Tutungunukayi ne kuendela mu njila wa Yehowa

‘Windile Yehowa, ulamate njila wende, yeye neakubandishe bua wewe kupiana buloba.’​—MUSAMBU 37:34.

1, 2. Kuendela mu njila wa Yehowa kuvua kumvuija tshinyi bua Mukalenge Davidi, ne kuendela mu njila eu kudi kutulomba tshinyi lelu’eu?

‘UMMANYISHE njila undi ne bua kuendela, bualu bua ndi mbisha muoyo wanyi kuudi.’ (Musambu 143:8) Lelu’eu bena Kristo badi bambulula ne muoyo mujima mêyi aa a Mukalenge Davidi. Mbasue kusankisha Yehowa ne muoyo umue ne kuendela mu njila wende. Bidi biumvuija tshinyi? Bua Davidi, bivua biumvuija kulama mikenji ya Nzambi. Bivua biumvuija kueyemena Yehowa pamutu pa kueyemena bipungidi bienza ne bisamba bia bende. Bushuwa, bivua kabidi biumvuija kumuenzela mudimu ne bulamatshi pamutu pa kukuatshila nzambi ya bena mutumba nabu mudimu. Bua bena Kristo, kuendela mu njila wa Yehowa kudi kumvuija malu a bungi.

² Tshia kumpala: lelu’eu kuendela mu njila wa Yehowa kudi kumvuija kuleja ditabuja mu mulambu wa tshia-bupikudi wa Yezu Kristo, pa kumuitaba bu ‘njila ne bulelela ne muoyo.’ (Yone 3:16; 14:6; Ebelu 5:9) Kudi kumvuija kabidi kukumbaja ‘mikenji ya Kristo,’ bu mudi kunangangana, nangananga kunanga bana babu ne Yezu bela manyi. (Galatia 6:2; Matayo 25:34-40) Aba badi bendela mu njila wa Yehowa mbanange mêyi ne mikenji yende. (Musambu 119:97; Nsumuinu 4:5, 6) Badi banyisha disanka diabu dia mushinga mukole dia kuenza mudimu wa bena Kristo. (Kolosai 4:17; 2 Timote 4:5) Batu basambila pa tshibidilu mu nsombelu wabu. (Lomo 12:12) Ne ‘mbadimuke bu mudibu benda, kabena benda bu badi kabayi ne meji, kadi badi benda bu bena meji.’ (Efeso 5:15) Kabena balekela bubanji bua mu nyuma bua kupeta bintu bia ku mubidi bia tshitupa tshîpi anyi kukeba bisankasanka bia mubidi. (Matayo 6:19, 20; 1 Yone 2:15-17) Kabidi, bulamatshi kudi Yehowa ne dimueyemena bidi ne mushinga wa bungi. (2 Kolinto 1:9; 10:5; Efeso 4:24) Bua tshinyi? Bualu nsombelu wetu mmufuanangane bikole ne wa Isalele wa kale.

Bua tshinyi kuikala ne dieyemena ne bulamatshi

3. Bua tshinyi bulamatshi, ditabuja ne dieyemena nebitulame mu njila wa Yehowa?

³ Isalele uvua tshisamba tshikese tshinyunguluka kudi bena mutumba babi bavua baditue mu bilele bia tshiendenda mu ntendelelu wa mpingu. (1 Kulondolola 16:26) Anu Isalele ke uvua wenzela Yehowa mudimu, Nzambi umuepele mulelela ne udi kayi umueneka. Yehowa uvua mubalombe bua balame mêyi-makulu matumbuke a nsombelu mulenga. (Dutelonome 6:4) Bia muomumue lelu’eu, anu bantu miliyo mikese ke badi batendelela Yehowa, ne mbasombe pa buloba budi ne bantu batue ku miliyare isambombo bikale ne mêyi adibu balonda ne mmuenenu ya malu a nzambi bishilangane bikole ne biabu. Bituikala munkatshi mua bantu aba miliyo mikese, tudi ne bua kuikala badimuke bua kabatusaki mu njila mubi nansha. Mushindu kayi? Bulamatshi kudi Yehowa Nzambi, ditabuja kudiye ne dishindika dikole dia se: neakumbaje malaya ende nebituambuluishe. (Ebelu 11:6) Bintu ebi nebitukande ku dieyemena ku bintu bitu bena panu beyemena.​—Nsumuinu 20:22; 1 Timote 6:17.

4. Bua tshinyi bisamba bidi ne ‘lungenyi lubuitshidile mu mîdima’?

⁴ Mupostolo Paulo wakaleja mudi bena Kristo ne bua kuikala bashilangane ne bena panu pakafundaye ne: “Nanku ndi nnuambila, nnubela mu dina dia Mfumu ne: kanuenji kabidi bu mudi bantu ba bisamba bikuabo benza, balonda meji abo a patupu. Lungenyi luabo ndubuitshidile anu mu midima; bakadi bu benyi mu muoyo wa [“Nzambi,” NW] anu bua dipanga didibo nadio, difuma ku muoyo wabo mupape.” (Bena Efeze 4:17, 18, MMM) Yezu udi “butoke bulelela.” (Yowanese 1:9, MMM) Bantu bonso badi bamubenga anyi badi bamba mudibu bamuitabuja, kadi kabayi batumikila ‘mikenji ya Kristo’ badi ne ‘lungenyi lubuitshidile mu mîdima.’ Bu mudibu kabayi pabuipi ne njila wa Yehowa, badi ‘benyi mu muoyo wa Nzambi.’ Nansha buobu mua kudimona ne meji mu malu a pa buloba, badi ne “dipanga” pa bidi bitangila dimanya dimuepele didi difikisha ku muoyo, dimanya dia Yehowa Nzambi ne Yezu Kristo.​—Yone 17:3; 1 Kolinto 3:19.

5. Nansha mudi butoke bua bulelela bukenka pa buloba, bua tshinyi mitshima ya bantu ba bungi mmipape?

⁵ Bushuwa, butoke bua bulelela budi bukenka pa buloba! (Musambu 43:3; Filipoi 2:15) ‘Meji [malelela] adi ela dîyi mu musesu.’ (Nsumuinu 1:20) Tshidimu tshishale Bantemu ba Yehowa mbenze mêba mapite pa muliyare mujima, bambila bantu nabu malu a Yehowa Nzambi ne Yezu Kristo. Bantu nkama ya binunu bavua bateleje. Kadi, tudi ne bua kukema bua mudi bakuabu ba bungi kabayi bateleje anyi? Tòo. Paulo wakakula bua “muoyo wabo mupape.” Bamue badi ne mitshima mipape bua budisui anyi bua dinanga dia biuma. Bakuabu mbenzeja kudi bitendelelu bia dishima anyi kudi mmuenenu wa buena panu wa dipidia malu a nzambi udi mutangalake bikole lelu’eu. Ntatu mikole ya mu nsombelu mmifikishe bantu ba bungi ku diela Nzambi nyima. Bakuabu badi babenga bua kutumikila mêyi-makulu matumbuke a Yehowa a nsombelu mulenga. (Yone 3:20) Mutshima wa muntu udi wendela mu njila wa Yehowa udi mua kulua mupape mu malu a mushindu’eu anyi?

6, 7. Nansha muvuabu batendeledi ba Yehowa Nzambi, mmu bikondo kayi muvua bena Isalele bapambuke, ne bua tshinyi?

⁶ Anu bu muakaleja Paulo, biakafikila Isalele wa kale. Wakafunda ne: “Malu aa avua menzeke nanku bua kutuleja tshilejilu, bua katuikadi balakanyi ba malu mabi bu muavuabo bobo benza. Kanutendeledi mpingu bu muvua bamue ba kudibo benza; bobo ke badibo bamba ne: bantu kusombabo, kudia, kunua, pashishe kujukabo bua kuja maja. Katudifidi ku buendenda bu muvua bamue ba kudibo benza, bobo kufua binunu makumi abidi ne bisatu dituku dimue.”​—1 Bena Korente 10:6-8, MMM.

⁷ Tshia kumpala, Paulo udi wakula bua tshikondo tshivua bena Isalele batendelele kana ka ngombe kuinshi kua Mukuna wa Sinai. (Ekesode 32:5, 6) Bualu ebu buvua bubengangane buludiludi ne mukenji wa Nzambi uvuabu bitabe bua kutumikila mbingu mikese kumpala. (Ekesode 20:4-6; 24:3) Pashishe, Paulo udi wakula bua dîba divua bena Isalele batendelele Bâla pamue ne bana ba bakaji ba Moaba. (Nomba 25:1-9) Mu ntendelelu wa kana ka ngombe bavua badifila mu didisankisha dibi menemene ne ‘baja maja.’a Ntendelelu wa Bâla uvua wenda pamue ne tshiendenda tshia masandi tshiele kalele. (Buakabuluibua 2:14) Bua tshinyi bena Isalele bakenza mpekatu eyi? Bualu bakalekela mitshima yabu ‘yalakana malu mabi’​—ditendelela dia mpingu anyi bilele bibi bia masandi bivuabu benza mu ditendelela edi.

8. Ntshinyi tshitudi mua kulongela ku malu akafikila Isalele?

⁸ Paulo wakaleja ne: tudi ne bua kulongela ku malu aa. Kulonga tshinyi? Mbikole bua kuela meji muena Kristo ukukuila kana ka ngombe anyi nzambi wa kale wa bena Moaba. Kadi netuambe tshinyi bua tshiendenda anyi bua didisankisha kakuyi didikanda? Malu aa mmatangalake lelu’eu, ne tuetu balekele dijinga diawu dienda dikola mu mitshima yetu, neatuabulule ne Yehowa. Tshipeta netshikale tshia muomumue bienze bu se: tudi batendelele mpingu​—bitufikisha ku diabulukangana ne Nzambi. (Tangila Kolosai 3:5; Filipoi 3:19.) Bushuwa, Paulo udi ujikija diakula bua malu aa pa kubela bena kuitabuja nende ne: ‘Nyemayi kutendelela kua mpingu.’​—1 Kolinto 10:14.

Diambuluisha bua kuendela mu njila wa Nzambi

9. (a) Ndiambuluisha kayi ditudi tupeta bua tuetu kushala tuendela mu njila wa Yehowa? (b) Mmushindu umue kayi utudi tumvua ‘dîyi munyima muetu’?

⁹ Bituikala bapangadije bua kutungunuka ne kuendela mu njila wa Yehowa, ki mbatulekele katuyi diambuluisha nansha. Yeshaya wakamanyisha mu mulayi ne: “Matshi ebe mene neumvue dîyi munyima muebe diamba ne: ‘Ke njila eu. Endelayimu,’ binuikala ne bua kuya ku dia balume anyi binuikala ne bua kuya ku dia bakaji.” (Yeshaya 30:21, NW) Mmunyi mudi ‘matshi etu’ umvua ‘dîyi [edi] munyima muetu’? Bushuwa, lelu’eu kakuena muntu udi umvua dîyi dia bushuwa anyi upeta mukenji ufumina kudi Nzambi nansha. “Dîyi” didi diumvuika didi dilua kutudi tuetu bonso mu mushindu wa muomumue. Tshia kumpalampala, didi dilua ku diambuluisha dia Mifundu mipudija, Bible, udi ne ngenyi ne muyuki wa malu adi Nzambi muenzele bantu. Bu mutudi dituku dionso tumvua ngenyi ne malu adi afumina ku bintu bidi ‘bienyi mu muoyo wa Nzambi,’ bua tuetu kuikala ne bukole buimpe bua mu nyuma, tudi ne bua kuikala tubala Bible ne tuelanganapu meji pa tshibidilu. Nebituambuluishe bua kuepuka ‘malu a patupu’ ne kuikala ‘bakumbane tshishiki, balongolola biakane bua mudimu wonso muimpe.’ (Bienzedi 14:14, 15; 2 Timote 3:16, 17, NW) Nebitukoleshe, nebitukankamije ne nebituambuluishe bua ‘kuikala ne diakalengele kuonso kutuaya.’ (Yoshua 1:7, 8) Pa nanku, Dîyi dia Yehowa didi ditubela ne: ‘Nunku, bana banyi ba balume, nungumvuile: bua badi balamata mu njila yanyi badi ne disanka. Umvuayi diyisha, nuikale ne meji, kanudipetudi nansha.’​—Nsumuinu 8:32, 33.

10. Mmushindu kayi muibidi utudi tumvua ‘dîyi munyima muetu’?

¹⁰ ‘Dîyi munyima muetu’ didi dilua kabidi ku diambuluisha dia “mupika wa lulamatu ne wa budimu” udi ufila “biakudia mu tshikondo tshiakanyine.” (Matayo 24:45-47, NW) Mushindu umue udi mupika eu ufila biakudia ebi ng’wa kupatula mikanda mishindamene pa Bible, ne mu bidimu bidi panshi ebi biakudia ebi mbivule menemene. Tshilejilu, ku diambuluisha dia tshibejibeji tshia Tshibumba tshia Nsentedi, tudi bakaje ngumvuilu wetu wa milayi. Mbatukankamije mu tshikandakanda etshi bua kunanukila mu mudimu wa buambi ne wa divuija bantu bayidi nansha mudi kalèngù kenda kavula. Mbatuambuluishamu bua kuepuka mateyi, ne mbatubelamu bua kuikala ne ngikadilu ya bena Kristo. Mmunyipu mutudi tuanyisha biakudia ebi mu tshikondo tshiakanyine!

11. Umvuija mushindu muisatu utudi mua kumvua ‘dîyi munyima muetu.’

¹¹ Mupika wa lulamatu ne wa budimu udi kabidi ufila biakudia ku diambuluisha dia bisangilu bietu bia pa tshibidilu. Munkatshi muabi mudi bisangilu bia mu tshisumbu tshia muaba utudi basombele, mpuilu ya bijengu ne mpungilu minene ya ku tshidimu. Mmuena Kristo kayi wa lulamatu udi kayi wangata bisangilu ebi ne mushinga? Bisangilu ebi ndiambuluisha dia mushinga mukole didi ditukuatshisha bua kuendela mu njila wa Yehowa. Bu mudi bantu ba bungi ne bua kuenza mêba mavule ku mudimu anyi mu tulasa pamue ne bantu badi kabayi ne ditabuja dimue nabu, didisangisha pa tshibidilu ne bena Kristo didi bushuwa dipandisha mioyo. Bisangilu bidi bitupesha mushindu mulenga wa ‘kusakangana ku dinanga ne ku midimu milenga.’ (Ebelu 10:24, NW) Tudi banange bana betu, ne tudi basue bua kudisangisha nabu.​—Musambu 133:1.

12. Ndipangadika kayi didi nadi Bantemu ba Yehowa, ne mmunyi muakadijikulabu matuku mashale aa?

¹² Bakolesha kudi biakudia ebi bia mu nyuma, lelu’eu bantu batue ku miliyo isambombo badi bendela mu njila wa Yehowa, ne bakuabu miliyo mivule badi balonga Bible bua kumanya mushindu wa kuendelabu pabu mu njila eu. Mbatekete mu mikolo bua mudibu bakese pa kufuanyikija ne bantu miliyare mivule badi pa buloba bujima anyi? Nansha kakese! Mbapangadije bua kutungunuka ne kuteleja ‘dîyi munyima muabu,’ ne bulamatshi buonso benza disua dia Yehowa. Bu tshijadiki tshia patoke tshia dipangadika edi, mu Mpungilu ya Distrike ne ya Bukua-matunga ya: “Njila wa muoyo wa Nzambi” mu 1998/99, bantu bavua babuelamu bakangata dipangadika divua dileja luseke luvuabu balamate ne muoyo mujima. Adi alonda aa mmêyi a dipangadika adi.

Dipangadika

13, 14. Mmuenenu kayi mulelela udi nende Bantemu ba Yehowa bua nsombelu udiku pa buloba?

¹³ “Tuetu Bantemu ba Yehowa badi badisangishe mu Mpungilu eu wa: ‘Njila wa muoyo wa Nzambi,’ tudi tuitaba ne muoyo mujima ne: njila wa Nzambi ke njila mutambe buimpe wa muoyo. Kadi, tudi tuitaba ne: bantu ba bungi lelu’eu badi ne mmuenenu mushilangane. Bantu mbatete malongesha kabukabu, nkindi ne ngenyi mipite bungi ya malu a nzambi pa tshidi mua kuikala njila mutambe buimpe wa muoyo. Dikonkonona bimpe malu a bantu a kale ne nsombelu idiku lelu pa buloba didi dijadika bulelela bua mêyi a Nzambi mafunda mu Yelemiya 10:23: ‘Muntu kêna ne bukole munda muende bua kuendesha nabu biendedi biende bimpe.’

¹⁴ “Dituku dionso tudi tumona bijadiki bia bungi bidi bishindika bulelela bua mêyi aa. Bantu ba bungi badi bapetula njila wa muoyo wa Nzambi. Badi benza malu adi amueneka makane ku mêsu kuabu. Nkupatuke bipeta bidi bibungamija: dinyanguka dia nsombelu wa mu dîku, bana bashala kabayi ne buludiki; ditamba kukeba bintu bia ku mubidi, didi difikisha bantu ku dibungama ne ku dibimona ne: mbia patupu; dibunda bibawu ne malu a tshinyangu kaayi tshipatshila, bishipesha bantu bungi kabuyi kubala; makokangana ne mvita ya bisa, bishipesha bantu mu mushindu mukuate buôwa; tshiendenda tshidi tshitangalake, tshikebesha bipupu bia masama a mu bilamba. Eyi ng’imue ya ku ntatu mikole mipite bungi idi ipangisha bantu bua kupeta disanka, ditalala ne bukubi.

15, 16. Pa bidi bitangila njila wa muoyo wa Nzambi, mmalu kayi akambabu mu dipangadika?

¹⁵ “Pa kumona mudi bantu ne nsombelu mukole wa dibungama ne mudi ‘mvita ya dituku dinene dia Nzambi Wa-Bukole-Buonso,’ mibikila ne: Armagedone mikale pabuipi (Buakabuluibua 16:14, 16), tuetu Bantemu ba Yehowa tudi tuangata dipangadika edi:

¹⁶ “Bualu bua kumpala: Tudi tudiangata bu bantu ba Yehowa Nzambi, badilambule kudiye muntu pa nkayende kakuyi didilaminyina, ne netulame ditabuja kadiyi kutenkakaja mu tshia-bupikudi tshidi Yehowa mufile ku butuangaji bua Muanende Yezu Kristo. Tudi bapangadije bua kuendela mu njila wa muoyo wa Nzambi, tuenza mudimu bu Bantemu bende ne tukokela bumfumu bukulu buende bulejila ku bukokeshi bua Yezu Kristo.

17, 18. Mmuenenu kayi watungunuka Bantemu ba Yehowa ne kulama bua bidi bitangila mêyi-makulu a nsombelu mulenga ne buena-muntu bua bena Kristo?

¹⁷ “Bualu buibidi: Netutungunuke ne kulamata mêyi-makulu matumbuke a mu nyuma a nsombelu mulenga adi mu Bible. Tudi bapangadije bua kubenga kuenda bu mudi bisamba bienda mu meji abi a patupu. (Efeso 4:17-19) Dipangadika dietu ndia kushala bakezuke ku mêsu kua Yehowa ne katuyi ne katoba ka ku malu a pa buloba nansha.​—Yakobo 1:27.

¹⁸ “Bualu buisatu: Netulame bikole ngikadilu wetu muleja mu Mifundu, bu bena Kristo badi mu buena-muntu bua buloba bujima. Netulame ndubidilu wa bena Kristo munkatshi mua bisamba, katuyi tuitaba bua kukuatshika mu buteyi bua nkuna ne matapuluka pankatshi pa makoba, matunga peshi bisa.

19, 20. (a) Ntshinyi tshikala baledi bena Kristo mua kuenza? (b) Mmunyi muikala bena Kristo balelela bonso mua kutungunuka ne kuleja mudibu bayidi ba Kristo?

¹⁹ “Bualu buinayi: Tuetu badi baledi netulongeshe bana betu njila wa Nzambi. Netufile tshilejilu mu dikala ne nsombelu wa bena Kristo, pa kubala Bible pa tshibidilu, kulonga mu dîku ne kuenza midimu ya tshisumbu tshia bena Kristo ne mudimu wa buambi ne muoyo mujima.

²⁰ “Bualu buitanu: Tuetu bonso netudienzeje bua kudima ngikadilu milenga idi nayi Mufuki wetu, ne netudienzeje bua kuidikija bumuntu buende ne njila yende, bu muakenza Yezu. (Efeso 5:1) Tudi bapangadije bua malu etu onso enzeke mu dinanga, nanku tuleja mutudi bayidi ba Kristo.​—Yone 13:35.

21-23. Ntshinyi tshiatungunuka Bantemu ba Yehowa ne kuenza, ne mbatuishibue bua bualu kayi?

²¹ “Bualu buisambombo: Katuyi tutekesha, netutungunuke ne kuyisha lumu luimpe lua Bukalenge bua Nzambi, pa kuvuija bantu bayidi, ne netubalongeshe malu a njila wa muoyo wa Nzambi ne netubakankamije bua kulonga malu makuabu mu bisangilu bia tshisumbu.​—Matayo 24:14; 28:19, 20; Ebelu 10:24, 25.

²² “Bualu bua muanda-mutekete: Netutungunuke ne kuteka disua dia Nzambi pa muaba wa kumpala mu nsombelu wetu, muntu pa nkayende anyi mu tshibungi bu bulongolodi bua malu a Nzambi. Pa kulamata Bible Dîyi diende bu mulombodi wetu, katuakusesuka ku dia-balume anyi ku dia-bakaji, nanku tufila tshijadiki tshia se: njila wa Nzambi mmupite njila ya panu. Tudi bapangadije bua kulonda njila wa muoyo wa Nzambi ne tshisumi ne bulamatshi buonso, mpindieu too ne kashidi!

²³ “Tudi tuangata dipangadika edi bualu tudi beyemene tshishiki dilaya dia dinanga didi Yehowa mufile dia se: eu udi wenza disua dia Nzambi udi ushala bua kashidi. Tudi tuangata dipangadika edi bualu tudi batuishibue ne: kutumikila mêyi-maludiki ne mibelu ya mu Mifundu ke njila mutambe buimpe wa muoyo lelu’eu, ne kudi kuasa tshishimikidi tshilenga bua matuku atshilualua, bua tuetu kumona mua kukuata bikole muoyo mulelela. (1 Timote 6:19; 2 Timote 4:7b, 8) Kupita bionso, tudi tuangata dipangadika edi bualu tudi banange Yehowa Nzambi ne mutshima wetu, anyima wetu, lungenyi luetu ne bukole buetu buonso!

24, 25. Ndiandamuna kayi diakafilabu ku dipangadika, ne ntshinyi tshidi aba badi bendela mu njila wa Yehowa bapangadije?

²⁴ “Bonso badi mu mpungilu eu badi bitabe dipangadika edi suayi nuambe ne: EYO!”

²⁵ Mu miaba ya manaya ne bipalu nkama ne nkama pa buloba bujima mêyi akumvuika pakandamuna bantu bonso bavua babuela mu mpungilu ne dîyi dikole ne: “EYO!” Bantemu ba Yehowa kabena ne dielakana bua se: nebatungunuke ne kuendela mu njila wa Yehowa. Mbeyemene Yehowa bikole ne badi ne dishindika dia se: neakumbaje malaya ende. Mbashale bamulamate, nansha bualu bua mushindu kayi mua kubafikila. Ne mbapangadije bua kuenza disua diende.

‘Nzambi udi netu’

26. Nnsombelu muimpe kayi udi nende aba badi bendela mu njila wa Yehowa?

²⁶ Bantemu ba Yehowa badi bavuluka mubelu wa mufundi wa misambu wa ne: ‘Windile Yehowa, ulamate njila wende, yeye neakumbandishe bua wewe kupiana buloba.’ (Musambu 37:34) Kabena bapua muoyo mêyi a Paulo adi akankamija a se: ‘Bikala Nzambi netu, nnganyi udi mumanye mua kutupumbisha? Yeye kakatuimina Muana wende mene, kadi wakamufila bua buonso buetu, mmunyi muapidiaye kutupa nende kabidi bintu bionso patupu?’ (Lomo 8:31, 32) Bushuwa, tuetu batungunuke ne kuendela mu njila wa Yehowa, neatupeshe ‘bintu bionso bivule bua tuetu kusanka nabi.’ (1 Timote 6:17) Kakuena muaba mulenga mupite utudi eu​—kuendela mu njila wa Yehowa, pamue ne bana betu basuibue ba balume ne ba bakaji. Bu mutudi ne Yehowa ku luseke luetu, tuikalayi bapangadije bua kushala balamateku ne bua kunanukila too ne ku ndekelu, bikale ne dishindika dikole dia se: mu tshikondo tshidiye mujadike, netumone mudiye ukumbaja malaya ende onso adi mashale.​—Tito 1:2.

[Mêyi adi kuinshi]

Udi muvuluke anyi?

◻ Ntshinyi tshidi tshilombibue bua muena Kristo kuendelaye mu njila wa Yehowa?

◻ Bua tshinyi tudi ne bua kuikala ne dieyemena ne bulamatshi kudi Yehowa?

◻ Ndiambuluisha kayi ditudi mua kupeta patudi tuendela mu njila wa Yehowa?

◻ Tela amue malu manene a mu dipangadika diangata mu Mpungilu ya: “Njila wa muoyo wa Nzambi.”

[Bimfuanyi mu dibeji 18]

Bakangata dipangadika dia mushinga mu Mpungilu ya Distrike ne ya: Bukua-matunga ya: “Njila wa muoyo wa Nzambi”