Mupeshanganyi wa “dipa dionso dimpe”

“Musangu kampanda ngakabidikibua kudi muambi wa Eglise reformée. Uvua musue kumanya mushindu untu ndongolola eklezia wanyi. Ngakamuambila ne: . . . ‘Katutu tufuta mafutu to; kakutu tshintu nansha tshimue tshidi tshibueja bantu mu matandu. Katutu tulomba mfranga.’ ‘Kadi, mmunyi munutu nupeta mfranga?’ ke muakebejaye. Ngakandamuna ne: ‘Mpindieu, Doktere​—— bingakuambila tshidi tshilelela, neutshianyishe ne lutatu. Bikala bantu badibueje mu njila eu, kabakusangana kabondo kabatekela ku diulu diabu nansha. Kadi, badi badijinguluila ne: mfranga itu itudibua. Batu badiambila buobo bine ne: “Nzubu eu wakatudisha mfranga. . . . Mmushindu kayi undi mua kupeta mfranga mikese bu ayi?”’ Wakantangila bu muntu udi wela meji ne: ‘Udi mungangate bu nganyi​—bu muana muambula ukamanyi bule bua njila anyi?’ Meme kuamba ne: ‘Mpindieu Doktere​—— ndi nkuambila bushuwa. . . . Bikala muntu kampanda mupeta dibenesha, pashishe muikale ne dimona dia bintu bia ku mubidi, neatumike nabi bua Mukalenge. Bikalaye kayi ne mushindu, bua tshinyi tudi mua kumubambidika ku bukole?’”

​—Charles T. Russell, muludiki wa kumpala wa Société Watch Tower, mu “Tshibumba tshia Nsentedi,” (angl.) tshia mu dia 15 Juillet 1915.

TUTU tupesha bualu Yehowa Nzambi ke uvua mupeshanganyi wa kumpala. Dipeshangana diende diakatuadija kale mu bikondo bikena-kubala​—ne bufuki buende bua diambedi, “Muanende umuepele.” (Yone 3:16) Ku buenzeji bua dinanga, wakapa bakuabo dipa dia muoyo.

Muana wa Nzambi, Yezu Kristo, ndipa ditambe bunene dia Yehowa kutudi. Kadi, Muana wa Nzambi yeye nkayende, kêna ndekelu wa dipeshangana dia Nzambi. “Buimpe bukena-butuakanyine bua Nzambi” ke budi mupostolo Paulo ubikila bu “Dipa dikena kusumba ne kufuanyikija.” (2 Kolinto 9:14, 15) Eyowa, dipa adi ndisangishe buimpe ne bulenga-bunangi: bionso bidi Nzambi muenze bua bantu bende ku butuangaji bua Yezu. Bulenga bua nanku mbua dikema, ke bualu kayi muntu kêna mua kubufuanyikija anyi kubumvuija. Kabidi, kudi malu makuabo mavule mu dipeshangana dia Nzambi.

Kale, mu meji ne budipuekeshi buonso, mukalenge kampanda wakamanyisha ne: bintu bionso bimpe bivuaye ufila bu mapa bivua bushuwa bia Yehowa. Wakamba ne: “Bualu bintu bionso mu mawulu ne pa buloba mbiebe. Bukalenge mbuebe, O Yehowa, wewe, utu udibandisha kabidi ku mutu kua bionso. . . . Ne kabidi, ndi nnganyi ne bantu banyi mbanganyi, bua tuetu kuteta kupumbisha kufila mulambu bu eu ku budisuile? Bualu bintu bionso mbifume kuudi, ne tuakupeshibi ku tshianza tshiebe nkayebe.”​—1 Kulondolola 29:11-14.

Tshilejilu tshia Nzambi

Yakobo, mulongi wa Yezu Kristo, uvua mumanye ne: Yehowa Nzambi mpokolo wa bintu bionso bimpe bia mishindu yonso. Mapa mapuangane atu afumina anu kudiye. Yakobo wakafunda ne: “Dipa dionso dimpe ne tshintu tshionso tshipuangane bidi bifuma kuulu, bualu bitu bituluka kua Tatu wa butoke bua mu diulu, ne kudiye kakuena dishintuluka dia dinyunguluka dia mundidimbi.”​—Yakobo 1:17.

Nansha mu mianda ya kupeshangana dipa, Yakobo wakamona mudi Nzambi mushilangane ne bantu. Bantu badi mua kufila mapa mimpe, kadi pa tshibidilu kabatu benza nanku to. Mapa awu adi mua kuenjibua ne tshipatshila tshia buiminyi, anyi adi mua kuenjibua bua kuteya muntu bua enze bualu kampanda bubi. Ne kudi Yehowa kakuena dishintuluka to; katu ushintuluka to. Kupita apu, mushindu udi mapa ende kawutu ushintuluka. Atu’anu makezuke. Atu anu adiundisha buakane ne disanka bia bukua-bantu. Atu’anu malenga ne ambuluisha, kaatu abutula nansha.

Mabingila a kupeshangana mapa

Mu matuku a Yakobo, bamfumu ba bitendelelu bavua ne tshibidilu tshia kufila mapa patoke bua bantu buonso babamone. Bavua bafila ne kabingila kabi. Lukuka luabo lua kutumbishibuabu kudi bantu, luakabapatula mu njila muakane wa mêyi-maludi. Kadi, bena nkristo, bavua ne bua kuikala bashilangane ne bantu abu. Yezu wakababela ne: “Binuikala nuya kufila mapa a dilekelelangana bilema, kanuedi mpungi kumpala kuenu, anu bu mutu bena mpala-ibidi benza mu nsunagoga ne mu misesu, bua kutumbishibua kudi bantu. Bulelela ndi nnuambila ne: mbamane kupeta difutu diabo dionso. Kadi nuenu, panuikala nufila mapa a dilekelelangana bilema, tshianza tshienu tshia bakaji katshimanyi tshidi tshia balume tshienza, mapa enu a dilekelelangana bilema ikale a mu musokoko; apu Tatu wenu udi utangila mu musokoko neanufute.”​—Matayi 6:2-4.

Kabingila ka difila dia mapa bua bena nkristo, nkuambuluisha bakuabo badi bakengela tshintu anyi bua kubasankisha peshi kulubuluja ntendelelu mulelela. Ki mbua kuditumbisha to. Ndekelu wa bionso, mêsu a Yehowa, adi amona tòo ne mu buondoke bua mutshima wetu. Udi mua kumona kabingila kadi mu munda muetu bituikala bafile mapa a dilekelelangana bileme.

Bantemu ba Yehowa batu benza madikolela bua kulonda tshilejilu tshia Yehowa ne tshia Muanende mu dipeshangana dia mapa. Batu bafila bidibu nabi. Badi ne lumu luimpe lua Bukalenge, ne batu balumanyisha bua bakuabo babeneshibue. Mbamanye ne: Nsumuinu 3:9 udi wamba ne: “Tumbisha Yehowa ne bintu biebe bia mushinga pamue ne mamuma ebe a diambedi.” Bualu filiale, bisumbu, ne bena bisumbu buonso badi bakeba ne muoyo umue diakalenga dia buonso, buena-muntu bujima budi bukolesha bantu mu nyuma ne bubalubuluja. Dilubuluka dia bintu bia ku mubidi kaditu difikisha ku dilubuluka dia mu nyuma, kadi dilubuluka dia mu nyuma ditu dituala dilubuluka dia bintu bia ku mubidi bidi bikengedibua bua mudimu wa Yehowa.

Mishindu ya kupeshangana

Kudi mishindu mivule idi muntu yonso mua kutua mudimu wa dimanyisha lumu luimpe nyama ku mikolo. Umue ng’udi utangila Nzubu ya Bukalenge. Bena tshisumbu buonso batu batumika ne Nzubu wa Bukalenge. Bamue bakafila biuma bua dimuibaka anyi bua kumufutshila, kubueja nzembu, kufila bintu bu mudi vantilatere bua kapepa, ne kumukuba. Bu mudi dikuatshisha dia buonso dikengedibua, tushete tua mapa ntutekibua mu Nzubu wa Bukalenge, batu batumika ne mapa a ku budisuile bua kusakidila ku mfranga itu tshisumbu tshitula. Bikala mfranga mishale, idi mua kufidibua bu mapa kudi filiale wa Société Watch Tower, bilondeshile dipangadika dia tshisumbu.

Mapa adi mua kufidibua kudi filiale wa Société bua kulongesha ne kukuatshisha ba-misionere ne bampanda-njila ba pa buabu mu miaba ya buloba mudi lumu luimpe kaluyi luanji kumanyishibua kudi bantu bavule. Mishindu mikuabo idi mfranga itudibua bua kumuangalaja lumu luimpe mmisuikakaja ku mudimu wa ngendu wa batangidi bena-ngendu. Mupostolo Paulo, eu wakafila tshilejilu mu mudimu wa ngendu mu siekele wa kumpala, wakatumina tshisumbu tshia bena Filipoi dîyi ne: “Musangu wa kumpala ne mubidi, nuakantumina bimvua nkengela.” (Filipoi 4:14-16) Pa kumbusha mfranga idi ikengedibua bua mudimu wa ku dîba ne ku dîba wa mushindu’eu udi filiale yonso nawu, kudi kabidi dikuba dia nzubu ya Betele bana betu batu basomba ne batumika mu Betele. Difunda ne dituta dia mikanda idi ne mukenji muimpe wa lumu luimpe mmidimu idi Nzambi mufila, kadi diyabanya didi padi dikengedibua, ne didi padi ditudisha mfranga. Pashishe, kudi kabidi ditula dia mfranga bua mpuilu ya tshijengu ne ya distrike, katuyi tuakula bua idi ituka bua bilumbu ku tubadi bua ‘kubingisha ne kubanjija lumu luimpe bilondeshile mêyi ne mikenji bia ditunga.’​—Filipoi 1:7.

Dîba ditu musadidi wonso wa Yehowa upitshisha bua kumanyisha lumu luimpe ndia ku budisuile, kabidi bidi bia muomumue pa bidi bitangila dipa diende dia mfranga. Dibuta mfranga pa tshibidilu mfranga bua kukuatshisha nayi dimuangalaja dia ntendelelu mulelela, ndilombibue kudi mupostolo Paulo ne: “Mpindieu, bua disangisha mfranga bua bansantu, . . . dituku dia kumpala dionso dia lumingu, yonso wa kunudi ateke tshintu ku luseke ku nzubu kuende, bilondeshile dimona diende.”​—1 Kolinto 16:1, 2.

Padi muntu ufila dipa, kakumanya misangu yonso tshienzabu nadi menemene, kadi neamone bipeta mu dimuangalaja dia dilongesha dia Bukalenge. Luapolo ludi mu Annuaire des Témoins de Jéhovah 1993 ludi luleja ne: lumu luimpe lua Bukalenge ndulongeshibue mu matunga ne bidiila bipite pa 200 kudi ba-ministre bena nkristo bapite pa 4 500 000. Luapolo alu ludi lulenga ku muoyo. Dipa dionso, dikese anyi dinene, ditu dikuatshisha mu dimuangalaja dia lumu luimpe pa buloba bujima.

Mudimu eu mmukuatshisha ne mapa a kudi buonso masangisha. Bamue batu ne bukokeshi bua kufila bintu bivule bitu biambuluisha mu mudimu wa dimanyisha mu mushindu mubandile. Bamue batu bafila bikese. Kadi aba batu bafila mapa mashadile kabumvu bundu peshi kabambi ne: diabo dipa ndikese. Bushuwa, Yehowa katu umvua nanku to. Yezu wakatokesha bualu abu pakalejaye mushindu uvua Yehowa muanyishe mulambu wa mukamba kampanda. “Pashishe, pakamonaye mukamba kampanda wela mu kashete mfranga ya biamu ibidi ya mushinga mushadile wakamba ne: ‘Bushuwa ndi nnuambila ne: mukamba eu, nansha mudiye mupele, mmuele kubapita buobo buonso. Bualu, buobo buonso baba mbafile mapa malamuna pa bishadile biabo, kadi mukaji eu mmuele, mu bupele buende bua menemene, bionso bivuaye nabi.’”​—Luka 21:2-4.

Nansha bikale bapele anyi babanji, tudi mua kufila mu mishindu idi isankisha Yehowa. Mufundi wa misambu udi utuvuluija mushindu utudi mua kutumbisha Mukalenge ne Nzuji wetu. Udi wamba ne: “Nuambike Yehowa butumbi bua dîna diende; luayi ne dipa ne vuayi mu ntanda yende.” (Musambu wa 96:8) Pabi, tudi ne bua kuidikija tshilejilu tshia dinanga tshia Tatu wetu wa mu diulu ne dipesha bantu mapa ne disanka bualu wakadianjila kutupesha diambedi.

[Kazubu mu dibeji 30]

MUSHINDU UTU BAKUABO BAFILA MAPA BUA MUDIMU WA DIMANYISHA BUKALENGE

◻ MAPA BUA MUDIMU WA PA BULOBA BUJIMA: Bavule batu bateka ku luseke anyi mu ditula diabo dia mfranga bavuluka bua kuela mfranga mu tushete tua mapa tudi ne miaku eyi: “Mapa bua mudimu wa pa buloba bujima wa Société​—Matayi 24:14.” Ngondo yonso bisumbu bitu bituma mfranga ayi ku tshilombuelu tshia pa buloba bujima tshia Société ku Brooklyn, mu New York, anyi kudi filiale utu pabuipi.

◻ MAPA: Mapa a ku budisuile a mfranga adi mua kutumibua buludiludi kudi Watch Tower Bible and Tract Society of Pennsylvania, 25 Columbia Heights, Brooklyn, New York 11201, peshi ku filiale wa Société wa ditunga dienu. Biju anyi bintu bikuabo bia mushinga bidi mua kufidibua. Mukanda mufunda mu mêyi makese udi uleja ne: aa mmapa, udi ne bua kutumibua pamue nawu.

◻ MAPA ADI AKENGELA BUALU: Badi mua kupa Société Watch Tower mfranga bua kuyilama tòo ne pafua muyifidi, mu mushindu wa se: bikala muenayi uyikengela, badi mua kumupingajilayi.

◻ MFRANGA YA PANSION: Société Watch Tower udi mua kupeshibua bukenji bua kuangata mfranga ya pansion. Bikalabi nanku, bidi bikengela kumanyisha Société.

◻ KONTE YA KU BANKE: Konte ya ku banke, konte ya depo, peshi konte wa muntu pa nkayende idi mua kunzuludibua bua Société Watch Tower, anyi mikale mifunda dîna dia Société pafua muena konte mu diumvuangana ne banke wa muaba awu. Bikalabi nanku, bidi bikengela kumanyisha Société.

◻ TITRE NE OBLIGATION: Badi mua kupa Société titre ne obligation bu dipa kadiyi tshintu tshia kulomba, anyi mu mushindu wa se: mufidi atungunuke ne kupeta makasa.

◻ NZUBU: Badi mua kupa Société nzubu idi mua kusumbibua; anyi mufidi udi ufila dipa buludiludi, anyi mu mushindu wa kupetelaku mfranga patshidiye ne muoyo. Bidi bikengela kumvuangana ne Société kumpala kua kumupa dipa dia nzubu.

◻ TESTAMENTS NE FIDÉICOMMIS: Badi mua kupa Watch Tower Bible and Tract Society of Pennsylvania nzubu anyi mfranga ku butuangaji bua testament udi mbulamatadi mumanye, peshi badi mua kufunda dîna dia Société bua ababidile contract de fidéicommis. Bulongolodi bua malu bua Nzambi butu butumika ne fidéicommis budi mua kufuta bimue bitadi. Dibeji dimue dia testament anyi dia contrat de fidéicommis didi ne bua kutumibua kudi Société.

Binuikala nujinga kupeta mamanyisha anyi mibelu pa bualu ebu, fundayi mu adresse ewu: Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, anyi ku biro bia filiale wa ditunga dienu.

[Bimfuanyi mu dibeji 31]

Mushindu utubu batumika ne mapa enu:

1. Bena Betele badisuile

2. Diibaka dia nzubu ya filiale

3. Diambuluisha dia bena tshipupu

4. Nzubu ya Bukalenge

5. Ba-misionere