Tulondololayi matuku a ndekelu a Yezu pa buloba

NDITUKU dia muanda-mutekete dia ngondo wa bena Yuda wa Nizan mu tshidimu tshia 33 B.B. Elabi meji ne: udi umona malu adi enzeka mu provense wa Yudeya wa bena Roma. Bumbuka mu Yeriko ne mabeji ende matumpuke, Yezu Kristo ne bayidi bende badi benda badikokela mu njila wa lupuishi ne bibenda. Bena luendu bakuabu ba bungi badi pabu mu njila amu batangile ku Yeruzaleme bua musekelelu wa ku tshidimu wa Kupita kua Yehowa. Kadi, bualu bukuabu bupite luendu elu lua dipungi budi mu lungenyi lua bayidi ba Kristo.

Bena Yuda badi bajinga bikole Masiya udi mua kubatuadila disulakana ku tshikokedi tshia bena Roma. Bantu bavule badi bitaba Yezu wa mu Nazarete bu Mupandishi au muindila mutantshi mule. Munkatshi mua bidimu bisatu ne tshitupa, uvua wakula bua Bukalenge bua Nzambi. Mmuondope babedi ne mudishe bavua ne nzala. Bushuwa, mmutuadile bantu busambi. Kadi bamfumu ba bitendelelu badi bumvua tshiji bua mudi Yezu ubatandula ne dîsu dikole ne mbapangadije bua kumushipesha. Nansha nanku, nyeye wawa, wenda ne dikima dionso mu njila mukamakane, kumpala kua bayidi bende.​—Mâko 10:32.

Bu mukadi dîba dibuela panyima pa Mukuna wa Olive udi kumpala kuabu, Yezu ne binende badi bafika mu musoko wa Betaniya, muaba wapitshishabu matuku a butuku asambombo adi alonda. Badi babakidila kuine aku kudi balunda babu bananga, Lazare, Mariya ne Marta. Dilolo didi difila disulakana dilenga ku luendu lua munya mukole ne dileja ntuadijilu wa Nsabatu wa dia 8 Nizan.​—Yone 12:1, 2.

Dia 9 Nizan

Panyima pa Nsabatu, midimu mmiangatangane mu Yeruzaleme. Bakumbudi binunu bivule mbamane kutuilangana mu tshimenga bua Kupita kua Yehowa. Kadi kayumbayumba ka mitoyi mikole katudi tumvua kakena bu ka pa tshibidilu mu tshikondo etshi tshia tshidimu. Misumba ya badi bajinga kumanya idi iditua lubilu mu tujila tukese mitangile ku biibi bia tshimenga. Padibu bapatukila ku biibi bikutakaja, mbualu kayipu bua tshikuma budibu bamona! Bantu bavule bikale ne disanka badi bapitshila ku Mukuna wa Olive mu njila udi ufuma ku Betefage. (Luka 19:37) Bionso ebi bidi ne diumvuija kayi?

Tangila! Yezu wa mu Nazarete udi ulua mubande pa muana wa mpunda. Bantu badi badija bilamba mu njila kumpala kuende. Bakuabu badi bapepa malala a mabue atshidibu bafumina ku dikosa ne bela mbila ne disanka dionso ne: “Eu udi ulua mu dîna dia Yehowa abeneshibue, eyowa, mukalenge wa Izalele!”​—Yone 12:12-15, NW.

Bu mukadi musumba usemena pabuipi ne Yeruzaleme, Yezu udi utangila tshimenga etshi ne bidi bimulenga bikole ku muoyo. Udi utuadija kudila, ne tudi tumumvua udianjila kuamba ne: nebabutule tshimenga etshi. Katupa kîpi kunyima padi Yezu ufika ku ntempelo, udi ulongesha misumba ya bantu ne wondopa bampofo ne balema badi balua kudiye.​—Matayo 21:14; Luka 19:41-44, 47.

Bionso ebi mbibambisha kudi bakuidi bamfumu ne baskribe. Badi ne tshiji bua kumona malu a dikema adi Yezu wenza ne disanka dinene didi nadi misumba ya bantu. Kabayi ne mushindu wa kusokoka tshiji tshiabu, Bafarizeyi badi balomba ne: “Muyishi, ubele bayidi bebe.” Yezu udi wandamuna ne: ‘Biapuwabu, mabue neele mbila.’ Kumpala kua kuya, Yezu udi umona midimu ya bungenda idibu benza mu ntempelo.​—Luka 19:39, 40; Matayo 21:15, 16; Mâko 11:11.

Dia 10 Nizan

Yezu udi ufika ku ntempelo kumpala kua dîba. Dituku dishale, uvua ne tshiji tshikole bua dienduluka dibi ne ntendelelu wa Tatuende Yehowa Nzambi. Nenku, ne lukunukunu lukole, udi utuadija kuipata basumbi ne basumbishi ba bintu mu ntempelo. Pashishe udi utonkola mesa a bashintuishi ba mfranga bena lukuka ne bibasa bia basumbishi ba nkudimba. Yezu udi wamba ne: “Mbafunde ne: Nzubu wanyi nebamuinyike nzubu wa disambila; kadi nuenu nukadi bamuandamune muaba wa bivi.”​—Matewuse 21:12, 13, Mukanda wa Mvidi Mukulu.

Bakuidi bamfumu, baskribe ne banene ba ditunga mbakine midimu ne dilongesha bia Yezu bia patoke. Badi bakeba ne muoyo mujima bua kumushipa! Kadi mbapangisha kudi musumba bualu bantu mbakemesha kudi dilongesha dia Yezu ne badi batungunuka ne ‘kunguila, bateleja mêyi ende.’ (Luka 19:47, 48) Bu mutukadi batangile ku dilolo, Yezu ne binende badi benza luendu lua disanka bapingana ku Betaniya bua dikisha dimpe dia butuku.

Dia 11 Nizan

Patshiatshia, Yezu ne bayidi bende bakadi mu njila bapitshila pa Mukuna wa Olive batangile ku Yeruzaleme. Padibu bafika ku ntempelo, bakuidi bamfumu ne bakulu mbadiakaje bua kubunda Yezu. Batshidi bavuluka tshivuaye muenzele bashintuishi ba mfranga ne bangenda mu ntempelo. Ne luonji luonso baluishi bende badi bebeja ne: ‘Wewe udi wenza malu aa ne bukokeshi kayi? Wakakupa bukokeshi ebu nnganyi?’ Yezu udi upingaja lukonko ne: ‘Meme kabidi nennukonke bualu bumue; binuangambila bualu ebu, nennuambile bualu bua bukokeshi bundi ngenza nabu malu aa. Dibatiza dia Yone diakafuma kudi kunyi? Mu diulu, anyi kudi bantu?’ Batuilangana pamue, baluishi aba badi belangana meji ne: ‘Bituamba ne: mu diulu, yeye neatuebeje ne: Bualu kayi kanuakamuitabuja? Kadi bituamba ne: kudi bantu, tudi tutshina bantu; bualu bua bantu bonso badi bitabuja Yone ne: udi muprofete.’ Bapange tshia kuamba, badi bandamuna ne dîyi ditekete ne: “Katuena bamanye.” Ne ditukija dionso Yezu udi wandamuna se: ‘Meme kabidi tshiena nnuambila bualu bua bukokeshi bundi ngenza nabu malu aa.’​—Matayo 21:23-27.

Baluishi ba Yezu badi mpindieu bateta kumuteya bua amba bualu kampanda budibu mua kumukuatshila. Badi bakonka ne: “Bua mulambo, tulambule Kezare anyi katumulambudi?” Yezu udi wandamuna ne: “Ndejayi tshitadi tshinutu nulambula.” Udi ukonka ne: “Mpala ewu ne miaku idibo bafundepu eyi mbia nganyi?” Badi bandamuna ne: “mBia Kezare.” Bua kubapuwisha, Yezu udi wamba patoke bua bantu bonso kumvuabu ne: “Pingajilayi Kezare bidi bia Kezare, nupingajile [“Nzambi,” NW] bidi bia [“Nzambi,” NW].”​—Matewuse 22:15-22, MMM.

Mumane kupuwisha baluishi bende ne bijadiki bishindame, ne bukole buonso Yezu udi mpindieu uleja dipila diabu kumpala kua misumba ne bayidi bende. Teleja mudiye utandula baskribe ne Bafarizeyi kayi utshina. Udi wamba ne: “Kanuenji malu adibo benza; bualu bua bobo batu bamba, kadi kabatu benza.” Ne dikima dionso, udi utela mulongolongo wa milawu yabakuata, ubabikila bu balombodi bafofo ne bena lubombo. Yezu udi wamba ne: ‘Nuenu nyoka, ne bana ba nyoka, nudi bamanye mua kupanduka dipila dia mu Ngena munyi?’​—Matayo 23:1-33.

Mêyi aa a dipisha nawu mamba ne dîsu dikole kaena umvuija ne: Yezu kêna umona ngikadilu mimpe ya bakuabu. Pashishe, udi umona bantu bela mfranga mu bibutshilu bia mu ntempelo. Bidi bilenga ku muoyo bua kumona mukaji mukamba kampanda mupele welamu biende bionso bivuaye mua kudidisha nabi​—tukuta tubidi tua mushinga mukese menemene! Ne dianyisha dikole, Yezu udi uleja patoke ne: bushuwa, mmuele bivule kupita bia bonso bavua bafile mapa a bungi a bivuabu kabayi nabi bualu, ‘bia pa mutu.’ Mu luse luende luengeleki, Yezu udi wanyisha bikole tshionso tshidi muntu mukokeshe mua kuenza.​—Luka 21:1-4.

Yezu udi umbuka mpindieu mu ntempelo bua musangu wa ndekelu. Bamue ba ku bayidi bende badi bakula bua bulenga bua ntempelo, bua se: ‘mmulengeja ne mabue mimpe ne bintu bifila kudi bantu.’ Bidi bibakemesha padi Yezu wandamuna ne: ‘Matuku nealue ikalabu kabayi bashiya dibue dimue pa mutu pa dikuabu, nebaasasule buonso buawu.’ (Luka 21:5, 6) Padi bapostolo balonda Yezu pambelu pa tshimenga tshiûle ne bantu, badi badiebeja tshidiye usua kumvuija menemene.

Ee, katupa kîpi pashishe Yezu ne bapostolo bende badi basomba ne banyisha ditalala ne bupole bia Mukuna wa Olive. Bikale babandila mmuenekelu mulenga wa Yeruzaleme ne ntempelo, Petelo, Yakobo, Yone ne Andele badi bakeba diumvuija dia mêyi a Yezu aa adi akuatshisha buôwa. Badi bamba ne: “Utuambile, Ntshikondo kayi tshikala malu aa, ne ntshinyi tshikala tshimanyinu tshia dikalaku diebe ne tshia nkomenu wa ndongoluelu eu wa malu?”​—Matayo 24:3, NW; Mâko 13:3, 4.

Mu diandamuna Mulongeshi Munene udi ufila mulayi udi bushuwa wa pa buawu. Udi udianjila kumanyisha bua mvita mikole, bikumina, biyole bia nzala ne bipupu bia masama. Yezu udi kabidi udianjila kuamba ne: nebayishe lumu luimpe lua Bukalenge pa buloba bujima. Udi udimuija ne: “Tshikondo atshi nekuikale dikenga dinene ditu kadiyi dianji kuenzeka katshia ku ntuadijilu wa buloba too ne mpindieu, tòo, dia mushindu au kadiakuenzeka kabidi.”​—Matayo 24:7, 14, 21, NW; Luka 21:10, 11.

Bapostolo banayi aba badi bateleja ne ntema mudi Yezu uleja bitupa bikuabu bia ‘tshimanyinu tshia dikalaku diende.’ Udi uzangika dikengedibua dia ‘kuikala batabale.’ Bua tshinyi? Udi wamba ne: “Bualu kanuena bamanye dituku diafika Mfumu wenu.”​—Matewuse 24:42, MMM; Mâko 13:33, 35, 37.

Edi ndituku didi Yezu ne bapostolo bende kabayi mua kupua muoyo. Bushuwa, ndituku dia ndekelu dia mudimu wa Yezu wa patoke kumpala kua dimukuata, dimulumbuluisha ne dimushipa. Bu mukadi dîba dibuela, badi babanga kuenza luendu lua mutantshi muipi pa kakunakuna batangile ku Betaniya.

Dia 12 ne dia 13 Nizan

Yezu udi upitshisha dituku dia 12 Nizan mu bupole pamue ne bayidi bende. Udi ujingulula ne: bamfumu ba bitendelelu mbasue kumushipa mu mishindu yonso, ne ki mmusue bua kumupangishabu musekelelu wende wa Kupita kua Yehowa dilolo didi dilonda. (Mâko 14:1, 2) Dituku didi dilonda, dia 13 Nizan, bantu mbaditue mu dienza malongolola a ndekelu bua Kupita kua Yehowa. Ku ntuadijilu kua mapingaja, Yezu udi utuma Petelo ne Yone bua kubalongoluela Kupita kua Yehowa mu nzubu wa kuulu mu Yeruzaleme. (Mâko 14:12-16; Luka 22:8) Mutantshi mukese kumpala kua dibuela dia dîba, Yezu ne bapostolo bakuabu dikumi badi batuilangana nabu kuine aku bua musekelelu wabu wa ndekelu wa Kupita kua Yehowa.

Dia 14 Nizan, panyima pa dibuela dia dîba

Yeruzaleme mmukenkesha kudi butoke bukese pa dîba dia kajimba buenyi bualu ngondo ukadi tshitonga udi ujuka pa mutu pa Mukuna wa Olive. Mu tshibambalu tshialabale tshidi ne bintu bionso, Yezu ne bapostolo 12 mbadiadije ku mesa malongolola bimpe. Udi wamba ne: ‘Nakatamba kusua bua kudia nenu bidia ebi bia Kupita kua Yehowa, diambedi tshiyi muanji kukenga.’ (Luka 22:14, 15) Mutantshi mukese pashishe bapostolo badi bakema bua kumona Yezu ujuka ne uteka bilamba biende bia pa mutu ku luseke. Wangata dituaya (essuie-mains) ne dilongo dia mâyi, udi utuadija kubuowesha mâyi ku makasa. Ndilongesha kayipu kadiyi kupua muoyo didi ditangila mudimu mupuekele!​—Yone 13:2-15.

Kadi, Yezu mmumanye se: umue wa ku bantu aba​—Yudase Iskariote—​mmumane kulongolola bua kumupangila kudi bamfumu ba bitendelelu. Bidi biumvuika bua tshinyi Yezu udi ubungama bikole. Udi usokolola ne: “Umue wa kunudi neampangile.” Bapostolo badi babungama bikole bua bualu ebu. (Matewuse 26:21, 22, MMM) Panyima pa bamane kusekelela Kupita kua Yehowa, Yezu udi wambila Yudase ne: ‘Enza buudi wenza lukasa.’​—Yone 13:27.

Diakamue padi Yudase umbuka, Yezu udi ubanjija didia bua kuvuluka lufu luende lukadi pabuipi. Udi wangata mulungu wa diampa kadiyi diela luevene, wela tuasakidila mu disambila, uditshibula, ne wambila bapostolo 11 bua kudiabu. Udi wamba ne: “Etshi tshidi tshiumvuija mubidi wanyi udi ne bua kufidibua bua bualu buenu. Tungunukayi ne kuenza nunku bua kumvuluka.” Pashishe udi wangata dikopo dia mvinyo mukunze. Panyima pa mumane kudibenesha, udi ubapeshadi, ubambila bua kunua. Yezu udi usakidila ne: “Etshi tshidi tshiumvuija ‘mashi anyi a tshipungidi,’ adi ne bua kupueka bua ba bungi bua dibuikidila dia mpekatu.”​—Luka 22:19, 20; Matayo 26:26-28, NW.

Dilolo adi dia mushinga mukole, Yezu udi ulongesha bapostolo bende ba lulamatu malongesha mavule a mushinga, ne munkatshi muawu muvua edi dia mushinga wa dinanga dia buena-muntu. (Yone 13:34, 35) Udi ubajadikila ne: nebapete “muambuluishi,” spiritu munsantu. Neabavuluije malu onso adiye mubambile. (Yone 14:26, NW) Ku dilolo adi menemene, badi ne bua kuikala bakankamija bikole pa kumvua Yezu wenza disambila dia tshikuma bua bualu buabu. (Yone, nshapita 17) Panyima pa bamane kuimba misambu ya disamuna, badi batuluka mu tshibambalu tshia kuulu balonda Yezu pambelu mu kapepe katalale ka butuku.

Basambuka Tshibanda tshia Kidilona, Yezu ne bapostolo bende badi baya batangile ku umue wa ku miaba yabu idibu batambe kunanga, budimi bua Getesemane. (Yone 18:1, 2) Padi eku bapostolo bende bashala bindile, Yezu udi usemena kumpala kakese bua kusambila. Disumpakana diende ndikole mua kudiumvuija ne miaku padiye ulomba ne muoyo mujima bua Nzambi amuambuluishe. (Luka 22:44) Bualu budi butamba kutonda bikole mpa kuela lungenyi ku bipendu bidibu mua kuela Tatuende musuibue wa mu diulu bu Yezu mua kupangila.

Yezu mmufume ku dijikija disambila padi Yudase Iskariote ufika ne musumba wa bantu bambule miele ya nkanza, bibonge ne bimunyi. “Labi, muoyo” ke mudi Yudase wamba, umutua mishiku ne diengeleka dionso. Etshi ke tshimanyinu bua bantu aba kukuatabu Yezu. Diakamue, Petelo udi utapa ne muele wende wa nkanza ne ukosa ditshi dia mupika wa muakuidi munene. ‘Pingaja muele webe mu muaba wawu,’ ke mudi Yezu wamba padiye wondopa ditshi dia muntu au. ‘Bonso badi bangata muele nebashipibue ku muele.’​—Matayo 26:47-52.

Malu onso adi enzeka ne lukasa! Badi bakuata Yezu ne bamusuika. Bua buôwa ne dilubakana, bapostolo badi bashiya Mfumuabu ne banyema. Badi baya ne Yezu kua Ana, muakuidi munene wa kale. Pashishe badi bamufila kudi Kayifase, muakuidi munene wa mpindieu, bua kumulumbuluisha. Mu mêba a ntuadijilu a dinda, bena Sanhedrin badi bamushiminyina bua se: mmupende Nzambi. Pashishe, Kayifase udi umufila kudi Ponsio Pilato, ngovena muena Roma. Udi utuma Yezu kudi Herode Antipase, mukokeshi wa Ngalileya. Herode ne basalayi bende balami badi bapepeja Yezu. Pashishe badi bamupingaja kudi Pilato. Pilato udi ujadika mudi Yezu kayi ne bualu. Kadi bamfumu ba bitendelelu bena Yuda badi bamuenzeja bua afundile Yezu tshibawu tshia lufu. Panyima pa bipendu bivule ne mitutu, badi bapatuka ne Yezu batangile nende ku Golgota muaba udibu bamupopela pa mutshi wa tshinyongopelu kakuyi luse ne ufua lufu lua tshinyangu.​—Mâko 14:50–15:39; Luka 23:4-25.

Bivua mua kuikala njiwu mitambe bunene mu miyuki ya bantu bu lufu lua Yezu luimanyike muoyo wende bua kashidi. Diakalenga, kabiakenzeka nanku. Mu dia 16 Nizan 33 B.B., bayidi bende bakakema bua kusangana se: uvua mujudibue ku bafue. Panyima pa matuku, bantu bapite pa 500 bakajadika ne: Yezu uvua kabidi ne muoyo. Ne matuku 40 kunyima kua dibishibua diende, tshisumbu tshia bamulondi ba lulamatu tshiakamumona ubanda mu diulu.​—Bienzedi 1:9-11; 1 Kolinto 15:3-8.

Muoyo wa Yezu ne nsombelu webe

Mmunyi mudi muoyo wa Yezu ne buenzeji kuudi​—bushuwa, kutudi tuetu bonso? Eyowa, mudimu wa Yezu, lufu ne dibishibua bidi bitumbisha Yehowa Nzambi ne bidi ne mushinga mu dikumbana dia dilongolola Diende dinene. (Kolosai 1:18-20) Mbia mushinga mukole kutudi mu mushindu wa se: badi mua kutubuikidila mpekatu yetu ku diambuluisha dia mulambu wa Yezu ne nenku tudi mua kuikala ne malanda a muntu pa nkayende ne Yehowa Nzambi.​—Yone 14:6; 1 Yone 2:1, 2.

Muoyo wa Yezu udi ne buenzeji nansha kudi bafue. Dibishibua dia Yezu didi diunzulula njila bua kubapingaja ku muoyo mu buloba bua Mparadizu bulaya kudi Nzambi. (Luka 23:39-43; 1 Kolinto 15:20-22) Biwikala musue kumanya bia bungi pa malu bu aa, tudi tukubikila bua kubuela mu Tshivulukilu tshia lufu lua Kristo mu dia 11 Tshisanga 1998, ku Nzubu wa Bukalenge wa Bantemu ba Yehowa ba mu tshitupa tshiudi musombele.

[Kazubu mu dibeji 6]

“Muaba wa banyengi”

YEZU uvua ne kabingila kakumbane bua kuamba ne: bangenda bena lukuka bavua bandamune ntempelo wa Nzambi bu “muaba wa banyengi.” (Matayo 21:12, 13) Bua kufuta tshitadi tshia ntempelo, bena Yuda ne ba-prozelite ba mu matunga makuabu bavua ne bua kushintula mfranga yabu ya ku ba bende bua kupetabu ivuabu bitaba kudi bantu. Mu mukanda wende (The Life and Times of Jesus the Messiah), Alfred Edersheim udi umvuija ne: bashintuishi ba mfranga bavua ne tshibidilu tshia kubangisha mishinga yabu mu provense mivule mu dia 15 Adar, ngondo udi kumpala kua Kupita kua Yehowa. Kutuadijila mu dia 25 Adar, bavua basombela pabuipi ne ntempelo mu Yeruzaleme bua kupetela makasa pambidi pa misumba mivule ya bena Yuda ne ba-prozelite. Bangenda bavua bapeta makasa a bungi, bafutshisha makuta bua tshijanja tshionso tshia mfranga mishintula. Dibabikila dia Yezu bu banyengi didi difila lungenyi lua se: makuta abu mafutshisha avua mapite bungi mu mushindu wa se: bavua bushuwa banyenga bapele mfranga.

Bamue kabavua mua kulua ne nyama yabu ya dilambula. Muntu yonso uvua ulua nende uvua ne bua kumutetesha kudi mukonkononyi mu ntempelo​—pa kufuta makuta. Batshina njiwu ya kumona babenga nyama panyima pa bamane kumbuka nende mutantshi mule, bantu bavule bavua basumba mu ntempelo nyama “muanyisha” bilondeshile bena Lewi ku bianza bia bangenda banyanguke. Mushikuluji kampanda udi wamba ne: “Misangu mivule bavua batapilaku bapele babidime ku mushinga.”

Kudi tshijadiki tshia se: muakuidi munene wa kale Ana ne dîku diende bavua ne bipatshila bibi bua kupeta lupetu kudi bangenda ba mu ntempelo. Mikanda ya ba-Rabbi idi yakula bua “Kasalu ka mu [ntempelo] ka bana ba Ana.” Mfranga ivua ifumina kudi bashintuishi ba mfranga ne ku disumbisha dia nyama mu mbanza ya ntempelo ivua tshimue tshia ku bintu biabu binene bibueji bia lupetu. Mushikuluji kampanda udi wamba ne: mudimu tshienzedi tshia Yezu tshia kuipata bangenda “tshivua tshitangija ki ng’anu ku bunême bua bakuidi kadi ku mpaya yabu.” Nansha bikala bua kabingila kayi, bushuwa baluishi bende bavua basua bua kumushipa!​—Luka 19:45-48.

[Tablo mu dibeji 4]

Matuku a ndekelu a muoyo wa bumuntu wa Yezu

Nizan 33 B.B.

7 Ditanu

Mianda: Yezu ne bayidi bende badi benza luendu bumbuka ku Yeriko batangile ku Yeruzaleme (Nizan 7 udi upetangana ne Dia lumingu dia 5 Tshisanga 1998, nansha muvua matuku a bena Ebelu abanga ku dilolo dimue too ne ku dikuabu)

Muntu mutambe bunenea: 101, tshik. 1

8 Ditanu ku dilolo

Mianda: Yezu ne bayidi bende badi bafika ku Betaniya; Nsabatu udi utuadija

Muntu mutambe bunene: 101, bik. 2-4

Disambombo

Mianda: Nsabatu (Dimue dia 6 Tshisanga 1998)

Muntu mutambe bunene: 101, tshik. 4

9 Disambombo ku dilolo

Mianda: Didia ne Simone muena nsudi; Mariya udi wela Yezu manyi a nard; bantu bavule badi bafumina ku Yeruzaleme bua kumona ne kuteleja Yezu

Muntu mutambe bunene: 101, bik. 5-9

Dia lumingu

Mianda: Dibuela dia ditshimuna mu Yeruzaleme; udi ulongesha mu ntempelo

Muntu mutambe bunene: 102

10 Dimue

Mianda: Luendu lua patshiatshia mutangile ku Yeruzaleme; udi ukezula ntempelo; Yehowa udi wakuila mu diulu

Muntu mutambe bunene: 103, 104

11 Dibidi

Mianda: Mu Yeruzaleme, udi ulongesha mu ntempelo pa kutumika ne mifuanu; upisha Bafarizeyi; ubambisha dipa dia mukaji mukamba; ufila tshimanyinu tshia dikalaku diende ditshivua dilua dikalalu

Muntu mutambe bunene: 105 too ne 112, tshik. 1

12 Disatu

Mianda: Udi upitshisha dituku dipole ne bayidi mu Betaniya; Yudase udi ulongolola dimupangila

Muntu mutambe bunene: 112, bik. 2-4

13 Dinayi

Mianda: Petelo ne Yone badi balongolola Kupita kua Yehowa mu Yeruzaleme; Yezu ne bapostolo bakuabu dikumi badi balondamu kushòò mu mapingaja (Disambombo dia 11 Tshisanga 1998)

Muntu mutambe bunene: 112, tshik. 5 too 113, tshik. 1

14 Dinayi ku dilolo

Mianda: Musekelelu wa Kupita kua Yehowa; Yezu udi wowesha bapostolo mâyi ku makasa; Yudase udi upatuka bua kupangila Yezu; Kristo udi ubanjija Tshivulukilu tshia lufu luende (Panyima pa dibuela dia dîba, Disambombo dia 11 Tshisanga 1998)

Muntu mutambe bunene: 113, tshik. 2 too ne 117

Panyima pa mundankulu

Mianda: Dipangila ne dikuatshibua mu budimi bua Getesemane; bapostolo badi banyema; dilumbuluisha kumpala kua bakuidi bamfumu ne Sanhedrin; Petelo udi uvila Yezu

Muntu mutambe bunene: 118 too ne 120

Ditanu ku dipatuka dia dîba too ne ku dibuela dia dîba

Mianda: Kumpala kua Sanhedrin; pashishe kudi Herode, udi upingana pashishe kudi Pilato; badi bamufundila tshibawu tshia lufu; bamujika

Muntu mutambe bunene: 121 too ne 127 tshik. 7

15 Disambombo

Mianda: Nsabatu; Pilato udi witaba bua basalayi kulamabu lukita lua Yezu

Muntu mutambe bunene: 127, bik. 8-10

16 Dia lumingu

Mianda: Yezu udi ubiishibua

Muntu mutambe bunene: 128

[Mêyi adi kuinshi]