza nenku didi mua kumueneka bu didi dikuatshisha buôwa, kadi Bantemu ba Yehowa mbadiakaje bua kukuambuluisha mu madikolela aa. Ku diambuluisha dia dilonga dia Bible dia ku nzubu kakuyi difutu, badi mua kukuambuluisha bua utuadije kuendela mu njila udi ufikisha ku lupandu lua bushuwa.b

Pa kutangila disemena dia dituku dia dilumbuluisha dia Nzambi didi dilua kumpala, dienza nenku nditambe kuikala dia mitalu kupita bikondo bikuabu bionso! Mpindieu ke dîba dia kuteleja mêyi a muprofete a se: ‘Diambedi mukenji kauyi muanji kukola, diambedi dituku kadiyi dianji kupita lubilu bu mudi bisote bipepuka, diambedi tshiji tshikole tshia Yehowa katshiyi tshianji kufika kunudi; diambedi dituku dia tshiji tshia Yehowa kadiyi dianji kufika kunudi. Kebayi Yehowa, nuenu bena kalolo bonso ba pa buloba, badi batumikila mikenji yende; kebayi buakane, kebayi kalolo; bumue nebanusokoke mu dituku dia tshiji tshia Yehowa.’​—Sefanya 2:2, 3.

[Mêyi adi kuinshi]

[Kazubu mu dibeji 6]

Lupandu ludi lufumina ku . . .

◻ Dipeta dia dimanya dijalame dia Nzambi ne Yezu.​—Yone 17:3.

◻ Dileja dia ditabuja.​—Lomo 10:17; Ebelu 11:6.

◻ Dinyingalala ne dikudimuka.​—Bienzedi 3:19; Efeso 4:22-24.

◻ Diditshipa ne batismo.​—Matayo 16:24; 28:19, 20.

◻ Ditungunuka ne kuenza dijikula dia patoke.​—Matayo 24:14; Lomo 10:10.

[Bimfuanyi mu dibeji 7]

Dilonga Bible, ditumikila bitudi tulonga, diditshipa, ne batismo mbidia bidi bifikisha ku lupandu