Newikalemu anyi?
1 Ntemu kampanda ukadi muenze bidimu bia bungi mu bulelela wakamba ne: “Wewe mupumbishe anu dituku dia kumpala dia mpungilu, udi mujimije malu a bungi be!” Bua tshinyi wakamba nunku? Bualu dituku dia kumpala ke ntuadijilu mene wa biakudia bimpe bia mu nyuma bidi bulongolodi bua Yehowa butulongoluele. (Yesh. 25:6) Dikala dietu muaba eu dituku dia ntuadijilu ntshijadiki tshia se: tudi tuitaba mêyi a muimbi wa misambu a ne: ‘Mvua ne disanka pakangambilabu ne: Tuye mu nzubu wa Yehowa.’—Mis. 122:1.
2 Tshidimu tshishale, mu Mpungilu ya Distrike ya “Dîyi dia mulayi dia Nzambi,” bantu bavuamu mu Ditanu bavua bashadile ku ba mu Disambombo ne mu Dia lumingu. Muanda eu udi uleja ne: bana betu ba bungi bakapangila bimue bitupa bia mpungilu bivua ne malu a mushinga adi atangila dîyi dia mulayi. Bakapangila kabidi mua kudisangisha dituku adi ne bena Kristo nabu bananga.
3 Mudimu webe kaukupumbishishi: Buôwa bua kujimija mudimu ke butu buenzeje bamue bua kubenga kubuela mu mpungilu mu Ditanu. Kadi, Bantemu ba bungi mbalue kumona se: bamfumu babu ba mudimu bavua babumvuila bua kuangatabu matuku a diikisha bikalabu badianjile kualomba kumpala kua dîba. Dipangadika dikole divua nadi muanetu wa bakaji kampanda uvua mpanda-njila (dia kubuela mu bisangilu bionso bia tshisumbu ne mu mpuilu) diakenza mfumuende wa mudimu disanka ne kumusakabi bua kubuela ne kushala pende mu mpungilu eu dituku dijima!
4 Kudianjidi kuela meji ne: mfumuebe wa mudimu kakukuitabila ne kufiki ku nkomenu wa se: kakuena bualu nansha biwapumbisha dituku dimue bua kubuela mu mpungilu. Kuelakanyi bua kudilongolola bua kuleja mfumuebe wa mudimu ne meji onso mvese ya mu Bible idi ileja bua tshinyi dibuela mu mpungilu mbualu bua mushinga mu ntendelelu webe. (Eb. 10:24, 25) Pashishe shala mueyemene Yehowa, mushindike se: anu bu mudiye mulaye, neakupeshe bintu bikuabu biudi nabi dijinga biwateka malu a mu nyuma pa muaba wa kumpala mu nsombelu webe.—Mat. 6:33; Eb. 13:5, 6.
5 Kuanyisha “tshidi tshipite bulenga” ke bualu bunene budi bukengela. (Filem. 1:10, 11, Mukanda wa Mvidi Mukulu; Mis. 27:4) Nenku nebitusake bua kudiakaja bua kupetela dikuatshisha dia bungi ku tshintu tshia mushinga etshi tshidi Yehowa mutulongoluele. Tuadija kudilongolola anu mpindieu, ne ikala ne dipangadika bua wewe kuikalamu matuku onso asatu!