Ntshinyi tshidi mua kutuambuluisha bua tuikale ne ditabuja dishindame?
1 Katshia tuabuela mu bulongolodi bua Yehowa, tutu ne disanka bualu tutu tudiunda mu nyuma. Pabi, bua kutungunuka ne ‘kuasa miji, kujama ne kushindama mu ditaba,’ bidi bikengela kukola anu kukola mu nyuma. (Kolos. 2:6, 7, MMM) Padi eku bantu ba bungi bakole mu nyuma, bamue mbapambuke mu njila bualu bavua bapangile bua ‘kuikala bashindame mu ditaba.’ (1 Kol. 16:13, MMM) Tuenza muetu muonso bua bualu bua mushindu’eu kabutufikidi to! Mushindu kayi?
2 Mudimu wa mu nyuma wa dîba dionso: Enza ndongamu muimpe udi utangila malu a mu nyuma autu wenza pa tshibidilu mu bulongolodi bua Yehowa. Majinga etu a mu nyuma akumbajibua bimpe menemene mu bulongolodi bua Nzambi ebu. Bua bisangilu, ne mpuilu ne mpungilu kutuambuluishabi bua kudiunda mu nyuma ne kushindama, tudi ne bua kuikala tumubuela pa tshibidilu. (Eb. 10:24, 25) Ndongamu wa dibala dia Bible, tshibejibeji tshia Tshibumba tshia Nsentedi ne tshia Réveillez-vous!, ne mikanda yetu idi ne biakudia bikole bia mu Dîyi dia Nzambi nealepeshe ne neakoleshe miji yetu ya mu nyuma. (Eb. 5:14) Kudifundila malu a mu nyuma a kuenza ne kusuminyina bua kuakumbaja nekutufikishe kabidi ku diakalenga dia kashidi.—Filip. 3:16.
3 Bantu bakole mu nyuma badi bafila diambuluisha: Diaku malanda ne bantu ba mu tshisumbu tshienu badi bashindame mu nyuma. Umanyangane ne bakulu, bualu buobu ke bantu ba kumpala badi mua kutukolesha ku muoyo. (1 Tes. 2:11, 12) Itaba mibelu anyi ngenyi yonso idibu mua kukupesha. (Ef. 4:11-16) Basadidi ba mudimu batu pabu bambuluisha bakuabu bua bashindame mu ditabuja, nunku lamata bana betu aba bua kupeta dikankamija.
4 Udi ujinga bua muntu akuambuluishe mu buambi anyi? Yikila ne bakulu ne balomba diambuluisha. Pamu’apa nebele dîna diebe mu liste wa bantu badi bampanda-njila mua kuambuluisha. Udi ufumina ku ditambula anyi? Kulonga mukanda wa Mudimu wetu ne kutumikila malu adimu nekukupeshe muoyo wa kudiunda ne kukola mu nyuma. Udi muledi anyi? Wikale ukolesha ngikadilu ya mu nyuma ya bana bebe.—Ef. 6:4.
5 Bua kushemeja malanda ne Yehowa ne kudia bulunda ne bana betu, mbimpe tuele miji ne tushale bashindame mu ditabuja. Kuenza nunku kudi kutuambuluisha bua kutua makasa panshi ne kukandamana misangu yonso idi Satana utuela mvita ne kabidi kukolesha ditekemena dietu dia muoyo wa kashidi mu matuku atshilualua.—1 Pet. 5:9, 10.