Dimukilayi buena-Simona!

BAVUA bangata Simona wa mu Samariya ne mushinga wa bungi mu tshinsanga tshiabu. Muntu eu uvua ne muoyo mu siekele wa kumpala B.B., ne bantu bavua basue majimbu ende bikole, kufikabu ne kudimuamba ne: ‘Muntu eu udi Bukole bua Nzambi budibu babikila ne: Bunene.’​—Bienzedi 8:9-11.

Kadi panyima pa Simona mumane kulua muena nkristo mutambule, wakajingulula bukole bupite buvuaye nabu kumpala. Buvua bukole buvuabu bapa bapostolo ba Yezu bua kupesha bantu bakuabu mapa a bishima a spiritu munsantu. Simona wakakema bikole mu mushindu wa se: wakasua kupesha bapostolo makuta ne kulombaye ne: ‘Numpe meme kabidi bukole ebu, bua muntu ungatentekela bianza bianyi angate biende [“spiritu munsantu,” NW].’​—Bienzedi 8:13-19.

Mupostolo Petelo wakakanyina Simona, wamba ne: ‘Argent yebe ifue nebe, bualu bua wewe wakelangana meji ne: nengangate dipa dia Nzambi ku bintu. Wewe kuena ne tshitupa anyi luseke mu bualu ebu, bua mutshima webe kawena muimpe ku mêsu kua Nzambi.’​—Bienzedi 8:20, 21.

Ku muyuki eu wa mu Bible ke kudi kufumina muaku “buena-Simona,” udibu bumvuija bu “mpekatu wa disumba anyi disumbisha mianzu anyi milongo ya mu ekleziya.” Tshibungu kampanda (New Catholic Encyclopedia) tshidi tshileja ne: nangananga kubangila mu siekele wa 9 too ne wa 11 “buena-Simona buvua butangalake mu nzubu ya badiambike, mu bamfumu ba ekleziya ba muanzu mushadile, munkatshi mua bepiskopo ne nansha munkatshi mua ba-pape.” Mpatuidi wa tshitema wa tshibungu tshia The Encyclopædia Britannica (1878) udi wamba ne: “Dilonga dia malu a kale a bisangilu bia disungula ba-pape didi dituisha balongi ne: kakutu kuanji kuenzeka masungulangana mu ekleziya kakuyi buena-Simona to, misangu ya bungi patubu benza buena-Simona mu bisangilu biabu, bitu mu mushindu mutambe bubi, kauyi bundu ne wa patoke.”

Lelu’eu bena nkristo balelela badi ne bua kudimukila buena-Simona. Tshilejilu, bamue badi mua kutamba kutumbisha anyi kufila mapa a kalolo kudi aba badi mua kubapesha masanka a mudimu a pa mutu. Ku lukuabu luseke, aba badi mua kufila masanka aa a mudimu badi mua kuleja kansungasunga pa kuapesha bantu badi mua kubapa mapa anyi batu misangu mivule basue kubapawu. Mu nsombelu eyi yonso ibidi mudi buena-Simona, ne Mifundu idi ipisha patoke ngenzelu wa nunku. Petelo wakabela Simona ne: ‘Nunku kudimuna mutshima webe, ulekele bubi buebe ebu, ulombe Nzambi ne bumue neakubuikidile meji adi munda muebe. Ndi mmona ne: wewe utshidi mu nyongangandu wa bululu ne mu lukanu lua bualu bubi.’​—Bienzedi 8:22, 23.

Diakalenga, Simona wakamona bunene bua dijinga diende dibi. Wakasengelela bapostolo ne: ‘Nundombele Mukalenge bua nansha bumue bua malu anuakuamba kabufiki kundi.’ (Bienzedi 8:24) Bangata dilongesha didi mu muyuki eu ne mushinga, bena nkristo balelela badi badienzeja bua kuepuka katoba konso ka buena-Simona.