“Nkuepi kudi mfranga ifumina?”
BATANGIDI ba bindidimbi bia kasete-video ka Société Watch Tower: “Les Témoins de Jéhovah: Un nom et une organisation” mbakemeshibue. Badi bamona bakaji ne balume ba mankenda ne mubidi mukole, bena bisa ne nshidimukilu bishilashilangane, bafukisha mimuemue ne benza mudimu popamue mu diumvuangana. Ki ng’anu binunu bia benji ba mudimu bena disanka bidi bikoka ntema yabu nansha kadi kudi kabidi mulongolongo wa nzubu ku tshilombuelu tshia Société ku Brooklyn ne ku ferme yabo ku Wallkill, ku New York. Video eu udi uleja ne: munda mua nzubu minene eyi mudi mua kuikala biamu bia buena-lelu—biamu bidi ne lukasa mu mudimu wa dipatula ne dienza miliyo mivule ya mikanda ngondo yonso, biamu bia ordinatere bishilashilangane, ne bibambalu bivule bidi bienza midimu ya dikuatshisha dipatula dia mikanda.
Ebi bidi bikengela mfranga mipite bungi. Nenku bamue badi bakonka ne: “Nkuepi kudi mfranga ifumina?”
Benyi batu balua kutangila tshilombuelu tshia Société batu bia muomumue bakemeshibua. Badi buolola nshingu bua kutangila nzubu mupiamupia wa bisasa 30, eu ng’umue wa ku nzubu ya bisasa bivule ya tshilombuelu ya benji ba mudimu bena budisuile bapite pa 3 000. Diya kuendakana ku Nsangilu mupiamupia wa bilongelu wa Watchtower, mutantshi wa kilometre bu 110 ku nord kua Brooklyn, didi kabidi dikemesha bikole. Muaba eu utshidi mu diibakibua ne kudi benji ba mudimu basombeleku bu 1 200. Tulasa tubidi tua ba-misionere netubuejibue muaba au bua dilongeshibua diabu tshidimu tshionso ne pashishe nebatumibue mu matunga menyi bua kuenzelamu mudimu. Bulombodi bua bisumbu bia Bantemu ba Yehowa bungi bupite pa 10 000 mu États-Unis, budi bufumina amu ku muaba eu. Filiale mivule pa buloba bujima mmifume ku didiundisha nzubu yayi peshi idi idilongolola bua kuenza nanku. Dikumbaja mudimu wa buena eu didi dikengela mfranga mivule. Bantu badi bebeja ne: “Nkuepi kudi mfranga ifumina?”
Diandamuna didi dia se: idi ifumina kudi bantu badi bu mudi muntu kayi yonso wa kutudi. Mbantu ba pa buloba bujima badi bajinga kuenza muabu muonso bua kuambuluisha dilubuluka dia mudimu wa mushinga mukole wa bena nkristo wa kuamba lumu luimpe ne kulongesha. Muoyo wa budisuile wa buena eu ki mmupange bualu buusonsolodi nansha.
Tshilejilu tshifila kudi Izalele wa kale
Kukadi bidimu bu 3 500 bipite, mapa a kalolo avua makengedibue. Yehowa wakamanyisha Mozese bua kuasaye tabernakle, anyi “ntenta wa tshisangilu,” muasa bua kutumikabu nende mu ntendelelu wende. Tshimuenekelu tshifila kudi Nzambi tshivua tshilomba bintu bia mushinga bishilashilangane. Yehowa wakatuma dîyi ne: ‘usangishe kupa kua Yehowa munkatshi muenu; muntu yonso udi witabuja mu mutshima wende, alue biende ne kupa kua Yehowa.’ (Ekesode 35:4-9) Mmunyi muakandamuna bantu? Muyuki udi utumvuija ne: ‘Muntu yonso wakadi mutshima wende umuenzeja ne wakadi tshipapai wakalua ne kupa kua Yehowa bualu bua mudimu wa nzubu wa tshitendelelu ne bintu bionso biakadi mu tshitendelelu ne bilulu bia tshijila.’ ‘Dipa [edi] dia ku budisuile’ diakapita kuvula mu mushinga wa se: ‘bintu biakatamba bungi bua ebi bivua bikengedibue bua kuenza nabi mudimu wakamba Yehowa.’ (Ekesode 35:21-29; 36:3-5) Mmuoyo kayipu ukena wa budisui, wa kalolo muleja kudi bantu!
Bidimu bishadile ku 500 panyima, dilomba dikuabu dia mapa a budisuile kudi bena Izalele diakakengedibua. Dijinga dia Mfumu Davidi dia kuasa nzubu wa Yehowa mushindamija mu Yeruzaleme dikavua pa kukumbajibua ku butuangaji bua muanende Solomo. Davidi nkayende wakasangisha ne kufila tshitupa tshinene tshia bintu bivua bikengedibua. Pakafila Davidi dimanyisha dia kutuala “mulambo wa Yehowa,” bakuabo bakalonda dikasa diende. Tshipeta tshivua tshinyi? “Pashishe bantu bakasanka bualu bua bobo bakadifidila bintu biabo; bualu bua bakafila bintu biabo ne mitshima mitoke kudi Yehowa; mukelenge Davidi wakatamba kusanka kabidi.” (1 Kulondolola 22:14; 29:3-9) Argent ne or nkayabi bivua bia mushinga mutue ku dolare miliyare 50 bilondeshile mushinga wa matuku etu aa!—2 Kulondolola 5:1.
Tuamonyi ku bilejilu ebi se: muntu nansha umue kavua mupampamika bua kufila mulambo nansha. Bivua bienjibua anu “ku budisuile” ne bifila “ne mutshima wonso.” Yehowa kavua mua kusanka bu kabiyi bienzeka mushindu eu. Bia muomumue, pakakengedibua mapa a mfranga bua kuambuluisha bena nkristo bakengi, mupostolo Paulo wakafunda ne: kabikadi “bu bintu binyenga ku bukole.” Wakasakidila ne: ‘Nunku muntu ne muntu afile bintu bu muakadisunguilaye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi mmusue muena kupa udi ufila ne disanka.’—2 Kolinto 9:5, 7.
Dikengela dia lelu
Kudiku dikengela dia mapa a budisuile lelu’eu anyi? Didiku bulelela, ne nedikaleku ditambe bunene mu kupita kua tshikondo. Bua tshinyi?
Bena nkristo mbapeshibue buludiki bua pa buabu mu tshikondo tshia ku nshikidilu etshi. Yezu wakatumina bayidi bende dîyi ne: “Nunku, ndayi ne nuvuije bantu ba mu matunga wonso bayidi, nubatambuishe mu dîna dia Tatu, dia Muana ne dia spiritu munsantu, nubalongeshe mua kutumikila mêyi wonso andi munutumina.”—Matayo 28:19, 20, NW.
Bua kukumbaja mudimu munene eu wa dilongesha ne wa buambi eku tusemena pabuipi menemene ne mfùdilu wa “nkomenu wa ndongoluelu eu wa malu” bidi bikengela dîba dia bungi ne mfranga. Bua tshinyi? Bualu bionso abi bidi bikengedibua mu mudimu wa dimanyisha mukenji wa Bukalenge bua Nzambi “mu bitupa bia kulekule bia buloba.” (Bienzedi 1:8, NW) Bantu ba bungi lelu ki mbadiine mu Mifundu mushindu uvua bena Yuda ba mu siekele wa kumpala. Bushuwa, ba pa buloba bavule ki mbamanye Bible ne kabena bamumona bu Dîyi dia Nzambi nansha. Bamanyishi badi ne bua kulongeshibua ne kutumibua mu miaba ya kulekule. (Lomo 10:13-15) Ne ela meji pa bungi bua miakulu! Balongeshibue aba nebajinge kupeta Bible ne mikanda mishindamija pa Bible bua kubala ne kulonga mu muakulu wabo. Bua kubapeta mu mushindu mulongolola ne kubafikisha ku kakese ku kakese ku diboba dia mu nyuma mu mushindu udibu mene mua kuambuluisha bakuabu, bidi bikengela didilongolola dinene.—2 Timote 2:2.
Yezu wakamba ne: “lumu luimpe lua Bukalenge” ludi diambedi ne bua “kumanyishibua pa buloba bujima budi bantu bâse, neluikale tshimanyinu bua matunga wonso; apu, ke nshikidilu kushishaye kulua.” (Matayo 24:14, NW) Nunku mpindieu ke tshikondo tshitudi mua kudifila muetu muonso bua kukumbaja mudimu eu wa mushinga mukole. Bintu bietu nebienze mudimu muimpe kumpala kua biûma kujikabi mushinga wabi.—Yehezekele 7:19; Luka 16:9.
Mfranga idi iya penyi?
Société Watch Tower udi upatula mikanda miumvuiji ya Bible mu miakulu bungi bupite 230, ne mikuabu mifunda mu braille, kabidi ne filme-video mu ngakuilu wa dinayisha bianza bua kumvuija bajibale matshi. Ebi bidi bikengela kuikala ne tusumbu tua bakudimunyi ne babadi bakontolodi bua muakulu wonso. Kuela meji ku dienza dia mudimu wonso eu patupu, nangananga dipatula dia Tshibumba tshia Nsentedi ku ngondo mu miakulu 121 ne tshikondo tshimue tshimue mu miakulu 101, kudi kukemesha bikole. Bidi bushuwa ne mushinga bua bantu ba pa buloba bujima kupetabu ne kubalabu mamanyisha a muomumue. Tshidimu tshionso mushinga wa mabeji ne bintu bikuabu bitumika nabi mu dipatula bumanyishi bua Bukalenge pa mabeji peshi mu tusete ne film-video, idi amu ibanda. Bualu bua mishinga eyi budi ne bua kujikijibua anu ne mapa a bana betu.
Mudimu wa buambi ne wa dilongesha udi wenzeka pa buloba bujima mu teritware idi ikonga bisumbu bia bantemu ba Yehowa bipite pa 75 000. Bua kubateka mu buobumue ne kubakankamija, batangidi bena ngendu balongeshibue badi bakumbula tshisumbu tshionso misangu ibidi ku tshidimu. Mpuilu idi kabidi ne mushinga mu dipetesha dia malongesha. Badi ne bua kufutshila miaba mialabale bua kuenzelamu mpuilu eyi, idi ikolesha ditabuja. Mapa ebe a budisuile mbatumike nawu kabidi mu tshipatshila etshi.
Nansha mudi mpuilu yenzeka pa tshibidilu amu misangu isatu ku tshidimu, bisumbu bidi bidisangisha bua bisangilu bitanu bia ku lumingu. (Fuanyikija ne Ekesode 34:23, 24.) Dilua dia bapiabapia bavule badi bandamuna ku lumu luimpe didi divudija binunu bia bisumbu tshidimu tshionso. Ne diambuluisha dia miliyo ya dolare misomba Société, Nzubu ya Bukalenge nkama ne nkama mmiashibue tshidimu tshionso, ne mikuabu mmilongolola ne mmidiundisha. Nansha mudi mfranga eyi misomba bua kuenza nayi mudimu ne pashishe kupingaja, malomba a mfranga adi amu avule.
Mu muaba umue mudi divula ditu kadiyi dianji kuenzeka dimueneke, mmu matunga a Mputu wa ku Est avua ku bukokeshi bua ditunga divua dibikidibua diambedi ne: Union Soviétique. Ndisanka kayipu pa kuteleja mamanyisha a se: mudimu uvua utuadija kuenzeka mu tshitupa atshi! Mpindieu ba-misionere mbatumibue mu matunga mavule a luseke alu. Filiale mipiamipia mmitekibue mu bimue bimenga ne idi ivudija bungi bua ba-ministre bena budisuile badi bambuluisha mu dîku dia Betele pa buloba bujima didi ne bantu bapite pa 15 000. Bushuwa, bidi bikengela kusumba peshi kuasa nzubu ya kubatekamu. Mapa ebe a budisuile adi ambuluisha bua kukumbaja dikengela edi.
Mudimu wonso eu kawena mutangila ne kalengu kudi Satana ne ba-demon bende nansha. Badi bakeba muabu muonso ne: madikolela a basadidi bena lulamatu ba Yehowa apangile anyi kubajudila bilumbu. (Buakabuluibua 12:17) Ebi bidi biumvuija divula dia mvita bua kukuba bukenji bua tshisamba tshia Nzambi bua kuamba lumu luimpe ne kuikala ne nsombelu udi mu diumvuangana ne mikenji yende ya buakane. Kusakidila apu, kudi kabutu ka mvita ya mu ndongoluelu wa malu wa Satana eu, kabidi ne bipupu bia ku bintu bifuka, ebi bidi biumvuija ne: bintu bia diambuluisha bidi amu bikengedibue bua bana betu badi bapetangane ne diakabi pamue ne bakuabu kabidi. Mapa ebe a budisuile adi avudija diambuluisha edi dia mushinga mukole.
Yehowa neakufute
Kutumika ne dîba dietu ne bintu bietu ne kalolo kuonso bua kulubuluja mudimu wa Mukalenge kudi kutuala mabenesha manene. Mmushindu kayi au? Bualu Nzambi, udi kamanyina muena bintu bionso, neatufute. Nsumuinu 11:25 udi umanyisha ne: ‘Muena mutshima wa dipa neavuijibue mubanji; wamiamina bakuabo mai neamiaminyibue pende mai.’ Yehowa udi bushuwa umvua disanka patudi tuenza tshietu tshitupa bua kulubuluja ntendelelu wende. (Ebelu 13:15, 16) Wakalaya bena Izalele ba kale bavua mua kufila mapa a budisuile malombibue mu Tshiovo tshia mikenji ne: “‘Nuntete mu muanda eu,’ ke mudi Yehowa wa biluilu wamba, ‘bua kumona né tshiakununzuluila biibi bia mu mawulu ne kunuitshikijila dibenesha pa mitu yenu too ne muikala dikengela dia bintu kaditshiyiku kabidi.’” (Malaki 3:10, NW) Dilubuluka mu nyuma dia basadidi ba Yehowa lelu’eu ntshijadiki tshia ne: Nzambi mmukumbaje dilaya diende.
Mudimu munene eu wa kumanyisha kudi buonso dituku dia dipandishibua ne wa kuambuluisha bena mitshima milulame mu njila wa muoyo kawakutungunuka kashidi nansha. (Matayo 7:14; 2 Kolinto 6:2) Kadi aba buonso ba ku “mikoko mikuabu” ya Mukalenge badi ne bua kusangishibua. (Yone 10:16) Mmushindu kayipu udibi bikengela bua tukumbaje bualu ebu lelu’eu! Ne ndisanka kayipu dikala nadi yonso wa kutudi, pa kuvuluka mu bulongolodi bupiabupia bua buakane ne kuamba ne: ‘Mvua muenze muanyi muonso mu mudimu wa ndekelu wa disangisha’!—2 Petelo 3:13.
[Kazubu mu mabeji 30, 31]
Mushindu utu bakuabo bafila mapa bua Mudimu wa dimanyisha Bukalenge
MAPA BUA MUDIMU WA PA BULOBA BUJIMA: Bavule batu bateka ku luseke anyi mu ditula diabo dia mfranga bavuluka bua kuela mfranga mu tushete tua mapa tudi ne miaku eyi: “Mapa bua mudimu wa pa buloba bujima wa Société—Matayo 24:14.” Ngondo yonso, bisumbu bitu bituma mfranga ayi ku tshilombuelu tshia Société pa buloba bujima ku Brooklyn, mu New York, anyi kudi filiale wa ditunga.
MAPA: Mapa a ku budisuile a mfranga adi mua kutumibua buludiludi kudi Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, peshi ku filiale wa Société wa ditunga dienu. Biju anyi bintu bikuabo bia mushinga bidi pabi mua kufidibua. Mukanda mufunda mu mêyi makese udi uleja ne: aa mmapa, udi ne bua kutumibua pamue nawu.
MAPA ADI AKENGELA BUALU: Badi mua kupa Société Watch Tower mfranga bua kuyilama too ne pafua muyifidi, mu mushindu wa se: bikala muenayi uyikengela, badi mua kumupingajilayi.
MFRANGA YA PANSION: Société Watch Tower udi mua kupeshibua bukenji bua kuangata mfranga ya pansion. Bikalabi nanku, bidi bikengela kumanyisha Société.
KONTE YA KU BANKE: Konte ya ku banke, konte ya depo, peshi konte wa mfranga ya pansion wa muntu pa nkayende badi mua kuyipesha Société Watch Tower peshi kuenza bua bamufuteyo pafua muena konte mu diumvuangana ne banke wa muaba awu. Bikalabi nanku, bidi bikengela kumanyisha Société.
TITRE NE OBLIGATION: Badi mua kupa Société Watch Tower titre ne obligation bu dipa kadiyi tshintu tshia kulomba, anyi mu mushindu wa se: mufidi atungunuke ne kupeta makasa.
NZUBU: Badi mua kupa Société nzubu idi mua kusumbibua, anyi mufidi udi ufila dipa buludiludi, anyi mu mushindu wa kupetelaku mfranga patshidiye ne muoyo. Bidi bikengela kumvuangana ne Société kumpala kua kumupa dipa dia nzubu.
TESTAMENTS NE FIDEICOMMIS: Badi mua kupa Société Watch Tower nzubu anyi mfranga ku butuangaji bua testament udi mbulamatadi mumanye, peshi badi mua kufunda dîna dia Société bua ababidile contract de fidéicommis. Bulongolodi bua malu a Nzambi bùtù butumika ne fidéicommis budi mua kufuta bimue bitadi. Kopi wa testament anyi wa contract de fidéicommis udi ne bua kutumibua kudi Société.
MAPA MAPANGADIJA BUA KUFILA: Société mmulongolole broshire wa mu anglé udi ne tshiena-bualu ne: “Mapa Mapangadija bua kufila.” Aba badi mu Etats-Unis badi bapangadija mpindieu bua kufila mapa a pa buawu kudi Société peshi kushiya bumpianyi dîba dia lufu nebambuluishibue ne mamanyisha aa. Ebi bidi menemene bilelela bikalabu basue kukumbaja tshipatshila kampanda tshia dîku peshi dilongolola pa bintu bia bumpianyi eku batumika ne ndongoluelu wa mikenji bua kukepesha mushinga wa mapa anyi bumpianyi bidibu banyisha kufila.
Bua kupeta mamanyisha a pa mutu pa mianda kayi yonso mileja ku mutu eku, nufundile Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, anyi biro bia filiale wa ditunga dienu.