Tudi balongesha kudi Yehowa
1 Ku bulombodi bua Nzambi, kudi mpindieu ndongamu wa dilongesha pa buloba bujima mu matunga 233. Kakuena tshintu tshidi bukua-panu mua kutupesha tshitudi mua kufuanyikija ne ndongamu eu to. Yehowa, Mulongeshi wetu Munene, udi utulongesha mua tuetu kuikala ne diakalenga mpindieu ne utushidimuna bua tupete muoyo wa kashidi.—Yesh. 30:20; 48:17.
2 Bilongelu bia dishidimuna dia Nzambi: Tuanji kumona bilongelu bidiku matuku aa bua kuambuluisha bantu ba Yehowa. Kalasa ka Mudimu wa Teokrasi, kalombola lumingu luonso mu bisumbu bipite pa 87 000, kadi kambuluisha bamanyishi ba Bukalenge miliyo mivule bua bikale ba-ministre bakumbane ba lumu luimpe. Ukadi mudifundishemu anyi? Udi umue wa ku binunu bia aba bavua babuele mu Kalasa ka Mudimu wa Bumpanda-njila ka mbingu ibidi anyi? Pamu’apa mudibu bakepeshe bungi bua mêba malomba bampanda-njila ba pa tshibidilu nebiambuluishe bantu ba bungi bua kulua bampanda-njila ne kudiakaja bua kubuela mu kalasa aka. Kalasa ka Dilongesha Mudimu ka ngondo ibidi, kalombola mpindieu mu miakulu minene pa buloba bujima, kadi kashidimuna bakulu ne basadidi ba mudimu badi bajike bua kuambulabu majitu manene a teokrasi. Mu bimue bikondo, bakulu bonso ne basadidi ba mudimu batu bapeta dishidimuna dia pa buadi mu Kalasa ka Mudimu wa Bukalenge.
3 Mu nzubu ya Tulasa tua Watchtower ku Patterson, mu New York, mudi bilongelu bisatu bia pa buabi, bidi bifila dishidimuna dia Nzambi dibandile. Dilongesha dia ngondo itanu difila mu Gilada, Tshilongelu tshia Bible tshia Watchtower didi dilongolola ba-ministre bua mudimu wa bu-misionere mu madimi a ku babende. Bena mu Komite ya Filiale ya pa buloba bujima batu babuela mu kalasa ka ngondo ibidi ka dilonga bulongolodi bua filiale. Mu Lumungulu tshidimu etshi mbatuadije dilongesha dipiadipia dia ngondo ibidi bua batangidi bena ngendu ne kalasa ka ntuadijilu kavua ne balongi 48 bafumine mu États-Unis ne mu Canada. Basadidi ba Yehowa bonso badi bafika ku dipeta masanka a bungi mu dishidimuna didi Yehowa ufila mu bilongelu bishilashilangane ebi.
4 Balongesha bua tshipatshila kayi? Muena mu Kasumbu Kaludiki umue wakamba ne: “Ndongamu wetu wa dilongesha udiku mpindieu mmulongolola bua kufikisha bantu bonso ba Yehowa muaba wonso udibu ku dikala bapie bimpe bu mudi Nsumuinu 1:1-4 uleja.” Yehowa atungunuke ne kupesha yonso wa kutudi “ludimi lua bantu balongesha.”—Yesh. 50:4, NW.