Utu bushuwa wanyisha mabenesha a Yehowa anyi?

KENICHI, muntu wa bukole bukumbane, wakaya mu nzubu wa disumbishila manga bua kupeta buanga bua tshimpumpu. Pakanuaye buanga ebu, wakatuadija kumvua disansakana dikole ne wakatala mabuba mubidi mujima. Kabiyi bikemesha, Kenichi wakatuadija kuela mpata bikala musumbishi wa manga eu uvua muteye ntema miakanyine ku bivuaye ukengela.

Bamue badi mua kuela meji bua Yehowa Nzambi mu mushindu wa muomumue uvua Kenichi muangate musumbishi wa manga eu. Badi bela mpata ne: Nzambi wa-bukole-buonso, Yehowa, kêna bushuwa uditatshisha bua muntu ne muntu wa kutudi. Nansha mudibu bitaba ne: Nzambi udi muimpe, ki mbatuishibue bua se: udi ututabalela muntu pa nkayende. Ebi mbilelela nangananga padi malu abu kaayi enda bimpe anyi padi ntatu mikole imueneka panyima pa dilamata diabu ku mêyi-maludiki a mu Bible. Bua dipanga busunguluji, badi bamona ntatu yabu bu disansakana dikole dia mubidi ne ditala mabuba biakapeta Kenichi mu mushindu kauyi mutekemena, bienze bu se: mu mushindu kampanda Nzambi mmuenze tshilema.​—Nsumuinu 19:3.

Katuena mua kufuanyikija Yehowa ne bantu bapange bupuangane. Bantu badi ne mikalu mu dimanya ne mu makokeshi. Batu bapangila kusunguluja tshishiki bidi bakuabu bakengela bushuwa, bu muakenza musumbishi wa manga eu kudi Kenichi. Bishilangane, kakuena tshintu tshidi tshisokoma ku mêsu a Yehowa. Yehowa utu misangu mivule utuambuluisha katuyi tusunguluja ne tujingulula muanda au bualu tutu anu batangile ku dimona bitudi katuyi nabi ne ku dilengulula mabenesha mavule atudi nawu. Pamutu pa kudiula Yehowa lukasalukasa bua ntatu yonso itudi tupeta, tudi ne bua kuteta mua kusunguluja mabenesha a kudi Yehowa atudi nawu.

Bilondeshile nkonga-miaku kampanda (Webster’s Ninth New Collegiate Dictionary), tudi mua kumvuija “dibenesha” bu “tshintu tshidi tshifikisha ku diakalenga anyi dikala bimpe.” Udi wanyisha ne: ebi mbilelela nangananga bua mabenesha a kudi Yehowa anyi?

Mukumbaji wa bitudi tukengela kayi kuelekeja

Padi mukaji kampanda wamba ne: bayende udi mukumbaji muimpe wa bidibu bakengela, pa tshibidilu utu usua kumvuija ne: udi utabalela biakane bidi dîku dikengela, upetesha biakudia bikumbane, muaba wa kulala, ne bilamba bua diakalenga ne dikala bimpe dia bena dîku. Mmunyi mudi Yehowa muikale muimpe bu Mukumbaji wa bitudi tukengela? Tangila bimpe dibulunge dietu dia Buloba, tshisombedi tshia bantu. Didi mutantshi wa kilometre 150 000 000 ne dîba, ntanta muakane menemene bua luya anyi mashika makumbane bua muoyo kuikalawu pa buloba. Disendama dia degré 23,5 dia dibulunge dietu ndienza mu mushindu mupuangane, difikisha ku mivu mishilashilangane idi yambuluisha bua kunowa bintu bivulavulayi. Bu tshipeta, buloba budi budiisha bantu bapite pa miliyare itanu. Yehowa udi bushuwa Mukumbaji wa kuanyina wa bitudi tukengela!

Kabidi, Bible udi utujadikila ne: Yehowa udi uditatshisha bikole bua bualu buetu ne bua dikala bimpe dietu muntu ne muntu. Anji kuela meji, Yehowa mmumanye ku dîna mutoto wonso wa mu miliyare mivule idiku, ne nansha mushamusha umue kawena upona panshi yeye kayi mumanye. (Yeshaya 40:26; Matayo 10:29-31) Mmunyipu mudiye utamba kutabalela bantu badi bamunange ne bavua basumba ku mashi a mushinga mukole a Muanende munanga Yezu Kristo! (Bienzedi 20:28) Muena meji wakamba bimpe ne: “Dibenesha dia Yehowa​—ke didi divuija muntu mubanji, ne kêna usakidilaku bisama.”​—Nsumuinu 10:22, NW.

Mabenesha àdì atuvuija babanji

Tudi bikale ne tshintu kampanda tshia mushinga mubandile tshitudi ne bua kuikala ne dianyisha diondoke bua bualu buatshi. Ntshinyi atshi? Bible udi utshileja padiye wamba ne: “Mikenji ya mukana muebe idi i[p]ita bitu[p]a binunu bia biamu bia or ne bia argent kundi.” (Musambu 119:72; Nsumuinu 8:10) Nansha mudi ngolo mulenga mua kuikala ne mushinga mukole, mikenji ya Yehowa nya kutamba kujinga bikole. Dimanya dijalame dia mikenji yende pamue ne bujinguludi ne busunguluji bidi Yehowa upesha badi bakeba bulelela ne muoyo umue mbintu bia kuangata ne mushinga. Bidi bitulongolola bua tuetu kudikuba, kuakama nsombelu mikole, kupita biakane ne ntatu, ne kuikala nenku ne disanka ne diakalenga.

Ebi mbilelela nansha bua batshidi bana bakese. Mona muvua muana kampanda mukese wa bakaji mujikije ntatu yende pa kulonda mikenji ya Yehowa. Muana wa bakaji eu, diende Akemi, mmusombele pabuipi ne tshimenga tshia Tokyo. Tatuende ne mamuende bavua batumike ne mêyi-maludiki a mu Bible mu dilongesha Akemi, ne mu mêyi ne ku bilejilu bakambuluisha muanabu wa bakaji bua kukolesha dinanga bua Yehowa ne bua muntu nende. Badianjile kumona ntatu ivuaye mua kupeta mu kalasa, bakenza muabu muonso bua kumulongolola. Kadi pakabuela Akemi mu kalasa ka kumpala, bamue balongi nende bavua bamumona bu “mushilangane” bualu uvua usambila kumpala kua kudia ne uvua ubenga ne dimanya dionso imue midimu ivua kayiyi ilonda Mifundu. Katupa aka, bakamumuenena kudi kasumbu ka bena mayobo bavua, pavuabu bapatuka mu kalasa, bamukokela mu ditumba ne bamukuma mapi, bamunyengabaja maboko, ne bamuseka.

Muana eu Akemi kavua ubapingajila bia muomumue, anyi kavua uzakala kumpala kua bamukengeshi aba. Kadi wakateta bua kulonda bivuaye mulonge. Bu tshipeta tshia bikadilu biende bilenga pamue ne dikima, balongi nende bavule bakatuadija kumunemeka. Bakafikisha bualu ebu kudi mulongeshi wabu, ne kutuadijila ku dituku adi, kabavua kabidi batatshisha Akemi mu kalasa.

Ntshinyi tshiakambuluisha Akemi bua kutshimuna nsombelu eu mukole? Dimanya dijalame, bujinguludi, ne meji bia kudi Yehowa bivua baledi bende babueje mu lungenyi luende. Uvua mumanye bimpe ditantamana dia Yezu, ne abi biakamusaka bua kuidikija tshilejilu tshiende. Bible wakamuambuluisha bua kusunguluja ne: bamue bantu badi benza malu mabi bua dipanga, ne wakamukankamija bua kukina malu mabi avua bena tshikisu aba benza, eku kayi ukina bantu bine.​—Luka 23:34; Lomo 12:9, 17-21.

Bushuwa, kakuena baledi badi mua kusua kumona baseka ne bakengesha muanabu. Kadi, udiku mua kufuanyikija muakasanka baledi ba Akemi pakumvuabu malu onso avua menzeke. Bana ba nunku badi bushuwa dibenesha dia kudi Yehowa.​—Musambu 127:3; 1 Petelo 1:6, 7.

Indila Yehowa ne lutulu luonso

Kadi kumpala kua wewe kupeta mabenesha a Yehowa, imue misangu udi ne bua kuindila Diende dîba. Yehowa mmumanye nsombelu webe ne udi ukumbaja tshionso tshiudi ukengela dîba dikalatshi mua kutamba kukukuatshisha. (Musambu 145:16; Muambi 3:1; Yakobo 1:17) Udi mua kuikala musue kudia tshimuma kampanda, kadi newele meji kayi bua muena kumbelu udi mukupeshe tshimuma etshi katshiyi tshianji kukumbana bua kutshidia? Nansha tshikale pome, didima anyi tshimuma tshikuabu, neujinge bua tshikale tshibobe, tshikale ne mâyi a bungi ne tshishême. Bia muomumue, Yehowa udi ufila biudi ukengela mu tshikondo tshiakane​—ki nkumpala menemene kua dîba anyi kushòò nansha.

Vuluka bua Yozefe. Kayi muenze tshilema, wakadimona muela mu buloko bua muinshi mua buloba mu Ejipitu. Muena buloko nende, mutuadi wa dikopo wa Faraone, uvua mutekemene bua kumupatulabu ne wakalaya bua kufikisha tshilumbu tshia Yozefe kudi Faraone. Kadi panyima pa dipatuka diende wakapua muoyo bua bionso bivua bitangila Yozefe. Biakenza bu se: Yozefe uvua mulekela. Kadi, bidimu bibidi bijima panyima, ndekelu wa bionso bakamupatula mu buloko ne bakamuvuija bushuwa mukokeshi muibidi mu Ejipitu. Pamutu pa kuja ne muoyo munda, Yozefe wakindila Yehowa. Bua bualu ebu, wakabeneshibua mu mushindu wakumvuija dikubibua dia muoyo bua bena Izalele ne bua bena Ejipitu.​—Genese 39:1–41:57.

Masashi uvua mukulu mu tshisumbu kampanda tshia ku Nord kua Japon. Kavua mu buloko to, kadi uvua ne bua kuindila Yehowa. Bua tshinyi? Anu katshia batuadija Kalasa ka Dilongesha Mudimu mu Japon, kalasa kalongolola bua kushidimuna ba-ministre bena nkristo bakumbane, ne disuminyina dionso wakadifundila tshipatshila tshia kubuelamu. Wakasambila bikole bua kupeta disanka edi dia mudimu. Bakabikila muinende mpanda-njila, kadi kabakabikila Masashi, nansha muvuaye ne dijinga dikole. Wakabungama bikole be.

Nansha nanku, wakela bidia bua kutshimuna nyanji yende. Wakalonga Bible ne mikanda mipatula kudi Société Watch Tower, mushindamene pa biena-bualu bu mudi kuikala mudipuekeshi ne pa mushindu wa kukanda mpampakenu. Wakakajilula ngelelu wende wa meji ne nenku kupetaye disankishibua dinene mu mudimu wende. Pashishe, pakavuaye katshiyi mutekaku muoyo, wakapeta dibikila dia kubuela mu kalasa.

Bu muakadimaye ngikadilu bu mudi lutulu ne budipuekeshi, wakapeta dikuatshisha divule mu kalasa aka kupita divuaye mua kupeta bu yeye mubuelamu kumpala. Pashishe, bakapesha Masashi disanka dia kusadila bana babu bu mutangidi muena ngendu. Ee, Yehowa uvua mumanye tshivua Masashi ukengela ne wakatshikumbaja dîba divuatshi menemene mua kutamba kumukuatshisha.

Keba mabenesha ende

Nenku, Yehowa kêna bu musumbishi wa manga au to. Nansha mutudi mua kupangila bua kusunguluja ditabalela ne diditatshisha bia Yehowa, bulenga buende budi bulua mu mishindu kabukabu​—mu bikondo ne mu mishindu idi itamba kutukuatshisha. Nenku tungunuka ne kukeba mabenesha ende. Vuluka ne: udi mumane kuikala ne tubingila tua bungi bua wewe kuikala ne dianyisha. Udi mubenesha pa kuikala ne bintu bia nshindamenu bua kutungunuka ne kuikala ne muoyo pa buloba. Mbakupeshe dimanya dia Yehowa ne dia njila yende mipuangane. Mbakupeshe bujinguludi. Ne udi mupete busunguluji. Bionso ebi bidi bikutuadila dikala bimpe ne diakalenga.

Bua kutamba kupeta tshishiki dibenesha dia Yehowa, tungunuka ne kulonga Bible pa tshibidilu. Usengelele Yehowa bua akuambuluishe bua umvue ne utumikile malongesha adi mafuane bilengejilu a mu Dîyi diende dienzeja ku spiritu. Wowu neakuvuije mubanji bushuwa, mu mushindu wa se: kuakupanga tshintu nansha tshimue. Eyowa, malongesha aa neumvuije diakalenga diebe ne disankishibua bua mpindieu ne muoyo muvule mu bulongolodi bupiabupia budi bulua.​—Yone 10:10; 1 Timote 4:8, 9.

[Tshimfuanyi mu dibeji 23]

Dibenesha dia Yehowa didi ne mushinga mukole kupita ngolo