Dishintulula bungi bua mêba malomba bampanda-njila
1 Tudi tuanyisha bonso mudimu mukole udi bampanda-njila ba pa tshibidilu ne bambuluishi benza mu tshisumbu. Nansha padi teritware muikale mukese ne benzelamu mudimu bikole pa tshibidilu, bampanda-njila badi bafila tshilejilu tshimpe tshia lukunukunu mu mudimu wa Bukalenge. Badi bakankamija bamanyishi bonso bua batungunuke ne kudifila mu dikeba aba badi “badiakaje bimpe.”—Bien. 13:48, NW.
2 Société mmumone ne: bampanda-njila badi batuilangana ne ntatu mivule, nangananga bua kupeta mudimu wa mêba makese udi mua kubambuluisha bua kukumbaja mudibi bikengela majinga abu ne kushala mu mudimu wa ku dîba ne ku dîba. Kabidi, mu matunga a bungi, anu bua nsombelu mukole udiku mpindieu, bidi bitamba kukolela bamanyishi bakuabu bua kubuela mu mulongo wa bampanda-njila, nansha mudibu ne dijinga dikole bua mudimu eu. Bavua batabalele ne ntema malu aa ne makuabu kabidi mu ngondo mishale eyi.
3 Nunku, Société udi ukepesha bungi bua mêba a bampanda-njila ba pa tshibidilu ne bambuluishi. Kutuadijila mu tshidimu tshia 1999, bungi bua mêba malomba bampanda-njila ba pa tshibidilu nebuikale 70 ku ngondo, mmuomumue ne: bungi busanga bua mêba 840 ku tshidimu. Bungi bua mêba malomba bampanda-njila bambuluishi ku ngondo nebuikale 50. Ki mbashintulule bua bampanda-njila ba pa buabu ne ba-misionere to, bualu Société mmulongolole bua kubapetesha mushindu wa kukumbaja majinga abu a nshindamenu. Nunku badi mua kutamba kudifila tshishiki mu mudimu wa kuyisha ne kuenza bayidi.
4 Tudi batekemene se: dishintulula edi dia bungi bua mêba nediambuluishe bampanda-njila ba bungi bua batungunuke mu mudimu wabu mulenga wa mushinga mukole. Ebi nebikale kabidi ne bua kupetesha bamanyishi ba bungi mushindu wa kulua bampanda-njila bambuluishi anyi ba pa tshibidilu. Ndibenesha kayipu bunene dikalaku bua muntu yonso mu tshisumbu!