Mishindu ya kualabaja mudimu webe
1 Kukadi kupite bidimu 40, tshiena-bualu etshi: “Ke muebe muonso muudi mua kuenza anyi?” tshiakapatuka mu Tshibumba tshia Nsentedi tshia dia 15 Tshiongo 1955 (Angl.). Tshivua tshileja mu bulenga buonso mushindu udi bantu ba Yehowa mua kutamba kuenza madikolela muntu ne muntu bua kuvudija mudimu wabu wa Bukalenge. Mubelu muimpe eu udi kabidi ne mushinga lelu’eu, mu ditungunuka ne kuenza muetu muonso bua kulengeja ngenzelu wa mudimu.
2 Ngenzelu wetu mujima wa mudimu udi ne bua kuikala muenzeja kudi dîyi-dituma ditambe bunene edi: “Udi ne bua kunanga Yehowa Nzambi webe ne mutshima webe wonso ne anyima webe yonso ne tshieledi tshiebe tshia lungenyi tshionso ne bukole buebe buonso.” (Mâko 12:30, NW) Tudi tuleja dinanga dietu dijima bua Yehowa pa kubenga kupitshisha mpunga yonso itudi tupeta bua kutuma kumpala mudimu wende wa Bukalenge. Tangila mishindu idi ilonda eyi iudi mua kualabaja mudimu webe.
3 Ambula bujitu buebe: Bana betu ba balume badi badilambule badi mua kudienzeja bua kukumbaja malu malomba bua kulua basadidi ba mudimu ne pashishe bua kusadila bu bakulu. Biena-bualu bibidi ebi: “Udi wipatshila anyi?” ne “Udi mukumbaje malu malomba bua kusadila anyi?,” bipatula mu Tshibumba tshia Nsentedi tshia Kabitende 1990 mu Tshiluba, biakasaka bana betu ba bungi ku didiakaja bua kuambula majitu mu tshisumbu. Konka bakulu ba mu tshisumbu tshienu bua kupeta mibelu pa mushindu wa kuipatshila ne kukumbaja malu malomba.
4 Bakulu ne basadidi ba mudimu badi bajike mbalombibue bua kuela meji bikole bua kulomba dibuela mu Kalasa ka Dilongesha Mudimu. Udi mua kumanya malu adi atangila kalasa aka pa kubala mikanda mileja mu Index wa 1986-1995, wa 1996 ne wa 1997, muinshi mua tshiena-bualu: “École de formation ministérielle” (Kalasa ka Dilongesha Mudimu). Udiku mumone ‘tshiibi tshinene tshia mudimu’ etshi tshiunzulula kumpala kuebe anyi? (1 Kol. 16:9a) Bana betu ba bungi bakapitshila mu tshiibi etshi kabavuaku banji kuela meji bua masanka a mudimu avua mabindile ku luseke lukuabu. Badi mpindieu benza mudimu ku Betele anyi mu budimi bikale bampanda-njila ba pa buabu, ba-misionere anyi batangidi ba bijengu.
5 Ipatshila mudimu wa ku dîba ne ku dîba: Bansonga bakadi bajikije tulasa tua bikadilu, ba-mamu ba nzubu, ne muntu yonso ukadi mupete pansio badi ne bua kuela meji bimpe bua bumpanda-njila. Balulula tshisakidila tshia Mudimu wetu wa Bukalenge wa Tshimungu 1998, pashishe uyukile ne bampanda-njila bavua ne nsombelu bu webe. Bidi mua kuenzeka ne: udiumvue musakibue bua kualabaja mudimu webe pa kuenza bumpanda-njila, anu bu mudibu benza. (1 Kol. 11:1) Kudiku mushindu wa wewe kuvudija mudimu webe ne kufika ku dienza mêba 70 ku ngondo bua kumona mua kusadila bu mpanda-njila wa pa tshibidilu anyi?
6 Bana betu bapite pa 17 000 badi mpindieu basadila ku biro bia filiale ne nzubu ya Betele pa buloba bujima. Mudimu wetu wa Bukalenge wa Kabitende 1995 udi ukonkonona malu adi malombibue bua kuenza mudimu eu. Bua tshinyi kubenga kubala tshiena-bualu atshi bua kumona né udi mua kukumbaja malu malomba bua disanka dia mudimu edi dia pa buadi dia kusadila ku Betele?
7 Sadila muaba udi dijinga ditambe bunene: Udi musombele mu teritware muenzela mudimu bikole anyi mudi bana betu bikale ba bungi ne bakuatshishangana mu mudimu eu anyi? Ukadiku muele meji pa bualu bua kualabaja mudimu webe pa kuya muaba udi dijinga ditambe bunene anyi? Pamu’apa bidi mua kuikala mu musoko wa pabuipi udi dijinga ne bena mudimu ba bungi. (Mat. 9:37, 38) Kuena ne bua kuangata dipangadika edi kuyi muanji kuela meji to. Bidi bikengela kuela meji ne muoyo mujima. (Luka 14:28-30) Yukila ne bakulu ne mutangidi wa tshijengu pa nsombelu webe. Nenuele meji pamue bua kumona bikalabi bia meji bua wewe kumuangala mpindieu anyi kudilongolola bua kumuangala kunyima. Biwajinga kufundila Société bua kulomba muaba uudi mua kuya, udi ne bua kutuma mukanda webe pamue ne mukanda mutua tshiala kudi bena Komite wa Mudimu wa Tshisumbu tshienu.
8 Lengeja ngikadilu wa mudimu webe: Pamu’apa tudi bonso mua kudifila bikole mu mudimu pa kulengeja ngikadilu wa mudimu wetu wa buambi. Utuku udifila mu bitupa bionso bia mudimu, pa kubala bumanyishi bua ku nzubu ne ku nzubu ne bua mu mpukapuka kabidi ne makumbulula ne malonga a Bible anyi? Biwikala ulombola dilonga, udiku mua kulengeja ndongeshilu webe anyi? Nebikale bimpe bua kubalulula tshisakidila tshia Mudimu wetu wa Bukalenge wa Kashipu 1996 bua kumona ngenyi mifila iudi mua kukuata nayi mudimu bua kusaka balongi bebe ku didilambula ne batismo.
9 Ngenyi ya bungi pa mishindu ya kualabaja ne kulengeja mudimu wetu idi mu nshapita wa 9 mu mukanda wa Mudimu wetu. Bushuwa buonso buetu tudi ne bua kujinga kuenza muetu muonso mu mudimu wa Nzambi. Bua tshinyi kubenga kuela meji bikole pa bipatshila biebe bia mu nyuma? Enza mudibu batulomba mu 1 Timote 4:15 ne: ‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso.’