Dikumbula kadiyi kupua muoyo didi disankisha bena mu tshidiila

Cuba katshiena tshidiila tshiditole nansha, nangananga mu ngumvuilu wa mu nyuma. Ndekelu wa tshidimu tshia 1998 wakatuadila Bantemu ba Yehowa ba mu ditunga edi dia Antilles dibenesha divuabu batekemene mutantshi mule. Bua musangu wa kumpala munkatshi mua bidimu bipite pa 30, bena mu Kasumbu Kaludiki ka Bantemu ba Yehowa bakakumbula ditunga edi pamue ne benyi bakuabu 15. Benyi bakuabu aba bavua bena matunga aa: Australie, Autriche, Belgique, Grande-Bretagne, Italie, Nouvelle-Zélande ne Porto Rico.

BUVUA bualu budi kabuyi kupua muoyo kudi bamanyishi ba Bukalenge 82 258 ba mu tshidiila etshi ne kudi bantu 87 890 bakadisangisha nabu bua kusekelela Bidia bia Dilolo bia Mukalenge mu 1998.

Kubangila mu dituku dia 1 too ne mu dia 7 Tshisua-munene 1998, Lloyd Barry, John Barr, ne Gerrit Lösch bakakumbula Betele wa mu Havana ne bakabuela mu imue Mpungilu ya Distrike ya: “Njila wa muoyo wa Nzambi” yakenzeka mu ditunga dia Cuba. Bavua ne disanka bua kumonangana ne bakulu bena ngendu ne kumanyangana bimpe ne banene ba mbulamatadi ba mu Cuba.

John Barr wakamba ne: “Eu uvua muanda wa mushinga mukole wa teokrasi undi tshiyi mua kupua muoyo kashidi meme ne mukajanyi. Bana betu basuibue ba mu Cuba badi ne lukunukunu lua bungi bua bulelela! Ngakajadika ne: buena-muntu buetu bua buloba bujima budi ne mushinga mukole bushuwa!” Lloyd Barry wakasakidila ne: “Lumingu elu lua mushinga mukole luakangambuluisha bua kujingulula bimpe menemene nsombelu uvua nende bana betu mu ditunga edi.”

Mu bidimu bitanu bikadi bipite, mbapeshe Bantemu ba Yehowa budikadidi buvule bua ntendelelu mu Cuba, ne mêyi a bamfumu mu ditunga edi akasaka bantu ku dimona se: bavua basue nsombelu eu atungunuke.

Mu Kabitende 1994, mudimu wa ditapa mikanda wakatuadija ku Betele wa mu tshimenga tshia Havana. Bantemu ba Yehowa bavua mpindieu mua kudisangisha patoke ne kuyisha ku nzubu ne ku nzubu. Pashishe mu 1998, bakokeshi bakitaba dilua dia Bantemu ba Yehowa 18 ba mu matunga mashilangane, munkatshi muabu muikale bena mu Kasumbu Kaludiki basatu.

Dituilangana dia disanka

Pakafika kasumbu ka bantu aba ku tshipalu tshia ndeke tshia José Martí mu Havana, bavua babakidile bimpe kudi kasumbu ka banene ba mbulamatadi ne tshisumbu tshia bena ku Betele. Munkatshi muabu muvua muanetu wa balume kampanda wakavuluka musangu wa ndekelu uvua Milton Henschel​—muena mu Kasumbu Kaludiki—​mulue mu Cuba mu 1961. Tshikondo atshi muanetu eu uvua ne bidimu 12; mpindieu udi mutangidi muena ngendu.

Pakafika benyi aba ku Betele, bakabasekelela ne bilongo bia mekala mashilangane, bikuna kudi muanetu wa balume kampanda anu bua muanda eu. Binsonji biakadipuekela pavua bena dîku dia Betele bakidila benyi aba. Kunyima, bakadia munyinyi wa ngulube muosha mutu bena mu Cuba benza, luosa ne nkunde, bisekiseki bibishi, yucca muela ku mojo (nsupu muenza ne matungulu a ai ne mafuta a olive) ne bimuma. Kunyima kua didia, muena mu Kasumbu Kaludiki yonso wakenza muyuki uvua ukankamija ne uleja mudi mudimu wa ku Betele muikale tshintu tshia mushinga mukole. Mêyi a muanetu Lösch akatamba kusankisha bana betu bualu uvua wakula mu tshiena-Espagne. Dîku dia Betele didi ne bantu 48 badi benza mudimu wa budisuile pa tshibidilu ne bantu 18 badi bambuluisha bua tshitupa tshîpi.

Nansha mudibu bapatuila mikanda ne Bible mu Italie bua bana betu ba mu Cuba, bibejibeji bia Tshibumba tshia Nsentedi ne Réveillez-vous! bia dikala difiike ne ditoke badi badipatuilabi mu ditunga edi ku biamu bibidi bia ditapa mikanda. Bidi bilomba mêba ne mudimu wa bungi wa bianza udibu benzela mu nzubu mipatakane bua kupatula bungi buonso bua bibejibeji bidi bikengedibua. Bena budisuile aba badi bangata ne mushinga mudimu eu muenzela Yehowa mu mushindu wa pa buawu.​—2 Kolinto 4:7.

Malu manene a mu Mpungilu

Bantu 18 bavua balue bakadipandulula mu tusumbu tusatu bua kubuela mu mpungilu ya distrike mienzela mu miaba isatu: mu Havana, Camagüey, ne Holguín. Ku dituku ku dituku mu bule bua matuku asatu, bavua babikila tshisumbu tshinene tshia bana betu ba balume ne ba bakaji muikale ne bakulu ne bampanda-njila, bua kubuela mu mpungilu wa muaba wonso. Bavua bambile Bantemu ba mu tshidiila atshi ne: etshi tshivua tshikondo tshia pa buatshi, kadi kabavua bamanye ne: bena mu Kasumbu Kaludiki bavua mua kuikalamu to. Ela meji muakakemabu pa kumona bana betu basuibue aba ne bakaji babu batuluka mu bise ivuabu bafutshila mu Ditanu mu dinda!

Bakenzela mpungilu eyi mu bitanda biasa kudi bana betu ku dianyisha dia bamfumu ba mbulamatadi. Muaba uvuabu benzela mpungilu wa mu Havana, bavua bafunde ne: “Musambu 133:1” pa dimue dia ku mabue a ku tshibueledi. Bivua bivuluija bana betu mêyi adi mu mvese au: “Monayi mudibio bilenga, mudibio disanka, bua kusomba bonso pamue, bu bana ba muntu.” (MMM) Bushuwa, munkatshi mua mpungilu eu, muvua bu-wetu bulenga ne bua disanka bua bena Kristo.

Benyi bakamona muakenzabu miyuki bilenga ne muvuabu belangana nkonko bimpe, ne bavua bakemesha kudi drama uvua mushindamene pa muanda wakenzeka mu Babulona wa kale udi mu Danyele nshapita 3. Muanetu wa bakaji kampanda wakamba ne: “Banayi ba drama bonso bavua benze bimpe bitambe, ne bavua bamanye mua kuidikija bimpe mêyi a ku tshisanji, muntu kavua mua kumanya ne: mêyi au avua mamana kukuata mu bande. . . . Bantu babi ba mu Babulona bakamueneka bushuwa anu babi, ne bena Ebelu basatu bavua bashindame ne bikale ne dipangadika dikole.”

Baleji-mpala ba Tshibambalu tshia Malu a Bitendelelu ne bakuabu banene ba mbulamatadi bakabuela mu mpungilu eyi bakela bana betu kalumbandi bua dilongolola dimpe dia malu ne tshikadilu tshiabu tshilenga. Muanetu Barry wakela tuasakidila bua muvua bamfumu ba mu Cuba benzela benyi malu malenga. Bana betu bavua baleja dianyisha diabu bua miyuki ne bua muvua bakokeshi babitabile bua kuenza mpungilu eyi pa kututa bikashi bivua misangu mivule binenga minite ya bungi. Bena mu dîku kampanda dia bena Kristo bakamba ne: “Mbipite ne tshituvua batekemene​—mpungilu mukese wa bukua-matunga! Uvua mulenga wa dikema, bualu mmufile tshijadiki tshia bukole buvule budi nabu Yehowa bua kukumbaja malaya ende.”

Mpungilu eyi yakapetesha kabidi bantu bakuabu mushindu wa kumanya Bantemu bimpe bitambe. Muendeshi kampanda wa bise wakabuela mu mpungilu mu Disambombo ne mu Dia lumingu kabidi. Wakamba muvuaye mumvue bakula malu a bungi bua Bantemu ba Yehowa, kadi mpindieu mmumanye ne: mbantu bimpe ne ba ditalala.

“Malu atudi katuyi ne bua kupua muoyo”

Bena mu Cuba bakakemesha benyi bua musangelu ne ngikadilu wabu wa bulunda. Bena mu Cuba mbenji ba mudimu, batu basue kuikala ne mêyi-maludiki a kulonda ne bantu bimpe. Umue wa ku benyi wakamba ne: “Misangu ya bungi, bantu batuvua katuyi bamanye bavua bakeba bua kutuambuluisha.”

Ditabuja, disanka ne dinanga bivua Bantemu netu ba mu Cuba baleje biakakemesha benyi bikole. Nansha mudiku bipumbishi bia bungi, mbavuije Yehowa lumbu luabu. (Musambu 91:2) John Barr wakamba ne: “Malu mimpe a bungi menemene akankemesha mu dikumbula dianyi dia kumpala mu Cuba​—bulengele bua ditunga, ngikadilu mulenga wa bantu bandi mupetangane nabu, ne nangananga disanka dia bushuwa dia Bantemu ba mu Cuba. Katshia bandela tshitu muanji kumvua bimba misambu yetu ya Bukalenge ne muoyo mujima nunku, ne batuta bikashi mutantshi mule pavua malu a mu nyuma alenga mitshima yabu! Aa mmalu, atudi katuyi ne bua kupua muoyo. Misangu yonso, tudi ne bua kuajinga.”

Musambu 97:1 udi wamba ne: “Bidila bionso bisanguluke.” (MMM) Bushuwa, Bantemu ba Yehowa ba mu tshidiila tshia Cuba bakasanguluka bua budikadidi butambe kuvula buvuabu bapete bua kutendelela Nzambi, ne bua dikumbula kadiyi kupua muoyo dia kasumbu ka bantu ba mu matunga mashilangane.

[Bimfuanyi mu dibeji 8]

Mêku a bungi akabuela mu Mpungilu ya pa buayi ya: “Njila wa muoyo wa Nzambi” mu Cuba

[Tshimfuanyi mu dibeji 8]

Bakunzulula tshiakabidi Betele wa mu Havana mu 1994

[Tshimfuanyi mu dibeji 8]

Bena mu Kasumbu Kaludiki badi batua biala pa Bible idibu babanyina bena mbulamatadi