Mushindu wa kumanya mua kuelangana meji
1 Mu ngumvuilu mukuabu, “kuelangana meji” kudi kumvuija “kuakula ne muntu bua kumufikisha ku dishintulula bienzedi biende anyi ngenyi yende.” Bua kupatula bipeta bimpe mu buambi, mbimpe wikale mumanye mua kuelangana meji ne bantu baudi uyukila nabu. (Bien. 17:2-4) Kadi mmunyi muudi mua kufika ku dielangana meji ne bantu?
2 Tuadija kuelangana meji munda muebe: Kuelangana meji pa bulelela budi mu Bible buudi ulonga kudi ne diambuluisha dia bungi. Bikala amue malu amueneka makole bua kuumvua, ukebe diumvuija mu mikanda idi yumvuija Bible ne welangane meji pa mandamuna. Keba mushindu wa kumvua bimpe malu adibu bumvuija aa ne tshidibu baafidile bilondeshile mudi Mifundu ileja.
3 Dianjila kudilongolola bua mudimu wa buambi: Ela meji pa mushindu uwikala mua kumvuija bulelela kudi bantu bashilashilangane. Longolola lukonko ludi luelesha meji bua kujula muntu dijinga dia kumanya malu makuabu. Keba mushindu wa kufila mvese wa mu Mifundu bu tshijadiki tshia malu awudi wamba ne elelanganapu meji. Dianjila kuela meji ku malu atu mua kukosesha diyuki, ne keba ngenyi yakuambuluisha. Sungula mu mukanda uwafila tshiena-bualu tshimue tshidi tshiakanyina bimpe bualu bunudi nuakula.
4 Londa tshilejilu tshia Yezu: Yezu uvua tshilejilu tshimpe tshitambe tshia muntu uvua welangana meji pa Mifundu. Bua kumanya mushindu wakalongeshaye, bala malu mafunda mu Luka 10:25-37. Kuata ngenzelu eu mu lungenyi: (1) Leja bantu tshidi Mifundu yamba paudi wandamuna nkonko yabu. (2) Balomba bua bumvuije pabu, ne dîba didibu bafila diumvuija dilenga, kupu muoyo bua kubela kalumbandi. (3) Wikale mujadike ne: lukonko ludi lumvuangana ne Mifundu. (4) Fila tshilejilu tshidi mua kulenga muntu ku muoyo bua kujadika ne: mmumvue diandamuna diudi mufile ne mushinga wadi.—Tangila Tshibumba tshia Nsentedi tshia 1 Luabanya 1986, mabeji 27-28, bikoso 8-10.
5 Kuata mudimu ne tshiamu tshidibu batupesha: Mukanda wa Comment raisonner à partir des Écritures, mmukanda mukese mupatula bua mudimu wa buambi. Mbuelelu idimu, mushindu wa kuandamuna ku malu atu akosesha diyuki, ne malu adi elesha lungenyi, bionso ebi bidi bituambuluisha bua kumanya mua kuelangana meji. Mukanda wa Comment raisonner ntshiamu tshia mushinga mukole tshitudi ne tshia kuikala natshi misangu yonso mu buambi ne katuelakanyi bua kuangata ngenyi idimu patudi tuyikila ne bantu malu a mu Bible. Balulula malu adi mu mukanda eu atudi tusangana mu dibeji dia 7 ne dia 8 bua kuenza nawu mudimu bimpe menemene.
6 Kumanya mua kuelangana meji nekulengeje mudimu webe wa diyisha ne dilongesha bantu. Nekukuambuluishe ne kabidi nekuambuluishe bantu baudi upetangana nabu mu mudimu wa buambi.