Baledi, bana benu badi bakengela ditabalela dia muntu pa nkayende

“Bana bebe baledibue nebikale bu [tuana tua, NW] mitshi ya olive, banyunguluke mesa ebe.”​—MUSAMBU WA 128:3.

1. Mmunyi mudi dikolesha dia bikunyibua mua kufuanyikijibua ne dikolesha dia bana?

MU MALU mavule, bana badi badiunda ne bakola amu bu bikunyibua. Bua kabingila aka, kabiena mua kukemesha, bu mudi Bible wakula bua muoyo wa muntu ne: “muonshi wa [mvinyo, NW] udi ukuama” ne udi ufuanyikija bana ne “[tuana tua, NW] mitshi ya olive, banyunguluke mesa [ende].” (Musambu wa 128:3) Tshidime neanuambile ne: kukolesha tuana tua bikunyibua ki nkupepele nansha, nangananga padi nsombelu ya muvu ne buloba kabiyi biakanyine. Bia muomumue, mu “matuku a ku nshikidilu aa a njiwu” mbikole bua kukolesha bana ne kuvuabo bakulumpe bakolesha bimpe, batshinyi ba Nzambi.​—2 Timote 3:1-5.

2. Pa tshibidilu, ntshinyi tshidi tshikengela bua kunowa bivule?

² Bua kupola bia-dinowa bimpe, tshidime udi ukengela buloba bua bufuke, nkêke ya dîba idi ne luya, ne mâyi. Pa kumbusha kudima ne kuipila, udi ne bua kudimuka bua se: tuishi, tunyama, bishilushilu, anyi bisuku bibi kabivu kunyanga [bikunyibua] ne udi ne bua kubitabalela mu mishindu mikuabo kabidi bua kubikuba. Kudi mua kuikala bikondo bibi munkatshi mua muvu wa dikola diabi, pabuipi ne dinowa. Mmushindu kayipu udibi bibungamija padi bia-dinowa binyanguka! Bishilangane, mmushindu kayipu udi tshidime mua kusanka, kunyima kua mudimu muvule mukole, padiye upola bia-dinowa bimpe!​—Yeshaya 60:20-22; 61:3.

3. Mmunyi mudi mushinga wa bikunyibua mua kufuanyikijibua ne wa bana, ne nditabalela dia mushindu kayi didi bana ne bua kupeta?

³ Nsombelu wa muntu udi ulubuluka, ne udi upatula bipeta udi ne mushinga mukole kupita bia-dinowa bia tshidime. Nanku, kabiena bikemesha bua se: kulubuluka mu dikolesha muana kudi mua kukengela dîba divule ne madikolela kupita kukolesha bikunyibua bivule. (Dutelonome 11:18-21) Nsonga mukuna mu budimi bua muoyo, bu yeye mumiamina mâyi ne mudiisha ne dinanga ne mukosela mikalu mikumbanyine, udi mua kukola ne kukuama bilongo mu nyuma, nansha mudiye mu bulongolodi ebu buwule tente ne bienzedi bidi binyangakaja ngikadilu mimpe. Bu yeye mua kukengeshibua anyi kunyawudibua, muana newume biangatshile munda ne pamu’apa neafue mu nyuma. (Kolosai 3:21; fuanyikija ne Yelemiya 2:21; 12:2.) Bushuwa, bana buonso badi bakengela ditabalela dia muntu pa nkayende!

Ditabalela dia ku dituku dionso biangatshile ku buana

4. Nditabalela dia mushindu kayi didi bana bakengela “katshia ku buana”?

⁴ Baledi badi ne bua kutabalela muana utshidi ufuma ku diledibua ku dîba ne ku dîba. Kadi, muana wa katoto udi ukengela kumutabalela amu ku mubidi anyi pa kumupesha amu bintu bia ku mubidi ku dituku ne ku dituku anyi? Mupostolo Paulo wakafundila musadidi wa Nzambi Timote ne: “Katshia ku buana udi mumanye mikanda minsantu, idi mua kukuvuija muena meji bua lupandu.” (2 Timote 3:15, NW) Nanku ditabalela dia baledi diakababidila Timote, katshia ku buana, divua kabidi dia mu nyuma. Kadi buana budi butuadija tshikondo kayi?

5, 6. (a) Ntshinyi tshidi Bible wamba pa bidi bitangila bana badi kabayi banji kuledibua? (b) Ntshinyi tshidi tshileja ne: baledi badi ne bua kutabalela dilubuluka dimpe dia muana udi kayi muanji kuledibua?

⁵ Muaku wa tshiena-Greke udi Paulo mutumike nawu apa udi (breʹphos), badi kabidi batumika nawu bua bana badi kabayi banji kuledibua. Elizabete, mamuende wa Yone mubatiji, wakambila mulela wende Mariya ne: “Pakabuela dî dia muoyo uwakangela mu matshu anyi, muana [breʹphos] wakutabuluka mu difu dianyi bualu bua disanka.” (Luka 1:44) Nanku, nansha aba badi kabayi banji kuledibua mbabikidibue ne: mbana, ne Bible udi uleja ne: badi mua kuandamuna ku malu adi enzeka pambelu. Ditabalela dia muana kumpala kua diledibua diende, didibu bakankamija lelu’eu, didi padi ditangila diteya ntema ku dilubuluka dimpe dia mu nyuma dia muana udi kayi muanji kuledibua anyi?

⁶ Ndukonko lua kuangata ne mushinga, bualu bijadiki bidi bileja ne: bidi muana udi kayi muanji kuledibua uteleja bidi mua kuikala ne buenzeji buimpe anyi bubi kudiye. Mulombodi kampanda wa tungimba tua misambu wakamona ne: misambu mivule ivuaye wimba ivua yumvuika mu mushindu wa pa buawu bu ukavua mumane kuibidilangana nayi, nangananga eyi mimba ne biombelu bia violon. Pakamanyishaye mêna a misambu ayi kudi mamuende uvua mene muimbi mupiluke wa tshiombelu tshia violon, wakamba ne: ayi mmisambu ivuaye wimba pakimitaye difu diende. Bia muomumue, bana badi kabayi banji kuledibua badi mua kupeta buenzeji bubi kudi bamamuabo padibu ne tshibidilu tshia kutangila programme wa manaya adi azangika ndululu mu dîku ku televizion. Ke bualu kayi tshikandakanda tshia bondopianganyi tshiakakula bua “dibidilangana dia mukuji ne ndululu ya ku televizion.”

7. (a) Mmunyi mutu baledi bavule batabalela dilubuluka dimpe dia bana babo badi kabayi banji kuledibua? (b) Mmakokeshi kayi adi nawu muana?

⁷ Pa kumona buimpe bua bisonsodi bia majinga biakane kudi bana, baledi bavule mbatuadije kubadila, kuakuila, ne kuimbila bana babo diambedi kabayi banji kuledibua. Udi pebe mua kuenza bia muomumue. Nansha bikala muanebe kayi mua kumvua miaku, neababidile dîyi diebe dilelela ne tshikuma tshiadi tshimpe tshia kunanga. Kunyima kua diledibua, muana neatuadije kumvua miaku yebe, pamu’apa ne lukasa kupita muwuvua wela meji. Mu bidimu bibidi anyi bisatu, muana udi ulonga muakulu mukodiakane udiye uteleja. Muana udi kabidi mua kutuadija kulonga “muakulu mukezuke” wa bulelela bua mu Bible.​—Sefanya 3:9, NW.

8. (a) Ntshinyi mene tshidi Bible usua kumvuija padiye wamba ne: Timote uvua mumanye mikanda minsantu “katshia ku buana”? (b) Ntshinyi tshiakajadika bulelela bua mêyi aa pa bidi bitangila Timote?

⁸ Ntshinyi tshivua Paulo usua kumvuija pa kuamba ne: Timote uvua ‘mumanye mikanda minsantu katshia ku buana,? Mbimueneke bu uvua usua kumvuija ne: Timote wakapeta diyishibua dia mu nyuma katshia ku tshikondo tshitshivuaye katoto, ki ng’anu bituadije ku tshikondo tshia buana to. Ebi bidi mu diumvuangana ne muaku wa tshiena-Greke breʹphos, udi bia bungi ufunkuna bana batshidi bafuma ku diledibua. (Luka 2:12, 16; Bienzedi 7:19) Timote wakapeta dishidimuna dia mu nyuma kudi mamuende Eunice ne kudi kakuende mukaji Lois katshia ku kale bu mudiye mua kuvuluka. (2 Timote 1:5) Kasumuinu ka se: ‘Muana utu ulonda nshandi,’ eyowa, bulelela buaku buakadijadika bua Timote. ‘Wakayishibua mu nshila udiye ne bua kuendela,’ ne, bu tshipeta, wakavua musadidi wa tshitembu wa Nzambi.​—Nsumuinu 22:6; Filipoi 2:19-22.

Ditabalela muntu pa nkayende ndikengedibue

9. (a) Ntshinyi tshidi baledi ne bua kuepuka, ne mbua tshinyi? (b) Padi muana ukola, ntshinyi tshidi baledi ne bua kuenza, ne ntshilejilu kayi tshidibo ne bua kulonda?

⁹ Bana badi kabidi bu bikunyibua, bualu kabena buonso ne ngikadilu ya muomumue, ne kabatu bandamuna mushindu umue ku bienzedi bimue bia dibatabalela. Baledi badi ne meji, nebangate ne mushinga mashilangana a bumuntu ne nebepuke kufuanyikija muana kampanda ne mukuabo. (Fuanyikija ne Galatia 6:4.) Binuajinga bua bana benu bakole ne bavue bakulumpe bakumbane tshishiki, nudi ne bua kusunguluja bikadilu bia bumuntu bia yonso wa kudibo, pa kukuna bidi bimpe ne kukandika bidi bibi. Nudi mua kuenza tshinyi bu nuenu mua kusunguluja butekete anyi tshikadilu tshibi, pamu’apa dishima, dinanga dinekesha dia bintu bia ku mubidi, anyi buiminyi? Numululamije ne dinanga dionso, amu bu muakalulamija Yezu butekete bua bapostolo bende. (Mâko 9:33-37) Elayi muana yonso pa tshibidilu ka-lumbandi bua madikolela ende ne bienzedi biende bimpe, muntu pa nkayende.

10. Ntshinyi tshidi bana bakengela menemene, ne mmunyi mudibi mua kuenjibua?

¹⁰ Bana badi bakengela ditabalela diwule tente ne dinanga dia muntu pa nkayende. Yezu uvua usumba tshikondo bua kuleja bana bakese dibatabalela dia pa buadi, nansha mu matuku a ndekelu a mudimu wende muvule. (Mâko 10:13-16, 32) Baledi, londayi tshilejilu etshi! Ne didipua muoyo, nulame dîba bua kuikala pamue ne bana benu. Ne kanufu bundu bua kubaleja dinanga dilelela. Nubambule mu maboko, bu muakenza Yezu. Nubele mu tshitupa ne nubakongoloje ne musangelu, ne dinanga dionso. Pavuabu bebeja baledi ba bana bakolesha bimpe bua kufila mubelu kudi baledi bakuabo, ku mandamuna wonso, mavule avua: ‘banangayi bikole,’ ‘pitshishayi nabo dîba pamue,’ ‘dimayi kanemu umue kudi mukuabo,’ ‘batelejayi bimpe,’ ‘filayi ki mmuyuki kadi buludiki,’ ne ‘nuikale ne mmuenenu mukumbanyine.’

11. (a) Mmunyi mudi baledi ne bua kuangata ditabalela dia muntu pa nkayende didibo bapetesha bana babo? (b) Ntshikondo kayi tshidi baledi ne bua kubabidila mayukidilangana a mushinga mukole ne bana babo?

¹¹ Kuleja ditabalela dia mushindu’eu dia muntu pa nkayende, kudi mua kuikala disanka. Muledi kampanda wakapeta bipeta biakane mu dikolesha bana bende wakafunda ne: “Patshivua bana betu ba balume babidi batekete, pa tshibidilu bivua disanka bua kubalongolola bua kuyabu kulala, kubabadila, kubadijila bilamba pa bulalu, ne kuenza disambila pamue nabo bivua disanka.” Bikondo bu nunku bipitshisha pamue bidi bipetesha mushindu wa kuyukidilangana kudi mua kuikala kukankamija muledi ne muana. (Fuanyikija ne Lomo 1:11, 12.) Bena dibaka babidi bakateleja muvua muanabo wa bidimu bisatu ulomba Nzambi bua kubeneshaye “Wally.” Uvua usambila bua “Wally” butuku bumue kunyima kua bukuabo, ne baledi bakakankamana bikole pakajingululabo ne: uvua usambila bua bana betu ba ku Malawi, bavua tshikondo atshi bakengeshibua. Mukaji kampanda wakamba ne: ‘Pamvua ne bidimu binayi patupu, mamu’anyi uvua ungambuluisha bua kukuata mvese ku muoyo ne kuimba misambu ya Bukalenge pa kungimanyika pa nkuasa bua kukupula mâyi ku malongo avuaye usukula.’ Nudi mua kuela meji ku bikondo binudi mua kubabidila diyukidilangana dia mushinga mukole ne bana benu batekete anyi?

12. Ne meji wonso, ntshinyi tshidi baledi bena nkristo mua kuenza bua bana babo, ne ntumikilu kayi idibo mua kubabidila?

¹² Baledi bena nkristo bena meji badi bakaja programme wa dilonga dia pa tshibidilu. Nansha nuenu mua kubabidila ntumikilu wa nkonko ne mandamuna, nudiku mua kujudija diyukidilangana dia musangelu pa kuenza bua se: dilonga diakanyine nangananga aba batshidi bana batekete menemene anyi? Nudi mua kumulomba dizola dia bimfuanyi bia malu a mu Bible, dilonda dia malu a kale adi mu Bible, anyi kuteleja tshikepeshilu tshinuvua balombe muana bua kulongolola. Enzayi madikolela bua kuvuija Dîyi dia Nzambi disheme bua bana mushindu wa kudijingabo bikole dîba dionso. (1 Petelo 2:2, 3) Tatu umue wakamba ne: ‘Patshivua bana batekete menemene, tuvua tukalaba nabo panshi ne tuenza manaya a malu a kale adi atangila bantu batumbe ba mu Bible. Bana bavua baananga.’

13. Manaya a malu menzeke adi ne mushinga kayi, ne mmalu kayi adi mua kuenjibua mu manaya aa?

¹³ Kuenza manaya kudi kabidi mua kufikisha ku dishintakaja ngenyi dia mushinga mukole, bualu kudi kuambuluisha bana batekete bua kudilongolola ku mianda ya mu nsombelu. Umue wa ku bana ba mu dîku dia Kusserow​—buonso buabo 11 bakashala anu ne lulamatu kudi Nzambi tshikondo tshia dikengeshangana dia bena Nazi—​wakamba bua baledi bende ne: “Bakatuleja mushindu wa kuenza ne wa kudibingisha tuetu nkayetu ne Bible. [1 Petelo 3:15] Pa tshibidilu tuvua tuenza manaya a malu menzeke, tuelangana nkonko ne tuyandamuna.” Bua tshinyi kubenga kuenza bia muomumue? Nudi mua kuenza maleja bua buambi, ne muledi umue bu muena-lubanza. Anyi dinaya dia malu menzeke didi ditangila mateta malelela a mu nsombelu. (Nsumuinu 1:10-15) “Dinaya didi ditangila nsombelu mikole didi mua kuibaka dizanzamuka dia muana ne dishindama diende,” ke muakumvuija mukaji umue. “Mu dinaya edi muntu umue neangate muaba wa mulunda udi upesha muanenu makanya, mâla anyi bintu bia lulengu.” Manaya aa adi mua kukuambuluisha bua kusunguluja mushindu wandamuna muanebe mu nsombelu ya mushindu’eu.

14. Bua tshinyi mayukidilangana muwule tente ne dinanga ne diengeleka ne bana benu adi ne mushinga mukole?

¹⁴ Dîba dia mayukidilangana ne muan’enu, nulenge mutshima wende ne disengelela anu bu mufundi wa miaku eyi: “Muan’anyi, kuhu diyisha dianyi muoyo, kadi mutshima webe utumikile mikenji yanyi. Bua neyikutentekashile dileha dia matuku ne bidimu bia muoyo ne ditalala.” (Nsumuinu 3:1, 2) Kabiakulengaku mutshima wa muan’enu binuamumvuija ne dinanga dionso ne: nudi numulomba butumike bualu ebi nebifikishe ku dimupetesha ditalala ne dilepa dia matuku​—eyowa, muoyo wa kashidi mu bulongolodi bupiabupia bua ditalala bua Nzambi anyi? Angatayi ne mushinga bumuntu bua muan’enu panudi nuelangana nende meji kumbukila mu Dîyi dia Nzambi. Enzayi nanku ne mmuenenu wa disambila, ne Yehowa neabeneshe madikolela enu. Mayukidilangana muwule tente ne dinanga ne diengeleka, mashila pa Bible adi apatula bipeta biakane ne adi atuala masanka a kashidi.​—Nsumuinu 22:6.

15. Mmunyi mudi baledi mua kuambuluisha bana babo bua kujikija ntatu?

¹⁵ Diyukidilangana dia mushindu’eu, nansha diodi kadiyi dienzeka munkatshi mua tshikondo tshienu tshilongolola bua dilonga, malu makuabo kaanubueji mu buteyi bua ditanaja. Telejayi bimpe ki ng’anu tshidi muan’enu wamba kadi kabidi ne mushindu udiye umvuija ngenyi yende. “Tangilayi muan’enu,” ke mudi mushikuluji umue ubela. “Numutabalele ne ntema yenu yonso. Bidi bikengela nuenu kumvua apo ki ng’anu kuteleja. Baledi badi benza madikolela aa a pa mutu, badi mua kufikisha mashintuluka manene mu nsombelu wa bana babo.” Lelu’eu, bana badi bapetangana ne ntatu ku tshilongelu ne mu miaba mikuabo. Bu muudi muledi, kankamija muanebe bua kukuambilaye bidi munda muende, ne umuambuluishe bua kuikalaye ne mmuenenu wa malu udi mu diumvuangana ne wa Nzambi. Paudi kuyi mujadike tshiwudi mua kuenza bua kujikija lutatu, enza dikebulula mu Mifundu ne mu mikanda idi ipatuka ku butuangaji bua “mupika wa lulamatu ne wa budimu.” (Matayi 24:45, NW) Mu mushindu kayi wonso, upeteshe muanebe ditabalela dia pa nkayende didi dikengela bua kujikija lutatu.

Anyishayi bikondo bia dishala muaba umue

16, 17. (a) Bua tshinyi bana batekete badi lelu’eu bakengela ditabalela ne dilongesha bia muntu pa nkayende? (b) Ntshinyi tshidi bana ne bua kumanya padibo banyokibua kudi baledi babo?

¹⁶ Bana batekete badi bakengela ditabalela dia muntu pa nkayende lelu’eu kupita kumpala, bualu tudi mu “matuku a ku nshikidilu,” ne bikondo ebi, “mbikondo bia njiwu.” (2 Timote 3:1-5; Matayi 24:3-14, NW) Baledi ne bana pabo, badi bakengela dikubibua didi difumina ku meji malelela adi “alama benawu ne muoyo.” (Muambi 7:12, NW) Bu mudi meji a Nzambi umvuija ditumikila dimpe dia dimanya diashila pa Bible, bana badi bakengela kulongeshibua pa tshibidilu Dîyi dia Nzambi. Ke bualu kayi, longayi Mifundu ne bana benu batekete. Nubambile malu adi atangila Yehowa, nubumvuije bimpe malu adiye utulomba bua kuenza, ne nudianjile kujula disanka munda muabo bua dikumbana dia malaya ende manene. Akulayi pa malu a mushindu’eu ku mbelu, panudi nuendakana ne bana ku luseke luenu​—eyowa, mu tshikondo tshionso tshiakanyine.​—Dutelonome 6:4-7.

¹⁷ Ba-bidime mbamanye ne: tuana tua bikunyibua tuonso katutu tukola mu nsombelu ya muomumue. Kana ka tshikunyibua kuonso kadi kakengela ditabalela dia pa nkayaku. Bia muomumue, muana yonso udi ne muende mudiye, ne udi ukengela ditabalela, dilongesha, ne dinyokibua bia pa nkayende. Tshilejilu, kutangila muana mutekete kampanda ne mpala mukanga kudi mua kuimanyika bubi buvuaye wenza, eku mukuabo udi yeye ukengela dinyokibua ne dîsu dikole. Kadi bana buonso badi bakengela kumanya bua tshinyi kanuena banange imue miaku ne bimue bienzedi, ne baledi buonso babidi badi ne bua kueleshangana diboko bua dinyoka dipatule bipeta biadi. (Efeso 6:4) Bidi bia mushinga menemene bua baledi bena nkristo bafile buludiki busunguluke budi mu diumvuangana ne Mifundu.

18, 19. Mbujitu kayi budi buomekela baledi bena nkristo pa bidi bitangila bana babo, ne ntshinyi tshidi mua kuenzeka bikala mudimu awu muenza bimpe?

¹⁸ Tshidime udi ne bua kuenza mudimu wa kukuna ne kuipila mu tshikondo tshiakane. Biajingakanaye bua kukuna anyi kulengulula bikunyibua biende, neanowe bikese anyi kakupola tshintu nansha tshimue. Bushuwa, bana benu “mbikunyibua” bidi bikola bidi bikengela ditabalela dia muana yonso pa nkayende bituadije ku mpindieu, ki nngondo walua anyi tshidimu tshialua nansha. Kanulekedi tshikondo tshia mushinga mukole tshipita, bua kulubuluja didiunda diabo dia mu nyuma, mu diumvuangana ne Dîyi dia Nzambi ne kukanda ngenyi mibi ya bulongolodi ebu idi mua kubakebela diwuma ne lufu bia mu nyuma. Angatayi ne mushinga mukole mêba ne matuku anudi ne disanka dia kupitshisha ne bana benu, bualu bikondo ebi bidi bipita ne lukasa luonso. Tumikayi bikole bua kudima mu bana benu ngikadilu milenga ya Nzambi idi ikengela bua nsombelu wa disanka bu basadidi ba lulamatu ba Nzambi. (Galatia 5:22, 23; Kolosai 3:12-14) Eu ki mmudimu wa muntu mukuabo nansha; mmudimu wenu nkayenu, ne Nzambi udi mua kunuambuluisha bua kuwenza.

¹⁹ Peshayi bana benu bumpianyi bunenanenayi bua mu nyuma. Longayi Dîyi dia Nzambi pamue nabo, ne babidilayi buonso pamue tshikondo tshia dijikija lutetuku. Yayi ne bana benu batekete mu bisangilu bia bena nkristo, ne nuikale nabo ku luseke luenu mu mudimu wa dimanyisha Bukalenge. Ibakayi mu bana benu bananga bumuntu budi buakanyine dianyishibua kudi Nzambi, ne kakuyi mpata nebanutuadile disanka dinene mu nsombelu wenu ku shòò. Bushuwa, “Tatu wa muntu muakane neatambe kusanka; udi ulela muana wa meji neasanke bualu buandi. Tatu’ebe ne mamu’ebe bikale ne disanka, mamu wakakulela ikale ne disanka.”​—Nsumuinu 23:24, 25.

Difutu dia mushinga mukole

20. Nsapi wa dipatula bipeta bilenga mu dikolesha bana ba bidimu bituadije pa 13 too ne 19 ntshinyi?

²⁰ Mudimu wa dikolesha bana mmukole, ne ng’wa musangu mule. Kukolesha ‘tuana tua mitshi ya olive, tunyunguluke mesa ebe’ bua kuvuabo bakulumpe batshinyi ba Nzambi badi bakuama mamuma a Bukalenge, kudi kumvuija etshi tshiakabikidibua programme muakaja mu bidimu 20. (Musambu wa 128:3; Yone 15:8) Diakaja programme eu ditu difila ntatu misangu mivule padi bana bakumbaja bidimu bituadije pa 13 too ne ku 19, padi bifimpakaji bibavudila, ne dîba adi baledi badi bamona se: bidi bikengela kuvudija madikolela. Kadi nsapi wa dilubuluka udi anu umuepele​—kutabalela, kuikala ne musangelu, ne kuteleja. Nuvuluke ne: bana benu batekete, badi bulelela bakengela ditabalela dia muntu pa nkayende. Nudi mua kubatabalela pa kubaleja dinanga dilelela bua diakalenga diabo. Bua kubambuluisha, nudi ne bua kudifila ne kasuki pa kubapesha dîba, dinanga, ne ditabalela bidibo bakengela bulelela.

21. Difutu dia dipetesha bana ditabalela dia muntu pa nkayende didi mua kuikala tshinyi?

²¹ Difutu dia madikolela enu bua kukuba mamuma a mushinga mukole adi Yehowa munupeshe ne dieyemena dionso didi mua kunupetesha disanka dipite dia tshidime kayi yonso udi mupole bia-dinowa bivule. (Musambu wa 127:3-5) Bua nanku nuenu baledi, tungunukayi ne kutabalela bana benu muntu pa nkayende. Enzayi nanku bua disanka diabo ne bua butumbi bua Tatu wetu udi mu diulu, Yehowa.

Mmunyi muwandamuna?

◻ Mmunyi mudi dikolesha dia bikunyibua mua kufuanyikijibua ne dikolesha dia bana?

◻ Nditabalela dia mushindu kayi didi muana ne bua kupeta dituku dionso katshia ku buana?

◻ Nditabalela kayi dia muntu pa nkayende didi bana bakengela, ne mmunyi mudidi mua kufidibua?

◻ Bua tshinyi kupetesha bana benu ditabalela dia muntu pa nkayende?