“Tumbisha Yehowa ne bintu biebe bia mushinga”​—Mushindu kayi?

“TUMBISHA Yehowa ne bintu biebe bia mushinga ne mamuma a kumudilu a mu madimi ebe.” (NW) Nsapi wa dipeta mabenesha mavule a kudi Yehowa udi mu mêyi aa a meji, mafundisha ku spiritu kukadi bidimu bu 2 600. Bualu mufundi udi utungunuka ne kuleja ne: ‘Nunku mayeba ebe neûle tente ne bintu bia bungi, bikaminu biebe nebipongolole mvinyo mupiamupia.’​—Nsumuinu 3:9, 10.

Kadi kutumbisha Nzambi kudi kumvuija tshinyi? Mbintu kayi bia mushinga bitudi ne bua kutumbisha nabi Yehowa? Ne mmunyi mutudi mua kuenza bualu ebu?

“Tumbisha Yehowa”

Mu Mifundu, muaku munene wa tshiena-Ebelu bua kutumbisha, ka·vohdhʹ, udi umvuija ku muaku ku muaku “bujitu.” Nenku kutumbisha muntu kudi kumvuija kumuangata bu udi ne bujitu, wa mukitshi, anyi muikale ne mushinga. Muaku mukuabu wa tshiena-Ebelu bua kutumbisha, yeqarʹ, mmuandamuna pawu ne: “a mushinga mukole” ne “bintu bia mushinga mukole.” Bia muomumue, muaku wa tshiena-Greke ti·meʹ, mukudimuna ne: ‘kutumbisha’ mu Bible, udi ufila ngumvuilu wa makumbu, mushinga, mushinga mukole. Nenku muntu udi utumbisha mukuabu pa kumuleja kanemu kondoke ne kumutua makumbu.

Kupa bunême kudi kabidi mu munga mushindu. Tangila muyuki wa muena Yuda wa lulamatu Môdekai, eu wakatandula musangu kampanda tshifufu tshielela Asuweruse, Mukalenge wa Perse wa kale. Pashishe, pakamanya mukalenge ne: kabavua benze tshintu nansha tshimue bua kutumbisha Môdekai bua tshienzedi atshi, wakakonka Hamana, kavula-mbedi wende, mushindu mutambe buimpe wa kutumbisha muntu uvua musankishe mukalenge. Hamana wakela meji ne: bunême bu ebu buvua mua kuikala buende yeye, kadi uvua mudishime bikole! Nansha nanku, Hamana wakamba ne: muntu wa nunku badi ne bua kumuvuadika “bilulu bidi mukelenge uluata” ne kubanda pa ‘kabalu kadi mukalenge wenda pa nyima paku.’ Wakakoma ne: ‘Bendeshe muntu au pa nyima pa kabalu aka mu musesu wa musoko, bela dîyi kumpala kuende ne: Nebenzele muntu udi mukalenge usanka bua kunemeka nunku.’ (Esetê 6:1-9) Mu tshilejilu etshi, kupesha muntu bunême kuvua kumvuija kumuzangamika patoke bua se: bantu bonso bamutue makumbu.

Bia muomumue, kupa Yehowa bunême kudi mishindu ibidi: muntu pa nkayende kumutua mushinga ne kumuzangamika patoke pa kudifila ne pa kukuatshisha mudimu wa dimanyisha dîna diende patoke.

“Bintu biebe bia mushinga”​—Mbinganyi?

Bintu bietu bia mushinga bidi bushuwa bikonga muoyo wetu, dîba dietu, mamanya etu, ne bukole buetu. Netuambe tshinyi bua bintu bietu bia ku mubidi? Tangila mêyi a Yezu pakamonaye mukaji mukamba mupele wela tujanja tukese tubidi tua mushinga mukese mu kashete ka mapa a mu ntempelo. Wakamba ne: ‘Bintu biakela mukaji eu mupele wa mu lufuila bidi bitambe biakela bakuabu bonso, bualu bua buonso buabu [bafidi bakuabu ba mapa] bakela bintu mu mushete wa Nzambi biakadibu kabayi nabi bualu, bia pa mutu; kadi mukaji eu wakela bintu biakadiye nabi bualu, bintu biende bionso bia kudia menemene.’ (Luka 21:1-4) Yezu wakasamuna mukaji mukamba eu bua ditumika ne bintu biende bia ku mubidi bua kutungunuja ntendelelu wa Yehowa.

Nenku, kakuyi mpata, bintu bia mushinga bitela kudi Solomo bidi kabidi biumvuija bintu kayi bionso bia ku mubidi bitudi mua kuikala nabi. Ne tshiambilu tshia se: “bia musomo bia mamuma ebe,” tshidi tshifila ngumvuilu wa dipesha Yehowa bintu bitambe buimpe bia mu bintu bietu bia mushinga.

Kadi, mmunyi mudi difila bintu bia ku mubidi mua kutumbisha Nzambi? Bintu bionso ki mbidianjile kuikala biende anyi? (Musambu 50:10; 95:3-5) “Bintu bionso bidi bifuma kûdi,” ke muakatonda Mukalenge Davidi pavuaye usambila Yehowa ne muoyo mujima. Ne bua dipa dinene divua yeye ne bena tshisamba tshiende bafile bua kuibaka ntempelo, Davidi wakamba ne: “Tuakafila anu bintu biebe kûdi.” (1 Kulondolola 29:14) Nenku patudi tufila mapa kudi Yehowa, tudi patupu tumupingajila bintu bidiye mutupeshe bua bulenga bua mutshima wende. (1 Kolinto 4:7) Kadi, anu mudibi bileja ku ntuadijilu, kutumbisha Yehowa kudi kumvuija kumuzangamika ku mêsu kua bantu bakuabu. Ne mapa a bintu bia ku mubidi matumika nawu bua kulubuluja ntendelelu mulelela adi atumbisha Nzambi. Mu Bible mudi bilejilu bilenga bia mushindu’eu wa ditumbisha Yehowa.

Bilejilu bia kale

Kukadi bidimu bu 3 500, pakakumbana tshikondo bua Yehowa kufilaye tabernakle mu tshipela bu muaba wa ntendelelu bua bena Izalele, kuakamueneka dijinga dia bintu kabukabu bia mushinga mukole bivua plan uvua Nzambi mufile ulomba. Yehowa wakatumina Mozese dîyi bua ‘muntu yonso udi witabuja mu mutshima wende kuluaye ne kupa kua Yehowa.’ (Ekesode 35:5) Muyuki udi utungunuka ne kuamba ne: ‘Muntu yonso wakadi mutshima wende umuenzeja ne wakadi tshipapayi wakalua ne kupa kua Yehowa bualu bua mudimu wa nzubu wa tshitendelelu ne bintu bionso biakadi mu tshitendelelu ne bilulu bia tshijila.’ (Ekesode 35:21) Bushuwa, mapa abu a budisuile akamueneka mikale mavule matambe kupita avua akengedibua bua mudimu mu mushindu wa se: ‘bakakanda bantu bua kabalu ne bintu bikuabu.’​—Ekesode 36:5, 6.

Tangila tshilejilu tshikuabu. Pakamana tabernakle kukumbaja tshipatshila tshiende ne malongolola avua enda enzeka bua kuibaka ntempelo, Davidi wakafila nkayende dipa dinene bua ntempelo uvua muanende Solomo ne bua kuibaka. Wakela kabidi dîyi bua bakuabu kumutuabu mu nyima, ne bantu kuitababu ne mapa a bintu bia mushinga bua Yehowa. Tshiamu tshia argent ne or nkayabi bivua mua kuikala bia dolare mitue ku miliyare 50 bua mushinga udiku lelu’eu. “Bantu kusankabu bualu bobo bakadifidila [“mapa a budisuile,” NW].”​—1 Kulondolola 29:3-9; 2 Kulondolola 5:1.

“Mapa a budisuile” mu matuku etu aa

Mmunyi mutudi mua kupeta petu disanka dia kufila mapa a budisuile mu matuku etu aa? Mudimu wa mushinga mukole udi wenzeka mu buloba bujima patudi tuakula apa ng’wa diyisha Bukalenge ne dienza bantu bayidi. (Matayo 24:14; 28:19, 20; Bienzedi 1:8) Ne Yehowa mmumone biakanyine bua kuomekela Bantemu bende bujitu bua bipatshila bia Bukalenge pa buloba.​—Yeshaya 43:10.

Kakuena mpata bua se: bidi bikengela mfranga bua kuambuluisha mudimu udi Bantemu ba Yehowa benza lelu’eu. Kuibaka ne kulama bimpe Nzubu ya Bukalenge, Nzubu ya Mpuilu, biro bia filiale, bikuminu bia mikanda, ne nzubu ya Betele kudi kulomba mfranga. Kupatula ne kuabanya Bible ne mikanda mishindamene pa Bible mu miakulu mishilangane bidi kabidi bilomba ditula mfranga. Mmunyi mudi mfranga eyi mitula bua dilongolola dia mudimu ipeteka? Nku diambuluisha dia mapa adi mikale anu a budisuile!

Mapa mavule ng’a kudi bantu badi​—bu mukaji mukamba uvua Yezu mujoje—​bikale anu ne mpetu mikese. Bu mudibu kabayi basue bua kupangila mushindu’eu wa ditumbisha Yehowa, badi bafila mfranga mikese “pa diabo dimona,” ne ku misangu ‘bapitshisha ne pa dimona diabu mene.’​—2 Bena Korente 8:3, 4, MMM.

Mupostolo Paulo wakambila bena nkristo ba mu Kolinto ne: ‘Nunku muntu ne muntu afile bintu bu muakadisunguileye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kolinto 9:7) Kufila ne disanka kudi kulomba didilongolola dimpe. Paulo wakambila bena Kolinto ne: ‘Ku dituku dia kumudilu dia lumingu ne lumingu, muntu ne muntu wa munkatshi muenu adibutshile bintu bu muakabipetaye, bua kakuikadi masangisha a bintu pangalua.’ (1 Kolinto 16:2) Mu mushindu wa muomumue, pa nkaya ne ku budisuile, aba badi bajinga kufila mapa bua kuyisha mudimu wa Bukalenge kumpala lelu badi mua kuteka ku luseke ndambu wa lupetu luabu bua tshipatshila etshi.

Yehowa udi ubenesha badi bamutumbisha

Nansha mudi dilubuluka mu bintu bia ku mubidi diodi nkayadi kadiyi difikisha ku dilubuluka dia mu nyuma, ne kalolo konso, kutumika ne bintu bietu bia mushinga​—dîba dietu, bukole buetu, ne bintu bietu bia ku mubidi—​bua kutumbisha Yehowa kudi kufila mabenesha a bungi. Ebi mbilelela bualu Nzambi, muena bintu bionso, udi utushindikila ne: ‘Muena mutshima wa dipa neavuijibue mubanji; wamiamina bakuabu mâyi neamiaminyibue pende mâyi kabidi.’​—Nsumuinu 11:25.

Kunyima kua lufu lua Mukalenge Davidi, muanende Solomo wakatumika ne mapa a budisuile avua tatuende musangishe bua kuibaka ntempelo wa lumu anu muvua Yehowa mufile buludiki. Tshikondo tshionso tshivua Solomo mushale ne lulamatu mu ntendelelu wende wa Nzambi, ‘Bena Yuda ne bena Izalele bonso bakashikama talalaa . . . ku Dana too ne ku Bê-sheba, matuku onso a Solomo.’ (1 Bakelenge 4:25) Mayeba avua mûle, mabungu a mvinyo akazabalala​—pavua bena Izalele ‘batumbisha Yehowa ne bintu biabu bia mushinga.’

Pashishe, ku butuangaji bua muprofete Malaki, Yehowa wakamba ne: ‘Nuntete mpindieu ne muanda eu, numone bingikala tshiyi mununzuluile bibi bia mu diulu, munulokeshile masanka, kanuyi nukengela bintu bikuabu kabidi.’ (Malaki 3:10) Dilubuluka dia mu nyuma dia basadidi ba Yehowa lelu’eu ntshijadiki tshia se: Nzambi mmukumbaje dilaya diende.

Yehowa udi usanka bushuwa patudi tuenza tshietu tshitupa mu diyisha bipatshila bia Bukalenge kumpala. (Ebelu 13:15, 16) Ne udi ulaya bua kutukuatshisha ‘bituatungunuka ne kukeba diambedi bukalenge ne buakane buende.’ (Matayo 6:33, NW) Ne disanka dinene dia mu mutshima, ‘tutumbishayi Yehowa ne bintu bietu bia mushinga.’

[Kazubu mu mabeji 28, 29]

Mishindu idi bamue basue kufila mapa bua mudimu wa pa buloba bujima

Bavule batu bateka ku luseke, anyi balongolola mfranga bua kuela mu tushete tua mapa tudi ne miaku eyi: “Mapa bua mudimu wa pa buloba bujima wa Société​—Matayo 24:14.” Ngondo yonso bisumbu bidi bituma mfranga eyi ku tshilombuelu tshia buloba bujima ku Brooklyn, mu New York, peshi ku biro bia filiale wa mu ditunga.

Badi mua kutuma kabidi mapa a budisuile a mfranga buludiludi ku Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, peshi ku biro bia Société bidi biambuluisha ditunga dienu. Badi mua kufila nansha bilengejilu anyi binga bintu bia mushinga. Badi ne bua kutuma mapa aa pamue ne mukanda mufunda mu tshikoso udi uleja ne: aa mmapa a buludiludi.

Dilongolola dia mapa mafila ne dîyi

Muntu udi mua kupesha Société Watch Tower mfranga bilondeshile dilongolola dia pa buadi, bua dîba dikala muyifidi nayi dijinga, bamupingajileyi. Bua mamanyisha makuabu, suaku ufundile Treasurer’s Office mu adrese mufunda kuulu eku.

Difila dilongolola

Kusakidila ku mapa mafila buludiludi a mfranga ne mapa a mfranga mafila ne dîyi, kudi mishindu mikuabu ya difila bua kuambuluisha mudimu wa Bukalenge wa pa buloba bujima. Imue ya kudiyi ng’eyi:

Tshieya: Muntu udi mua kupesha Société Watch Tower bukenji bua kuangata mfranga ya tshieya bua kudiambuluisha (police d’assurance-vie) anyi mfranga ya pansio. Bidi bikengela kumanyisha Société bua ndongoluelu yonso ya nunku.

Konte ya ku banke: Konte ya ku banke, mikanda ya mfranga mitekesha, peshi konte ya mfranga ya pansio wa muntu, badi mua kuyifunda mu dîna dia peshi kuyivuija ya kufuta dîba dia lufu kudi Société Watch Tower mu diumvuangana ne malu-malomba a banke wa muaba au. Bidi bikengela kumanyisha Société bua ndongoluelu yonso wa nunku.

Lupetu ne nsombu: Badi mua kupesha Société Watch Tower lupetu ne nsombu (titres et obligations) bu dipa dia buludiludi anyi bilondeshile ndongoluelu kampanda muenza bua kutungunuka ne kufuta makasa kudi mufidi.

Nzubu: badi mua kupesha Société Watch Tower nzubu udiye mua kusumbisha bu dipa dia buludiludi anyi pa kulamina mufidi nzubu, udi mua kutungunuka ne kusombelamu patshidiye ne muoyo. Bidi bikengela kumanyisha Société kumpala kua kumupesha dipa dia nzubu.

Bumpianyi ne bintu bitekesha bua mukuabu: Badi mua kushila Société Watch Tower nzubu anyi mfranga ku diambuluisha dia mukanda wa bumpianyi mumanya kudi Mbulamatadi, peshi badi mua kufunda mu mukanda wa tshipungidi dîna dia Société bu udi ne bukenji bua kuangata bintu bitekesha (contrat de fideicommis). Bintu bitekesha mu dîna dia bulongolodi bua malu a Nzambi bidi mua kukepeshisha mushinga wa bitadi. Badi ne bua kutumina Société kopi wa mukanda wa bumpianyi anyi wa tshipungidi tshia bintu bitekesha.

Anu bu mudi tshiambilu tshia “dipa dilongolola” tshiumvuija, mishindu eyi ya mapa idi bia muomumue ilomba didilongolola kampanda didianjila kuenza kudi mufidi. Bua kuambuluisha bantu badi bajinga bua kukuatshisha Société ku butuangaji bua mushindu kampanda wa difila dilongolola, mbapatule broshire udi ne tshiena-bualu tshia Planned Giving to Benefit Kingdom Service Worldwide (Difila dilongolola bua kukuatshisha mudimu wa Bukalenge wa pa buloba bujima). Broshire eu uvua mufunda bua kuandamuna ku nkonko ya bungi idibu bele Société bua mapa, bumpianyi ne mikanda ya bintu bitekesha. Udi kabidi ne mamanyisha makuatshishi a pa mutu adi atangila nzubu, mfranga, ne dilongolola dia bitadi, ne mmuenza bua kuambuluisha bantu mu États-Unis badi bajinga bua kukuatshisha bipatshila bia Bukalenge pa buloba bujima, bua kusunguluja mishindu idi itamba kukuatshisha ne miakanyine bua kufila mapa aa bilondeshile malu a mu nsombelu wabu ne mu mêku abu. Pa kubala broshire eu ne pa kuyukila ne aba badi benza mudimu ku biro bia Planned Giving Desk, bantu ba bungi badi bikale bambuluisha Société, ne kabidi badi bakepeshisha bikole mushinga wa bitadi mu dienza nenku. Udi mua kupeta broshire eu ku dilomba, pa kufunda anyi pa kuela nshinga.

Aba badi banyishe umue wa ku ndongoluelu eyi ya difila dilongolola badi ne bua kufundila Planned Giving Desk, Watch Tower Bible and Tract Society of Pennsylvania, 100 Watchtower Drive, Patterson, New York 12563-9204, telefone (914) 878-7000, peshi badi ne bua kufundila biro bia Société bidi biambuluisha ditunga diabu.