Tungunuka ne kudiunda mu nyuma!

Dituku dia batismo wetu ndituku ditudi ne bua kuanyisha ne kuvuluka misangu yonso. ndituku ditudi tuanyisha patoke ne: tudi badilambule bua kusadila Nzambi.

BUA bantu ba bungi bidi bilomba madikolela a bungi menemene bua kufika ku bualu ebu​—kulekela bibidilu bibi bia mutantshi mule, kudilamuna kudi balunda babi, kushintulula ngelelu wa meji ne bikadilu bidi biele miji bikole.

Nenku nansha mudi batismo muikale muanda wa disanka ne wa mushinga mu nsombelu wa muena nkristo, udi anu ntuadijilu patupu. Mupostolo Paulo wakambila bena nkristo batambule ba mu Yudeya ne: “Mpindieu utukadi bashiye malongesha a ntuadijilu adi atangila Kristo, tuambuluje batangile ku dikola.” (Ebelu 6:1, NW) Eyowa, bena nkristo bonso badi ne bua ‘kupeta buobumue bua ditabuja ne bua [“dimanya dijalame dia,” NW] Muana wa Nzambi, too ne ku mulongo wa muntu mukole, too ne ku luidi lua dikola didi mu tshiuwidi tshia Kristo.’ (Efeso 4:13) Anu tuetu badiunde too ne ku buntu bukole ke patudi mua kuikala bushuwa ‘bajadikibue mu ditabuja.’​—Kolosai 2:7.

Mu bidimu bikese bidi bipite ebi, batendeledi nkama ya binunu badi bafumina ku didilambula mbalue mu tshisumbu tshia bena nkristo. Imue misangu udi umue wa kudibu. Anu bu bana benu ba mu siekele wa kumpala, kuena musue kushala muana mutekete mu nyuma nansha. Udi musue kukola, kuya kumpala! Kadi mmunyi muudi mua kukola? Ne mmu imue mishindu kayi muudi mua kudiunda?

Kudiunda ku diambuluisha dia didilongela

Paulo wakambila bena nkristo ba mu Filipoi ne: “Ebu ke bualu bundi ntungunuka ne kulomba, bua se: dinanga dienu didiunde misangu ne misangu ne dimanya dijalame ne busunguluji bua tshishiki.” (Filipoi 1:9, NW) Kukola mu “dimanya dijalame” kudi ne mushinga wa bungi mu didiunda diebe dia mu nyuma. ‘Kupeta dimanya dia Yehowa Nzambi ne dia Yezu Kristo’ mmuanda udi utungunuka, ki mbualu budi buimana kunyima kua batismo nansha.​—Yone 17:3, NW.

Muanetu wa bakaji muena nkristo utuabikila ne: Alexandra wakafika ku dijingulula bualu ebu bidimu dikumi kunyima kua mumane kutambula ne bidimu 16. Uvua mukolele mu bulelela ne misangu yonso uvua ubuela mu bisangilu bia bena nkristo ne wenza mudimu wa buambi. Udi ufunda ne: “Panyima pa ngondo mikese, ngakajingulula ne: kuvua bualu kampanda bubi menemene. Ngakapangadija bua kudikonkonona bikole ne bululame, tshindi ngela meji bua bulelela ne bua tshinyi ntshidi mu bulelela.” Ntshinyi tshiakasanganaye? Udi utungunuka ne: “Ngakasangana ne: tubingila tua dikala dianyi mu bulelela tuvua tuntatshisha. Ndi mvuluka ne: mu dikola dianyi, bavua bela kashonyi pa bisangilu ne mudimu wa budimi. Bivua bienze bu se: bibidilu bia didilongela ne disambila mu mushindu kampanda bivua ne bua kuikala ne muaba wabi. Kadi pangakakonkonona nsombelu wanyi, ngakajingulula ne: bualu ebu kabuvua buenzeke nanku to.”

Mupostolo Paulo udi ubela ne: “Ne mpenyi ne mpenyi patukadi, tulonde amu [“tshibidilu etshi tshia,” NW] muomumue.” (Bena Filipi 3:16, MMM) Tshibidilu tshidi mua kuambuluisha bua kuya kumpala. Bangabanga ne batismo webe, kakuyi mpata uvua ne tshibidilu tshia kulonga Bible ku lumingu luonso ne mulongeshi mukumbane bimpe. Pakakola dianyisha diebe, wakabueja mu tshibidilu etshi didilongolola kumpala kua dîba bua dilongesha dionso dia ku lumingu, ukeba mvese mitela mu Bible, ne bikuabu. Bu muukadi mutambule, udi mutungunuke ne ‘kuenda mu [tshibidilu atshi tshia] muomumue’ anyi?

Bikalabi ne: tòo, bidi bikukengela bua kukonkonona tshiakabidi malu audi muteke pa muaba wa kumpala, ‘ujadika malu adi makane.’ (Filipoi 1:10) Mutudi ne bivule bia kuenza, bidi bilomba didikanda bua kudilamina dîba dia kudibadila Bible ne kudilongela. Kadi masanka adi amueneka adi aleja ne: madikolela aa ng’a mushinga. Tangila kabidi muyuki wa Alexandra. Udi witaba ne: “Ndi ne bua kuamba ne: mvua muikale mu bulelela munkatshi mua bidimu 20 anyi kupita apu anu mu diya patupu mu bisangilu ne mu dienza mudimu wa budimi.” Kadi udi utungunuka ne: “Ndi mufike ku nkomenu wa se: nansha mudi malu aa mikale ne mushinga, wowu nkayawu kaena mua kunkuatshisha padi nsombelu utuadija kukola nansha. Bionso ebi mbifike ku dimueneka bualu bibidilu bianyi bia didilongela mbifue menemene, ne masambila anyi ki mmenza pa tshibidilu to ne nga pa mutu pa mutu. Mpindieu ndi mujingulule ne: ndi ne bua kuakajilula ngelelu wanyi wa meji ne kutuadija ndongamu wa dilonga muikale ne tshipatshila, bua mfike bushuwa ku dimanya Yehowa ne ku dimunanga ne ku dianyisha tshidi muanende mutupeshe.”

Biwikala dijinga ne diambuluisha bua kujadika tshibidilu tshimpe tshia didilongela, bakulu ne bena nkristo bakuabu bapie ba mu tshisumbu tshienu nebikale ne disanka bua kukukuatshisha. Kabidi, biena-bualu bidi mu nimero ya Tshibumba tshia Nsentedi tshia 1 Lumungulu 1995; 15 Tshimungu 1993; ne 15 Lumungulu 1986 (Mfual.) bidi ne ngenyi mivule idi ifila diambuluisha.

Bidi bikengela kusemena pabuipi ne Nzambi

Mu tshitupa tshikuabu muudi ne bua kudienzeja bua kudiunda mmalanda ebe ne Nzambi. Mu imue nsombelu kudi mene mua kuikala dijinga dikole mu muanda eu. Tangila Anthony, uvua mutambule patshivuaye mupuekele. Udi ulonda ne: “Mvua muana wa kumpala mu dîku dietu bua kutambula. Panyima pa batismo wanyi, mamu wakangupukila ne disanka. Tshivua muanji kumumona ne disanka divule nanku. Kuvua disanka dia bungi, ne ngakadiumvua ne bukole bua bungi.” Kadi kuvua bunga bualu. Anthony udi utungunuka wamba ne: “Munkatshi mua matuku a bungi, kakuvua nsonga mukuabu mutambule mu tshisumbu tshietu to. Nenku ngakaditambisha bikole. Mvua nditambisha nansha mu mandamuna ne miyuki yanyi mu bisangilu. Kupeta disamuna ne dianyisha bia kudi bantu biakalua malu a mushinga wa bungi kundi kupita disamuna Yehowa. Bushuwa tshivua nende mu malanda mashême nansha.”

Bu Anthony, bamue badi mua kuikala badilambule nangananga bua dijinga dia kusankisha bakuabu pamutu pa kuikala ne dijinga dia kusankisha Yehowa. Nansha nanku, Nzambi mmutekemene bua bantu aba bakumbaje dilaya diabu dia kumusadila. (Fuanyikija ne Muambi 5:4.) Kadi padibu kabayi ne bulamate bua nsungasunga kudi Nzambi, misangu mivule bitu bibakolela bua kuenza nanku. Anthony udi uvuluka ne: “Disanka divule dimvua nadi dituku dia batismo wanyi divua dia matuku makese. Tshidimu katshiyi tshianji kupita kunyima kua batismo wanyi, ngakapona mu bubi bunene ne bakulu ba tshisumbu bakankanyina. Tshikadilu tshibi tshia misangu ne misangu tshiakamfikisha ku dipatshibua mu tshisumbu. Bidimu bisambombo panyima pa didilambula dianyi kudi Yehowa, bavua bankuate ne bangele mu buloko bua dishipangana.”

Dima malanda mashême ne Yehowa

Nansha nsombelu webe muikale mushindu kayi, bena nkristo bonso badi mua kuandamuna ku dibikila dia mu Bible dia ne: ‘Semenayi pabuipi ne Nzambi ne yeye neasemene pabuipi nenu.’ (Yakobo 4:8) Bushuwa uvua mudie ndambu wa bulunda ne Nzambi pauvua ulonga Bible kumpala. Uvua mulonge ne: Nzambi ki n’nzambi ya mu lungenyi tshianana idibu batendelela mu Bukua-buena-nkristo to, kadi mmuntu muikale ne dîna ne: Yehowa. Uvua mulonge kabidi ne: udi ne ngikadilu milenga, ne se: udi “Nzambi wa luse ne dinanga, kena ukuata tshiji lubilu, udi mûle tente ne luse lujalame ne bushuwa.”​—Ekesode 34:6.

Kadi bua kukumbaja mutshipu webe bua kusadila Nzambi, udi ne bua kusemena pabuipi nende! Mushindu kayi? Mufundi wa misambu wakasambila ne: ‘Yehowa, ummanyishe bienzedi biebe! Unyishe njila yebe.’ (Musambu 25:4) Didilongela Bible ne mikanda ya Société didi mua kukuambuluisha bua kumanya Yehowa bimpe. Kuenza pa tshibidilu disambila dia muoyo umue kudi kabidi ne mushinga. Mufundi wa misambu udi ubela ne: ‘Nupumune milombu ya mu mitshima yenu kumpala kuende.’ (Musambu 62:8) Paudi umona se: masambila ebe adi apeta diandamuna, neumvue mudi Nzambi nkayende ukutabalela. Ebi nebikuambuluishe bua kudiumvua mutambe kuikala pabuipi nende.

Mateta ne ntatu bidi bifila kabidi mpunga mukuabu wa kusemena pabuipi ne Nzambi. Udi mua kupeta ntatu ne mateta a ditabuja, bu mudi masama, buenzeji bua mu kalasa ne ku muaba wa mudimu, anyi ntatu ya malu a mfranga. Bidi mene mua kuikala se: tshibidilu tshia mu teokrasi tshia kuenza mudimu wa buambi, kubuela mu bisangilu, anyi kulonga Bible ne bana bebe ntshikukolele. Kutu tshiadi ku ntatu eyi nkayebe to! Lomba Nzambi akuambuluishe, ulombe buludiki ne bulombodi buende. (Nsumuinu 3:5, 6) Umulombe spiritu wende munsantu! (Luka 11:13) Paudi upeta dikuatshisha dia Nzambi dia dinanga, neutambe kusemena pabuipi nende. Anu muakaleja mufundi wa misambu Davidi ne: ‘Teta, ulabule, umvue ne: Yehowa mmuakane; disanka didi kudi muntu udi unyemena kudiye.’​—Musambu 34:8.

Netuambe tshinyi bua Anthony? Udi uvuluka ne: “Ngakatuadija kuela meji bua tshikondo tshimvua ne bipatshila bivule bia mu nyuma bishindamene pa dienza dia disua dia Yehowa. Ebi bivua bia lutatu. Kadi mu ntatu yonso ayi ne diedibua mâyi ku makasa, ngakavuluka dinanga dia Yehowa. Biakalomba tshikondo tshile bua meme kushisha kupeta mushindu wa kusambila Yehowa, kadi ngakenza bualu ebu, ne ngakamupumuina mutshima wanyi, mmulomba dibuikidila. Ngakatuadija kabidi kubala Bible ne biakankemesha bua kumona mushindu umvua mupue malu a bungi muoyo ne mumvua ne dimanya dikese pa bidi bitangila Yehowa.” Nansha mutshidi Anthony ne bua kujikija buloko buende bua tshibawu tshivuaye mubunde, udi upeta diambuluisha dia kudi Bantemu ba muaba au ne mmutangile ku dipetulula makanda ende a mu nyuma. Ne dianyisha dionso, Anthony udi wamba ne: “Ku diambuluisha dia Yehowa ne dia bulongolodi buende, ndi mupete mushindu wa kumbusha bumuntu bukulukulu, ne dituku dionso ndi ndienzeja bua kuvuala bupiabupia. Mpindieu malanda anyi ne Yehowa adi ne mushinga mukole mutambe kundi.”

Didiunda dia mu nyuma mu mudimu webe

Yezu Kristo wakalomba balondi bende bua bikale bayishi ba ‘lumu luimpe lua bukalenge.’ (Matayo 24:14) Bu muutshidi mumanyishi mupiamupia wa lumu luimpe, dimanya diebe mu mudimu eu didi mua kuikala dikese. Nenku, mmunyi muudi mua kudiunda bua kumona mua ‘kukumbaja mudimu webe’?​—2 Timote 4:5.

Mushindu umue ng’wa kudima mmuenenu muimpe. Longa bua kuangata mudimu wa buambi bu “tshiuma,” bu diakalenga. (2 Bena Korente 4:7, MMM) Mmpunga wa kulejila dinanga dietu, bulamatshi ne muoyo-mutoke kudi Yehowa. Udi kabidi utuambuluisha bua kuleja diditatshisha bua muntu netu. Kudifila kakuyi budisui mu muanda eu kudi mua kuikala mpokolo wa disanka dia bushuwa.​—Bienzedi 20:35.

Yezu muine uvua ne mmuenenu muimpe bua mudimu wa buambi. Kumanyisha bakuabu malelela a mu Bible kuvua bu “bidia” kudiye. (Yone 4:34) Pa nanku tudi mua kuamba mu tshikoso tshivua tshimusaka bua kuambuluisha bakuabu mu mêyi ende a se: “Ndi musue.” (Matayo 8:3) Yezu uvua umvuila bantu luse, nangananga aba bavua bikale ‘batata ne batangalaja’ kudi bulongolodi bua Satana. (Matayo 9:35, 36) Utu ‘musue’ kuambuluisha bia muomumue aba badi mu mîdima ya mu nyuma ne badi bakengela bukenke budi bufuma mu Dîyi dia Nzambi anyi? Nenku neudiumvue musakibue bua kuandamuna ku dîyi-dituma dia Yezu dia se: “Nenku ndayi ne nuenze bantu ba mu matunga onso bayidi.” (Matayo 28:19, NW) Bushuwa, newikale musakibue bua kuenza mudimu eu tshishiki bilondeshile makanda ebe a mubidi ne nsombelu yebe.

Nsapi mukuabu udi ufikisha ku didiunda ndienza mudimu wa buambi pa tshibidilu​—lumingu luonso pikalaku mushindu. Kuenza nunku kudi mua kuambuluisha bua kukepesha ditshina ne buôwa bidi mua kupangisha muntu utu uyisha anu mu mpukapuka. Kuenza pa tshibidilu mudimu wa budimi nekukuambuluishe kabidi mu mishindu mikuabu. Nekuvudije dianyisha diebe bua bulelela, nekukoleshe dinanga diebe bua Yehowa ne bua muntu nebe, ne nekukuambuluishe bua kutungunuka ne kutuishila mêsu pa ditekemena dia Bukalenge.

Kadi netuambe tshinyi bikala nsombelu uudi nende mpindieu utamba kutekela dienza diebe dia mudimu wa buambi mikalu? Bikalaku kakuyi mushindu wa kuenza makajilula, nanku peta busambi mu dimanya se: Nzambi udi usanka bikole bua tshionso tshiudi mua kuenza, pawikala mudifile ne anyima mujima mu mudimu webe. (Matayo 13:23) Imue misangu udi mua kudiunda mu mishindu mikuabu, bu mudi mu dilengeja mbabi yebe mu buambi. Mu tshisumbu, Kalasa ka Mudimu wa Teokrasi ne Tshisangilu tshia Mudimu bidi bifila dilongesha ditambe buimpe mu muanda eu. Pa tshibidilu, patudi tutamba kuzanzamuka mu mudimu, neutambe kutusankisha ne netupatule bipeta bimpe.

Nenku bidi bushuwa se: didiunda dia mu nyuma kadiena ne bua kuimana dituku didi muntu utambula nansha. Mupostolo Paulo wakafunda bua ditekemena diende dia kuikala ne muoyo udi kauyi kufua mu diulu ne: “Bana betu, tshiena ngelangana meji ne nkadi mumane kupeta difutu; kadi ndi ngenza bualu bumue: ndi mpua bidi kunyima kuanyi muoyo ne ndi ndikolesha bua kupeta bidi kumpala kuanyi. Nunku, ndi nyemena ku kipatshila bua kupeta difutu didi [“Nzambi,” NW] mutubikidile mu [“Kristo Yezu,” NW] bua tuetu kuangata kulu. Tuetu bonso badi bakole, tuelangane meji nunku ewu. Kadi bikala bakuabo ba munkatshi muenu belangana meji mushindu mukuabo, [“Nzambi,” NW] neanujinguluile bualu ebu.”​—Filipoi 3:13-15, MML.

Eyowa, bena nkristo bonso, nansha bikale ne ditekemena dia kuikala ne muoyo udi kauyi kufua mu diulu anyi muoyo wa kashidi mu Mparadizu pa buloba, badi ne bua ‘kudikolesha’​—badienzeja ne muabu muonso bua kupeta tshipatshila tshia muoyo! Batismo webe uvua ntuadijilu mulenga, kadi udi anu mbangilu tshianana. Utungunuke ne kudienzeja bua kudiunda mu nyuma. Ku diambuluisha dia bisangilu ne didilongela, “ikalayi bantu bakole ku ngelelu wenu wa meji.” (1 Kolinto 14:20, MML) ‘Upete bukole bua kumvua nabu mudi butshiame ne bule, mudi butumbuke ne buondoke’ bua bulelela. (Bena Efeze 3:18, MMM) Didiunda diudi wenza kadiakukuambuluisha anu bua kulama disanka ne diakalenga mpindieu to, kadi bua kupeta kabidi muaba wa bukubi mu bulongolodi bupiabupia bua Nzambi, muwikala mua kudiunda tshiendelele ku bukokeshi bua Bukalenge buende bua mu diulu!

[Tshimfuanyi mu dibeji 29]

Bidi bilomba didikanda bua kupeta dîba dia kudilongela

[Tshimfuanyi mu dibeji 31]

Kuikala ne mmuenenu muimpe kudi mua kutuambuluisha bua kupeta disanka mu mudimu