‘Tungunukayi ne kuenda mu buobumue ne Kristo’

“Pa nanku, bu munudi bitabe Kristo Yezu Mfumu, tungunukayi ne kuenda nende mu buobumue.”​—KOLOSAI 2:6, NW.

1, 2. (a) Mmunyi mudi Bible umvuija nsombelu wa Henoke wa mudimu wa lulamatu muenzela Yehowa? (b) Mmunyi mudi Yehowa mutuambuluishe bua kuenda nende, anu bu mudi Kolosai 2:6, 7 uleja?

UKADIKU mumone muana mukese wa balume wenda pamue ne tatuende anyi? Udi widikija tshionso tshidi tatuende wenza, mpala wende uleja dikatshila; tatu udi umuambuluisha, wende mpala udi uleja dinanga ne dianyisha. Mu mushindu muakanyine, Yehowa udi utumika ne tshimfuanyi tshia mushindu’eu bua kumvuija nsombelu wa mudimu wa lulamatu mumuenzela. Tshilejilu, Dîyi dia Nzambi didi diamba ne: muena lulamatu Henoke “wakatungunuka ne kuenda ne Nzambi [mulelela].”​—Genese 5:24, NW; 6:9.

² Anu mudi tatu muena ditabalela mua kuambuluisha muanende wa balume mutekete bua kuenda pamue nende, Yehowa mmutupeshe diambuluisha dimuepele ditambe buimpe didiku. Wakatuma Muanende umuepele mulela pa buloba. Mu tshidia tshionso tshia luendu luende lule lua pa buloba apa, Yezu Kristo wakaleja Tatuende wa mu diulu mu mushindu mupuangane. (Yone 14:9, 10; Ebelu 1:3) Nenku bua kumona mua kuenda ne Nzambi, bidi bitukengela kuenda ne Yezu. Mupostolo Paulo wakafunda ne: “Pa nanku, bu munudi bitabe Kristo Yezu Mfumu, tungunukayi ne kuenda nende mu buobumue, bele miji ne bikale bibakila munda muende ne bikale bashindame mu ditabuja, anu bu muvuabu banulongeshe, nusapalala ne ditabuja mu disakidila.”​—Kolosai 2:6, 7, NW.

3. Bilondeshile Kolosai 2:6, 7, bua tshinyi tudi mua kuamba ne: kuenda mu buobumue ne Kristo kudi kumvuija bivule kupita ditambula patupu?

³ Bualu mbasue kuenda mu buobumue ne Kristo, badienzeja bua kulonda bidia biende bipuangane, balongi ba Bible bena mutshima mululame badi batambula. (Luka 3:21; Ebelu 10:7-9) Pa buloba bujima, anu mu 1997 patupu, bantu bapite pa 375 000 bakela tshidia etshi tshia mushinga mukole​—muayene wa bantu bapite pa 1 000 ku dituku dionso. Didiunda edi didi disankisha bikole! Kadi, mêyi a Paulo mafunda mu Kolosai 2:6, 7 adi aleja ne: kuenda mu buobumue ne Kristo kudi kumvuija bivule kupita ditambula patupu. Muaku wa pa muanda wa tshiena-Greke muandamuna ne: “tungunukayi ne kuenda” udi umvuija tshienzedi tshidi ne bua kuikala tshia munanunanu, katshiyi tshikoseka. Kabidi, Paulo udi usakidila ne: kuenda ne Kristo kudi kumvuija malu anayi: kuikala bele miji munda mua Kristo, kuikala bibakila munda muende, kuikala bashindame mu ditabuja, ne kusapalala ne disakidila. Tukonkononayi tshiambilu tshionso ne tumone muditshi tshituambuluisha bua kutungunuka ne kuenda mu buobumue ne Kristo.

Udi ‘muele miji munda mua Kristo’ anyi?

4. Kuikala ‘bele miji munda mua Kristo’ kudi kumvuija tshinyi?

⁴ Tshia kumpala, Paulo udi ufunda ne: tudi ne bua kuikala ‘bele miji munda mua Kristo.’ (Fuanyikija ne Matayo 13:20, 21.) Mmunyi mudi muntu mua kudienzeja bua kuikala muele miji munda mua Kristo? Ee, miji ya mutshi itu misokome kayiyi imueneka, kadi idi ne mushinga wa bungi bua mutshi​—idi iushindamija ne iupetesha biakudia. Bia muomumue, tshilejilu ne dilongesha bia Kristo bidi ne buenzeji kutudi diambedi mu mushindu udi kauyi umueneka, bijama mu bieledi bietu bia lungenyi ne mu mitshima yetu. Muine amu bidi bitudiisha ne bitukolesha. Patudi tubianyishila bua kulombolabi meji etu, bienzedi bietu ne mapangadika etu, tudi tusakibua bua kulambula mioyo yetu kudi Yehowa.​—1 Petelo 2:21.

5. Mmunyi mutudi mua ‘kujinga’ biakudia bia mu nyuma?

⁵ Yezu uvua munange dimanya dia kudi Nzambi. Wakadifuanyikija mene ne biakudia. (Matayo 4:4) Ee, mu Muyuki wende wa pa Mukuna, wakatela misangu 21 mêyi a mu mikanda mishilangane muanda-mukulu ya mu Mifundu ya tshiena-Ebelu. Bua kulonda tshilejilu tshiende, tudi ne bua kuenza mudi mupostolo Petelo utubela​—‘kujinga’ biakudia bia mu nyuma “bu bana balela katataka.” (1 Petelo 2:2) Padi muana mulela katataka ujinga biakudia, udi umanyisha patoke dijinga diende dikole. Bituikala katuyi tumvua mushindu’eu mpindieu bua biakudia bia mu nyuma, mêyi a Petelo adi atukankamija bua ‘kudima’ (NW) dijinga adi dikole. Mushindu kayi? Dîyi-diludiki didi mu Musambu 34:8 didi mua kuambuluisha: ‘Teta, ulabule, umvue ne: Yehowa udi muakane.’ Bituikala ‘tuteta ne tulabula’ Bible, Dîyi dia Yehowa pa tshibidilu, pamu’apa tubala tshitupa kampanda dituku dionso, netumone se: Bible udi udiisha mu nyuma ne udi muimpe. Mu bungi bua matuku, dijinga dietu dikole bua bualu buende nedidiunde.

6. Bua tshinyi mbia mushinga bua kuelangana meji pa bitudi tubala?

⁶ Kadi, bidi ne mushinga bua kupuekesha biakudia diakamue tuetu bamane kubidia. Nenku tudi ne bua kuelangana meji pa bitudi tubala. (Musambu 77:11, 12) Tshilejilu, patudi tubala mukanda wa Muntu mutambe bunene wa katshia ne katshia, nshapita yonso neatambe kuikala ne mushinga kutudi bituimana ne kudikonka ne: ‘Ntshitupa kayi tshia bumuntu bua Kristo tshindi mmona mu muyuki eu, ne mmunyi mundi mua kutshidikija mu nsombelu wanyi meme?’ Kuelangana meji mushindu’au nekutuambuluishe bua kutumikila bitudi tulonga. Pashishe, patudi kumpala kua dipangadika kampanda, tudi mua kudikonka tshivua Yezu mua kuikala muenze. Bituangata dipangadika dietu mushindu’eu, tudi tufila tshijadiki tshia mutudi bushuwa bele miji munda mua Kristo.

7. Ntshinyi tshidi ne bua kuikala mmuenenu wetu bua biakudia bikole bia mu nyuma?

⁷ Paulo udi kabidi utubela bua kudia ‘biakudia bikole,’ malelela muondoke bikole a mu Dîyi dia Nzambi. (Ebelu 5:14) Mu muanda eu dibala dia Bible mujima didi ne bua kuikala tshipatshila tshietu tshia kumpala. Pashishe kudi biena-bualu bivule bisunguluke bia dilonga, bu mudi mulambu wa tshia-bupikudi wa Kristo, bipungidi kabukabu bivua Yehowa muenze ne bantu bende, anyi imue mikenji ya milayi idi mu Bible. Kudi mikanda ya bungi yatuambuluisha bua kudia ne kupuekesha biakudia ebi bikole bia mu nyuma. Kupeta dimanya dia nunku kudi ne tshipatshila kayi? Ki ntshia kutupesha kabingila ka kuditambishila, kadi ntshia kukolesha dinanga dietu bua Yehowa ne kusemena bikole pabuipi nende. (1 Kolinto 8:1; Yakobo 4:8) Bituapeta dimanya edi ne muoyo mujima, kutumika nadi buetu tuetu bine, ne kuenza nadi mudimu bua kuambuluisha bakuabu, bushuwa netuikale tuidikija Kristo. Ebi nebituambuluishe bua kuikala bele miji bimpe munda muende.

Udi ‘muikale muibakila munda mua Kristo’ anyi?

8. Kuikala ‘bibakila munda mua Kristo’ kudi kumvuija tshinyi’?

⁸ Bua tshitupa tshidi tshilonda tshia dienda mu buobumue ne Kristo, Paulo udi umbuka ne lukasa ku tshimfuanyi tshimue tshia bukole mutangile ku tshikuabu​—umbuka ku tshia mutshi mutangile ku tshia nzubu. Patudi tuela meji bua nzubu udibu bibaka, katuena tuela meji bua tshishimikidi patupu kadi bua tshipidi tshidi tshienda tshibanda tshimueneke patoke, mu mudimu mukole wa bungi. Bia muomumue, tudi ne bua kuenza mudimu mukole wa bungi bua kudima ngikadilu ne bibidilu bifuane bia Kristo. Mudimu mukole wa nunku’eu kautu upanga kumueneka, anu muvua Paulo mene mufundile Timote ne: “Kudiunda kuebe kumueneke kudi bonso.” (1 Timote 4:15; Matayo 5:16) Ng’imue midimu kayi ya bena nkristo idi ituibaka?

9. (a) Bua kumona mua kuidikija Kristo mu mudimu wetu, mbimue bipatshila kayi bidi ne dikuatshisha bitudi mua kudifundila? (b) Mmunyi mutudi bamanye ne: Yehowa mmusue bua tuikale ne disanka mu mudimu wetu?

⁹ Yezu wakatupesha mudimu wa kuyisha ne kulongesha lumu luimpe. (Matayo 24:14; 28:19, 20) Wakashiya tshilejilu tshipuangane, ne dikima dionso ufila bumanyishi ne upatula bipeta bimpe. Bushuwa, katuadiakuenza anu bu muvuaye muenze. Kadi, mupostolo Petelo udi ututekela tshipatshila etshi: ‘Nujidile Kristo mu mitshima yenu bu Mukalenge; nuikale badilongolole misangu yonso bua kukudimuna dîyi kudi muntu yonso udi unukonka bua muanda wa ditekemena didi munda muenu; kadi nuenze nunku ne kalolo ne ditshina.’ (1 Petelo 3:15) Biwikala udiumvua ne: kuena ‘mudilongolole misangu yonso bua kuandamuna dîyi,’ kuteketshi mu mikolo. Difundila bipatshila biakanyine biakuambuluisha bua kutungunuka ne kudiunda too ne ku mulongo au. Didianjila kudilongolola didi mua kukuambuluisha bua kushintulula dileja diebe peshi kubuejamu mvese umue anyi ibidi. Udi mua kudifundila bipatshila bua kuabanya mikanda mivule miumvuiji ya Bible, kuenza makumbulula a bungi, anyi kutuadija dilonga dia Bible. Katuena ne bua kuela kashonyi pa bungi​—bu mudi bua mêba, mikanda miabanya anyi malonga​—kadi pa ngikadilu. Kudifundila bipatshila biakanyine ne kudienzeja bua kubikumbaja kudi mua kutuambuluisha bua kusanka bua mutudi badifile mu mudimu. Atshi ke tshidi Yehowa musue​—bua tuetu kumuenzela mudimu “ne disanka.”​—Musambu 100:2; fuanyikija ne 2 Kolinto 9:7.

10. Ng’imue midimu kayi mikuabu ya bena nkristo itudi ne bua kuenza, ne mmunyi mudiyi ituambuluisha?

¹⁰ Kudi kabidi midimu itudi tuenza mu tshisumbu idi ituibaka munda mua Kristo. Mudimu udi mutambe mushinga ng’wa kulejangana dinanga, bualu diodi didi tshimanyinu tshidi tshisunguluja bena nkristo balelela. (Yone 13:34, 35) Patutshidi tulonga, bavule ba munkatshi muetu tutu tulamata mulongeshi wetu, ebu mbualu butu buenzeka pa tshibidilu. Kadi, tudi mua kulonda mpindieu mubelu wa Paulo wa ‘kualabala’ pa kufika ku dimanya bakuabu mu tshisumbu anyi? (2 Kolinto 6:13, NW) Bakulu pabu badi bakengela dinanga ne dianyisha dietu. Pa kuenza nabu mudimu pamue, kukeba ne kuitaba mibelu yabu miangatshila mu Mifundu, netutambe kubapepejila mudimu wabu mukole. (Ebelu 13:17) Pine apu, muanda eu newambuluishe bua dikala dietu bibakila munda mua Kristo.

11. Mmuenenu kayi mulenga utudi ne bua kuikala nende bua batismo?

¹¹ Batismo ntshikondo tshia disanka! Kadi, katuena mua kutekemena bua tshikondo tshionso tshia mu nsombelu kuikalatshi tshia disanka mu mushindu wa muomumue. Tshitupa tshinene tshia dikala dietu bibakila munda mua Kristo tshidi tshiumvuija ‘kunanukila kuya kumpala bilondeshile mu njila utukadi bamane kulonda.’ (Filipoi 3:16, MML) Abi kabiena biumvuija nsombelu muneme bujitu ne wa lunsuya nansha. Bidi patupu biumvuija kuya kumpala mu njila mululame​—mu mêyi makuabu, kukolesha bibidilu bimpe bia mu nyuma ne kubilama ku dituku dionso, bidimu ne bitshia. Vuluka ne: “Wananukila tô ne kunshikidilu neasungidibue.”​—Matayo 24:13.

Udi ‘muikale mushindame mu ditabuja’ anyi?

12. Kuikala “bashindame mu ditabuja” kudi kumvuija tshinyi?

¹² Mu tshiambilu tshiende tshisatu tshidi tshiumvuija luendu luetu mu buobumue ne Kristo, Paulo udi utubela bua kuikala “bashindame mu ditabuja.” Tudi tubala mu nkudimuinu kampanda ne: “bashindike pa bidi bitangila ditabuja,” bualu muaku wa tshiena-Greke wakatumika nawu Paulo udi mua kumvuija “kushindika, kujadika ne kuvuija tshintu katshiyi kushintulula bilondeshile mikenji.” Patudi tuvudija dimanya, tudi tupeta tubingila tukuabu bua kumona se: ditabuja dietu kudi Yehowa Nzambi ndishindame bimpe ne didi bushuwa dijadika bilondeshile mikenji. Tshipeta tshidi se: dishindama dietu didi dikola. Bidi bienda bilua bikole menemene bua bulongolodi ebu bua Satana kutupambuishabu. Muanda eu udi utuvuluija mubelu wa Paulo wa ‘kuluijakana batangile ku dikola.’ (Ebelu 6:1, NW) Dikola ne dishindama bidi bienda pamue.

13, 14. (a) Nnjiwu kayi yakapeta bena nkristo ba mu siekele wa kumpala mu Kolosai bua dishindama diabu? (b) Mmalu kayi avua mua kuikala matonde mupostolo Paulo?

¹³ Bena nkristo ba mu siekele wa kumpala mu Kolosai bavua mu njiwu bua dishindama diabu. Paulo wakadimuija ne: ‘Nudimuke bua muntu kikadiku udi mua kununyanga ne nkindi yende ne lubombo lua patupu, bu mudi bilele biamba kudi bantu, bu mudi mayisha a kumudilu a pa buloba, ki mbu mudi Kristo mutuyishe.’ (Kolosai 2:8) Paulo kavua musue bua bena Kolosai, bakavua balue bakokedi mu ‘bukalenge bua Muana wa dinanga [dia Nzambi],’ babumbushe, babapambuishe ku nsombelu wabu mubenesha wa mu nyuma. (Kolosai 1:13) Bapambuisha ku diambuluisha dia tshinyi? Paulo udi ufunkuna “nkindi,” musangu umuepele udi muaku eu umueneka mu Bible. Uvua wakula bua bena nkindi bena Greke, bu mudi Platon ne Socrate anyi? Nansha muvua bantu aba bikale njiwu kudi bena nkristo balelela, mu matuku au, bavua batumika ne muaku “nkindi” mu mushindu mualabale. Uvua pa tshibidilu ufunkuna tusumbu tuvule ne bantu ba mmuenenu milongolola ya muomumue​—nansha batendeledi. Tshilejilu, bena Yuda ba mu siekele wa kumpala bu mudi Josèphe ne Philon bakabikila tshitendelelu tshiabu bu nkindi​—pamu’apa bua kukolesha bulobeshi buatshi.

¹⁴ Imue nkindi ivua mua kuikala mitonde Paulo mu lungenyi ivua ya malu a ntendelelu. Pashishe mu nshapita umue-umue wa mukanda wende mutumina bena Kolosai, wakambila aba bavua balongesha ne: “Kukuatshi, kulabudi, kulengi,” muikale pa nanku utuma meji ku malu a mu Mikenji ya Mozese ivua lufu lua Kristo lufikishe ku ndekelu. (Lomo 10:4) Kusakidila ku nkindi ya bampangano, kuvua buenzeji bukuabu buvua buteka nsombelu wa mu nyuma wa tshisumbu mu njiwu. (Kolosai 2:20-22) Paulo wakadimuija bua nkindi ivua mu ‘mayisha a kumudilu a pa buloba.’ Dilongesha dia dishima dia nunku divua dia kudi bantu.

15. Mmunyi mutudi mua kuepuka dikala batenkakaja kudi ngelelu wa meji udi kayi wa mu Mifundu ututu tutuilangana nende misangu mivule?

¹⁵ Dikankamija dia ngenyi ne ngelelu wa meji bia bantu bidi kabiyi biashila bikole pa Dîyi dia Nzambi didi mua kuteka dishindama dia bena nkristo mu njiwu. Tuetu lelu’eu tudi ne bua kuikala badimukile njiwu ya nunku’eu. Mupostolo Yone wakabela ne: “Bananga, kanuitabuji dîyi dionso dipudija, kadi nutete mêyi mapudija bua kumona bikalawu afuma kudi Nzambi.” (1 Yone 4:1, NW) Nenku bikala mulongi nebe ukeba kukuitabijija ne: kuikala ne nsombelu mumvuangane ne mêyi-makulu a mu Bible kakutshiena ne mushinga, anyi bikala muena mutumba usua kukusaka bua kuikala ne mmuenenu wa dinanga dinekesha dia bintu, peshi bikala muena mudimu nebe ukuenzeja ne budimu bua kuenza malu mabengangane ne kuondo kebe ka muoyo kalongesha kudi Bible, nansha bikala mene muena kuitabuja netu utobolola ne wamba malu mabi pa bidi bitangila bakuabu mu tshisumbu, mushindamene pa mmuenenu yende nkayende, kuitabi patupu malu adiye wamba nansha. Konkonona ne ulekele malu adi kaayi umvuangana ne Dîyi dia Nzambi. Bituenza nenku, netulame dishindama dietu mu luendu luetu mu buobumue ne Kristo.

“Nusapalala ne ditabuja mu disakidila”

16. Ntshitupa kayi tshinayi tshia dienda mu buobumue ne Kristo, ne ndukonko kayi lutudi mua kudiela?

¹⁶ Tshitupa tshinayi tshia dienda mu buobumue ne Kristo tshidi Paulo utela ntshia se: tuikale ‘tusapalala ne ditabuja mu disakidila.’ (Kolosai 2:7, NW) Muaku ‘disapalala’ udi utuvuluija musulu udi usapalala ku mielelu yawu. Ebi bidi bileja ne: buetu tuetu bena nkristo, disakidila dietu didi ne bua kuikala bualu budi butungunuka anyi bua pa tshibidilu. Muntu yonso wa kutudi udi mua kudikonka bimpe ne: ‘Ntu muena dianyisha anyi?’

17. (a) Bua tshinyi tudi mua kuamba ne: tuetu bonso tudi ne bivule bia kuikadila bena dianyisha, nansha mu bikondo bikole? (b) Mbua amue mapa kayi a kudi Yehowa buudi nangananga udiumvua muena dianyisha?

¹⁷ Bushuwa, tuetu bonso tudi ne kabingila kakumbane bua kusapalala ne diela Yehowa tuasakidila dituku dionso. Nansha mu bikondo bitambe bubi, kudi mua kuikala amue malu makese adi afila bikondo bia disulakana. Mulunda udi uleja diumvuilangana. Munanga kampanda udi ukupukila bua kukukolesha. Diikisha dilenga dia butuku didi difila bukole. Biakudia bisheme bidi bituyisha nzala mikole. Musambu wa nyunyi, tuseku tua muana, diulu difikuluke didi diengelela, kapepe katalale​—tudi mua kumona bionso ebi ne bikuabu bia bungi mu dituku dimue. Bitu anu bitekete bikole bua kupepeja mapa a mushindu’eu. Kaenaku onso makanyine diela tuasakidila anyi? Onso adi afumina kudi Yehowa, Mpokolo wa “dipa dilenga dionso [ne] dipa diakane dionso.” (Yakobe 1:17, Mukanda wa Mvidi Mukulu) Ne mmutupeshe mapa adi mapite atuatedi kuulu eku​—tshilejilu, muoyo muine. (Musambu 36:9) Kabidi, mmutupeshe mpunga wa kuikala ne muoyo tshiendelele. Bua kumonaye mua kufila dipa edi, Yehowa wakafila mulambu mupite yonso pa kutuma Muanende umuepele mulela, “eu uvuaye munange mu mushindu wa pa buawu.”​—Nsumuinu 8:30, NW; Yone 3:16.

18. Mmunyi mutudi mua kudileja bena dianyisha kudi Yehowa?

¹⁸ Nenku mêyi a mufundi wa Misambu mmalelela: “Bidi bimpe bua kusakidila Yehowa.” (Musambu 92:1) Bia muomumue, Paulo wakavuluija bena nkristo ba mu Tesalonike ne: “Mu malu onso nusakidile Nzambi.” (1 Tesalonike 5:18; Efeso 5:20; Kolosai 3:15) Yonso wa kutudi udi ne bua kupangadija bua kutamba kuikala ne dianyisha. Masambila etu kaena ne bua kuimanyina anu pa milombu kudi Nzambi bua bitudi tukengela. Milombu ki mmibi to. Kadi ela meji biwikala ne mulunda udi wakula nebe anu padiye ukengela tshintu kampanda kuudi! Nenku bua tshinyi kubenga kusambila Yehowa anu bua kumusakidila ne kumusamuna? Masambila a nunku adi ne bua kumusankisha bushuwa padiye winangila bua kumona bulongolodi ebu bupange dianyisha! Dikuatshisha dibidi didi se: masambila bu aa adi mua kutuambuluisha bua kushindamena pa malu mimpe a mu nsombelu, atuvuluija mutudi babenesha bushuwa.

19. Mmunyi mudi ngakuilu wa Paulo mu Kolosai 2:6, 7 uleja ne: tuetu bonso tudi mua kutungunuka ne kudilengeja mu dienda ne Kristo?

¹⁹ Kabienaku bia kukatshila mutudi mua kupetela buludiki bua meji mavule nunku ku mvese umue wa mu Dîyi dia Nzambi anyi? Mubelu wa Paulo wa kutungunuka ne kuenda ne Kristo mbualu budi yonso wa kutudi ne bua kusua kulama ku muoyo. Nenku tuikalayi bapangadije bua kuikala ‘bele miji munda mua Kristo,’ “bibakila munda muende,” “bashindame mu ditabuja,” ne ‘tusapalala ne disakidila.’ Mubelu bu eu udi nangananga ne mushinga mukole kudi aba badi bafuma ku ditambula. Kadi udi ututangila buonso buetu. Ela meji bua mudi muji munene wenda anu ubuela muinshi mua buloba ne mudi nzubu udibu bibaka wenda anu ubanda tshipidi. Nenku luendu luetu ne Kristo kaluena lushikila. Tutshidi anu tukengela kudiunda mu bitupa bishilangane bia nsombelu wetu. Yehowa neatuambuluishe ne neatubeneshe, bualu mmusue bua tutungunuke ne kuenda nende pamue ne Muanende munanga kakuyi ndekelu.

Newandamune munyi?

◻ Kuenda mu buobumue ne Kristo kudi kumvuija tshinyi?

◻ Kuikala ‘bele miji munda mua Kristo’ kudi kumvuija tshinyi?

◻ Mmunyi mutudi mua kuikala ‘bibakila munda mua Kristo’?

◻ Bua tshinyi mbia mushinga wa bungi bua kuikala “bashindame mu ditabuja”?

◻ Ntubingila kayi tutudi natu bua ‘kusapalala ne disakidila’?

[Tshimfuanyi mu dibeji 10]

Pamu’apa miji ya mutshi kayena mua kumueneka ku mêsu, kadi idi ipetesha mutshi biakudia ne iujamija bikole