‘Mutshima webe udi muakanangane ne wanyi anyi?’
‘Ulue nanyi, umone lukunukunu lundi nalu kudi Yehowa.’—2 BAKELENGE 10:16.
1, 2. (a) Mmunyi muakatamba kubipa malu a ntendelelu wa bena Izalele? (b) Mu 905 K.B.B., mmashintuluka kayi manene akavua pa kuenzeka mu Izalele?
TSHIDIMU tshia 905 K.B.B. tshivua tshikondo tshia dishintuluka dinene mu Izalele. Bidimu bu 100 kumpala, Yehowa uvua muenze bua bukalenge budisange bua Izalele kudiabululabu bualu bua butontolodi bua Solomo. (1 Bakelenge 11:9-13) Tshikondo atshi, bukalenge bua ku Sud, bua Yuda, buvua bukokesha kudi Robowame, muana wa Solomo pavua eku bukalenge bua ku Nord, bua Izalele, bulue ku bukokeshi bua Mukalenge Yerobowame, muena Efrayime. Diakabi, bukalenge bua ku Nord buakatuadija bibi. Yerobowame kakasua bua bakokedi bende kuyabu batangile ku bukalenge bua ku Sud bua kutendelela mu ntempelo, utshina ne: bavua mua kupeta lungenyi lua kupingana ku nzubu wa Davidi. Nenku wakateka ntendelelu wa kana ka ngombe mu Izalele ne kujadika nunku’eu ntendelelu wa mpingu wakatungunuka mu bualabale kampanda mu tshikondo tshionso tshia bukalenge ebu bua ku Nord.—1 Bakelenge 12:26-33.
2 Malu akatamba kubipa pakadia Ahaba, muana wa Omeri, bukalenge. Mukajende wa ku ba bende, Yezabele, wakalubuluja ntendelelu wa Baala ne wakashipa baprofete ba Yehowa. Nansha muvuaku madimuija menza ne muoyo umue kudi muprofete Eliya, Ahaba kakenza bualu nansha bumue bua kuimanyika mukajende. Kadi mu 905 K.B.B., Ahaba ukavua mufue ne muanende Yehorame ke uvua ukokesha. Dîba diakakumbana musangu au bua kukezulabu ditunga adi. Elisha mupinganyi wa Eliya, wakamanyisha Yehu mfumu wa tshiluilu ne: Yehowa uvua umuela manyi bua kuikalaye mukalenge walonda wa Izalele. Mmudimu kayi wakamupabu? Uvua wa kushipa ba mu nzubu wa mpekatu wa Ahaba ne kusombuela mashi a baprofete mamatshisha panshi kudi Yezabele!—2 Bakelenge 9:1-10.
3, 4. Mmunyi muakaleja Yehonadaba ne: mutshima wende uvua ‘muakanangane ne mutshima wa Yehu’?
3 Mu ditumikila dîyi dituma kudi Nzambi, Yehu wakashipesha Yezabele muena malu mabi, ne panyima kutuadijaye dikezula Izalele pa kushipa ba mu nzubu wa Ahaba. (2 Bakelenge 9:15–10:14, 17) Pashishe kusambakenaye ne mumukuatshishi. ‘Wakasangila ne Yehonadaba, muana wa Lekaba, wakadi ulua kusangakena nende. Yeye wakamuela muoyo, wakamuebeja ne: Mutshima webe udi muakanangane ne mutshima wanyi bu mudi mutshima wanyi muakanangane ne mutshima webe anyi? Yehonadaba wakamukudimuna ne: Ee, budi nunku. Bikalawu bu nunku, unkuate ku tshianza. Yeye wakamukuata ku tshianza tshiende, wakamubueja mu [“ditempu,” NW] diende. Wakamuambila ne: Ulue nanyi, umone lukunukunu lundi nalu kudi Yehowa. Nunku bakamushikika mu [“ditempu,” NW] diende.’—2 Bakelenge 10:15, 16.
4 Yehonadaba (anyi Yonadaba) kavua muena Izalele. Nansha nanku, mu diumvuangana ne dîna diende (dikale diumvuija “Yehowa mmusue,” “Yehowa ng’wa bunême,” peshi “Yehowa udi muena kalolo”) uvua mutendeledi wa Yehowa. (Yelemiya 35:6) Bushuwa uvua ne dijinga dipite dia pa tshibidilu dia kumona ‘lukunukunu luvua nalu Yehu kudi Yehowa.’ Mmunyi mutudi bamanye bualu ebu? Ee, disambakena diende ne mukalenge muela manyi wa Izalele kadivua dia mu mpukapuka. Yehonadaba ‘uvua ulua kusangakena nende,’ ne binebi pakavua Yehu mumane kushipa Yezabele ne bakuabu ba mu nzubu wa Ahaba. Yehonadaba uvua mumanye malu avua enzeka pakitabaye dibikila dia Yehu dia kubanda mu ditempu diende. Kakuyi mpata uvua ku luseke lua Yehu—ne lua Yehowa—mu diluishangana edi pankatshi pa ntendelelu wa dishima ne ntendelelu mulelela.
Yehu wa lelu ne Yehonadaba wa lelu
5. (a) Mmashintuluka kayi akadi pa kuenzeka bua bantu bonso? (b) Nnganyi udi Yehu Munene, ne mbanganyi badi baleji-mpala bende pa buloba?
5 Lelu’eu, malu neashintuluke bikole mu katupa kîpi emu bua bantu bonso bu muakashintulukawu bua Izalele kale mu 905 K.B.B. Tshikondo tshidi pabuipi mpindieu tshiakezula Yehowa buloba ku bipeta bibi bionso bia buenzeji bua Satana, kukonga ne bitendelelu bia dishima. Nnganyi udi Yehu wa lelu? Ki mmuntu mukuabu anu Yezu Kristo, udibu bambile mêyi aa a mu tshiprofete: “Tshilobo, asa muele webe pa mikaba, ke buebe bulenga ne lumu, ndaku, ubande pa nyama, uluile bulelela, [“bupuekele,” NW] ne buakane.” (Misambo 45:3, 4, MMM) Yezu mmuleja mpala pa buloba kudi “Izalele wa Nzambi,” bena nkristo bela manyi “badi batumikila mêyi a Nzambi ne badi ne mudimu wa kufila bumanyishi budi butangila Yezu.” (Galatia 6:16; Buakabuluibua 12:17, NW) Kubangila mu 1922 bana babu ne Yezu aba bela manyi, mbadimuije bantu kabayi batshina bua bienzedi bia dilumbuluisha dia Yehowa didi dilua.—Yeshaya 61:1, 2; Buakabuluibua 8:7–9:21; 16:2-21.
6. Mbanganyi bakapatuka mu matunga bua kukuatshisha bena nkristo bela manyi ne, mu ngakuilu wa mu tshimfuanyi, mmunyi mudibu babuele mu ditempu dia Yehu Munene?
6 Bena nkristo bela manyi kabena nkayabu. Anu bu muakapatuka Yehonadaba bua kusambakena ne Yehu, bantu bavule ba mu matunga mbapatuke bua kukuatshisha Yezu, Yehu Munene, ne baleji-mpala bende ba pa buloba mu dimanyina diabu dia ntendelelu mulelela. (Zekâya 8:23) Babikila kudi Yezu bu “mikoko [yende] mikuabo,” bavua bamanyike mu 1932 bu bantu badi bakanangane lelu ne Yehonadaba wa kale ne bakababikila bua ‘kubuela mu ditempu’ dia Yehu wa lelu. (Yone 10:16) Mmunyi? Mpa ‘kutumikila mêyi a Nzambi’ ne pa kudifila pamue ne bela manyi mu “mudimu wa kufila bumanyishi budi butangila Yezu.” Mu bikondo bia lelu, ebi bidi bikonga diyisha lumu luimpe lua Bukalenge bujadika bua Nzambi bukokesha kudi Yezu bu Mukalenge. (Mâko 13:10) Mu 1935 bakasunguluja “ba-Yonadaba” aba bu “musumba munene” wa mu Buakabuluibua 7:9-17, NW.
7. Mmunyi mudi bena nkristo baleje lelu’eu ne: ‘mutshima wabu utshidi anu muakanangane’ ne mutshima wa Yezu?
7 Kubangila mu bidimu bia 1930, musumba munene eu ne bana babu bela manyi mbaleje ne dikima dionso dikuatshisha diabu dia ntendelelu mulelela. Mu amue matunga a ku Mputu wa ku Est ne wa ku Ouest, ku Extrême-Orient, ne mu Afrike, bavule ba kudibu mbafuile ditabuja diabu. (Luka 9:23, 24) Mu matunga makuabu, bavua babele mu lukanu, bababunde kudi misumbasumba, anyi babakengeshe mu mishindu mikuabu. (2 Timote 3:12) Mmuyuki kayipu wa ditabuja udibu bashiye! Ne Luapolo lua Tshidimu tshia Mudimu tshia 1997 ludi luleja ne: batshidi bapangadije bua kusadila Nzambi nansha bia munyi. ‘Mutshima wabu utshidi anu muakanangane’ ne mutshima wa Yezu. Ebi bivua bileja patoke mu 1997, pavua bamanyishi ba Bukalenge 5 599 931 bapitshishe bungi busanga bua mêba 1 179 735 841 mu mudimu wa difila bumanyishi budi butangila Yezu, pabuipi ne bonso ba kudibu “ba-Yonadaba.”
Batshidi bayisha ne lukunukunu
8. Mmunyi mudi Bantemu ba Yehowa baleja lukunukunu luabu bua ntendelelu mulelela?
8 Yehu uvua mumanyike bua diendesha ditempu diende ne lubilu lukole—tshijadiki tshia lukunukunu luende bua kukumbaja mudimu wende. (2 Bakelenge 9:20) Yezu, Yehu Munene, mmuleja bu muikale ‘mudia mumana’ kudi lukunukunu. (Musambu 69:9) Nenku kabiyi bikemesha, lelu’eu bena nkristo balelela mbamanyike bua lukunukunu luabu. Mu tshisumbu ne pambelu, badi ‘bambila bantu dîyi . . . bananukila misangu miakane ne misangu idi kayiyi miakane.’ (2 Timote 4:2) Lukunukunu luabu luvua nangananga lumueneke patoke mu tshitupa tshia kumpala tshia 1997 pakamana tshiena-bualu kampanda tshia mu Mudimu wetu wa Bukalenge kukankamija bantu ba bungi menemene bua kudifila mu mudimu wa bumpanda-njila buambuluishi. Mu ditunga dionso bakadifundila bungi bua kukumbaja bua bampanda-njila bambuluishi. Ndiandamuna kayi divuaku? Dia dikema! Filiale ya bungi yakapitshisha bungi budifundila. Ditunga dia Équateur divua didifundile bungi bua 4 000 kadi mu Luabanya bakabala bampanda-njila bambuluishi 6 936. Ditunga dia Japon diakabala bungi busanga bua bantu 104 215 mu ngondo ayi isatu. Mu Zambie, muvuabu badifundile bungi bua 6 000, bakabadika bampanda-njila bambuluishi 6 414 mu Luabanya; 6 532 mu Tshisanga; ne 7 695 mu Lumungulu. Mu ka-bujima, bungi bubandile bua bampanda-njila bambuluishi ne ba pa tshibidilu bonso pamue buvua bantu 1 110 251, didiunda dia bia pa lukama 34,2 kupita bua 1996!
9. Kusakidila ku mudimu wa ku nzubu ne ku nzubu, mmu mishindu kayi mikuabu mudi Bantemu ba Yehowa bapeta bantu bua kubambila lumu luimpe?
9 Mupostolo Paulo wakambila bakulu ba mu Efeso ne: ‘Tshiakatshina bua kunuambila malu onso akamanya mua kunukuatshisha ne bua kunuyisha padi bantu bunguile, ne ku nzubu ne ku nzubu.’ (Bienzedi 20:20) Lelu’eu Bantemu ba Yehowa badi bidikija tshilejilu tshia Paulo ne badi bayisha lumu luimpe ku nzubu ne ku nzubu ne lukunukunu luonso. Kadi, kabiena mua kuikala bipepele bua kupeta bantu ku nzubu yabu. Nenku, “mupika wa lulamatu ne wa budimu” udi ukankamija bamanyishi ba Bukalenge bua kuyukila ne bantu mu miaba yabu ya bungenda, mu misesu, ku mielelu ya mbuu, mu mpangu ya diikishila—muaba kayi wonso udi bantu mua kupeteka. (Matayo 24:45-47, NW) Bipeta bivua bilenga bitambe.
10, 11. Mmunyi mudi bamanyishi ba mu matunga abidi baleje dipangadika dimpe mu dipeta bantu badi ne dijinga dia kumanya bivule bavua pa tshibidilu kabayi kupeta ku mabu?
10 Mu tshimenga tshia Copenhague, mu Danemark, kasumbu kakese ka bamanyishi kavua kafila bumanyishi mu misesu pambelu pa bitudilu bia tuwulu. Kubangila mu Tshiongo too ne mu Kabalashipu, bakabanya bibejibeji 4 733, kufikabu ku diyukila ne bantu ba bungi, ne kuenzabu makumbulula mavule. Bamanyishi ba bungi mu ditunga adi mbalongolole njila ya bibejibeji mu miaba idi magazen. Tshimue tshimenga tshitu ne tshisalu tshinene mu Ditanu dionso, ne mutu binunu bivule bia benyi. Nenku tshisumbu ntshilongolole difila bumanyishi bua pa tshibidilu mu tshisalu. Mu munga muaba badi bakumbula bilongelu ne mabuki a mamanyisha adi mu mikanda miakanyine nangananga balongeshi.
11 Mu ditunga dia Hawaii pamu bavua benze madikolela bua kupeta bantu badi kabayi mua kupeteka kumbelu. Teritware ya pa buayi idi ikonga miaba idi bantu (misesu, mpangu, bimanyikilu bia mashinyi ne bitudilu bia bise), miaba ya bungenda, nzubu ya dipanyishila bintu ne bipalu bia ndeke, bumanyishi bua ku telefone, ne mu mashinyi a diambulangana (diyisha mu bise), ne kampise ya université. Badi batabalela bua kujadika ne: mbatume bungi bukumbane bua Bantemu mu teritware yonso, ne se: bine badibu batuma aba bikale balongesha biakane. Luapolo idi ileja madikolela a muomumue malongolola bimpe mu matunga mavule. Bu tshipeta, Bantemu badi benda bapeta bantu bàdì ne dijinga dia kumanya bivule bavuabu kabayi pamu’apa mua kupeta mu mudimu wa ku nzubu ne ku nzubu.
Tushindamayi bikole
12, 13. (a) Nngenzelu kayi udi Satana mutumike nende bua kuluisha Bantemu ba Yehowa mu 1997? (b) Mmu mushindu kayi muvua dimuangalaja dia malu a dishima mu dimue ditunga dipatule bipeta kabiyi bindila?
12 Mu matunga a bungi mu 1997, bavua bendeshile Bantemu ba Yehowa lumu lubi lua dishima ne kipatshila kamueneke ka kubafikisha pamu’apa ku bilumbu ku tubadi. Kadi kabakatenkakana nansha kakese! (Musambu 112:7, 8) Bakavuluka disambila dia mufundi wa misambu ne: “Badi badisue badi banshiminyina bikole, kadi nendame m[êy]i awakungambila ne mutshima wanyi mujima.” (Musambu 119:69) Ditangalaja ngumu ya dishima dia nunku didi anu tshijadiki tshia mudibu bakine bena nkristo balelela bu muakadianjila Yezu kumanyisha. (Matayo 24:9) Ne imue misangu ndipatule bipeta bivua kabiyi bindila. Muntu kampanda mu Belgique wakabala tshimue tshiena-bualu tshivua tshisendeka Bantemu ba Yehowa mu tshikandakanda kansanga tshimanyike bimpe. Mutuibue ku muoyo kudi dishiminyinangana malu edi, wakabuela mu tshisangilu tshimue ku Nzubu wa Bukalenge mu Dia lumingu diakalonda. Wakadilongolola bua kulonga Bible ne Bantemu ne wakatungunuka ne kulubuluka ne lukasa. Kumpala, muntu eu uvua muena dingumba dia ba-kanka. Dilonga diende dia Bible diakamuambuluisha bua kukezula nsombelu wende, bualu buakamonabu kudi bantu bavua pabuipi nende. Bushuwa, mufundi wa tshiena-bualu atshi bua dishiminyinangana malu kavua mutekemene tshipeta tshia nunku!
13 Bamue bantu bena mitshima milulame ba mu Belgique mbakule ne dikima babenga dimuangalaja dia malu edi dia dishima. Munkatshi muabu muvua kavula-mbedi wa kale wakitaba muvuaye ne dianyina divule bua bidi Bantemu ba Yehowa bakumbaje. Ne tshipuita kampanda wakafunda ne: “Bibengangane ne malu mabubika mamuangalaja imue misangu, [Bantemu ba Yehowa] kabena bamueneka kundi bu badi njiwu nansha mikese bua Mbulamatadi. Mbena-muabu banangi ba ditalala, benji ba malu ne muoyo mujima, ne bena kanemu kudi bakokeshi.” Bushuwa, mêyi a mupostolo Petelo adi a meji: “Nuikale ne bienzedi bienu bimpe munkatshi mua bisamba bia bende, bualu bua, mu mianda idibo banusonguela nuenu bu benji ba malu mabi, bobo batumbishe Nzambi mu dituku dialueye, bua midimu yenu mimpe idibo bamona.”—1 Petelo 2:12.
Disekelela dia pa buadi dia Tshivulukilu
14. Ng’imue luapolo kayi idi ifila disanka ivuaku bua bavua babuele mu Tshivulukilu mu 1997?
14 Mbiakanyine bua se: aba badi bafila bumanyishi budi butangila Yezu bikale ne bua kumona Tshivulukilu tshia lufu luende bu bualu buabu bua tshikuma bua ku tshidimu. Mu 1997, bantu 14 322 226 bavuapu mu dia 23 Luabanya bua kusekelela bualu ebu. Bungi abu buvua bua bantu bapite pa 1 400 000 kupita mu 1996. (Luka 22:14-20) Mu matunga a bungi bantu bakabuela mu Tshivulukilu bavua bapite ne kule bungi bua bamanyishi ba Bukalenge, bileja matekemena malenga bua didiunda ditshilualua. Tshilejilu, mu ditunga dia Haïti, bakapeta mu 1997 bungi bubandile bua bamanyishi 10 621 pavua eku bantu 67 259 babuele mu Tshivulukilu. Udi mua kutangila luapolo lua tshidimu mu dibeji dia 18 too ne dia 21 ne kumona muvua matunga makuabu mavule mapete bungi bubandile bua muomumue bua babuedi pa kufuanyikija ne bungi bua bamanyishi.
15. Mu amue matunga, mmunyi muvua bana betu batshimune ntatu mikole bua kumona mua kusekelela Tshivulukilu?
15 Bua bamue, dibuela mu Tshivulukilu kadivua dipepele. Mu ditunga dia Albanie bantu bavua ne bua kubuela mu nzubu dilolo pa dîba 7:00 bua tshimvundu tshia bena ditunga. Mu tusumbu tukese 115 tua mu ditunga edi, Tshivulukilu tshiakatuadija dilolo pa dîba 5:45. Dibuela dia dîba diakenzeka dilolo pa dîba 6:08, dileja ntuadijilu wa dia 14 Nizan. Bakapitshisha bimanyishilu dilolo bu pa dîba 6:15. Mu miaba ya bungi bakenza disambila dia ndekelu dilolo pa dîba 6:30, ne aba bakabuelamu bakambula makasa bua kupingana kumbelu kumpala kua dîba difunda. Nansha nanku, babuedi ba mu Tshivulukilu bavua 3 154 pa kufuanyikija ne bungi bubandile bua bamanyishi 1 090. Mu dimue ditunga dia mu Afrike, tshimvundu tshia bena ditunga tshiakapangisha bantu bua kufika ku Nzubu wa Bukalenge, nenku bakulu babidi bakangata dipangadika dia kusangila mu nzubu wa mukulu mukuabu muisatu, bua kulongolola mua kuenzabu disekelela edi mu tusumbu tukese. Bua kufika ku nzubu aku, bakulu babidi aba bavua ne bua kusabuka munkidi wa dipitshishila mâyi. Kadi, kuvua diluangana mu tshitupa atshi, ne bashanganyi ba bingoma basokome bavua basa muntu yonso uvua uteta bua kusabuka munkidi eu. Mukulu umue wakasabuka lubilu kakuyi bualu. Muibidi utshivua usabuka pakumvuaye bela tshingoma. Wakadiela panshi ne kulandalaye bua kudikuba eku masashi apitshila anu pa mutu pende. Tshisangilu tshia bakulu tshiakenzeka bimpe, ne bakatabalela bivua tshisumbu tshikengela.
“Wa mu matunga onso ne bisa bionso . . . ne miakulu yonso”
16. Mmunyi mudi kasumbu ka mupika wa lulamatu ne wa budimu kalongolole bua kutangalaja lumu luimpe mu bisumbu bia miakulu mikese?
16 Mupostolo Yone wakamba ne: musumba munene uvua ne bua kuikala “wa mu matunga onso ne bisa bionso ne bisamba bionso ne miakulu yonso.” (Buakabuluibua 7:9, NW) Nenku, Kasumbu Kaludiki kadi kalongolola bua mikanda ipeteke mu miakulu mipite bungi—pamue ne eyi idi miakula kudi bisa bia kule ne tusumbu tukese tua bantu. Tshilejilu mu ditunga dia Mozambique, trakte wa Nsombelu wa ditalala mu bulongolodi bupiabupia uvua mupatula mu miakulu mikuabu itanu. Mu ditunga dia Nicaragua, broshire wa Ikalayi ne muoyo wa kashidi ne disanka pa buloba! wakapeteka mu muakulu wa Miskito—mukanda wa kumpala mupatula mu muakulu au kudi Société Watch Tower. Ba-Miskito bena Inde bakanyisha broshire eu ne musangelu pa kumona tshintu tshifunda mu muakulu wabu mene. Mu 1997 Société uvua muanyishe dipatula mikanda mu miakulu mikuabu ya pa mutu 25 ne mutape ku biamu bibejibeji bipite pa muliyare umue.
17. Ntshisumbu tshia muakulu kayi tshivuabu bambuluishe mu Corée, ne mmunyi mudi tusete tua video tuambuluishe bikole tshitupa etshi tshia bantu?
17 Mu ditunga dia Corée bakambuluisha kasumbu kakuabu ka muakulu. Mu 1997 bakenza mpuilu munene wa kumpala mu ngakuilu wa misalu wa bena Corée. Kudi bisumbu 15 biena ngakuilu wa misalu mu Corée bikale ne bamanyishi 543, kadi bantu 1 174 bakabuela mu mpuilu eu, ne bantu 21 bakatambula. Bua kuambuluisha bampudi-matshi badi kabayi mua kumvua bipepele dîyi diakula anyi difunda, badi benda bapatula mikanda mu tusete tua video mu ngakuilu 13 mishilangane ya misalu. Mushindu’eu, badi benda bambuluisha bampudi-matshi bua “kubala” ne nansha mene kulonga lumu luimpe, ne bipeta bilenga. Mu États-Unis, kumpala bivua mua kulomba bidimu bitue ku bitanu bua muntu udi mpudi-matshi kulubulukaye too ne ku batismo. Mpindieu, ne bungi bua tusete tua video tudiku mu Ngakuilu wa Misalu wa bena Amerike, mbilue kukepela too ne ku tshidimu bu tshimue bua bamue bampudi-matshi.
‘Tushalayi mu ditempu’
18. Mumane kusambakena ne Yehonadaba, ntshinyi tshiakatuadija Yehu kuenza?
18 Kale mu 905 K.B.B., mumane kupetangana ne Yehonadaba, Yehu wakatuadija dibutula ntendelelu wa dishima. Wakabikidisha batendeledi bonso ba Baala ne: “Basungule dituku dia kujidila Bâla.” Pashishe wakatuma bantu mu ditunga dijima bua kujadika ne: kakuvua mutendeledi wa Baala uvua mushale. Pavua misumba yenda ibuela mu ntempelo munene wa nzambi eu wa dishima, bakatabalela bua kumona se: kamuvua mutendeledi wa Yehowa nansha umue. Ndekelu, Yehu ne tshiluilu tshiende bakashipa batendeledi ba Baala. ‘Nunku Yehu wakajimija bualu bua Bâla munkatshi mua bena Izalele.’—2 Bakelenge 10:20-28.
19. Pa kumona tshidi tshindile bantu, ndungenyi kayi lutudi ne bua kuleja, ne mmu mudimu kayi mutudi ne bua kuditua ne tshisumi?
19 Lelu’eu, dilumbuluisha dia ndekelu dia bitendelelu bionso bia dishima didi pabuipi apa. Ku bulombodi bua banjelu, bena nkristo badi benda bamanyisha bantu bonso lumu luimpe, babakankamija bua kutshina Nzambi ne bua kuditapulula ku bitendelelu bia dishima. (Buakabuluibua 14:6-8; 18:2, 4) Bena bupuekele mbakankamija bua bakokele Bukalenge bua Nzambi bukokesha kudi Yezu Kristo, Mukalenge udi Yehowa muteke mu nkuasa wa bumfumu. (Buakabuluibua 12:10) Mu tshikondo etshi tshidi tshisankisha, katuena ne bua kulekela lukunukunu luetu luteketa mu dimanyina ntendelelu mulelela dietu.
20. Neupangadije bua kuenza tshinyi mu tshidimu tshia mudimu tshia 1998?
20 Kale, pavua Mukalenge Davidi mu dilubakana dikole, wakasambila ne: “Mutshima wanyi udi mushindame, Nzambi, mutshima wanyi udi mushindame. Nengimbe misambu, nenkutumbishe ne biombelu. Muk[a]lenge, nenkusakidile munkatshi mua bantu.” (Musambu 57:7, 9) Tushalayiku petu bashindame. Mu tshidimu tshia mudimu tshia 1997, nansha muvuaku ntatu mivule, lubila lukole lua disamuna luvua lubandisha bua butumbi bua Yehowa Nzambi. Lubila lua muomumue, nansha lukole kupita apu mene, lumvuikeku mu tshidimu etshi tshia mudimu. Ne muanda eu wikale mulelela nansha bu Satana mua kuteta mua kuenza tshintu kayi tshionso bua kututekesha mu mikolo anyi kutuluisha. Mushindu’eu netuleje ne: mutshima wetu mmushale muakanangane ne mutshima wa Yehu Munene, Yezu Kristo, ne netuandamune ne anyima wetu mujima ku dikankamija edi dienzeja ku spiritu: “Nuikale ne disanka mu Yehowa, nusanke bikole, nuenu bantu bakane; ela[y]i mbila bua disanka dienu, buonso buenu badi bakane mu mitshima yenu!”—Musambu 32:11.
Udi mua kumvuija anyi?
◻ Mmashintuluka kayi akenzeka mu Izalele mu 905 K.B.B.?
◻ Nnganyi udi Yehu wa lelu, ne mmunyi mudi bena “musumba munene” baleje ne: ‘mutshima wabu udi muakanangane’ ne mutshima wende?
◻ Mbishiferi kayi bia mu luapolo lua tshidimu bidi bileja lukunukunu luvua nalu Bantemu ba Yehowa mu tshidimu tshia mudimu tshia 1997?
◻ Nansha Satana mua kuenza bualu kayi bua kutuluisha, ndungenyi kayi lutualeja mu tshidimu tshia mudimu tshia 1998?
[Tablo mu mabeji 18-21]
LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 1997
(Bua kumona malu bimpe, tangila mu mukanda)
[Tshimfuanyi mu dibeji 15]
Bungi bua dikema bua bantu bavua babuele mu Tshivulukilu budi buleja matekemena malenga a didiunda ditshilualua
[Tshimfuanyi mu dibeji 16]
Anu bu muvua Yehonadaba mukuatshishe Yehu, ke mudi “musumba munene” lelu’eu ukuatshisha Yehu Munene, Yezu Kristo, ne bana babu bela manyi