Utu utangila anu mmuenekelu patupu anyi?
1 Patudi mu mudimu wetu wa buambi, lungenyi luetu lua kumpala bua bantu kampanda ludi mua kuenza ne: tuelakane bua kubamanyisha lumu luimpe. Tshilejilu, ntshinyi tshiudi mua kuenza bikala muntu kampanda ukuosha dîsu dia luonji misangu yonso iudi uya kukumbula muena mutumba nende uvua muleje dijinga dia kumanya bulelela? Muanetu wa bakaji kansanga uvua muikale mpanda-njila wakapetangana ne nsombelu wa nunku ne wakapangadija bua kuya kudi muntu au ne kuakula nende. Muntu au wakamuela muoyo mupange bukalanga. Kadi, bualu bua dikema, muntu eu wakateleja mukenji wa mu Bible ne wakitaba ne lukasa bua kulonga. Mushindu wakamueneka bua muntu eu ne mukajende kulongabu bulelela amu bualu muanetu wa bakaji eu kavua mutangile anu mmuenekelu patupu to.
2 Muanetu wa bakaji mukuabu wakanji kutshina pakamonaye nsongalume uvua ne nsuki mile. Kadi wakasuminyina ne dimuyisha kakese kakese misangu yonso ivuaye ulua mu magazen muvuaye wenza mudimu. Madikolela ende akakuama mamuma, ne nsongalume eu ukadi mpindieu Ntemu mutambule. Ntshinyi tshiatuepula ku dikoma ne lukasa ne: bantu ba nunku kabakuitaba?
3 Tulondayi tshilejilu tshia Yezu: Yezu uvua mumanye ne: uvua ne bua kufila muoyo wende bua muntu yonso. Nunku, kavua ulekela mmuenekelu wa bantu umupangisha mua kuakula nansha. Uvua mumanye ne: nansha bantu bavua bende lumu lubi bua nsombelu wabu bavua mua kuanyisha bua kuandamuka bikalabu bapete diambuluisha diakanyine ne dieeedi disaka ku dienza malu. (Mat. 9:9-13) Wakambuluisha babanji ne bapele. (Mat. 11:5; Mâko 10:17-22) Katuikadi ne meji kampanda bua bantu batudi tupetangana nabu mu buambi anu bua mmuenekelu wabu, tubuita ku mêsu ne tupanga kumona tshidi mua kuikala ngikadilu muimpe wa mutshima. (Mat. 7:1; Yone 7:24) Ntshinyi tshidi mua kutuambuluisha bua kulonda tshilejilu tshia pa buatshi tshia Yezu?
4 Mu dilonga dietu dia Bible, tudi bafike ku dimanya ne: Dîyi dia Nzambi didi ne bukokeshi bua kuandamuna ngelelu wa meji wa muntu, bikadilu ne bumuntu buende. (Ef. 4:22-24; Eb. 4:12) Bua nanku, tudi ne bua kuikala ne mmuenenu muimpe wa malu ne kushiya bionso bidi bishala mu bianza bia Yehowa, Yeye udi umona mu mitshima ya bantu.—1Sam. 16:7; Bien. 10:34, 35.
5 Dimanyisha dietu dia lumu luimpe kadiyi kansungasunga kudi bantu ba mishindu yonso, katuyi tutangila mmuenekelu wabu, dituambuluishe mu mudimu munene wa dinowa mu matuku a ku nshikidilu aa.—1 Tim. 2:3, 4.