“Nuluangane mvita mikole bua ditabuja”!
“Nuluangane mvita mikole bua ditabuja divuabu bapeshe bansantu musangu umue bua kashidi.”—YUDA 3, NW.
1. Mmu ngumvuilu kayi mudi bena nkristo balelela baditue mu mvita lelu’eu?
BASALAYI mu mvita batu misangu yonso mu nsombelu mukole. Ela meji ne: udi uvuala bia-mvita bionso ne wenda kilometre kayiyi kubala mu mashika ne munya bia mishindu yonso, upeta dishidimuna didi ditshiokesha bua kutumika ne bia-mvita, anyi muikale ne bua kudisungila ku njiwu mikole ya mishindu yonso idi mua kukufikisha ku lufu anyi ku ditapika. Kadi, bena nkristo balelela kabena babuela mu mvita ya matunga. (Yeshaya 2:2-4; Yone 17:14) Nansha nanku, katuena ne bua kupua muoyo se: tudi bonso mu mvita mu ngumvuilu kampanda. Satana udi ne lukinu lua bungi bua Yezu Kristo ne balondi bende ba pa buloba. (Buakabuluibua 12:17) Bonso badi bapangadija bua kusadila Yehowa Nzambi, badi bushuwa badifundisha bu basalayi bua kuluangana mvita ya mu nyuma.—2 Kolinto 10:4.
2. Mmunyi mudi Yuda umvuija mvita ya bena nkristo, ne mmunyi mudi mukanda wende mua kutuambuluisha bua kunanukilamu?
2 Mbiakanyine mudi Yuda muanabu ne Yezu ufunda ne: “Bananga, nansha mumvua ngenza madikolela onso bua kunufundila bua lupandu lutudi nalu bonso, ngakamona bikengela bua kunufundila bua kunubela bua nuluangane mvita mikole bua ditabuja divuabu bapeshe bansantu musangu umue bua kashidi.” (Yuda 3, NW) Padi Yuda ubela bena nkristo bua ‘kuluangana mvita mikole,’ udi utumika ne tshiambilu tshisuikila ku muaku “dipampakana.” Eyowa, mvita eyi idi mua kuikala mikole, nansha ipampakaja! Utu ubimona imue misangu bikole bua kunanukila mu mvita eyi anyi? Mukanda wa Yuda muipi kadi muikale wa bukole udi mua kutuambuluisha. Udi utubela bua kukandamena tshiendenda, kunemeka bukokeshi bujadika kudi Nzambi, ne kudilama mu dinanga dia Nzambi. Tumonayi mutudi mua kutumikila mibelu eyi.
Kandamenayi tshiendenda
3. Nnsombelu kayi uvua ukengela mitalu wakafikila tshisumbu tshia bena nkristo mu matuku a Yuda?
3 Yuda wakamona se: ki mbena nkristo nende bonso bavua bikale batshimuna mu mvita miluangana ne Satana. Tshisumbu tshia mikoko tshivua mu nsombelu uvua ukengela mitalu. Yuda udi ufunda ne: bantu banyanguke bavua ‘badifinyemu.’ Ne budimu buonso bantu aba bavua bakankamija tshiendenda. Pashishe ne meji onso bavua babingisha bienzedi biabu, “bandamuna bulenga bukena butuakanyine bua Nzambi wetu bu kabingila ka buenzavi.” (Yuda 4, NW) Pamu’apa, anu bu bamue bena Gnosticisme ba kale, bavua bela meji ne: pavua muntu utamba kuenza mpekatu, uvua mua kutamba kupeta ngasa wa Nzambi—nenku bushuwa, bivua ne dikuatshisha dia bungi bua kutamba kuenza mpekatu! Anyi pamu’apa bavua bakoma ne: Nzambi muena bulenga kavua mua kubanyoka nansha kakese. Mu mishindu yonso, bavua mu ntupakanyi.—1 Kolinto 3:19.
4. Mbilejilu kayi bisatu bia mu Mifundu bia malumbuluisha a Yehowa a kale bidi Yuda utela?
4 Yuda udi upisha ngelelu yabu ya meji mibi mu ditela bilejilu bisatu bia malumbuluisha a Yehowa a mu bikondo bia kale: akaluila bena Izalele bavua ‘kabayi ne ditabuja’; ‘banjelu bavua bashiye muaba wabu mene wa kuikala’ bua kumona mua kuenza mpekatu ne bakaji; ne bena mu Sodome ne Gomore, bavua ‘badifile mu masandi ne balonde malu a mubidi avua kaayi makanangane ne tshilele tshia bantu.’ (Yuda 5-7; Genese 6:2-4; 19:4-25; Nomba 14:35) Mu bualu buonso buakenzeka, Yehowa wakatuadila benji ba mpekatu dilumbuluisha dikole.
5. Mmuprofete kayi wa kale muena mêyi adi Yuda utela, ne mmunyi muvua mulayi au mumvuije dishindika dikole dia dikumbana diawu?
5 Pashishe, Yuda udi wakula bua dilumbuluisha dinene menemene. Udi utela mulayi wa Henoke—mêyi adi kaayi asanganyibua muaba mukuabu mu Mifundu mipudija ku spiritu.a (Yuda 14, 15) Henoke wakadianjila kuamba bua tshikondo tshivua Yehowa mua kulumbuluisha bantu badi bapidia Nzambi ne bienzedi biabu bia bupidia. Muanda udi ukoka ntema ng’wa se: Henoke wakakula mu ditumika ne dîba dikadi dipite, bualu malumbuluisha a Nzambi avua a bushuwa bienze bu se: akavua menzeke. Bantu bavua mua kuikala baseke Henoke ne pashishe Nowa, kadi basekianganyi abu bonso bakafua mu mâyi mu Mvula wa kabutu wa buloba bujima.
6. (a) Ntshinyi tshivua bena nkristo mu matuku a Yuda bakengela kubavuluija? (b) Bua tshinyi tudi ne bua kuteleja mavuluija a Yuda?
6 Bua tshinyi Yuda wakafunda bua malumbuluisha a Nzambi aa? Bualu uvua mumanye ne: bamue bavua badisangisha ne bisumbu bia bena nkristo mu matuku ende bavua benza mpekatu ya muendi ne miakanyine dinyoka anu bu eyi yakakebesha malumbuluisha au a kale. Nenku, Yuda udi ufunda ne: bidi bikengela kuvuluija bisumbu amue malelela a mu nyuma a nshindamenu. (Yuda 5) Bavua bushuwa bapue muoyo ne: Yehowa Nzambi uvua umona bivuabu benza. Eyowa, padi basadidi bende bashipa mikenji yende ku budisuile, badinyanga ne banyanga bakuabu, udi umona. (Nsumuinu 15:3) Bienzedi bia nunku bidi bimubungamija bikole. (Genese 6:6; Musambu 78:40) Bidi bifila buôwa pa kuela meji ne: tuetu bantu ba patupu tudi mua kuikala ne buenzeji pa nyanji ya Mfumu Mukulu pa bionso. Dituku dionso utu utumona, ne patudi tuenza muetu muonso bua kulonda makasa a Muanende Yezu Kristo, nenku tshikadilu tshietu tshidi tshisankisha mutshima wende. Pa nanku katumvu bibi bua mavuluija aa adi Yuda ufila kadi tuatelejayi.—Nsumuinu 27:11; 1 Petelo 2:21.
7. (a) Bua tshinyi mbia mushinga bua aba badi babuelakane mu bualu bubi bunene bakebe diambuluisha ne lukasa luonso? (b) Mmunyi mutudi bonso mua kuepuka tshiendenda?
7 Yehowa kêna umona patupu kadi udi wenza bualu kampanda. Bu mudiye Nzambi wa buakane, udi utuadila benji ba bibi dinyoka—ku tototo nansha ku ndandanda. (1 Timote 5:24) Aba badi bela meji ne: malumbuluisha ende adi patupu miyuki ya kale ne se: kêna utabalela malu mabi adibu benza badi badishima nkayabu. Mbia mushinga bua aba bonso badi babuelakane mu tshiendenda, bakebe ne lukasa luonso diambuluisha kudi bakulu bena nkristo! (Yakobo 5:14, 15) Buonso buetu tudi mua kuela meji bikole bua njiwu idi tshiendenda tshikeba mu mvita yetu ya mu nyuma. Tshidimu tshionso kudi badi bajiwukamu—bantu badibu bipata munkatshi muetu, bavule ba kudibu bua bienzedi bia tshiendenda kakuyi dinyingalala. Tudi ne bua kuikala bapangadije bikole bua kukandamena matetshibua onso adi mene atuadija kutulombola matutangije ku disangu edi.—Fuanyikija ne Matayo 26:41.
Nemekayi bukokeshi bujadika kudi Nzambi
8. Mbanganyi bavua “bena butumbi” baleja mu Yuda 8?
8 Bualu bukuabu budi Yuda wamba ndipanga kanemu ku bukokeshi bujadika kudi Nzambi. Tshilejilu, mu mvese wa 8 (NW) udi upisha bantu babi bamuebamue aba bua ‘diakula bibi bua bena butumbi.’ Mbanganyi bavua “bena butumbi” aba? Bavua balume bapange bupuangane, kadi bavua ne majitu mabapesha kudi spiritu munsantu wa Yehowa. Tshilejilu, bisumbu bivua ne bakulu, bavua buomekela bujitu bua kulama mikoko ya Nzambi. (1 Petelo 5:2) Kuvua kabidi batangidi bena ngendu, bu mudi mupostolo Paulo. Ne kasumbu ka bakulu mu Yeruzaleme kavua kenza mudimu bu kasumbu kaludiki, kangata mapangadika avua ne buenzeji pa tshisumbu tshijima tshia bena nkristo. (Bienzedi 15:6) Bivua bitonde Yuda bikole bua muvua bamue bantu mu bisumbu bakula bibi bua balume aba, anyi babapenda.
9. Mbilejilu kayi bia dipanga kanemu ku bukokeshi bidi Yuda utela?
9 Bua kutandula ngakuilu eu mupange kanemu, mu mvese wa 11, Yuda udi utela bilejilu bikuabu bisatu bu mavuluija: Kaina, Balama ne Kola. Kaina wakalengulula mubelu wa dinanga wa kudi Yehowa ne ku budisuile wakatungunuka ne njila wende wa lukinu lua lufu. (Genese 4:4-8) Balama wakapeta madimuija misangu ne misangu avua bushuwa afumina ku mpokolo udi kayi wa pa tshibidilu—nansha mpunda wende mukaji wakamuakuila! Kadi ne budisui buonso Balama wakatungunuka bua kutungila bantu ba Nzambi tshitungu. (Nomba 22:28, 32-34; Dutelonome 23:5) Kola uvua ne wende muanzu wa mudimu, kadi kauvua mukumbane buende yeye. Wakajudila Mozese buntomboji, pende muikale muntu uvua mupite bonso ku bupuekele pa buloba.—Nomba 12:3; 16:1-3, 32.
10. Mmunyi mudi bamue lelu’eu mua kupona mu buteyi bua ‘diakula bibi bua bena butumbi,’ ne bua tshinyi tudi ne bua kuepuka ngakuilu wa nunku?
10 Bilejilu ebi bidi bushuwa bitulongesha ne bukole buonso bua kuteleja mibelu ne kunemeka aba badi Yehowa utumika nabu badi ne majitu. (Ebelu 13:17) Bitu bipepele bikole bua kuangula bilema bia bakulu bateka, bualu mbantu bapange bupuangane, anu mutudi tuetu bonso bapange bupuangane. Kadi bituashindamena pa bilema biabu ne kukepesha kanemu ketu kudibu, tudi mua kuikala ‘tuakula bibi bua bena butumbi’ anyi? Mu mvese wa 10, Yuda udi wakula bua aba badi ‘bapenda malu onso adibu kabayi bamanye.’ Imue misangu, bamue nebasendeke dipangadika kampanda diangata kudi kasumbu ka bakulu anyi kudi komite mulumbuluishi. Pabi, ki mbabamanyishe tunungu tuonso tuvua bakulu bakonkonone bua kumona mua kufika ku diangata dipangadika. Nenku bua tshinyi kuakula bibi bua malu adibu bushuwa kabayi bamanye? (Nsumuinu 18:13) Aba badi batungunuka ne ngakuilu eu mubi badi mua kukeba matapuluka mu tshisumbu ne pamu’apa mene kuikala bafuanyikija ne “mabue masokome muinshi mua mâyi” mu masangila a bena kuitabuja nabu. (Yuda 12, 16, 19, NW) Katujingi bua kukebela bakuabu njiwu ya mu nyuma nansha. Pamutu pa nanku, yonso wa kutudi ikale mupangadije bua kuanyisha balume bambika majitu bua mudimu wabu mukole ne bulamate bileja tshisumbu tshia mikoko ya Nzambi.—1 Timote 5:17.
11. Bua tshinyi Mikaele wakadilaminyina bua kulumbuluisha Satana ne miaku mibi?
11 Yuda udi utela tshilejilu tshia muntu wakanemeka bimpe bukokeshi bujadika. Udi ufunda ne: ‘Kadi Mikaele, muanjelu mutambe bakuabu bunene, pakadiye ufuilakana ne Diabolo muelangane nende mpata bua mubidi wa Mose, kakadi ne dikima dia kulua ne bipendu bia kumupisha nabi, kadi wakamba ne: Mukalenge akubele.’ (Yuda 9) Muyuki eu udi ukoka ntema, mufunda anu kudi Yuda nkayende mu Mifundu mipudija ku spiritu, udi ulongesha malongesha abidi masunguluke. Ku lumue luseke, udi utulongesha bua kulekela Yehowa dilumbuluisha. Kakuyi mpata Satana uvua musue kutumika bibi ne mubidi wa muena lulamatu Mozese bua kumonaye mua kulubuluja ntendelelu wa dishima. Mmeji mabi kayipu! Kadi, ne budipuekeshi buonso Mikaele wakadikanda bua kulua ne dilumbuluisha, bualu anu Yehowa nkayende ke uvua ne bukokeshi abu. Nenku tudi ne bua kutamba kudikanda bua kulumbuluisha balume ba lulamatu badi badienzeja bua kusadila Yehowa.
12. Ntshinyi tshidi aba badi ne miaba ya majitu mu tshisumbu tshia bena nkristo mua kulongela ku tshilejilu tshia Mikaele?
12 Ku lukuabu luseke, aba badi ne ndambu wa bukokeshi mu tshisumbu badi mua kupetela kabidi dilongesha kudi Mikaele. Nansha muvua Mikaele muikale “muanjelo mutambe bakuabo bunene,” mfumu wa banjelu bonso, kakatumika bibi ne muanzu wende wa bukole, nansha pavuabu bamuyobola. Bakulu ba lulamatu badi balonda bikole tshilejilu atshi, bajingulula ne: ditumika bibi ne bukokeshi buabu ndipanga kanemu ku bumfumu bukulu bua Yehowa. Mukanda wa Yuda uvua ne bia bungi bia kuamba bua balume bavua ne muaba muakanyine kanemu mu bisumbu kadi bavua bafike ku ditumika bibi ne bukokeshi buabu. Tshilejilu, mu mvese wa 12 too ne wa 14, Yuda udi ufunda ditandula dikole dia ‘balami ba mikoko badi badidisha kabayi ne ditshina.’ (Fuanyikija ne Yehezekele 34:7-10.) Mu mêyi makuabu, tshipatshila tshiabu tshia kumpala tshivua tshia kudipetesha masanka, ki ntshisumbu tshia mikoko ya Yehowa nansha. Lelu’eu bakulu badi mua kulongela bivule ku bilejilu bibi bia mushindu’eu. Bushuwa, muaba eu mêyi a Yuda adi aleja ne bukole buonso tshitudi katuyi basue bua kulua. Patudi tupona mu budisui, katuena mua kuikala basalayi ba Kristo; tudi tuluangana bikole bua bipatshila bietu nkayetu. Kadi, buonso buetu tuikalayi ne nsombelu mumvuangane ne mêyi a Yezu a se: “Disanka dia kupa ndipite dia kupeta.”—Malu Menza 20:35, MMM.
“Nudilame mu dinanga dia Nzambi”
13. Bua tshinyi tuetu bonso tudi ne bua kujinga ne muoyo mujima bua kushala mu dinanga dia Nzambi?
13 Batangile ku ndekelu kua mukanda wende, Yuda udi ufila mubelu eu udi usanguluja mutshima: “Nudilame mu dinanga dia Nzambi.” (Yuda 21) Tshintu tshimuepele tshiatuambuluisha bua kuluangana mvita ya bena nkristo ntshia kushala bapetshi ba dinanga dia Yehowa Nzambi. Tuamba eku tuela eku, dinanga nngikadilu munene wa Yehowa. (1 Yone 4:8) Paulo wakafundila bena nkristo ba mu Roma ne: ‘Ndi ngitabujibua ne: kakuena lufu, kakuena muoyo, kakuena banjelu, kakuena bakokeshi, kakuena malu atshidiku, kakuena malu atshilualua, kakuena makalenge, kakuena bule, kakuena ndondo, kakuena tshintu tshionso tshikuabu tshifukibua tshidi ne bukole bua kutupandulula ku dinanga dia Nzambi didi mu Kristo Yezu Mukalenge wetu.’ (Lomo 8:38, 39) Kadi, mmunyi mutudi tushala mu dinanga adi? Tangila asatu a ku mapangadika atudi mua kuangata bilondeshile Yuda.
14, 15. (a) Kudibakila pa ‘ditabuja dietu ditambe tshijila’ kudi kumvuija tshinyi? (b) Mmunyi mutudi mua kukonkonona ngikadilu wa bia-mvita bietu bia mu nyuma?
14 Tshia kumpala, Yuda udi utuambila bua kutungunuka ne kudibakila pa ‘ditabuja dietu ditambe tshijila.’ (Yuda 20) Anu mutudi bamone mu tshiena-bualu tshishale, eu mmuanda wa munanunanu. Tudi bu nzubu idi ikengela kutamba kuyikolesha bua kukandamena mikumu mikole ya bipupu. (Fuanyikija ne Matayo 7:24, 25.) Nenku katulu badieyemenyi. Pamutu pa nanku, tutangile muaba utudi mua kudibakila pa tshishimikidi tshia ditabuja dietu, tulue bakole menemene, basalayi ba lulamatu ba Kristo. Tshilejilu, tudi mua kukonkonona bitupa bia bia-mvita bionso bia mu nyuma bileja mu Efeso 6:11-18.
15 Bia-mvita bietu bia mu nyuma bidi mushindu kayi? ‘Ngabu wetu wa ditabuja’ mmukole mudibi bikengela anyi? Patudi tutangila panyima bidimu bishale ebi, tudi tumona bimue bimanyinu bia lulèngù, bu mudi dikepesha dibuela dia mu bisangilu, dijimija lukunukunu bua mudimu wetu, peshi dipanga musangelu bua dilonga dia pa nkaya anyi? Bimanyinu bu ebi mbia njiwu! Tudi ne bua kutumika mpindieu bua kudibaka ne kudikolesha mu bulelela.—1 Timote 4:15; 2 Timote 4:2; Ebelu 10:24, 25.
16. Kusambila ne spiritu munsantu kudi kumvuija tshinyi, ne ntshintu kayi tshitudi ne bua kulomba Yehowa pa tshibidilu?
16 Mushindu muibidi wa kushala mu dinanga dia Nzambi ng’wa kutungunuka ne ‘kusambila ne spiritu munsantu.’ (Yuda 20, NW) Abi bidi biumvuija kusambila ku buenzeji bua spiritu wa Yehowa ne mu diumvuangana ne Dîyi diende dipudija ku spiritu. Disambila mmushindu wa mushinga mukole wa kusemena pabuipi ne Yehowa ne kuleja bulamate buetu kudiye. Katuenaku ne bua kulengulula diakalenga edi dia dikema! Ne patudi tusambila, tudi mua kulomba—bushuwa, kutungunuka ne kulomba—spiritu munsantu. (Luka 11:13) Mbukole butambe onso butudi mua kupeta. Ne diambuluisha bu edi, tudi mua kushala mu dinanga dia Nzambi misangu yonso ne kutantamana bu basalayi ba Kristo.
17. (a) Bua tshinyi tshilejilu tshia Yuda mu muanda udi utangila luse ntshitambe kuikala tshia pa buatshi? (b) Mmunyi mudi yonso wa kutudi mua kutungunuka ne kuleja luse?
17 Tshisatu: Yuda udi utubela bua tutungunuke ne kuleja luse. (Yuda 22) Tshilejilu tshiende yeye muine mu bualu ebu ntshia pa buatshi. Uvua mene ne kabingila ka kumvua bibi bua dinyanguka, tshiendenda ne butontolodi bivua bienda bivula mu tshisumbu tshia bena nkristo. Nansha nanku, kavua mupete tshipapu, pa kuela meji ne: nsombelu ivua imueneka bu ya njiwu mikole bua kuleja ngikadilu eu “mupole” wa luse. Tòo, wakabela bana babu bua batungunuke ne kuleja luse dîba dionso pavuaku mushindu, belangane meji bilenga ne aba bavua ne mpata ne mene ‘bapatule mu kapia’ aba badi bapambuke batangile ku mpekatu munene. (Yuda 23; Galatia 6:1) Mmubelu kayipu mulenga bua bakulu mu bikondo ebi bisaluke! Buobu pabu badi badienzeja bua kuleja luse padiku kabingila ka kululeja, eku bikale ne dîsu dikole padibi bikengedibua. Buonso buetu tudi basue kulejangana luse mu mushindu wa muomumue. Tshilejilu, pamutu pa kulaminangana munda bua tualu tukese, tudi mua kuikala bena kalolo mu dibuikidilangana dietu.—Kolosai 3:13.
18. Mmunyi mutudi mua kuikala bashindike ne: netutshimune mu mvita yetu ya mu nyuma?
18 Mvita itudi tuluangana ki mmitekete nansha. Anu mudi Yuda wamba, idi “mvita mikole.” (Yuda 3, NW) Baluishi betu badi ne bukole. Ki ng’anu Satana kadi ne bulongolodi buende bubi ne dipanga bupuangane dietu, bionso ebi mbituelele mualu wa mvita bua kutuluisha. Nansha nanku, tudi mua kuikala ne dishindika dikole dia butshimunyi! Bua tshinyi? Bualu tudi ku luseke lua Yehowa. Yuda udi ujikija mukanda wende ne divuluija dia se: Yehowa mmuakanyine bua kupeta ‘butumbi ne bunême ne bukokeshi ne bukole, kumpala kua bikondo bionso ne katataka ne tshiendelele.’ (Yuda 25) Alu ki ndungenyi ludi lukuatshisha buôwa anyi? Nanku, kudiku mua kuikala mpata bua se: Nzambi umue-umue eu “udi mumanye mua kunulama bua nuenu kanulenduki” anyi? (Yuda 24) Nansha kakese! Yonso wa kutudi ikale mupangadije bua kutungunuka ne kukandamena tshiendenda, kunemeka bukokeshi bujadika kudi Nzambi ne kudilama mu dinanga dia Nzambi. Mushindu’au, netupete pamue butshimunyi bua butumbi.
[Mêyi adi kuinshi]
a Bamue bakebuludi badi bamba ne: Yuda udi utela mêyi a mu Mukanda wa Henoke, mukanda kauyi mupudija ku spiritu. Kadi, R. C. H. Lenski udi ufunda ne: “Tudi tuebeja ne: ‘Mukanda eu mukuatakaja, Mukanda wa Henoke, mmufumine kuepi?’ Mukanda eu mmusakidila; ne muntu nansha umue ki mmujadike bua tshikondo tshia bitupa biawu bishilangane . . . ; muntu nansha umue kêna mua kujadika ne: bimue bia ku biambilu biawu kabivua pamu’apa biangatshila kudi Yuda nkayende.”
Nkonko bua kuambulula
◻ Mmunyi mudi mukanda wa Yuda utulongesha bua kukandamena tshiendenda?
◻ Bua tshinyi mbia mushinga wa bungi bua kunemeka bukokeshi bujadika kudi Nzambi?
◻ Mbualu kayi budi butambe bubi pa bidi bitangila ditumika bibi ne bukokeshi bua mu tshisumbu?
◻ Mmunyi mutudi mua kudienzeja bua kushala mu dinanga dia Nzambi?
[Tshimfuanyi mu dibeji 15]
Bashilangane ne basalayi bena Roma, bena nkristo badi baluangana mvita ya mu nyuma
[Tshimfuanyi mu dibeji 18]
Balami bena nkristo badi basadila, ki mbua budisui, kadi bua dinanga