Tudi ne disanka mudi Yehowa utuleja njila wende

‘Njila wa Nzambi udi muakane tshishiki; dîyi dia Yehowa [“ndilengeja,” NW].’​—2 SAMUELE 22:31.

1, 2. (a) Ndijinga kayi dinene ditu nadi bantu bonso? (b) Ntshilejilu tshia nganyi tshitudi ne bua kuidikija?

BANTU bonso batu ne dijinga dinene dia kupeta buludiki. Bushuwa, tudi dijinga ne diambuluisha didi mua kutuludika mu nsombelu wetu. Bulelela, Yehowa mmutupeshe ndambu wa meji ne kuondo ka muoyo bua bituambuluishe bua kujingulula tshimpe ne tshibi. Kadi bua kuondo ketu ka muoyo kuikalaku muludiki wa kueyemena, tudi ne bua kukalongesha. (Ebelu 5:14) Bua tuetu kuangata mapangadika mimpe, lungenyi luetu ludi dijinga ne kumanya malu malelela​—pamue ne dilongesha bua kumanya mua kukonkonona malu au. (Nsumuinu 2:1-5) Nansha nanku, bua mpukapuka ya mu nsombelu, mapangadika etu adi mua kupanga kukumbana mutuvua basue. (Muambi 9:11) Tuetu nkayetu katuena ne mushindu kampanda wa kueyemena bua kumanya tshiatufikila mu matuku atshilualua nansha.

² Bua malu aa ne makuabu a bungi, muprofete Yelemiya wakafunda ne: ‘Yehowa, ndi mumanye ne: njila wa muntu kêna munda muende; muntu kêna ne bukole munda muende bua kuendesha nabu biendedi biende bimpe.’ (Yelemiya 10:23) Yezu Kristo, muntu mutambe bunene wa katshia ne katshia, wakitaba bulombodi. Wakamba ne: ‘Muana kêna mumanye mua kudienzela bualu, utu wenza anu budiye umona Tatu wende wenza; malu onso adi Tatu wenza Muana utu uenza muomumue.’ (Yone 5:19) Nenku mmunyipu mudibi bia meji bua kuidikija Yezu ne kunyemena kudi Yehowa bua atuambuluishe bua kulombola bidia bietu! Mukalenge Davidi wakimba ne: ‘Njila wa Nzambi udi muakane tshishiki; dîyi dia Yehowa [“ndilengeja,” NW]; yeye udi ngabu kudi bantu bonso badi banyemena kudiye.’ (2 Samuele 22:31) Bituakeba bua kuendela mu njila wa Yehowa pamutu pa kulonda meji etu, netupete buludiki buimpe butambe. Kubenga njila wa Nzambi kudi kufikisha ku kabutu.

Yehowa udi uleja njila

3. Mmunyi muvua Yehowa mulombole Adama ne Eva, ne mmalu kayi avuaye mubatekele kumpala?

³ Tangila muanda wakafikila Adama ne Eva. Nansha muvuabu kabayi ne mpekatu, bavua bakengela bulombodi. Yehowa kavua mulekele Adama udilongoluela malu onso mu budimi bulenga bua Edene nansha. Kadi, wakamupesha mudimu wa kuenza. Tshia kumpala, Adama uvua ne bua kuinyika nyama mêna. Pashishe, Yehowa wakapesha Adama ne Eva bipatshila bivuabu ne bua kukumbaja mu matuku a bungi. Bavua ne bua kukokesha buloba, kubuuja ne ndelanganyi yabu, ne kukuba nyama ya pa buloba. (Genese 1:28) Eu uvua ne bua kuikala mudimu munene, kadi tshipeta tshia ndekelu tshivua ne bua kuikala mparadizu wa buloba bujima mûle ne bantu bapuangane, basombe mu diumvuangana ne nyama. Mmalu kayipu malenga avua kumpala kuabu! Kabidi, pavua Adama ne Eva bendela mu njila wa Yehowa ne lulamatu, bavua bayukila nende. (Tangila Genese 3:8.) Ndiakalenga kayipu dia kuikala mu malanda a nsungasunga ne a kashidi ne Mufuki!

4. Mmunyi muvua Adama ne Eva bapange dieyemena ne bulamatshi, ne mbipeta bibi kayi biakamueneka?

⁴ Yehowa uvua mukandike bantu babidi ba kumpala bua kudia mamuma a mutshi wa dimanya dia tshidi tshimpe ne tshibi uvua mu Edene, ne bualu ebu buakabapesha mushindu wa kuleja butumike buabu​—dijinga diabu dia kuendela mu njila wa Yehowa. (Genese 2:17) Kadi, mutantshi mukese butumike abu buakatetshibua. Pakalua Satana ne mêyi a dishima, Adama ne Eva bavua ne bua kuleja bulamatshi buabu kudi Yehowa ne kueyemena malaya Ende bu buobu basue kushala bena butumike. Diakabi, kabavua ne bulamatshi ne dieyemena nansha. Pavua Satana mulaye Eva budikadidi ne mubande Yehowa bu muena mashimi, Eva wakitaba mashimi au ne wakabenga kutumikila Nzambi. Adama wakamulonda mu mpekatu wende. (Genese 3:1-6; 1 Timote 2:14) Bintu biakajimijabu bua bualu ebu bivua bipite bungi. Kuendela mu njila wa Yehowa kuvua mua kuikala kubapeshe disanka divua anu dienda divula pavuabu ne bua kukumbaja disua diende ku kakese ku kakese. Pamutu pa nanku, nsombelu wabu uvua mûle ne ntatu ne makenga avuabu kabayi batekemene too ne pakabakuata lufu.​—Genese 3:16-19; 5:1-5.

5. Ndilongolola kayi dia mutantshi mule didi nadi Yehowa, ne mmunyi mudiye wambuluisha bena lulamatu bua kumonabu mudidi dikumbana?

⁵ Nansha nanku, Yehowa kakashintulula dilongolola diende dia se: dimue dituku buloba nebuikale mparadizu, muaba wasombela bantu bapuangane, kabayi ne mpekatu. (Musambu 37:11, 29) Ne katu muanji kupangila bua kufila buludiki bupuangane kudi aba badi bendela mu njila wende ne badi batekemene bua kumona dikumbana dia mulayi au. Bua bantu ba munkatshi muetu badi ne matshi a kumvua, dîyi dia Yehowa didi munyima muetu diamba ne: “Ke njila eu. Endelayimu.”​—Yeshaya 30:21, NW.

Bamue bantu bakendela mu njila wa Yehowa

6. Mbantu kayi babidi ba kale bakendela mu njila wa Yehowa, ne bakapeta tshinyi?

⁶ Bilondeshile muyuki wa mu Bible, anu bantu bakese ba mu ndelanganyi ya Adama ne Eva ke bakendela mu njila wa Yehowa. Wa kumpala ku bantu aba uvua Ebele. Nansha muakafuaye kumpala kua dîba, uvua muanyishibue kudi Yehowa ne uvua ne ditekemena dishindika dia kuikala mu “dibika dia . . . bakane” mu tshikondo tshijadika kudi Nzambi. (Bienzedi 24:15) Neamone dikumbana dia ndekelu dia dilongolola dinene dia Yehowa bua buloba ne bantu. (Ebelu 11:4) Muntu mukuabu wakendela mu njila wa Yehowa uvua Hanoka, muena mulayi wa nshikidilu wa ndongoluelu eu wa malu udi mufunda mu mukanda wa Yuda. (Yuda 14, 15) Hanoka pende kakashala ne muoyo matuku a bungi nansha. (Genese 5:21-24) Nansha nanku, “badi bajadika bualu buende ne: uvua mulengelele [“Nzambi,” NW].” (Bena Hebreyi 11:5, MMM) Anu bu Ebele, pakafuaye uvua ne ditekemena dishindika dia kubiishibua ku lufu, ne neikale munkatshi mua bantu bamona mushindu wakumbana malongolola a Yehowa.

7. Mmunyi muvua Noa ne dîku diende baleje bulamatshi ne dieyemena kudi Yehowa?

⁷ Bu muvua bantu ba kumpala kua Mvula munene badine ne kasuki mu dienza dia malu mabi, ditumikila Yehowa diakalua diteta dikole menemene dia bulamatshi. Ku ndekelu kua bukua panu abu, anu kasumbu kamue ka bantu bakese ke kavuabu basangane kendela mu njila wa Yehowa. Noa ne dîku diende bakateleja Nzambi ne bakeyemena malu avuaye wamba. Ne lulamatu luonso bakakumbaja midimu mibapesha, ne bakabenga bua kabababueji mu bilele bibi bia bantu ba matuku au. (Genese 6:5-7, 13-16; Ebelu 11:7; 2 Petelo 2:5) Tudi mua kuikala ne dianyisha bua butumike buabu bua bulamatshi ne dieyemena diabu. Bua butumike abu, bakapanduka ku Mvula munene ne kuluabu bankambua betu.​—Genese 6:22; 1 Petelo 3:20.

8. Bua tshisamba tshia Isalele, kuendela mu njila wa Nzambi kuvua kumvuija tshinyi?

⁸ Kunyima, Yehowa wakenza tshipungidi ne ndelanganyi ya muena lulamatu Yakoba, ne yakalua tshisamba tshiende tshia pa buatshi. (Ekesode 19:5, 6) Yehowa wakalombola bantu bavuaye mudie nabu tshipungidi ku diambuluisha dia Mikenji mifunda, bakuidi ne dia mêyi a baprofete avua abaludika misangu yonso. Kadi bena Isalele bavua ne bujitu bua kuitaba bulombodi abu. Yehowa wakatuma muprofete wende bua ambile bena Isalele ne: ‘Tangilayi, ngakuteka disanka ne mulawu kumpala kuenu lelu. Binumvua mikenji ya Yehowa, Nzambi wenu, ingakunuambila lelu, nenupete disanka; binuapidia kumvua mikenji ya Yehowa, Nzambi wenu, binuasesuka mu njila ungakunuleja lelu bua kulonda nzambi mikuabu, inudi kanuyi bamanye, nenupete mulawu.’​—Dutelonome 11:26-28.

Tshivua bamue bumbukile mu njila wa Yehowa

9, 10. Bena Isalele bavua ne bua kueyemena Yehowa ne kuikala ne bulamatshi kudiye bua nsombelu kayi uvuaku?

⁹ Anu bu muvuabi bua Adama ne Eva, bena Isalele bavua ne bua kueyemena Yehowa ne kuikala ne bulamatshi kudiye bu buobu basue kushala bena butumike. Isalele uvua tshisamba tshikese tshinyunguluka kudi bena mutumba bavua basue mvita. Ku Sud-Ouest kuvua Ejipitu ne Etiopia. Ku Nord-Est kuvua Sulia (Syrie) ne Ashû (Assyrie). Pabuipi menemene kuvua Peleshete, Amona, Moaba ne Edome. Mu tshikondo kampanda, bisamba bionso ebi biakalua biluishi bia Isalele. Kabidi, buonso buabi bivua bilonda bitendelelu bia dishima, bimanyike bua ntendelelu wa mpingu, lubuku lua mitoto ne imue misangu bilele bibi menemene bia mikiya ya masandi ne dilambula bana ne tshikisu. Bena mutumba ba Isalele bavua banyemena kudi nzambi yabu bua ibapeshe bana ba bungi, bia pa madimi bivule ne bua ibambuluishe bua kutshimuna mu mvita.

¹⁰ Isalele nkayende ke uvua utendelela Nzambi umuepele, Yehowa. Yehowa wakalaya bua kubabenesha ne bana ba bungi, bia pa madimi bivule ne kubakuba ku baluishi babu bu buobu mua kutumikila mikenji yende. (Dutelonome 28:1-14) Diakabi, bantu ba bungi ba mu Isalele kabakenza nanku to. Ku bantu bakendela mu njila wa Yehowa, ba bungi bakakenga bua bulamatshi buabu. Bavua mene bakengeshe bamue, babaseke, babakume mfimbu, babele mu buloko, babase mabue ne babashipe kudi bena Isalele nabu. (Bienzedi 7:51, 52; Ebelu 11:35-38) Adi divua ne bua kuikala diteta dia bushuwa bua bena lulamatu! Kadi bua tshinyi bantu bapite bungi nenku bakumbuka mu njila wa Yehowa? Bilejilu bibidi biangata mu malu a kale a Isalele bidi bituambuluisha bua kumona ngelelu wa meji mubi uvuabu nende.

Tshilejilu tshibi tshia Ahaza

11, 12. (a) Pavua bena Sulia balue kumuluisha, ntshinyi tshivua Ahaza mubenge bua kuenza? (b) Mmiaba kayi ibidi ivua Ahaza munyemene bua kupeta bukubi?

¹¹ Ahaza wakakokesha mu bukalenge bua Yuda bua ku Sud mu siekele wa muanda-mukulu K.B.B. Mu bukalenge buende kamuvua ditalala nansha. Umue musangu, Sulia ne bukalenge bua Isalele bua ku Nord bakadisangisha bua kumuluisha, ne ‘mutshima wende wakazakala, ne mitshima ya bantu bende yakazakala.’ (Yeshaya 7:1, 2) Kadi, pakalaya Yehowa bua kumukuatshisha ne kuambilaye Ahaza bua amutete, Ahaza wakabenga kuosha ne munu muiku! (Yeshaya 7:10-12) Bu tshipeta, bakatshimuna Yuda ne kushipabu bantu ba bungi mu mvita ayi.​—2 Kulondolola 28:1-8.

¹² Nansha muvua Ahaza mubenge bua kuteta Yehowa, kakapanga bua kulomba diambuluisha kudi mukalenge wa bena Ashû nansha. Kadi, bisamba bia bena mutumba biakatungunuka ne kukengesha Yuda. Pavua bena Ashû pabu bakudimukile Ahaza ne ‘bamutatshishe,’ mukalenge ‘wakashipela nzambi ya mu Damaseke yakamubutula milambu, yeye wakamba ne: bualu bua nzambi ya bena Sulia yakabakuatshisha, nunku nenyishipele milambu bua yoyi kunkuatshisha meme.’​—2 Kulondolola 28:20, 23.

13. Ntshinyi tshiakaleja Ahaza mu dinyemena kudi nzambi ya bena Sulia?

¹³ Panyima pa matuku, Yehowa wakambila Isalele ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bua kuendela. Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene!’ (Yeshaya 48:17, 18) Mu dinyemena kudi nzambi ya bena Sulia, Ahaza wakaleja muvuaye kayi pabuipi ne ‘njila uvuaye ne bua kuendela.’ Ngelelu wa meji wa bisamba bia bende wakamupambuisha bikole, kunyemenaye ku bintu bia dishima bia bukubi pamutu pa kunyemena kudi Yehowa.

14. Bua tshinyi Ahaza kavua ne kabingila pakanyemenaye kudi nzambi ya dishima?

¹⁴ Nzambi ya bisamba bia bende, pamue ne ya bena Sulia, ivua mileja kale kuonso aku bu “nzambi kayiyi ne mushinga.” (Yeshaya 2:8, NW) Kumpala, mu bukokeshi bua Mukalenge Davidi, bantu bakamona patoke ne: Yehowa uvua mupite nzambi ya bena Sulia pakalua bena Sulia basadidi ba Davidi. (1 Kulondolola 18:5, 6) Yehowa nkayende, ‘Nzambi wa nzambi mikuabu, Mukalenge wa bakalenge, Nzambi munene ne mukole, udibu batshina’ udi mua kukuba bimpe menemene. (Dutelonome 10:17) Kadi Ahaza wakela Yehowa nyima ne kunyemenaye kudi nzambi ya bisamba bia bende bua imukube. Yuda wakakenga bikole bua bualu ebu.​—2 Kulondolola 28:24, 25.

Bena Yuda ne Yelemiya mu Ejipitu

15. Mmu mushindu kayi muvua bena Yuda bavua mu Ejipitu mu matuku a Yelemiya benze mpekatu?

¹⁵ Bua dipanga bulamatshi ditamba bunene dia bantu bende, Yehowa wakalekela bena Babulona babutula Yelushalema ne ntempelo uvuamu mu 607 K.B.B. Bakaya ne bantu ba bungi ba mu tshisamba etshi mu bupika mu Babulona. Kadi bavua bashiye bamue bantu kunyima, munkatshi muabu muvua muprofete Yelemiya. Pakashipabu Ngovena Gedaliya, tshisumbu etshi tshiakanyemena mu Ejipitu ne kuyatshi ne Yelemiya. (2 Bakelenge 25:22-26; Yelemiya 43:5-7) Muine amu, kutuadijabu kupesha nzambi ya dishima milambu. Yelemiya wakelangana meji bikole ne bena Yuda abu bapange lulamatu, kadi bavua ne mutu mukole. Bakabenga bua kunyemena kudi Yehowa ne bakasuminyina bamba ne: bavua ne bua kutungunuka ne kuoshila ‘mukalenge-mukaji wa mu diulu’ musenga wa manananshi. Bua tshinyi? Bualu etshi ke tshivuabu benza ne batatuabu ‘mu misoko ya Yuda ne misesu ya Yelushalema. Mu tshikondo atshi bavua ne bintu bia kudia bikumbane, bavua ne diakalengele, kabavua bamona dikenga’ nansha. (Yelemiya 44:16, 17) Bena Yuda bakamba kabidi ne: ‘Katshia tualekela kuoshila mukalenge-mukaji wa mu diulu musenga wa manananshi ne kumupongoluela milambu ya bia kunua, tuakukengela bintu bionso, tuakufua ku muele wa mvita ne ku tshiyole.’​—Yelemiya 44:18.

16. Bua tshinyi bena Yuda bavua mu Ejipitu bavua batupakane bikole mu ngelelu wabu wa meji?

¹⁶ Mmunyipu mudi lungenyi lulama malu adi asankisha meji ne majinga etu! Mmalu kayi avua menzeke? Bena Yuda bavua bapeshe nzambi ya dishima milambu mu buloba buvua Yehowa mubapeshe. Imue misangu, anu bu muvuabi mu tshikondo tshia Ahaza, bakakenga bua butontolodi abu. Kadi Yehowa ‘kakakuata tshiji lukasa’ bua bantu bavuaye mudie nabu tshipungidi nansha. (Ekesode 34:6; Musambu 86:15) Wakatuma baprofete bende bua bambile bantu aba bua banyingalale. Imue misangu, pavua mukalenge muikale ne lulamatu, Yehowa uvua umubenesha, ne bantu bavua bapetela masanka ku dibenesha adi, nansha muvua bavule ba kudibu bapange lulamatu. (2 Kulondolola 20:29-33; 27:1-6) Mmunyipu muvua bena Yuda abu bavua mu Ejipitu batupakane pa kuamba ne: diakalengele dionso divuabu bapete kale mu buloba buabu divua difumine kudi nzambi yabu ya dishima!

17. Bua tshinyi Yuda wakajimija buloba ne ntempelo wende?

¹⁷ Kumpala kua tshidimu tshia 607 K.B.B., Yehowa ukavua muambile bantu ba mu Yuda ne: ‘Umvuayi dîyi dianyi, nunku nengikale Nzambi wenu, nuenu nenuikale bantu banyi; nuende mu njila yonso ungakunuambila, bua nuenu nupete diakalengele.’ (Yelemiya 7:23) Bena Yuda bakajimija ntempelo ne buloba buabu nangananga bualu bakabenga bua kuendela mu ‘njila yonso uvua Yehowa mubambile.’ Tuikalayi bashindike bua kuepuka tshilema atshi tshidi tshifikisha ku lufu.

Yehowa udi ubenesha aba badi bendela mu njila wende

18. Ntshinyi tshidi aba badi bendela mu njila wa Yehowa ne bua kuenza?

¹⁸ Anu bu muvuabi kale, kuendela mu njila wa Yehowa lelu kudi kulomba bulamatshi​—dipangadika dia kumuenzela yeye nkayende mudimu. Kudi kulomba dieyemena—​ditabuja dikole dia se: malaya a Yehowa nga kueyemena ne neakumbane. Kuendela mu njila wa Yehowa kudi kulomba butumike​—kulonda mikenji yende kakuyi disesuka ne kulama mêyi-makulu ende matumbuke. “Yehowa udi muakane; udi unanga buakane.”​—Musambu 11:7.

19. Nnzambi kayi idi bantu ba bungi batendelela lelu’eu, ne ntshinyi tshidibu bapeta?

¹⁹ Ahaza wakanyemena kudi nzambi ya mu Sulia bua imukube. Bena Isalele bavua mu Ejipitu bavua batekemene ne: ‘mukalenge-mukaji wa mu diulu,’ nzambi-mukaji uvuabu batendelela bikole ku Moyen-Orient (Asia) wa kale​—uvua mua kubapetesha bintu bivule bia ku mubidi. Lelu’eu, nzambi ya bungi kayena anu mpingu ya bushuwa eyi nansha. Yezu wakadimuija bua dienzela “biuma” mudimu pamutu pa kuenzela Yehowa. (Matewuse 6:24, MMM) Mupostolo Paulo wakakula bua “lukuka ludi [luikale] ditendelela dia mpingu.” (Bena Kolose 3:5, MMM) Wakakula kabidi bua bantu badi ‘nzambi wabu muikale difu diabu.’ (Filipoi 3:19) Bushuwa, makuta ne bintu bia ku mubidi bidi munkatshi mua nzambi minene idi bantu batendelela lelu’eu. Mu bulelela, bantu bavule​—ba bungi bikale mu bitendelelu—​‘badi bateka ditekemena diabu kudi bubanji budi mua kujimina tshitupa tshîpi.’ (1 Timote 6:17) Bantu ba bungi badi benzela nzambi eyi mudimu mukole, ne bamue badi bapeta mafutu​—basombele mu nzubu milenga, bikale ne bintu bia mushinga mukole ne badia biakudia bia dinono. Kadi bantu bonso kabatu bapeta bintu ebi to. Nansha aba badi babipeta, ndekelu wa bionso batu bafika ku dimona bintu ebi kabitshiyi bibasankisha. Mbintu bidi mua kujimina, bia tshitupa tshîpi, ne kabiena bikumbaja majinga a mu nyuma nansha.​—Matayo 5:3.

20. Nnkatshinkatshi kayi utudi ne bua kuikala nende?

²⁰ Bulelela, tudi ne bua kuikala ne meji mu matuku aa a ku nshikidilu wa ndongoluelu eu wa malu. Bidi bitukengela kuangata mapangadika a meji bua kukumbaja majinga a ku mubidi a mêku etu. Kadi bituangata dikala ne nsombelu mubandile ne mushinga wa bungi menemene, nansha dikeba dia makuta anyi dia bintu bia muomumue pamutu pa kuenzela Nzambi mudimu, tudi bamate mu mushindu kampanda wa ditendelela dia mpingu ne katuena kabidi tuendela mu njila wa Yehowa nansha. (1 Timote 6:9, 10) Kadi netuambe tshinyi bu tuetu mua kupeta disama, ntatu ya malu a makuta anyi ya malu makuabu? Katuikadi bu bena Yuda bavua mu Ejipitu bakamba ne: disadila Nzambi ke divua dibakebele ntatu. Pa mutu pa nanku, tutetayi Yehowa nansha muakapangila Ahaza bua kumuteta. Ne bulamatshi tunyemenayi kudi Yehowa Nzambi bua atuludike. Tutumikilayi mibelu yende ne dieyemena, ne tusambile bua kupeta bukole ne meji bua kumanya mua kupita ne nsombelu yonso mukole. Pashishe, tuindile dibenesha dia Yehowa ne dishindika dionso.

21. Mmabenesha kayi adi aba badi bendela mu njila wa Yehowa bapeta?

²¹ Mu nsombelu wa bena Isalele kale, Yehowa wakabenesha bikole bantu bakendela mu njila wende. Mukalenge Davidi wakimba ne: “Yehowa, undombole mu buakane buebe bualu bua bena lukuna banyi.” (Musambu 5:8) Yehowa uvua muambuluishe basalayi ba Davidi bua kutshimunabu bisamba bia bena mutumba biakalua kuyobesha Ahaza pashishe. Mu bukokeshi bua Solomo, bakabenesha Isalele ne ditalala ne bintu bia bungi bivua bena Yuda bavua mu Ejipitu balue kujinga pashishe. Yehowa wakambuluisha mene Hezikiya muana wa Ahaza bua kutshimunaye bena Ashû nansha muvuabu ne bukole. (Yeshaya 59:1) Eyowa, tshianza tshia Yehowa katshivua tshitambe buipi bua bena bulamatshi bende, bavua kabayi bimane ‘mu njila [wa] benji ba malu mabi,’ kadi bavua bapetela disanka mu mikenji ya Nzambi. (Musambu 1:1, 2) Ke mudibi kabidi lelu’eu. Kadi mmunyi mutudi mua kuikala bajadike lelu’eu ne: tudi tuendela mu njila wa Yehowa? Netumone bualu ebu mu tshiena-bualu tshidi tshilonda.

Udi muvuluke anyi?

◻ Nngikadilu kayi itudi ne bua kuikala nayi bituasua kuendela mu njila wa Yehowa?

◻ Bua tshinyi ngelelu wa meji wa Ahaza uvua mubi?

◻ Mbualu kayi buvua bubi mu ngelelu wa meji wa bena Isalele bavua mu Ejipitu?

◻ Mmunyi mutudi mua kukolesha dipangadika dietu dia kuendela mu njila wa Yehowa?

[Tshimfuanyi mu dibeji 13]

Ahaza wakanyemena kudi nzambi ya bena Sulia pamutu pa kunyemena kudi Yehowa