Bakenza disua dia Yehowa

Tshilejilu tshia didipangisha amue masanka ne tshia bulamatshi

BUA nsongalume kampanda tshidime muena dîna dia Elisha, tshiakatuadija bu dituku dia mudimu wa buatshiabuatshia wa kusekuna buloba tshiakakudimuka bua kuikala dituku ditambe bunene mu nsombelu wende. Pavuaye wenza mudimu mu budimi, Elisha wakapeta dikumbula kadiyi ditekemena dia Eliya, muprofete muende lumu wa mu Izalele. Elisha uvua mua kuikala mudiebeje ne: ‘Udi nanyi tshilumbu kayi?’ Kavua ne bua kuindila mutantshi mule bua kupeta diandamuna. Eliya wakakupa tshikowelu tshiende pambidi pa Elisha, uleja ne: dimue dituku Elisha uvua ne bua kuikala mupinganyi wende. Elisha kakapepeja dibikila edi nansha. Diakamue yeye e kushiya budimi buende bua kuluaye musadidi wa Eliya.​—1 Bakelenge 19:19-21.

Bidimu bitue ku bisambombo pashishe, tshikondo tshiakakumbana bua Eliya kumbukaye. Muyuki wa diumbuka diende mbaubikile bu “umue wa ku miyuki idi itamba kukemesha” mu Mifundu ya tshiena-Ebelu.

Eliya udi udilongolola bua kumbuka

Eliya wakajinga bua kukumbula Betele, Yeriko ne Yordane bua musangu wa ndekelu. Ebi bivua mua kumvuija kilometre mivule ya luendu, bitupa bikuabu bia luendu pa mikuna ya bipokupoku. Mu tshitudilu tshionso tshia luendu alu, Eliya wakakankamija Elisha bua kushadila pine apu. Kadi Elisha wakasuminyina bua kushala pamue ne mfumuende too ne ku ndekelu.​—2 Bakelenge 2:1, 2, 4, 6.

Pavuabu ku Betele ne ku Yeriko, “bana balume ba baprofete” kuyabu kudi Elisha.a Buobu kumukonka ne: ‘Udi mumanye ne: Yehowa neumushe mukalenge webe ku mutu kuebe lelu’eu anyi?’ Yeye kuandamuna ne: ‘Ee, ndi mumanye, nuanji kupuwa.’​—2 Bakelenge 2:3, 5.

Pashishe Eliya ne Elisha kumatabu mu njila batangile ku Musulu wa Yordane. Pakafikabu ku Yordane, Eliya wakenza tshishima pavua bana balume batue ku 50 ba baprofete batangidile pa bule. ‘Eliya wakakopola tshikowelu tshiende, wakatshivunga, wakatuta pa mâyi, ne mâyi akapanduluka eku ne eku; bubidi buabu bakasabuka pa buloba bûme.’​—2 Bakelenge 2:8.

Diakamue bamane kusabuka, Eliya kuambilaye Elisha ne: “Tshiudi musue ne nkuenzele kabayi banji kungumbusha kuudi ntshinyi? Utshindombe.” Elisha kulombaye ‘bitupa bibidi’ bia spiritu wa Eliya​—mmumue ne: bitupa bibidi bivuabu bapesha muan’a bute pa tshibidilu. Bushuwa, Elisha uvua munemeke Eliya anu muvua muan’a bute mua kunemeka tatuende. Kabidi, bakamuteka bua kuikalaye mupinganyi wa Eliya bu muprofete wa Yehowa mu Izalele. Nenku dilomba diende kadivua nansha dia budisui peshi kadiyi diakanyine. Kadi, bu muvuaye mumanye ne: Yehowa nkayende ke uvua mua kukumbaja dilomba edi, Eliya kuandamunaye ne budipope buonso ne: “Udi undomba tshintu tshikole.” Pashishe kusakidilaye ne: “Kadi wewe mummone diba didibo . . . bangumbusha muaba uudi, neupete tshintu atshio; wewe kuyi mummone, kuakupeta to.”​—2 Bamfumu 2:9, 10, MMM; Dutelonome 21:17.

Kakuyi mpata Elisha uvua mutambe kupangadija bua kulamata bikole mfumuende. Pashishe, ‘dikalu [“dia mvita,” NW] dia kapia ne tubalu tua kapia’ biakamueneka. Diakamue kumpala kua Elisha uvua muikale ukema, kuangatabu Eliya mu mvunde​—kuyabu nende mu tshishima mu muaba mukuabu.b Elisha kuambulaye tshikowelu tshia Eliya ne kuasaye luendu upingana ku muelelu wa Musulu wa Yordane. Wakatshituta pa mâyi, wamba ne: “Yehowa, Nzambi wa Eliya, udi kudi kunyi?” Mâyi e kupanduluka, kufilawu tshijadiki tshia patoke tshia se: Elisha uvua ne diambuluisha dia kudi Nzambi bu mupinganyi wa Eliya.​—2 Bakelenge 2:11-14.

Malongesha buetu tuetu

Pakamubikilabu bua kuenza mudimu wa pa buawu ne Eliya, diakamue Elisha wakashiya budimi buende bua kusadila muprofete muende lumu wa mu Izalele. Kakuyi mpata, imue ya ku midimu yende ivua mipuekele, bualu wakalua kumanyika bu muntu uvua ‘wela mâyi pa bianza bia Eliya.’c (2 Bakelenge 3:11) Nansha nanku, Elisha wakangata mudimu wende bu diakalenga, ne wakalamata bikole ku luseke lua Eliya.

Lelu’eu basadidi bavule ba Nzambi badi baleja lungenyi lua muomumue lua didipangisha amue masanka. Bamue mbashiye “madimi” abu, nzubu yabu, bua kuyisha lumu luimpe mu teritware ya kule anyi bua kusadila bu bena mu dîku dia Betele. Bakuabu mbaye mu matunga a ku ba bende bua kuenza midimu ya luibaku ya Société. Bavule mbitabe tshitudi mua kubikila ne: midimu mipuekele. Pabi, kakuena muntu udi wenzela Yehowa mudimu udi kauyi ne mushinga. Yehowa udi wanyisha bantu bonso badi bamuenzela mudimu ne budisuile buonso, ne neabeneshe lungenyi luabu lua didipangisha amue masanka.​—Mâko 10:29, 30.

Elisha wakalamata Eliya too ne ku ndekelu. Wakabenga bua kulekela muprofete eu mukulakaje nansha pavuaye umuambila bua kuenza nanku. Kakuyi mpata, malanda mashemakane akadimaye ne Eliya akavuija dinanga dia bulamatshi dia nunku dikale dia milowo. Lelu’eu, basadidi ba Nzambi badi badienzeja bua kukolesha malanda abu ne Nzambi ne kuikala pabuipi ne bena kuitabuja nabu. Tshisuikidi tshikole tshia buobumue netshipete dibenesha, bualu Bible udi wamba bua Yehowa ne: “Kudi muena bulamatshi newenze malu mu bulamatshi.”​—2 Samuele 22:26, NW.

[Mêyi adi kuinshi]