Mushindu wa kupeta disanka dia bungi mu bisangilu

¹ Bisangilu bidi ne mushinga mukole bua tuetu kuikala bimpe mu nyuma. Disanka ditutu tupetelamu didi dilondesha buludiludi tshitutu tuenza kumpala kua bisangilu, dîba didibi bienzeka ne kunyima kuabi. Mmunyi mutudi mua kuambuluishangana tuetu bine ne kuambuluisha bakuabu bua kulama disanka dia bungi patudi tubuela mu bisangilu?

² Kumpala kua bisangilu: Didilongolola didi ne buenzeji bunene pa disanka ditudi tupetela ku bisangilu. Patudi badilongolole bimpe, tudi tutamba kuikala ne meji a kuteya ntema ne kufila mandamuna mu bisangilu. Kabidi, mudimu wonso udibu batupesha mu bisangilu, tudi ne bua kuulongolola bimpe, ne tshipatshila tshia kulongesha mu bujalame bilondeshile mêyi-mashidimunyi ne kukoka ntema ya bateleji. Tudi ne bua kuambulula misangu ya bungi. Patudi tudienzeja bua bisangilu bikale ne luya ne bikoleshangana bua muntu yonso apeteleku dikuatshisha, tudi tudiunda mu nyuma ne tudi tumvua disanka dia bungi.​—1 Tim. 4:15, 16.

³ Dîba dia bisangilu: Kufila mandamuna mu bisangilu kudi mua kutuambuluisha bua kubisankidila bikole. Muntu yonso mu tshisumbu udi ne bua kudianjila kudilongoluela pa nkayende bitupa bia nkonko ne mandamuna. Mumvuija adi majadika ne maludika anu pa bualu atu pa tshibidilu alela bipeta bitambe buimpe. Kulonda mu mêyi makese malu mamonamona adi akolesha kudi mua kukankamija menemene ne kufila makanda, ne tudi ne bua kuenza nunku padibi biakanyine. (Nsu. 15:23; Bien. 15:3) Patudi ne mudimu wa kuenza mu tshisangilu, tudi ne bua kuakula ne musangelu ne dituishibua, kuuvuija mulenga, bu bualu bua bushuwa budi buakanyine.

⁴ Kunyima kua bisangilu: Kuyikila ne bakuabu mu mêyi malenga, kuelangana muoyo wa bulunda ne kuakula kakese pa malu mateleja mu bisangilu nebitukuatshishe bonso. Patudi tuleja disanka dietu padi bansonga, bakulakaje ne bapiabapia benza midimu mu bisangilu, bidi bikolesha dinanga dia buena-muntu. Pamutu pa kujana badi bapumbisha mu bisangilu, tudi ne bua kuyikila nabu bua disanka ditudi nadi dia mutudi tubuelamu, pa nanku netubakankamije bua kubuela mu bisangilu.​—Eb. 10:24, 25.

⁵ Katudipangishi dipa dia mushinga mukole edi dia kuikala kukankamijangana. (Lomo 1:11, 12) Tuetu mua kuenza muetu muonso, netuikale bonso mua kulama disanka mu dibuela mu bisangilu bia bena Kristo.