Nnganyi wapanduka ku “dituku dia Yehowa”?

“Mbantu ba mushindu kayi banudi ne bua kuikala mu bienzedi binsantu bia nsombelu ne malu a bulamate kudi Nzambi, bindile ne balame bikole mu lungenyi dikalaku dia dituku dia Yehowa!”​—2 PETELO 3:11, 12, NW.

1. Mbanganyi badi batumike ne spiritu ne bukole bia Eliya?

YEHOWA NZAMBI mmusungule munkatshi mua bukua-bantu aba balua bapianyi pamue ne Muanende Yezu Kristo, mu Bukalenge bua mu diulu. (Lomo 8:16, 17) Patshidibu pa buloba, bena nkristo bela manyi badi batumika ne spiritu ne bukole bia Eliya. (Luka 1:17) Mu tshiena-bualu tshishale, tuvua bamone difuanangana pankatshi pa midimu yabu ne eyi ya muprofete Eliya. Kadi netuambe tshinyi bua mudimu wa muprofete Elisha, mupinganyi wa Eliya?​—1 Bakelenge 19:15, 16.

2. (a) Ntshinyi tshivua tshishima tshia ndekelu tshia Eliya, ne tshia kumpala tshia Elisha? (b) Ntshijadiki kayi tshidi tshileja ne: Eliya kakaya mu diulu?

² Tshishima tshia ndekelu tshienza kudi Eliya tshivua tshia dikosolola mâyi a Musulu wa Yordane pa kututamu tshikowelu tshiende. Ebi biakapetesha Eliya ne Elisha mushindu wa kusabukila pa buloba bûme. Pavuabu bendela ku muelelu wa ku Est kua musulu, mvunde wakambula Eliya ne kuya nende ku muaba mukuabu pa buloba. (Tangila kazubu mu dibeji dia 15 kadi kamba ne: “Mmu diulu kayi muakabanda Eliya?”) Tshikowelu tshia Eliya tshiakashala. Pakatumika natshi Elisha bua kututa pa musulu wa Yordane, mâyi awu akakosoloka tshiakabidi, kupetaye mushindu wa kuendela pa buloba bûme. Tshishima etshi tshiakaleja patoke ne: Elisha uvua mulue mupinganyi wa Eliya mu dilubuluja ntendelelu mulelela mu Izalele.​—2 Bakelenge 2:6-15.

Ngikadilu ya buena Nzambi nya mushinga mukole

3. Paulo ne Petelo bakamba tshinyi bua dikalaku dia Yezu ne “dituku dia Yehowa”?

³ Siekele mivule kunyima kua matuku a Eliya ne Elisha, mupostolo Paulo ne mupostolo Petelo bakasuikakaja “dituku dia Yehowa” divua dilua ku dikalaku dia Yezu Kristo ne ku “muulu mapiamapia ne buloba bupiabupia” bitshivua ne bua kulua musangu au. (2 Tesalonike 2:1, 2, NW; 2 Petelo 3:10-13, NW) Bua kupanduka ku dituku dinene dia Yehowa​—padi Nzambi ubutula bena lukuna bende ne upandisha bantu bende—​tudi ne bua kukeba Yehowa ne kuleja bupuekele ne buakane. (Sefanya 2:1-3) Kadi imue ngikadilu ya pa mutu idi imueneka patudi tukonkonona malu adi atangila muprofete Elisha.

4. Lukunukunu ludi ne muaba kayi mu mudimu wa Yehowa?

⁴ Lukunukunu bua mudimu wa Nzambi ndua mushinga mukole bituasua kupanduka ku “dituku dia Yehowa.” Eliya ne Elisha bavua bena lukunukunu mu mudimu wa Yehowa. Ne lukunukunu lua muomumue, lelu’eu bashadile ba mu bena nkristo bela manyi badi bakuatshila Yehowa mudimu wa tshijila ne badi ba-ntunga-mulongo mu diyisha lumu luimpe.a Kubangila munkatshi mua bidimu bia 1930, mbakankamije aba bonso badi bitaba mukenji wa Bukalenge ne batekemena kuikala ne muoyo wa kashidi pa buloba bua buobu kuditshipa kudi Yehowa ne kutambuishibua. (Mâko 8:34; 1 Petelo 3:21) Miliyo ya bantu mmiandamune bilenga ku dikankamija edi. Bavua kale mu mîdima ya mu nyuma ne bafue mu mpekatu, kadi mpindieu mbalonge bulelela bua Nzambi, mbapete ditekemena dia muoyo wa tshiendelele mu mparadizu wa pa buloba, ne badi ne lukunukunu mu mudimu wa Yehowa. (Musambu 37:29; Buakabuluibua 21:3-5) Ku diambuluisha dia lukunukunu luabu, dieleshangana diboko, diakidilangana, ne midimu mikuabu milenga, badi bapesha bana babu ne Kristo ba mu nyuma batshidi pa buloba dikankamija dinene.​—Matayo 25:31-46.

5. Bua tshinyi mbia mushinga mukole bua kuenzela “bana babu” ne Yezu malu mimpe, ne ntshilejilu kayi tshia mu matuku a Elisha tshitudi natshi?

⁵ Aba badi benzela ‘bana babu’ ne Yezu malu mimpe bualu bela manyi aba mbalondi bende badi ne ditekemena dia kupanduka ku “dituku dia Yehowa.” Bena dibaka babidi ba mu musoko wa Shuneme bakabeneshibua bikole bua muvuabu baleje bulenga ne bakidile Elisha ne musadidi wende. Bena dibaka aba kabavua ne muana wa balume, ne mulume ukavua mukulakaje. Kadi Elisha wakalaya mukaji muena Shuneme ne: uvua ne bua kulela muana wa balume, ne bualu ebu buakenzeka. Pakafua muana eu umuepele wa balume bidimu bikese pashishe, Elisha wakaya ku Shuneme ne wakamubiisha. (2 Bakelenge 4:8-17, 32-37) Mmafutu kayipu manene bua muvuabu baleje Elisha diakidilangana!

6, 7. Namana wakashiya tshilejilu kayi, ne bualu ebu budi buleja tshinyi pa bidi bitangila dipanduka ku “dituku dia Yehowa”?

⁶ Bidi bikengela budipuekeshi bua kumona mua kuitaba bulombodi buashila pa Bible bua kudi “bana babu” ne Kristo ne ditekemena dia kupanduka ku dituku dia Yehowa. Mfumu wa tshiluilu tshia bena Syrie, muena nsudi Namana, uvua ne bua kuleja budipuekeshi bua kulonda mubelu wa muana wa bakaji wa bena Izalele uvua ku bupika ne kukeba luondapu pa kuya mu Izalele bua kumona Elisha. Pamutu pa kupatuka pambelu bua kumonangana ne Namana, Elisha wakamutumina mukenji eu: ‘Uye udine mu mâyi a Yordane misangu muanda-mutekete, ne mubidi webe neupingane muawu mua kale.’ (2 Bamfumu 5:10, MMM) Bua lutambishi luende, Namana wakadiumvua bamupepeje, ne wakafiika munda, kadi pakamanaye kuya ne budipuekeshi buonso ne kudina mu Yordane misangu muanda-mutekete, “mubidi wende kupingana muawu mua kale bu wa muana mutekete.” (2 Bamfumu 5:14, MMM) Kumpala kua kupinganaye kuende, Namana wakenza tshiakabidi luendu lujima mutangile ku Samariya bua kusakidila muprofete wa Yehowa. Mupangadije bua kubenga kupetela bintu bia ku mubidi ku makole mamupesha kudi Nzambi, Elisha wakapatuka bua kumonangana ne Namana kadi kavua mua kuanyisha mapa nansha. Ne budipuekeshi buonso Namana wakambila Elisha ne: ‘Muntu webe kêna ufila mulambu kudi nzambi mukuabu, anu kudi Yehowa.’​—2 Bakelenge 5:17.

⁷ Lelu’eu, mu dilonda ne budipuekeshi buonso mibelu ya mu Mifundu ya bela manyi, miliyo ya bantu mmibeneshibue bikole. Kabidi, pa kuleja ditabuja mu mulambu wa tshia-bupikudi wa Yezu, bena mitshima milulame aba mbakezula mu nyuma. Badi mpindieu ne disanka dia kuikala balunda ba Yehowa Nzambi ne ba Yezu Kristo. (Musambu 15:1, 2; Luka 16:9) Ne bulamate buabu kudi Nzambi ne mu mudimu wende nebufutshibue padibu babepula ku kabutu ka tshiendelele kakadi pa kutulukila benji ba mpekatu bena lutambishi badi kabayi banyingalala, mu “dituku dia Yehowa” didi disemena ne lukasa luonso.​—Luka 13:24; 1 Yone 1:7.

“Udi ku luseke luanyi nganyi?”

8. (a) Aba bapanduka ku “dituku dia Yehowa” badi ne mmuenenu kayi pa dienza dia disua dia Nzambi? (b) Mmudimu kayi wakapeshabu Yehu? (c) Ntshinyi tshivua ne bua kufikila Yezabele?

⁸ Aba badi batekemene bua kupanduka ku “dituku dia Yehowa” badi kabidi ne bua kuikala bapangadije bua kuenza disua dia Nzambi. Ne dikima dionso, Eliya wakadianjila kumanyisha kabutu ka dîku dishipianganyi dia Mukalenge Ahaba, divua ditendelela Baala. (1 Bakelenge 21:17-26) Kadi, kumpala kua kukumbajabu dilumbuluisha edi, Elisha, mupinganyi wa Eliya, uvua ne bua kukumbaja mudimu kampanda uvua kauyi mujike. (1 Bakelenge 19:15-17) Pakalua tshikondo tshijadika kudi Yehowa, Elisha wakatumina musadidi kampanda dîyi bua kuyaye kuela mfumu wa tshiluilu Yehu manyi bu mukalenge mupiamupia wa Izalele. Mumane kuela Yehu manyi pa mutu, mutumibue eu wakamuambila ne: ‘Yehowa, Nzambi wa Izalele, udi wamba ne: Ngakukusungula bu mukalenge ku mutu kua bantu ba Yehowa, bena Izalele mene. Buudi nabu mbua kushipa ba mu nzubu wa Ahaba, mukalenge webe, bua kusombuela mashi a bantu banyi baprofete ne a bantu bonso ba Yehowa akamatshisha tshianza tshia Yezabele panshi. Bualu bua bonso ba mu nzubu wa Ahaba nebafue.’ Mukalenge-mukaji mubi Yezabele bavua ne bua kumuelela mbua ne kabavua ne bua kumujiika biakane nansha.​—2 Bakelenge 9:1-10.

9, 10. Mmunyi muakakumbana dîyi dia Eliya bua Yezabele?

⁹ Bantu ba Yehu bakanyisha mushinga wa diedibua manyi diende ne bakamumanyisha bu mukalenge mupiamupia wa Izalele. Ne dipangadika dionso, Yehu wakaya lubilu mutangile ku Yizreele bua kutuadija mudimu wende wa dishipa balombodi batontolodi ba ntendelelu wa Baala. Mukalenge Yehorame, muana wa Ahaba, ke uvua wa kumpala ku diumvua muketa wa dilumbuluisha dia Yehu. Wakapatuka pambelu pa tshimenga bua kuebeja Yehu né uvua mulue bua ditalala. Yehu wakamukudimuna ne: ‘Tudi ne ditalala kudi kunyi patshidi malu a masandi a mamu webe ne mbuku yende bikumbane bia bungi?’ Amu apu, muketa wa Yehu kutubulawu dimuma dia muoyo dia Yehorame.​—2 Bakelenge 9:22-24.

¹⁰ Bakaji bena Nzambi badi bepuka dikala bu Yezabele anyi bu muntu yonso udi mumufuane. (Buakabuluibua 2:18-23) Pa kuamba Yehu afike ku Yizreele, Yezabele ukavua mutete bua kudilengeja mubidi. Winangila panshi ku dididishi, wakamuela muoyo wa nsenda. Yehu kukonka basadidi ba mukaji eu ne: “Udi ku luseke luanyi nganyi?” Diakamue, banene babidi anyi basatu ba mu lubanza kuinangilabu panshi. Bavua ku luseke lua Yehu anyi? Kutumaye dîyi ne: ‘Numuele panshi!’ Amu apu, ne dipangadika dionso, kuimanshilabu mukaji mubi Yezabele pa dididishi. Bakamudiatakaja, pamu’apa kudi bikono bia tubalu. Pakalua bantu bua kumujiika, ‘bakasangana anu kabalubalu ka mutu wende ne makasa ne munda mua bianza.’ Ndikumbana menemene dia dikema dia dîyi dia Eliya dia se: “Mbua neyidie [Yeza]bele”!​—2 Bakelenge 9:30-37.

Dikuatshisha ntendelelu mulelela ne muoyo mujima

11. Yehonadaba uvua nganyi, ne mmunyi muakalejaye dikuatshisha diende bua ntendelelu mulelela?

¹¹ Aba badi batekemene bua kupanduka ku “dituku dia Yehowa” ne kuikala ne muoyo wa kashidi pa buloba badi ne bua kukuatshisha ntendelelu mulelela ne muoyo mujima. Badi ne bua kuikala bu Yehonadaba, peshi Yonadaba, mutendeledi wa Yehowa uvua kayi muena Izalele. Bu muvua Yehu utungunuka ne kukumbaja mudimu wende ne lukunukunu, Yehonadaba wakasua kuleja dianyisha diende ne dikuatshisha diende. Nenku wakapatuka bua kusambakena ne mukalenge mupiamupia wa Izalele, uvua mutangile ku Samariya bua kushipa bavua bashale ba mu nzubu wa Ahaba. Umona Yehonadaba, Yehu kumukonka ne: “Mutshima webe udi muakanangane ne mutshima wanyi bu mudi mutshima wanyi muakanangane ne mutshima webe, anyi?” Diandamuna dilenga dia Yehonadaba diakasaka Yehu bua kumuoluela tshianza ne kumubandisha mu dikalu diende dia mvita, kuambaye ne: ‘Ulue nanyi, umone lukunukunu lundi nalu kudi Yehowa.’ Kakuyi dijanguluka, Yehonadaba wakitaba disanka edi dia kuleja dikuatshisha diende kudi mukumbaji wa malumbuluisha ne mulaba manyi wa Yehowa.​—2 Bakelenge 10:15-17.

12. Bua tshinyi Yehowa udi ulomba mu buakane buonso bulamate bukena buabanya?

¹² Dikuatshisha ntendelelu mulelela ne muoyo mujima ndiakanyine bushuwa, bualu Yehowa udi Mufuki ne Mfumu mukulu wa bionso, udi mu buakane buonso ulomba bulamate buetu bukena buabanya ne mmubuakanyine. Wakatumina bena Izalele dîyi ne: ‘Kudisongedi lupingu anyi tshifuanyikiji tshia tshintu tshia mu diulu anyi tshia tshintu tshia panshi pa buloba anyi tshia tshintu tshia mu mâyi adi muinshi mua buloba. Kubinaminyi, kubitendeledi; bualu meme Yehowa, Nzambi webe, ndi bianyi Nzambi [“udi ulomba bulamate bukena buabanya,” NW].’ (Ekesode 20:4, 5) Aba badi batekemene bua kupanduka ku “dituku dia Yehowa” badi ne bua kumutendelela amu yeye nkayende, benza nunku “ne spiritu ne bulelela.” (Yone 4:23, 24, NW) Badi ne bua kuikala bashindame bua ntendelelu mulelela, bu muvua Eliya, Elisha, ne Yehonadaba.

13. Anu bu muvua mutshima wa Yehonadaba muikale kudi Yehu, mbanganyi badi bitaba Mukalenge Masiya, ne mmunyi mudibu baleja bualu ebu?

¹³ Mumane kushipa ba mu nzubu wa Ahaba, Mukalenge Yehu wakela bikuabu bidia bua kusunguluja batendeledi ba Baala ne kumbusha tshitendelelu etshi tshia dishima mu Izalele. (2 Bakelenge 10:18-28) Lelu’eu, Mukalenge wa mu diulu Yezu Kristo mmutekibue bua kushipa bena lukuna ba Yehowa ne kubingisha bumfumu bukulu Buende. Anu bu muvua mutshima wa Yehonadaba muikale kudi Yehu, lelu’eu “musumba munene” wa “mikoko mikuabo” ya Yezu udi witaba Kristo ne muoyo mujima bu Mukalenge Masiya ne weleshangana diboko ne bana babu ne Kristo ba mu nyuma badi pa buloba. (Buakabuluibua 7:9, 10, NW; Yone 10:16) Badi bafila tshijadiki tshia bualu ebu mu dilamata ntendelelu mulelela ne mu dikala ne didifila dia lukunukunu mu mudimu wa Buena-nkristo, pa kudimuija bena lukuna ba Nzambi bua “dituku dia Yehowa” didi dienda disemena ne lukasa.​—Matayo 10:32, 33; Lomo 10:9, 10.

Malu a dikema adi kumpala eku!

14. Ntshinyi tshiavuila bitendelelu bia dishima?

¹⁴ Yehu wakenza bualu kampanda bua kujikija ntendelelu wa Baala mu Izalele. Mu matuku etu aa, ku butuangaji bua Yehu Munene, Yezu Kristo, Nzambi neatume kabutu ka Babilone Munene, nsangilu wa buloba bujima wa bitendelelu bia dishima. Mu katupa kîpi emu netumone dikumbana dia mêyi avua muanjelu muambile mupostolo Yone: “Nsengu dikumi iwamonyi, ne nyama wa luonji, yoyi eyi neyikine ndumba [Babilone Munene] ne neyimubutule ne kumushiya butaka, ne neyidie mubidi wende ne neyimuoshe butubutu mu kapia. Bualu Nzambi mmubuteke mu mitshima yayi bua kukumbajayi lungenyi luende, eyowa bua kukumbaja lungenyi luayi lumue pa kufila bukalenge buayi kudi nyama wa luonji, too ne pakumbana mêyi a Nzambi.” (Buakabuluibua 17:16, 17, NW; 18:2-5) “Nsengu dikumi” eyi idi ileja makole a tshididi a biluilu adi akokesha pa buloba. Nansha mudiwu mpindieu mu malanda a masandi a mu nyuma ne Babilone Munene, tshikondo tshiende ntshîpi. Tshitupa etshi tshia malu a tshididi tshia bulongolodi ebu netshibutule bitendelelu bia dishima, ne “nyama wa luonji”​—Matunga Masanga—​neikale ne mudimu munene pamue ne “nsengu dikumi” mu dimubutula.b Ntshikondo kayipu tshia kusamuna Yehowa!​—Buakabuluibua 19:1-6.

15. Mbualu kayi buenzeka patetabu bua kubutula bulongolodi bua Nzambi bua pa buloba?

¹⁵ Pakamana Mukalenge Yehu kubutula ntendelelu wa Baala, nzubu wende wa bukalenge wakatangija ntema kudi bena lukuna ba Izalele mu malu a tshididi. Mukalenge Yezu Kristo neenze bualu bua muomumue. Makole a tshididi neashale pabutulabu bitendelelu bia dishima bifuane bia Baala. Ku buenzeji bua Satana Diabolo, bena lukuna aba ba bumfumu bukulu bua Yehowa nebenze dibunda dia ndekelu ne kipatshila ka kubutula bulongolodi bua Nzambi bua pa buloba. (Yehezekele 38:14-16) Kadi Yehowa neatume Mukalenge Yezu Kristo bua kubakuma pa kubabutula ku Har–Magedone, “mvita ya dituku dinene dia Nzambi Wa-Bukole-Buonso,” ne kujikija dibingisha dia bumfumu bukulu bua Yehowa.​—Buakabuluibua 16:14, 16, NW; 19:11-21; Yehezekele 38:18-23.

Tusadilayi ne lukunukunu bu lua Elisha

16, 17. (a) Mmunyi mutudi bamanye ne: Elisha uvua muena lukunukunu too ne ku ndekelu kua muoyo wende? (b) Ntshinyi tshitudi ne bua kuenza ne miketa ya bulelela?

¹⁶ Too ne padi “dituku dia Yehowa” dituisha ndongoluelu mubi mujima wa malu wa Satana ku ndekelu, basadidi ba Nzambi nebikale ne dikima ne lukunukunu bu Elisha. Kusakidila ku mudimu wende bu musadidi wa Eliya, Elisha wakasadila nkayende bu muprofete wa Yehowa munkatshi mua bidimu bipite pa 50! Ne Elisha uvua muena lukunukunu too ne ku ndekelu kua matuku ende a muoyo a bungi. Katupa kakese kumpala kua kufuaye, Mukalenge Yehoasha, muikulu wa Yehu, wakamukumbula. Elisha wakamuambila bua kuelelaye muketa pa dididishi. Muketa kuyawu buludiludi, ne Elisha kutuaye tshikemu ne: “Muketa wa lupandu wa Yehowa, muketa mene wa lupandu bua kutshimuna bena Syrie! Ne bushuwa wewe neushipe bena Syrie ku Afeke too ne ku dibabutula butubutu.” Ku dilomba dia Elisha, Yehoasha wakasa pashishe buloba ne miketa yende. Kadi wakenza nenku kayi ne lukunukunu, pa kuasa anu misangu isatu. Bu tshipeta, Elisha wakamba pashishe ne: Yehoasha uvua ne bua kutshimuna bena Syrie anu misangu isatu, ne ke tshiakenzeka. (2 Bakelenge 13:14-19, 25, NW) Mukalenge Yehoasha kakashipa menemene bena Syrie, “too ne ku dibabutula butubutu” nansha.

¹⁷ Nansha nanku, bikale ne lukunukunu bu lua Elisha, bashadile bela manyi badi batungunuka ne kuluisha ntendelelu wa dishima. Balunda babu badi ne ditekemena dia kuikala ne muoyo pa buloba badi benza bia muomumue. Kabidi, bonso badi batekemene bua kupanduka ku “dituku dia Yehowa” badi ne bua kulama mu lungenyi mêyi a lukunukunu a Elisha adi atangila dikuma buloba. Tuangatayi miketa ya bulelela ne tuasayi nayi ne lukunukunu luonso​—misangu ya bungi—​eyowa, too ne pamba Yehowa ne: mudimu wetu nayi wajiki.

18. Mmunyi mutudi ne bua kuandamuna ku mêyi a mu 2 Petelo 3:11, 12?

¹⁸ Mu katupa kîpi emu, “dituku dia Yehowa” nedituishe ndongoluelu eu mubi wa malu ku ndekelu. Pa nanku tuanyishe bua mêyi aa a mupostolo Petelo adi alenga ku mutshima atusonsole. Wakela tshikemu ne: “Bu mudi bintu ebi bionso ne bua kuenguluka nenku, mbantu ba mushindu kayi banudi ne bua kuikala mu bienzedi binsantu bia nsombelu ne malu a bulamate kudi Nzambi, bindile ne balame bikole mu lungenyi dikalaku dia dituku dia Yehowa!” (2 Petelo 3:11, 12, NW) Padi kapia ka tshiji tshia Nzambi kumvuija ku butuangaji bua Yezu Kristo kengulula tshitupa tshionso tshia ndongoluelu eu, anu aba badi bamanyike bua nsombelu muakane ne bulamate kudi Nzambi ke bapanduka. Bupeluke bua mu nsombelu ne bua mu nyuma mbua mushinga mukole. Bidi kabidi nanku bua dinanga dia bantu netu, ditudi tuleja mu diandamuna ku majinga abu, nangananga mu nyuma ku diambuluisha dia mudimu wetu wa Buena-nkristo.

19. Ntshinyi tshitudi ne bua kuenza bua kupanduka ku “dituku dia Yehowa”?

¹⁹ Mêyi ebe ne bienzedi biebe bidiku bikusunguluja bu musadidi muena lulamatu wa Nzambi ne muena lukunukunu anyi? Bikalabi nanku, udi mua kuikala ne ditekemena dia kupanduka ku “dituku dia Yehowa” ne kubuela mu bulongolodi bupiabupia bulaya kudi Nzambi. Eyowa, udi mua kupeta lupandu biwenzela bana babu ne Kristo ba mu nyuma malu mimpe bualu mbalondi bende, bu muvua bena dibaka bena Shuneme bakidile Elisha. Bua kupeta lupandu, udi kabidi ne bua kuikala bu Namana, eu wakitaba ne budipuekeshi buonso dîyi dia kudi Nzambi ne kuluaye mutendeledi wa Yehowa. Biwajinga bikole bua kuikala ne muoyo wa kashidi mu mparadizu wa pa buloba, udi ne bua kukuatshisha ntendelelu mulelela ne muoyo mujima, anu bu muakenza Yehonadaba. Apu udi mua kuikala munkatshi mua basadidi bena lulamatu ba Yehowa, bikala mua kumona mu katupa kîpi emu dikumbana dia mêyi aa a Yezu: “Luayi, nuenu bavua Tatu wanyi mubeneshe, nupiane bukalenge bunulongoluela katshia ku ntuadijilu wa bukua-bantu.”​—Matayo 25:34, NW.

[Mêyi adi kuinshi]

Mmunyi muwandamuna?

◻ Ng’imue ngikadilu kayi idi ikengela bua kumona mua kupanduka ku “dituku dia Yehowa”?

◻ Ntshilejilu kayi tshiakashiya bena dibaka bena Shuneme mu matuku a Elisha?

◻ Ndilongesha kayi ditudi mua kupetela kudi Namana?

◻ Mmunyi mutudi mua kulonda tshilejilu tshia Yehonadaba?

◻ 2 Petelo 3:11, 12 udi ne bua kuikala ne buenzeji kayi kutudi?