Mandamuna ku nkonko yenu
▪ Mmunyi mudi baledi ne bua kuikala badimuke padi bana babu batekete bapatuka mu mudimu wa buambi?
Baledi bena Kristo batu bapatuka bimpe ne bana babu mu buambi, babibidija bua kuyisha bakuabu lumu luimpe lua Bukalenge. Mu dienza nunku, bidi bikengela balame dîsu kudi bana babu batekete bua njiwu idi mua kubenzekela mu teritware, nansha bikale muaba wa “bukubi bukole.” Misangu mivule, batu bakengesha bana ne babanyanga bu mudiku divulangana dia lukuka ne tshiendenda tshia masandi mu “bikondo bikole” ebi mutudi. (2 Tim. 3:1-5, NW) Baledi badi ne bua kudianjila kuangata amue mapangadika ne budimu ne mu mushindu muakanyine bua kukuba bana babu ku bantu badi mua kubenzela bibi. Ntshinyi tshidibu mua kuenza?
Bible udi ufila mibelu ya meji eyi: tuikale badimuke ne tudianjile kuela meji bua njiwu idi mua kulua. (Nsu. 22:3; Mat. 10:16) Lungenyi ludi muaba eu ki ndua kuela mikenji to, kadi bidi bia meji bua muledi anyi mukulumpe mukuabu kufila muana padiye upatuka mu buambi. Bikala bansonga bamanyishi babidi bakadi mua kudienzela malu bapatuka pamue, bidi bia meji bua muledi anyi muntu mukulumpe mukuabu ikale ubatangila dîba dionso. Bushuwa, padi muana ukola ne ukumbana bua kudiangatshila mapangadika, baledi badi mua kujadika bikalabu mua kukepesha butangidi buabu.—Tangila kabidi Mandamuna ku nkonko yenu mu Mudimu wetu wa Bukalenge wa Luishi 1993.
Bidi kabidi bia meji bua kutabalela misangu yonso bukubi patudi mu mashinyi ne patudi tuenda. Kudianjila kuangata mapangadika ne budimu kudi kutuepula misangu mivule ku njiwu ne ku bisama bidi bibungamija, ku ditula dia makuta bua luondapu, ne ku dibunda bilumbu mu bukua panu bûle ne malu mabi budi butunyunguluke.
Mbiakanyine bua bansonga ‘batumbishe dîna dia Yehowa.’ (Mus. 148:12, 13) Mêyi abu malenga ne bikadilu biabu bimpe padibu mu buambi bidi bikemesha bikole bakuabu ne biambika Yehowa lumu. Baledi, ambuluishayi bana benu mu mishindu yonso bua kudifilabu pa tshibidilu mu dimanyisha lumu luimpe, anu bu munudi kabidi ne budimu bua kubakuba ku njiwu kayi yonso idi mua kumueneka!