Ushindike ne: Udi muteke malu a mushinga pa muaba wa kumpala!

Kudi bisangilu dilolo, kadi udi ne mudimu wa kuenza. Ntshinyi tshiwateka pa muaba wa kumpala?

UDI mulume musele ne tatu wa nzubu. Padi dituku dile dia mudimu wa dipungi dijika, udi utuma meji ebe ku bisangilu bia tshisumbu bilongolola bua dilolo adi. Wewe mumbuke ku mudimu diakamue, newikale ne dîba dikumbane anu bua kuowa mâyi, kushintulula bilamba ne kudia biakudia lukasa lukasa kumpala kua kuya mu bisangilu. Diakamue mfumuebe wa mudimu udi ulua kukulomba bua kuenza mudimu mêba a pa mutu. Udi ukulaya bua kukufuta bimpe. Udi dijinga ne mfranga.

Peshi udi mukaji musela ne mamu wa nzubu. Mu dilamba biakudia bia dilolo, mêsu ebe adi amona mushiki wa bilamba kabiyi bikoma, bimue bia kudibi bia kuvuala malaba. Udi udiebeja ne: ‘Meme mubuele mu bisangilu dilolo edi, ntshikondo kayi tshingapeta dîba dia kubikoma?’ Bu muudi ufuma ku dipeta mudimu wa ku mubidi wa ku dîba ne ku dîba, udi umona mudibi bikole bua kuenza midimu ya nzubu eku ukeba mua kupeta biakudia ne bia kuvuala.

Anyi udi mulongi. Mesa a mu nzubu muebe mmûle ne midimu ya mu tulasa. Mivule ya kudiyi ivua mifila kukadi matuku, kadi udi muyinengeshe, ne mpindieu midimu kabukabu mmimane bua kuyenza musangu umue. Udi ukeba kulomba dianyisha dia baledi bebe bua upumbishe bisangilu bua kujikija midimu yebe ya mu tulasa.

Ntshinyi tshiwateka pa muaba wa kumpala: mudimu wa ku mubidi wa mêba a pa mutu, dikoma bilamba, midimu ya mu tulasa, anyi mbisangilu bia tshisumbu? Mu ngakuilu wa mu nyuma, kuteka malu a mushinga pa muaba wa kumpala kudi kumvuija tshinyi? Mmuenenu wa Yehowa udi munyi?

Ntshinyi tshiudi ne bua kuteka kumpala?

Katupa kîpi kunyima kua bena Izalele bamane kupeta Mêyi-matuma Dikumi, bakajikila muntu wangula nkunyi dituku dia Nsabatu. Bualu ebu buvua bukandika bikole mu Mikenji. (Nomba 15:32-34; Dutelonome 5:12-15) Mmunyi muuvua mua kuikala mukose tshilumbu etshi? Uvua mua kuikala mubingishe muntu au, wamba ne: tuamba eku tuela eku, kavua wenza mudimu au bua kupeta bintu bivule to, kadi bua kupetesha bena dîku diende bivua bikengedibua anyi? Uvua mua kuikala muele meji ne: kuvua bikondo bivule mu tshidimu bua kulama Nsabatu ne se: musangu umue uvuaye mupangile, pamu’apa bua dipanga kulongolola malu kumpala kua dîba dia muntu eu, bavua mua kumufuila luse bipepele anyi?

Yehowa wakamona tshilumbu atshi tshikale tshinene. Bible udi wamba ne: ‘Yehowa wakambila Mose ne: Nebashipe muntu au bulelela.’ (Nomba 15:35) Bua tshinyi Yehowa wakatamba kuangata bualu buakenza muntu au ne luya lukole nunku?

Bantu bavua ne matuku asambombo bua kuangula nkunyi ne kujikija majinga abu avua atangila biakudia, bia kuvuala ne muaba wa kulala. Bavua ne bua kupitshisha dituku dia muanda-mutekete bua bivuabu bakengela mu nyuma. Nansha muvuabi kabiyi bibi bua kuangula nkunyi, bivua bibi bua kutumika ne tshikondo tshia kutendelela Yehowa bua kuangula nkunyi. Nansha mudi bena nkristo kabayi muinshi mua Mikenji ya Mozese, bualu ebu kabuenaku butupesha dilongesha mu diteka malu a mushinga kumpala lelu’eu anyi?​—Filipoi 1:10.

Bamane kuenza bidimu 40 mu tshipela, bena Izalele bakavua pa kubuela mu Buloba Bulaya. Bamue bavua batshioke ne didia dia mana mafila kudi Nzambi mu tshipela ne kakuyi mpata bavua batekemene bua kushintulula biakudia. Bua kubambuluisha bua balame mmuenenu muimpe pavuabu babuela mu buloba “budi ne mabele ne buitshi bia bungi,” Yehowa wakabavuluija ne: ‘Muntu kêna wikala ne muoyo bualu bua bidia nkayabi, kadi utu wikala ne muoyo bualu bua mêyi onso adi apatuka mukana mua Yehowa.’​—Ekesode 3:8; Dutelonome 8:3.

Bena Izalele bavua ne bua kuenza mudimu mukole bua “mabele ne buitshi” biabu. Kuvua biluilu bia kutshimuna, nzubu ya kuibaka, madimi a kudima. Nansha nanku, Yehowa wakatumina bantu abu dîyi bua kudisumbila tshikondo dituku dionso bua kuelangana meji pa malu a mu nyuma. Bavua kabidi ne bua kudilamina dîba bua kulongesha bana babu njila ya Nzambi. Yehowa wakamba ne: ‘Numanyishe bana benu [mêyi-matuma anyi], nubambilewu panuashikama mu nzubu yenu ne panuenda mu njila ne panualala ne panuabika.’​—Dutelonome 11:19.

Misangu isatu ku tshidimu, balume bonso bena Izalele ne ba-prozelite bavua balombibue bua kumuenekabu ku mêsu kua Yehowa. Bu muvuabu bajingulule ne: dîku dijima divua mua kupeta masanka a mu nyuma mu bikondo ebi, bamfumu bavule ba mêku bakalongolola bua kuya ne bakaji ne bana babu. Kadi nnganyi uvua mua kukuba nzubu ne madimi abu kudi baluishi pavua dîku diumbuka? Yehowa wakalaya ne: ‘Bantu bakuabu kabena bikale ne lukuka lua buloba buenu, panuamueneka kudi Yehowa Nzambi wenu misangu isatu ku tshidimu ku tshidimu.’ (Ekesode 34:24) Bivua bilomba ditabuja bua bena Izalele kuitababu ne: biatekabu bipatshila bia mu nyuma pa muaba wa kumpala, kabavua mua kujimija bintu bia ku mubidi to. Yehowa wakakumbaja dîyi diende anyi? Wakenza nanku bushuwa!

Tungunukayi ne kukeba diambedi Bukalenge

Yezu wakalongesha balondi bende bua kuteka malu a mushinga a mu nyuma kumpala kua bintu bikuabu bionso. Mu Muyuki wa pa Mukuna, wakabela bateleji bende ne: “Kanusumpakanyi ne kanuambi ne: ‘Netudie tshinyi?’ anyi, ‘Netunue tshinyi?’ peshi, ‘Netuvuale tshinyi?’ . . . Tungunukayi ne kukeba diambedi bukalenge ne buakane buende, ne bintu ebi [bia ku mubidi bidi bikengedibua] nebanusakidilebi.” (Matayo 6:31, 33, NW) Katupa kîpi kunyima kua lufu lua Yezu, bena nkristo bavua bafuma ku ditambula bakalonda mubelu au. Bavule bavua bena Yuda anyi ba-prozelite bena Yuda bavua baye ku Yeruzaleme bua kusekelela tshibilu tshia Pentekoste mu 33 B.B. Pavuabu kuine aku, bualu kabuyi butekemena buakenzeka. Bakumvua ne bakitaba lumu luimpe luvua lutangila Yezu Kristo. Bikale ne dijinga dikole dia kumanya bia bungi pa ditabuja divuabu bafuma ku dipeta, bakashala mu Yeruzaleme. Biakudia biabu biakatuadija kukepela, kadi bintu bia ku mubidi bivua pa muaba muibidi. Bavua bapete Masiya! Bana babu bena nkristo bakababanyina bintu bia ku mubidi bivuabu nabi bua bonso bamone mua kutungunuka ne ‘kudifila mu dilongesha dia bapostolo ne mu masambila.’​—Bienzedi 2:42, NW.

Mu bungi bua matuku, bamue bena nkristo bakalengulula mushinga wa kudisangisha pa tshibidilu ne ba-wetu. (Ebelu 10:23-25) Pamu’apa bavua balue banangi banekeshi ba bintu bia ku mubidi, balengulula malu a mu nyuma pavuabu bakeba kupeta mfranga buabu buobu ne bua mêku abu. Mumane kubela bana babu bua kabalekedi bisangilu, mupostolo Paulo wakafunda ne: ‘Mioyo yenu kayikadi ne lukuka lua biuma, nuikale ne disanka ne bintu binudi nabi, bualu bua Nzambi muine wakamba ne: Tshiena nkulekela, nansha kakese, tshiena nkushiya tshianana.’​—Ebelu 13:5.

Mubelu wa Paulo wakamueneka se: uvua mufila mu tshikondo tshiakanyine menemene. Bidimu bu bitanu panyima pa Paulo mumane kufunda mukanda wende mutumina bena Ebelu, tshiluilu tshia bena Roma tshilombola kudi Cestius Gallus tshiakanyunguluka Yeruzaleme. Bena nkristo ba lulamatu bakavuluka didimuija dia Yezu dia se: ‘Panuamona [tshintu etshi], udi pa mutu pa nzubu katuluki mu nzubu muende bua kuangata bintu bidimu; udi mu budimi kapinganyi bua kuangata tshikowelu tshiende.’ (Mâko 13:14-16) Bavua bamanye ne: lupandu luabu luvua lusuikila, ki nku dishindama dia midimu yabu anyi ku mushinga wa bintu biabu bia ku mubidi to, kadi nku ditumikila diabu dia mêyi a Yezu. Aba bakateleja mubelu wa Paulo ne bakateka bipatshila bia mu nyuma pa muaba wa kumpala, kakuyi mpata bakamona bipepele bua kushiya nzubu, mudimu, bilamba ne bintu biabu bikuabu bia mushinga bua kunyemena ku mikuna kupita muakenza aba bavua kabayi balekele dinanga dia mfranga.

Mushindu udi bamue bateka malu a mushinga pa muaba wa kumpala lelu’eu

Lelu’eu bena nkristo ba lulamatu mbanange disangila pa tshibidilu ne bana babu, ne bavule badi benza madikolela bua kumona mua kubuela mu bisangilu. Imue miaba, mudimu umuepele udiku ng’wa mpungi. Muanetu kampanda wakalomba bua kuenza mudimu pa muaba wa bena mudimu nende mu Disambombo dionso butuku, dituku ditu bantu bavule ba mu tshinsanga tshiabu basue kupitshisha mu dijikija lutetuku, bikalabu pabu mua kumuenzela wende mpungi mu matuku a bisangilu bia dilolo. Bana betu bakuabu bena mudimu wa mpungi batu babuela mu bisangilu bia tshisumbu tshidi pabuipi bikala mudimu wabu ubapangisha bua kubuela mu biabu bisumbu. Mu dienza nunku, kabatu bapangila bisangilu nansha. Muntu mukaji kampanda wa mu ditunga dia Canada uvua ufuma ku disankidila bulelela wakajingulula ne lukasa luonso mushinga udi nawu Kalasa ka Mudimu wa Teokrasi ne Tshisangilu tshia Mudimu, kadi ndongamu wende uvua tshipumbishi ku dibuela diende mu bisangilu. Pa nanku, wakafuta muena mudimu nende bua enze mudimu pa mpungi wende bua kupetaye dîba dia kubuela mu bisangilu ebi bia mushinga.

Bantu bavule badi basama mabedi a munanunanu batu bapangila bisangilu mu mpukapuka. Batu balonda ndongamu kumbelu ku diambuluisha dia telefone anyi bande mukuata padibu kabayi ne mushindu wa kufika ku Nzubu wa Bukalenge. Badi baleja dianyisha diakanyine ka-lumbandi bua ndongoluelu ya Yehowa ya mu nyuma mienza ku butuangaji bua “mupika [wende] wa lulamatu ne wa budimu”! (Matayo 24:45, NW) Bena nkristo badi bakuba baledi babu bakulakaje batu bushuwa banyisha padi muanetu wa balume anyi wa bakaji witaba bua kushala ne muledi eu bua mukubianganyi abuele mu bisangilu bia tshisumbu.

Dianjila kulongolola malu!

Baledi badi bamanye bidibu bakengela mu nyuma badi bambuluisha bana babu bua banyishe bisangilu bia bena nkristo. Pa tshibidilu, mbatekemene bua bana babu benze midimu yabu ya mu tulasa padibu bayifila pamutu pa kuyinengesha. Padiku bisangilu bia dilolo, bana badi mua kuenza midimu yabu ya mu tulasa diakamue padibu bamufuma. Manaya ne midimu mikuabu kabiena mua kuikala tshipumbishi bua bisangilu bia tshisumbu to.

Bu muudi mulume musele ne tatu wa nzubu, utu uteka dibuela mu bisangilu pa muaba wa kumpala anyi? Bu muudi mukaji musela ne mamu wa nzubu, utu uteta kulongolola midimu yebe bua kumona mua kubuela mu bisangilu anyi? Bu muudi nsonga, utu umona bisangilu bikale ne mushinga wa bungi kupita midimu yebe ya mu tulasa anyi, peshi midimu yebe ya mu tulasa itu ne mushinga mupite wa bisangilu?

Tshisangilu tshia tshisumbu nndongoluelu wa dinanga wa Yehowa. Tudi ne bua kuenza madikolela onso bua kubuelamu. Yehowa neakubeneshe biwateka malu a mushinga pa muaba wa kumpala!